Hechos 9 - Nuevo Testamento Uwotjüja

Sauro ü'ärowächinü̧ wȩnȩ

¹ Ja̧'wa̧nü̧ 'kuäopa'anä̧mä̧ Sauro-mä̧ Jesucrito-rü esetätürü rü̧ȩnä̧ üjü'kü juiyünä̧ jä̧ku̧. Sacerdote-tü̧ ttu̧ru̧wa̧rü̧ ichi'ü,

² wȩyu̧kuojä iyü wearü pä'ü jä'epinü̧, Damasco ütawiyänä̧ sinagogas odewiyättü Jesucrito-rü esetätürümä̧, u̧mä̧tü̧rü̧'i̧nä̧, nä̧tü̧rü̧'i̧nä̧ Jerusarȩ́-nä̧ kärenä̧ ütä'cha pä'ü, ü̧ka̧ka̧tä̧ja̧ pä'ü.

³ Ja̧'wa̧nü̧ jä̧ja̧'a̧, Damasco ütawiyä ütü'küwächi'omȩnä̧, u̧ni̧chä̧ra̧'a̧nä̧ jä̧ttä̧pä̧ya̧rü̧ mo̧ro̧jä̧ra̧'a̧ttü̧ tȩya̧u̧ kkȩdȩ'a̧'a̧ttü̧;

⁴ rȩjȩku̧ ma̧ä̧cha̧'a̧, ya̧tȩ i̧wȩnȩ rȩmi̧pa̧'a̧, ä̧ju̧kui̧nü̧: Sauro, Sauro ¿tta̧'a̧nü̧ pä'ü suronä̧ jȩ'kua̧ pä'ü kusäkusättü̧? [

⁵ päku ädätinä̧ku̧: ¿Chu̧ru̧wa̧, ukumä̧ dí kua'ajä̧ttü̧? jäepomȩnä̧ päinä̧ku̧: «ttümä̧ Jesú-sä, ttürü ja̧'a̧ uku suronä̧ jȩ'kua̧ pä'ü kusa'amä̧. Kua̧mü̧nä̧ pa̧ja̧tü̧ suronä̧ jȩpä̧kuä̧u̧jä̧, päkäyä aboja'aku̧nä̧ i̧sa̧rinä̧ kuättomȩnä̧, jarodü yabokutä teächäkuäwa'a jä̧'i̧nü̧'a̧nü̧.

⁶ Päku ye'i'ü tti̧'ä̧u̧ kkä̧nü̧ pä'inü̧:] Chu̧ru̧wa̧, ¿däjé jȩchi̧ya̧ku̧ päkua'ajä̧ttü̧? jäepäku, Tu̧ru̧wa̧mä̧ päinä̧ku̧: Ä̧rä̧mi̧'ü̧ täi Damasco ütawiyämä̧ dokuächi'a, jua'attü jiäkuäwäkua'a jȩ'kuä̧kuȩmä̧.

⁷ Ja̧'wa̧nü̧ ja̧'a̧ Sauro-ku 'chä̧jä̧tü̧mä̧ rü̧ȩnä̧ ye'inä̧tü̧, ya̧tȩ'i̧nä̧ toa'anä̧ i̧wȩnȩtä̧ rä̧mi̧pi̧yä̧u̧.

⁸ Ja̧'wa̧nü̧ jä̧jí̧ o'ka'a Sauro-mä̧ rȩjȩttü̧ ä̧rä̧mi̧'ü̧, i'äre yeädomȩnä̧, toü juiyünä̧ ji̧nä̧ku̧. Ja̧'wa̧nü̧ ji̧yä̧u̧ u̧mü̧ttü̧tä̧ ȩpü̧ Damasco ütawiyära̧'a̧ tti'kächinä̧ku̧.

⁹ Ja̧'wa̧nü̧ ja̧'a̧ juȩnȩmä̧ wäbodäkuä mo̧ro̧ jo̧mȩnä̧, topü'i̧nä̧ tooka'a, u̧kuȩ'i̧nä̧ ukuoka'a, au'i̧nä̧ awoka'a kki̧nü̧.

¹⁰ Ja̧'wa̧nü̧ ja̧'a̧ Damasco ütawiyänä̧ ya̧tȩ kki̧nü̧, Jesucrito-rü esetü, Ananía pä'ü mi̧kua̧, jua̧u̧ru̧ Tu̧ru̧wa̧mä̧ 'kuo̧ti̧nä̧ jä̧'i̧nü̧'a̧nü̧ i̧jȩku̧ päinä̧ku̧: —«¡Ananía!» woäku, ädätinä̧ku̧: —«Pȩnȩtä̧ kkü̧sä̧, Chu̧ru̧wa̧,» ädätäku,

¹¹ Tu̧ru̧wa̧mä̧ päinä̧ku̧: «ä̧rä̧mi̧'ü̧ täi, Ttu̧wo̧jua̧'a̧ku̧nä̧ pä'ü mikuämä̧nä̧, jua'attü Juda ojusodenä̧ do'ächi'ü kusajä̧, ya̧tȩ Taso ttü̧ja̧sa̧, Sauro pä'ü mi̧kua̧rü̧; Jua̧u̧mä̧ Dio-rü ukuoku.

¹² Ja̧'wa̧nü̧ ja̧'a̧, jua̧u̧mä̧, 'kuo̧ti̧nä̧ jä̧'i̧nü̧'a̧nü̧ topäji Ananía pä'ü mi̧kua̧, doächi'ü u̧mü̧nä̧ churutä mȩa̧'a̧, i'äre pä'äjita'anü̧ toa pä'ümä̧.»

¹³ Pä'ü weäku Ananía-mä̧ pä'inü̧: Chu̧ru̧wa̧, päkuäku ütü'kümä̧ rü̧ȩnä̧ ä̧ju̧kuä̧'i̧jü̧sä̧ ja̧'wa̧ta̧nü̧ Jerusarȩ́-ttü̧ uku kuȩmi̧nä̧u̧ru̧ suronä̧ jȩa̧'a̧'i̧nä̧ ä̧ju̧kuä̧'i̧jü̧sä̧;

¹⁴ ja̧'wa̧ta̧nü̧ porü'i̧nä̧, sacerdote-tü̧ tturuwotü wettäjäku, ukuru esetätürü 'chu'chäu, kärenä̧ ttütatü pä'ü ȩpi̧ya̧tü̧ pä'ü.

¹⁵ Ja̧'wa̧nü̧ pä'anä̧, Tu̧ru̧wa̧mä̧ päinä̧ku̧: Täkü täi, jua̧u̧mä̧ ttü chȩmä̧jä̧ku̧ ttü chi̧mi̧ ȩpa̧ pä'ü, judío pokotürü'i̧nä̧, ruwotürü'i̧nä̧ ja̧'wa̧ta̧nü̧ Irae ttü̧ja̧rü̧'i̧nä̧, jü̧nä̧.

¹⁶ Isopäi'ünä̧ Ttü jua̧u̧ru̧ chi̧jȩpä̧kua̧sä̧, ttü chi̧mi̧nä̧ usurä ttȩmä̧wa̧ pä'ü rü̧ȩnä̧ rekuä rü̧jü̧ wȩnȩ.

¹⁷ Ja̧'wa̧nü̧ weäjäku, Ananía-mä̧, isodenä̧ do'ächi'ü, jua̧u̧ru̧ u̧mü̧ mȩ'ü̧ pä'inü̧: —Cha̧wa̧ru̧wa̧ chi̧jä̧wa̧ Sauro, uku mä̧nä̧nä̧ kuichomȩnä̧ i̧jȩkuä̧ji̧, Tu̧ru̧wa̧ Jesú weäjäkusä kui'äre pä'äjita'anü̧ to'kua pä'ü'i̧nä̧ ja̧'wa̧ta̧nü̧ Epíritu Sa̧tu̧rü̧ jo̧mȩnü̧ päkui'a pä'ü'i̧nä̧, jü̧nä̧.

¹⁸ Päüta'anü̧, yotäku Sauro i'ärettümä̧ po̧i̧sa̧ i̧jȩ o̧bi̧ 'kua̧rü̧ ma̧i̧'a̧'a̧ttü̧, pä'äjita'anü̧ topinü̧. Jua̧u̧nü̧ o'ka'a bautizo jȩtti̧nä̧ku̧.

¹⁹ Ja̧'wa̧nü̧ jä̧ji̧ o'ka'a u̧kuȩ kui'ipü ujuru ȩmi̧nü̧. Juȩnȩ Damasco-nä̧mä̧, a̧'u̧ku̧nä̧tä̧ mo̧ro̧ kki̧nü̧ Jesucrito-rü esetätukumä̧.

Sauro Damasco-ttü ji'äwinü̧ wȩnȩ

²⁰ Ja̧'wa̧nü̧ jä̧ji̧ o'ka'a, yotäku sinagogas odewiyänä̧ Jesucrito ütü'kü ji'äwinü̧, jua̧u̧tä̧ ja̧'a̧ Dio i̧tti̧mä̧ pä'ü.

²¹ Ja̧'wa̧nü̧ jiäwiyä̧u̧, to̧o̧ to̧pä̧rü̧ kkä̧nü̧ pä'inä̧tü̧: —¿Chujuatä jo̧ka̧'a̧ Jerusarȩ́-ttü̧, Jesú-ru esetätürü suronä̧ jȩpü̧ ya̧'a̧wä̧'i̧jü̧mä̧? ¿Ja̧'wa̧ta̧nü̧ jua̧u̧tä̧ jo̧ka̧'a̧, sacerdote tturuwotü weäwänä̧, kärenä̧ ttüta pä'ü 'chu'chäu ichäjimä̧?

²² Ja̧'wa̧nü̧ ja̧'a̧nä̧ Sauro-mä̧, yabonü̧ ujuruku, Jesucrito-mä̧ Dio wȩ'ä̧wa̧ pä'ü jiäwomȩnä̧, Damasco-nä̧ kka̧kuä̧tü̧ judío-mä̧ jua'a yabokutä, isotä ja̧'a̧ pä'ü ttieruwächi'ünä̧ ji̧nä̧u̧.

Sauro-mä̧ Judío-rü dajäwächü tü'ipächinü̧

²³ Täkü rekuo mo̧ro̧ 'kuäo'äji o'ka'a, judío-mä̧ Sauro-rü kuä'ü ttikua pä'ü jo̧mȩnü̧ amükuädü kku̧ni̧nä̧tü̧;

²⁴ ja̧'wa̧nü̧ jȩtta̧'a̧nä̧ Sauro-mä̧ wo̧jui̧'i̧nü̧. Ja̧'wa̧nü̧ ja̧'a̧ttü̧, mo̧ro̧'i̧nä̧, yodo'i̧nä̧ ütawiyä äpatenä̧ tta̧ttä̧ri̧nä̧ku̧ kuä'ü ttikuarü pä'ü.

²⁵ Ja̧'wa̧nü̧ ji̧yä̧u̧ Jesú-ru esetätümä̧, püttäwo'tanä̧ ȩnü̧, ütawiyä sobükuächünä̧ ttoekuäbänä̧ mȩyȩdü̧ juittädinä̧ku̧, yodó.

Sauro Jerusarȩ́-ra̧'a̧ i̧'chi̧nü̧ wȩnȩ

²⁶ Ja̧'wa̧nü̧ jä̧ja̧'a̧ Sauro-mä̧, Jerusarȩ́-nä̧ 'chä̧wi̧'ü̧ Jesucrito-rü esetätüku ka̧ka̧kui̧'ü̧ ü̧'ä̧mä̧da̧ päja'amä̧; o'katoi'ünä̧ yettekuinä̧ku̧, Jesucrito-rümä̧ esetokü 'kua̧ra̧'a̧ pä'ü.

²⁷ Ja̧'wa̧nü̧ ji̧yä̧ku̧, Bernawé-mä̧ apótore ttü̧ja̧'a̧ku̧ o'ipächü i̧jȩpü̧, ji'äwinü̧: Sauro-mä̧ mä̧nä̧ttü̧ Tu̧ru̧wa̧rü̧ topäji pä'ü ja̧'wa̧ta̧nü̧ Damasco-ttü ujuruku Jesucrito ütü'kü jiäwäja'a'i̧nä̧ jiäwiyinä̧u̧.

²⁸ Ja̧'wa̧nü̧ jȩä̧ji̧ o'ka'amä̧, Sauro-mä̧ juätütäku Jerusarȩ́-nä̧, kkä̧nü̧ kue'ächinü̧. Tu̧ru̧wa̧ ütü'kü ujuruku ji'äu.

²⁹ Ja̧'wa̧ta̧nü̧ judío ja̧'a̧nä̧ Grecia ttü̧ja̧ tti̧wȩnȩ ukuokuätuku rü̧ȩnä̧ ujuruku ukuokui Tu̧ru̧wa̧ Jesucrito ütü'kü. Ja̧'wa̧nü̧ ja̧'a̧nä̧ juätümä̧ kuä'ü ttikua pä'ü jȩpü̧ kku̧ni̧nä̧tü̧;

³⁰ Ja̧'wa̧nü̧ ttukuokua'a wo̧jui̧'ü̧, Jesucrito-rü esetätümä̧, Sauro-rü Cesarea-ra̧'a̧ ȩmi̧päjä'kotü, jua'a yabo Taso ütawiyära̧'a̧ we'ü ttikuinä̧ku̧.

³¹ Ja̧'wa̧nü̧ jo̧mȩnä̧, Judea rȩjȩttü̧'i̧nä̧, Galirea rȩjȩttü̧'i̧nä̧ ja̧'wa̧ta̧nü̧ Samaria rȩjȩttü̧'i̧nä̧ o'katoi'ünä̧ igresia wotümä̧ rü̧ȩnä̧ eseäkuäwä kku̧nä̧ri̧nä̧tü̧; Dio-rü ukuotäkuäwänä̧ ttä̧rä̧ma̧'a̧ttü̧, Epíritu Sa̧tu̧ ppädäkuäwänä̧ yaboku rü̧'ä̧chi̧nä̧tü̧.

Peduru-mä̧, Enea-rü̧ aditü ikuinü̧

³² Peduru-mä̧ Jesucrito-rü esetätü o'katoi'ünä̧rü̧ do'ächü 'chä̧ji̧'ka̧ ja̧'wa̧ta̧nü̧ Lida ütäwiyättü esetätürü'i̧nä̧ do'ächü 'chi̧nü̧.

³³ Ja̧'wa̧nü̧ ja̧'a̧, juorü po̧kui̧pi̧nü̧ Enea-rü̧, kko̧ro̧mü̧ttü̧nü̧ wäbodäkuä año jo̧mȩnä̧ parárisi na̧'ä̧chä̧'i̧jü̧ ja̧'a̧, cama-nä̧tä̧ ü̧'a̧'a̧.

³⁴ Jua̧u̧ru̧ Peduru-mä̧ pä'inü̧: —Enea, Jesucrito aditü ikuäkujä̧; ä̧rä̧mi̧'ü̧ kuiäre camatä̧ aditi. Päomȩnä̧ Enea-mä̧ yotäku ä̧rä̧mi̧'i̧nü̧.

³⁵ Ja̧'wa̧nü̧ jo̧mȩnä̧ Lida ttü̧ja̧'i̧nä̧, Sarón rȩjȩ ttü̧ja̧'i̧nä̧ o'katoi'ünä̧ jua̧u̧ru̧ topätümä̧ Jesucrito-rü esetü ikuinä̧tü̧.

Peduru-mä̧, Dorca-rü tto'ädinü̧

³⁶ Ji̧yȩnü̧ pä̧nä̧ Jope ütawiyänä̧ kki̧nä̧ju̧, Jesucrito-rü esetäju Tabitá pä'ü mi̧kuaju, Grecia ttü̧ja̧ tti̧wȩnȩnä̧mä̧ Dorca pä'ü mikuinä̧ju̧. Juäju rü̧ȩnä̧ ppä'ädinä̧ju̧, rü̧ȩnä̧ rekuä rü̧jä̧u̧ru̧.

³⁷ Ja̧'wa̧nü̧ jä̧'i̧ja̧'a̧, Dorca-mä̧ na̧'ä̧chi̧pü̧ 'koru pä'i'inä̧ju̧. Ja̧'wa̧nü̧ jä̧ja̧'a̧, kkidepä o'komä̧ tükü iku, doächäkuäwo̧ka̧nä̧ ttütinä̧kua̧.

³⁸ Jope ütawiyämä̧, Peduru ü̧jo̧mȩ Lida ütawiyättümä̧ tü'kü wa̧'a̧ ja̧'a̧; Jesucrito-rü esetätümä̧, juȩnȩ kkü̧do pätta'a ä̧ju̧kuä̧jo'kotümä̧: «ujurunä̧ ichi'ido pä'ü,» ta̧ju̧ru̧ jittäwo'äjarü pä'ü we'opo'ü ikuinä̧tü̧.

³⁹ Ja̧'wa̧nü̧ jittäwo'ächäku, Peduru-mä̧ 'chä̧ji̧'ka̧ ttü̧tä̧ro̧ka̧nä̧ doächi'omȩnä̧; rü̧ȩnä̧ rȩkua̧mü̧mä̧, Dorca ji̧nä̧ kka̧'kua̧rä̧i̧ kkiyä'chinü̧, pü̧jä̧ti̧yu̧ i̧jȩpä̧rü̧ ajuäkuäwinä̧tü̧.

⁴⁰ Ja̧'wa̧nü̧ ja̧'a̧, Peduru-mä̧ o'katoi'ünä̧rü̧ rättopächünä̧ we'ü ikuäji̧'ka̧, iwe'kiyunä̧ kkä̧mä̧dü̧, Dio-rü ukuoku pä'inü̧: —«¡Tabitá, ä̧rä̧mi̧'i̧!», päomȩnä̧, kki'äre ye'ädü Peduru-rü tojomȩnä̧, pä'äji ta̧'a̧nü̧ adiu pä'i'inä̧ju̧.

⁴¹ Ja̧'wa̧nü̧ ja̧'a̧ kku̧mü̧ttü̧ 'chu'ädü äräbe'äji̧'ka̧; Crito-rü esetätürü'i̧nä̧, rȩkua̧mü̧rü̧'i̧nä̧ wopo'ü a̧'kua̧räju̧ru̧tä̧ iyinä̧u̧.

⁴² Pi̧yȩ wȩnȩmä̧, Jope ütawiyänä̧ kkakuä̧tü̧mä̧ o'katoi'ünä̧ ä̧ju̧ku̧, Jesucrito-rü esetinä̧tü̧.

⁴³ Peduru-mä̧, rekuonä̧nü̧ kki̧'i̧'o̧po̧'i̧nü̧ juȩnȩmä̧, isotü tti̧jȩti̧yu̧ adikuä i̧sa̧ pättä'ijäku Simón ojusodenä̧mä̧.