Hechos 8 - Nuevo Testamento Uwotjüja

¹ Sauro'i̧nä̧, Esteba̧-rü̧ kuä'ü ttikua'a ppä'ädinü̧. Jua̧u̧nu̧tä̧ mo̧ro̧ kkä̧mä̧di̧na̧'a̧, Jesucrito-rü esetätü Jerusarȩ́-nä̧ kka̧kuä̧tü̧rü̧ ra̧wä̧rü̧ ya'äu ttiku wȩnȩmä̧. Ja̧'wa̧nü̧ ya̧ttä̧wä̧u̧ o'katoi'ünä̧ dü'ekuinä̧tü̧ Judea rȩjȩra̧'a̧ku̧'i̧nä̧, Samaria rȩjȩra̧'a̧ku̧'i̧nä̧, jü̧nä̧; suro apótore-tä ttü̧ja̧kui̧'a̧nä̧.

Sauro, igresia-rü suronä̧ jȩi̧nü̧ wȩnȩ

² Yotüte Dio-rü esetätü, Esteba̧-rü̧ ȩmi̧pü̧ wa'are rejunä̧ rütinä̧tü̧ ja̧'wa̧nü̧ jȩpü̧ ajuäkuäwinä̧tü̧.

³ Ja̧'wa̧nü̧ jȩpü̧ Sauro-mä̧, Jesucrito-rü esetätürü usurä ttȩmä̧u̧nä̧ jȩpi̧nü̧, u̧mä̧tü̧rü̧'i̧nä̧, nä̧tü̧rü̧'i̧nä̧ dodottünä̧ jȩpü̧, kärenä̧ rütä'chinü jȩpi̧nü̧.

Jareü wȩnȩ Samaria-nä̧ ji'äwinä̧tü̧

⁴ Ja̧'wa̧nü̧ jä̧u̧ Jerusarȩ́-ttü̧ dü'ekuätümä̧, tti̧'cho̧mȩ pünä̧mä̧ o'kajuiyünä̧tä̧ jareü wȩnȩ ji'äwinä̧tü̧.

⁵ Ja̧'wa̧ta̧nü̧ Felipe'i̧nä̧, Samaria ütawiyära̧'a̧ku̧ mȩyȩwä̧chü̧ 'chä̧ji̧'ka̧, Jesucrito ütü'kü ji'äwinü̧.

⁶ Ja̧'wa̧nü̧ ja̧'a̧ Felipe jiäwa'a, rekuätü ka̧ka̧ku̧ ä̧ju̧kui̧nä̧tü̧ ja̧'wa̧ta̧nü̧ jȩtto̧kü̧ ja̧jü̧ juei'i̧nä̧ jȩa̧'a̧ topinä̧tü̧.

⁷ Rekuätü epíritu-tu̧ suropätürü kku̧nä̧rä̧tü̧'i̧nä̧ adiu pȩji̧pi̧nä̧tü̧; juätü ttü̧ja̧ttü̧ rä'ekuächümä̧ wopinä̧tü̧; ja̧'wa̧ta̧nü̧ rekuätü parárisi mä̧richei na̧nȩpä̧tü̧'i̧nä̧, tti̧'chü̧ juiyünä̧ wotü'i̧nä̧ adiwächinä̧tü̧.

⁸ Ja̧'wa̧nü̧ jo̧mȩnä̧, juȩnȩ ütawiyä ttü̧ja̧mä̧ rü̧ȩnä̧ eseäkuäwinä̧tü̧.

⁹ Ja̧'wa̧nü̧ ja̧'a̧nä̧, juȩnȩ Samaria-nä̧ kki̧nü̧, ya̧tȩ Simón pä'ü mi̧kua̧, ukuo i̧sa̧ 'kua̧rü̧nä̧ magia-nä̧ jȩpä̧'chü̧ juȩnȩ ttü̧ja̧rü̧ yaparetä'chä'ijü.

¹⁰ Ja̧'wa̧nü̧ ja̧'a̧, jua̧u̧ru̧mä̧ o'katoi'ünä̧ ppo̧'ä̧tü̧ttü̧ kkä̧mä̧da̧'a̧mä̧, tä̧mü̧'i̧nä̧ ä̧ju̧kuä̧rü̧ ukuokuinä̧tü̧: «Pi̧yȩtä̧ ja̧'a̧ Dio ujurumä̧,» pä'ü.

¹¹ Ja̧'wa̧nü̧ pä'ü, rü̧ȩnä̧ ttesetä'ijäku ji̧na̧'a̧, rekuo mo̧ro̧ magia jȩä̧'cha̧'a̧.

¹² Ja̧'wa̧nü̧ ja̧'a̧nä̧, Felipe jareünä̧ Ru̧wa̧ Dio weü wȩnȩ'i̧nä̧, Jesucrito i̧mi̧nä̧'i̧nä̧ jiäwomȩnä̧ bautizo jȩpä̧kuä̧wi̧nä̧tü̧ u̧mä̧tü̧'i̧nä̧, nä̧tü̧'i̧nä̧, jü̧nä̧.

¹³ Ja̧'wa̧nü̧ ja̧'a̧, Simón'i̧nä̧ esetü iku bautizo jȩpä̧kuä̧wä̧ji̧'ka̧, Felipe-ku kue'ächü, to̧o̧ to̧pä̧ri̧nü̧, jȩtto̧kü̧ juei rü̧ȩnä̧ jȩi̧yä̧ku̧.

¹⁴ Ja̧'wa̧nü̧ ja̧'a̧, apótore-mä̧ Jerusarȩ́-nä̧ ttü̧ja̧kua̧'a̧ ja̧'a̧, Samaria ttü̧ja̧'i̧nä̧ Dio i̧wȩnȩ esetäjätüdo pätta'a ä̧ju̧ku̧, Peduru-rü'i̧nä̧, Ju̧a̧-rü̧'i̧nä̧ jua'a we'inä̧tü̧;

¹⁵ Ja̧'wa̧nü̧ ja̧'a̧ jua'a rȩbȩwi̧pü̧mä̧, Dio-rü esetätürü, Dio-rü ukuokuinä̧tü̧, juätürü'i̧nä̧ Epíritu Sa̧tu̧ ü̧jä̧mä̧da̧ pä'ü.

¹⁶ Jua'amä̧ ya̧tȩrü̧'i̧nä̧, ji̧nä̧ Epíritu Sa̧tu̧mä̧ ü̧jä̧mä̧do̧ka̧'a̧ ji̧na̧'a̧; suro Jesú i̧mi̧nä̧tä̧ bautizo jȩttä̧kuä̧wä̧ji̧yä̧u̧ jȩpi̧nä̧tü̧.

¹⁷ Ja̧'wa̧nü̧ ja̧'a̧ Peduru'i̧nä̧, Ju̧a̧'i̧nä̧ ttu̧mü̧nä̧ mȩ'ü̧ ttukuokuomȩnä̧, Epíritu Sa̧tu̧ ü̧jä̧mä̧dinä̧u̧.

¹⁸ Ja̧'wa̧nü̧, apótore-mä̧ ttu̧mü̧ mȩ'ü̧ ttukuokuomȩnä̧, Epíritu Sa̧tu̧ ü̧jä̧mä̧da̧'a̧ topü, Simón-mä̧ pärätä iya pä'ü ukuokunü̧,

¹⁹ päinä̧u̧: Ttürü'i̧nä̧ jua̧u̧ ujuru iyätukuittü, ttü'i̧nä̧ mȩ'ü̧ chukuokuäkurumä̧, ja̧'wa̧ta̧nü̧ Epíritu Sa̧tu̧ ü̧jä̧mä̧dä̧kua̧'a̧nü̧.

²⁰ Päiyäku Peduru-mä̧ ädätinä̧ku̧: —¡Ukú kuiäre pärätämä̧ ukutäku to̧ȩ'ä̧chä̧kuȩ, Dio mippoünä̧ iyümä̧ pärätä mitü ȩmä̧wä̧kü̧ pä'ü kuamükuädüta'anü̧!

²¹ Ukumä̧ pi̧yȩ jäwämä̧ kuȩmü̧ juiyü'anü̧ wa̧jä̧, Dio ä'ka jo̧mȩttü̧ adiu jueünä̧ kuamü̧kuädoka'attü̧.

²² Jua̧u̧ surojü kä'ädi'ü, Dio-rü ajuäkuäwi, suronä̧ kuamükuädäji jȩpü̧ ikuajaku pä'ümä̧.

²³ Ttü tochomȩnä̧ kua̧'kua̧ surojütä ȩkä̧ku̧jä̧, ja̧'wa̧ta̧nü̧ surojütä 'chu'ädü rütinä̧ku̧jä̧.

²⁴ Päku Simón-mä̧ ädätinä̧u̧: —Tu̧ru̧wa̧ Dio-rü ukuokuätukuittü, ukutu päkuätuku ttürü suronä̧ 'kuäopü juiyäkua'anü̧.

²⁵ Ja̧'wa̧nü̧ ja̧'a̧ juätümä̧, Dio i̧wȩnȩ'i̧nä̧, tottinü̧'i̧nä̧ ji'äwäjä'kotü, Jerusarȩ́-ra̧'a̧ku̧ ppa̧'ä̧chä̧chi̧nä̧tü̧ ja̧'wa̧ta̧nü̧ Samaria ttü̧ja̧ ttü̧ja̧kuo̧mȩ pünä̧ ji'äwinä̧tü̧.

Felipe, Etiopía ttü̧ja̧sa̧rü̧ ji'äwinü̧

²⁶ Ya̧tȩ á̧gȩ Dio i̧sa̧, Felipe-rü pä'inü̧: Ä̧rä̧mi̧'ü̧ kkä̧wa̧ ü'oweku ja̧'a̧ku̧nä̧ku̧ täi, Jerusarȩ́-ttü̧mä̧ Gaza ütawiyä mä̧nä̧ku̧nä̧, rȩbi̧yu̧ dȩ'a̧ra̧'a̧ kkä'konä̧ 'kuäopä̧'ijä̧mä̧nä̧.

²⁷ Ja̧'wa̧nü̧ ja̧'a̧ Felipe-mä̧ ä̧rä̧mä̧chü̧ 'chi̧nü̧; i̧'chä̧ja̧'a̧, ya̧tȩ Etiopía i̧sa̧ eunuco, juȩnȩ ruwaju reina kkiäre pärätä tta̧wä̧rä̧kuä̧wä̧ i̧sa̧rü̧, po̧kui̧pi̧nü̧. Jerusarȩ́-ttü̧ Dio-rü ukuoku ichäji̧'ka̧,

²⁸ iäre carukänä̧, profeta Isaía i̧wȩyu̧tinä̧'tä u̧kuo̧kuä̧ya̧ ppa̧wä̧cha̧'a̧.

²⁹ Ja̧'wa̧nü̧ ja̧'a̧ Epíritumä̧ Felipe-rü pä'inü̧: «Jikäja karukä tü'küku pä'i'i.»

³⁰ Päku, Felipe-mä̧ tü'küku päi'omȩnä̧, profeta Isaía kuyäru'tä ukuokua'a ä̧ju̧ku̧, päinä̧ku̧: —Ja̧'wa̧nü̧ kukuokua'amä̧, ¿Wo̧jui̧'ü̧jä̧?

³¹ Päku pä'inü̧: —¿Toku chu̧wo̧jui̧pa̧, ya̧tȩ'i̧nä̧ ji'äu toa'anä̧mä̧? Pä'ü kä'ädü Felipe-rü 'cha'ächi'ü ippeyänä̧ ü̧'ä̧mä̧da̧ pä'ü we'inü̧.

³² Wȩyu̧kuo̧mȩ ukuokuinomȩmä̧ pa̧'a̧nü̧ päina̧'a̧: Oweja-rü kuä'ü ikuäwomȩku̧, kuä'ü ttikua pä'ü ttȩpa̧'a̧ 'kua̧rü̧nä̧ ttȩpi̧nä̧ku̧; Oweja i̧tti̧rü̧ uwo'che 'kuitta'anä̧, ttä'kattü 'korunä̧ ü̧ja̧'a̧ jä̧'i̧nü̧'a̧nü̧, ämä̧ yä'epokü pinü̧.

³³ Iyäkuäwina̧'a̧mä̧, adiwomȩnä̧mä̧ jȩtto̧ko̧ku̧ pinü̧; ja̧'wa̧nü̧ ja̧'a̧nä̧ ¿Ditäjä̧ttü̧ jua̧u̧ awaruwä rekuätürü ü̧'a̧tü̧'a̧nü̧ wa̧mä̧? isopäi'ünä̧ pi̧jä̧ttü̧mä̧ wa'ü ikunä̧ jȩtti̧nä̧ku̧.

³⁴ Etiopía i̧sa̧mä̧ Felipe-rü jä'epü ä̧ju̧kui̧nü̧: —Pi̧yȩ tü'kü ji'äwittü, ¿profeta-mä̧ chutä ütü'kü päina̧'a̧ tä̧jí̧ ja̧'wa̧nü̧ jü̧ juiyüttü'i̧nä̧ kka̧ra̧ ütü'kü päina̧'a̧ tä̧jí̧?

³⁵ Ja̧'wa̧nü̧ ja̧'a̧ Felipe-mä̧, juȩnȩ wȩyu̧kua̧'a̧ ukuokuäjämȩttü̧tä̧ kkä̧mä̧dü̧, Jesú jäwä jareünä̧ wȩnȩ jiäwinä̧ku̧.

³⁶ Jua̧u̧nü̧ o'ka'a, aje kko̧mȩ 'kuäto'omȩnä̧, Etiopía i̧sa̧mä̧ pä'inü̧; —Pȩnȩtä̧ akua'a ajiyamä̧; ¿däjetä tto̧ȩpä̧ra̧'a̧jä̧ttü̧, bautizo jȩchä̧kuä̧wa̧ pä'ümä̧? [

³⁷ Felipe-mä̧ ädätinä̧ku̧: —Jesucrito-rü adiu kuesetüttümä̧, bautizo jȩchä̧ku̧jä̧. Etiopía i̧sa̧mä̧ pä'inü̧: —Jesucrito-mä̧ isopäi'ünä̧ Dio I̧tti̧ ja̧'a̧ pä'ü esetüsä.]

³⁸ Pä'ü, karukä ttiwirodünä we'opo'äja'a; ta̧ju̧kuäyotü ajiyara̧'a̧ tti̧mȩyȩwi̧'ä̧ja̧'a̧, Felipe-mä̧ Etiopía i̧sa̧rü̧ bautizo jȩpi̧nü̧.

³⁹ Jua̧u̧ o'ka'a, ajettü ttu̧wä̧mi̧'i̧'o̧mȩnä̧, Epíritumä̧ Felipe-rü ȩmi̧pi̧nü̧ ja̧'wa̧nü̧ ja̧'a̧ttü̧ tookoku pinü̧, ja̧'wa̧nü̧ ja̧'a̧nä̧ Etiopía i̧sa̧mä̧ rü̧ȩnä̧ esewä̧ya̧ i̧wi̧nü̧.

⁴⁰ Ja̧'wa̧nü̧ jä̧ja̧'a̧mä̧, Felipe-mä̧ Azoto pä'ü miku ütawiyänä̧ 'kuä'opü, jareü wȩnȩ ji'äwinü̧ ütawiyä pünä̧ Cesarea-bü kä'ädü.