Hechos 6 - Nuevo Testamento Uwotjüja

Kko̧ro̧mü̧ttü̧nü̧ ta̧ju̧ diákunu̧tu̧rü̧ ȩmi̧nä̧tü̧

¹ Ji̧yȩnü̧ pä̧nä̧ Jesucrito-rü esetätü ttirekuächomȩnä̧, judío ja̧'a̧nä̧ Grecia ttü̧ja̧ tti̧wȩnȩ ukuokuätuku, ja̧'wa̧ta̧nü̧ judío ja̧'a̧nä̧ arameo ukuokuätürü, wopäkuäwinä̧tü̧ rȩkua̧mü̧rü̧ adiu ttu̧kuȩ iyokotü pä'ü.

² Ja̧'wa̧nü̧ ji̧yä̧u̧, ttü̧jä̧pü̧ttü̧ ta̧ju̧nü̧ wotü apótore-mä̧ Jesucrito-rü esetätü o'katoi'ünä̧rü̧ wopäjä'kotü pä'inä̧tü̧: —Ujutu Dio i̧wȩnȩ jitäwä'ija'a kä'ädi'ü ttu̧kuȩtä̧ iyä'chü taditüttümä̧ adiwoka'a.

³ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, ukututtütä usätukui, ttü̧jä̧pü̧ttü̧ ta̧ju̧nü̧ wotürü, ukututä ku̧wo̧juä̧tu̧kuä̧u̧ru̧, adiu wo̧juȩku̧nä̧ amükuädätürü, Epíritu Sa̧tu̧ jäwä jo̧mȩnü̧ wotürü, pi̧yȩ ttadita we'ü tu̧ju̧na̧tü̧.

⁴ Ujutumä̧ Dio-rü yabonü̧ ukuokuätüjä̧ ja̧'wa̧ta̧nü̧ Dio i̧wȩnȩ ji'äwätüjä̧.

⁵ Ja̧'wa̧nü̧ pättomȩnä̧ o'katoi'ünä̧ tteseunä̧ ji̧na̧'a̧; ja̧'wa̧nü̧ ja̧'a̧ Esteba̧-rü̧ ȩmi̧nä̧tü̧, Dio-rü a̧'kua̧ wȩnä̧rü̧rü̧ ja̧'wa̧ta̧nü̧ Epíritu Sa̧tu̧ jäwä jo̧mȩnü̧ wa̧rü̧, Felipe-rü'i̧nä̧, Prócoro-rü'i̧nä̧, Nicano-rü'inä̧, Timón-rü'i̧nä̧, Pármena-rü'i̧nä̧, Nicorá Antioquía-ra̧'a̧ttü̧ ichinü̧rü̧'i̧nä̧, jü̧nä̧.

⁶ Ja̧'wa̧nü̧ ttȩmä̧jä̧u̧ru̧mä̧, apótore ttü̧ja̧kua̧'a̧ku̧ ttȩpä̧ja̧'a̧ ttu̧mü̧ mȩ'ü̧ Dio-rü ttukuokuinä̧u̧.

⁷ Ja̧'wa̧nü̧ ja̧'a̧mä̧, yabokutä Dio i̧wȩnȩmä̧ rü̧ä̧chi̧na̧'a̧, Jerusarȩ́-nä̧mä̧ Jesucrito-rü esetätümä̧ rekuächinä̧tü̧; ja̧'wa̧ta̧nü̧ rekuätü sacerdote'i̧nä̧ esetächinä̧tü̧, jua̧u̧ tta̧'kua̧ wȩnä̧rä̧kuä̧wä̧mä̧.

Esteba̧-rü̧ 'chuttädinü̧ wȩnȩ

⁸ Ja̧'wa̧nü̧ ja̧'a̧ Esteba̧-mä̧, Dio ujuru'i̧nä̧, Dio jäwä'i̧nä̧ jo̧mȩnü̧ kkä̧ku̧, ttü̧ja̧ jȩtto̧kü̧ jue'i jȩpi̧nü̧.

⁹ Ja̧'wa̧nü̧ ja̧'a̧ libertos ttü̧ka̧ka̧kuode sinagoga-ttü, Cirene ttü̧ja̧'i̧nä̧, Alejandría ttü̧ja̧'i̧nä̧, Ciricia ttü̧ja̧'i̧nä̧ ja̧'wa̧ta̧nü̧ Asia rȩjȩ ttü̧ja̧'i̧nä̧ Esteba̧-ku̧ pä'ä'winätü̧;

¹⁰ Ja̧'wa̧nü̧ ja̧'a̧nä̧, pättü juiyünä̧ ji̧nä̧u̧, wo̧juȩku̧nä̧ ukuokuomȩttü̧ ja̧'wa̧ta̧nü̧ Epíritu Sa̧tu̧ u̧wo̧juetä̧ra̧'a̧nä̧ ukuokuomȩttü̧.

¹¹ Ja̧'wa̧nü̧ weyekumä̧, kkorotürü mitinä̧tü̧, Moisé-rü'i̧nä̧, Dio-rü'i̧nä̧ suronä̧ pä'a tä̧ju̧kuä̧jä̧ku̧, pättiyatü pä'ü.

¹² Ja̧'wa̧nü̧ jȩpü̧ ttü̧ja̧rü̧'i̧nä̧, judío-ttü a̧ci̧a̧nu̧ wotü'i̧nä̧, weäwä wȩnȩ wo̧juȩkuä̧ isottürü'i̧nä̧ ttü̧ra̧wä̧ri̧pü̧nä̧ jȩpi̧nä̧tü̧; ja̧'wa̧nü̧ jo̧mȩnä̧ Esteba̧-rü̧ 'chu'ädü ruwotü ukuo isotü ttä'ka jo̧mȩ ȩpü̧ kku̧ni̧nä̧tü̧.

¹³ Ja̧'wa̧nü̧ jȩpü̧ yapareu jittäwa pä'ü ttu̧ju̧nä̧jä̧u̧mä̧ pä'inä̧tü̧: —Pide ttü̧ja̧sa̧mä̧ pode Dio-rü ukuokuäkuäwode tü'kü'i̧nä̧, weäwä wȩnȩ tü'kü'i̧nä̧ to'ija̧'a̧ku̧ suronä̧tä̧ ukuoku,

¹⁴ pä'inä̧tü̧; pa̧'a̧nü̧ pä'a tä̧ju̧kuä̧jä̧ku̧: Jua̧u̧, Jesú nazare i̧sa̧mä̧, pode Dio-rü ukuokuäkuäwode'i̧nä̧ si'epü iku, weäwä wȩnȩ Moisé weinü̧'i̧nä̧ pärotü ikuäkua̧ pä'inü̧, pä'inä̧tü̧.

¹⁵ Ja̧'wa̧nü̧ pä̧tti̧yä̧u̧, juȩnȩ ruwonä̧ pȩjä̧tü̧mä̧, Esteba̧ ü'änä̧ tottomȩnä̧, á̧gȩ ü'ä 'kua̧rü̧nä̧ tottinä̧ku̧.