Hechos 5 - Nuevo Testamento Uwotjüja

Ananía'i̧nä̧, Safira'i̧nä̧ jȩtti̧nü̧ wȩnȩ

¹ Ja̧'wa̧ta̧nü̧, ya̧tȩ Ananía pä'ü mi̧kua̧ irekua Safira-ku i'ätta iyü ikuinü̧.

² Ja̧'wa̧nü̧ ja̧'a̧ pidemä̧ irekuaku ukuokuäkuäu, jua̧u̧ mikuä ju'tomä̧ jitütä ȩmü̧, kkoro ju'totä apótore-rü iyinä̧tü̧.

³ Ja̧'wa̧nü̧ jȩttä̧ji̧yä̧ku̧ Peduru-mä̧ päinä̧ku̧: —Ananía, ¿tta̧'a̧nü̧ pä'ü Satanás-mä̧ (äwettämä̧) wea'anä̧ kuiyäwäja'ajä̧ttü̧, kui̧rȩjä̧ mikuä ttimitäji ju'to ukutä ȩmi̧pü̧, Epíritu Sa̧tu̧rü̧ kuyaparewa pä'ümä̧?

⁴ ¿Tta̧'a̧nü̧ pä'ü ukutä kui̧rȩjä̧ ja̧'a̧nä̧? ¿iyü kuikuäji o'ka'a'i̧nä̧ ukutä kuiäre pärätä ja̧'a̧nä̧? ¿ja̧'wa̧nü̧mä̧ jȩ'kuä̧jä̧ttü̧? Ttü̧ja̧rü̧mä̧ yaparewokü päjijä̧, Dio-rü yaparewäjijä̧.

⁵ Pi̧yȩ pä'a ä̧ju̧ku̧, Ananía-mä̧ 'koru pä'i'ü ma̧'i̧nü̧. Ja̧'wa̧nü̧ päi'omȩnä̧ o'katoi'ünä̧ pi̧yȩ ä̧ju̧ku̧ rü̧ȩnä̧ ye'inä̧tü̧.

⁶ Ja̧'wa̧nü̧ 'koru pä'i'äjirümä̧ mü̧ä̧yotü ichi'ü juä'opü ȩmi̧pü̧ 'turu iku tti̧wi̧nä̧ku̧.

⁷ Ja̧'wa̧nü̧ jä̧ji̧ o'ka'a, irekua o'kajumä̧ wäbodäkuä hora päi'omȩnä̧ do'ächi'inä̧ju̧ 'kuäopäjimä̧ jerupü.

⁸ Ja̧'wa̧nü̧ ja̧'a̧, Peduru-mä̧ jä'epü ä̧ju̧kui̧nä̧kua̧: —Ji'äwittü, ¿Juȩnȩnä̧ jo̧mȩnä̧tä̧ mikuä pä'ü iyü ikuäjätüjä̧? Juajumä̧ ädätinä̧ju̧: —A̧, juȩnȩtä̧ pä'ü iyü ikuäjätüjä̧.

⁹ Peduru-mä̧ päinä̧kua̧: —¿Tta̧'a̧nü̧ pä'ü ukutumä̧ kka̧kuä̧mȩ'ü̧ tokuä'chäjätukuättü̧ Tu̧ru̧wa̧ i̧sa̧ Epíritu-rumä̧? Topi, kuirekuorü 'turu i̧wä̧jä̧tü̧mä̧ juȩnȩtä̧ ichätü, jitämä̧ ukuru'i̧nä̧ ttȩmi̧pä̧kuo̧tü̧.

¹⁰ Ja̧'wa̧nü̧ päüta'anü̧, yotäku Safira-mä̧ 'koru pä'i'ü Peduru ü̧jä̧pü̧ jo̧mȩ ma̧'i̧nä̧ju̧. Ja̧'wa̧nü̧ ja̧'a̧ müäyotümä̧ do'ächi'ü 'koru juo'ächäjurutä topü, rättepächinä̧kua̧ kkirekuo pinü̧ ippeyänä̧ 'turu 'chä̧nü̧.

¹¹ Ja̧'wa̧nü̧ päi'äja'amä̧ o'katoi'ünä̧ Jesucrito-rü esetätümä̧ ja̧'wa̧ta̧nü̧ kkorotü pi̧yȩ 'kuäopäji ä̧ju̧ku̧mä̧, rü̧ȩnä̧ ye'inä̧tü̧.

Ttü̧ja̧ jȩtto̧kü̧ juei jȩpi̧nä̧tü̧

¹² Apótore-mä̧ rü̧ȩnä̧ ttü̧ja̧ jȩtto̧kü̧ ja̧jü̧ juei jȩpi̧nä̧tü̧ ttü̧ja̧ ttü̧ja̧kuo̧mȩttü̧; o'katoi'ünä̧ Saromón aditino̧mȩ äpatenä̧ ka̧ka̧kui̧nä̧tü̧.

¹³ Ja̧'wa̧nü̧ ja̧'a̧ kkorotümä̧ ya̧tȩ'i̧nä̧ juätuku ppättächi'amä̧ pä'okotü pinä̧tü̧; ja̧'wa̧nü̧ jo̧mȩnä̧ ttü̧ja̧mä̧ rü̧ȩnä̧ ttukuotinä̧u̧.

¹⁴ Ja̧'wa̧nü̧ jo̧mȩnä̧ Jesucrito-rü esetätümä̧ yaboku rekuächinä̧tü̧, u̧mä̧tü̧'i̧nä̧, nä̧tü̧'i̧nä̧, jü̧nä̧.

¹⁵ Na̧nȩpä̧tü̧rü̧mä̧ u̧mi̧ mä̧nä̧ku̧ rä'epü rütinä̧tü̧, cama-nä̧'i̧nä̧, ttü̧'ä̧biyänä̧'i̧nä̧ ttü̧'ȩja̧'a̧, Peduru 'kuäopomȩnä̧ a̧'kua̧juä̧nä̧'tä̧'i̧nä̧ ttumä̧richeittü ttü̧'ȩji̧'a̧ pä'ü.

¹⁶ Ja̧'wa̧ta̧nü̧ Jerusarȩ́ ppeyä ütawiyänä̧ kka̧kuä̧tü̧'i̧nä̧ ichinä̧tü̧ na̧nȩpä̧tü̧rü̧'i̧nä̧, epíritu suropätü ttü̧ja̧kuä̧u̧ru̧'i̧nä̧ i'kächü; o'katoi'ünä̧tä̧ na̧nȩpä̧tü̧rü̧mä̧ aditü tti̧kui̧nä̧u̧.

Apótore-rü suronä̧ jȩtti̧nü̧ wȩnȩ

¹⁷ Ja̧'wa̧nü̧ ja̧'a̧, sacerdote ttu̧ru̧wa̧mä̧ ja̧'wa̧ta̧nü̧ saduceo wotü'i̧nä̧ juȩnȩ kka̧kuä̧tü̧mä̧ kkü'kü jui'ü ra̧wä̧ri̧nä̧tü̧.

¹⁸ Ja̧'wa̧nü̧ ja̧'a̧ apótore-rü 'chu'ädü kärenä̧ rütinä̧tü̧.

¹⁹ Ja̧'wa̧nü̧ ja̧'a̧nä̧, ya̧tȩ á̧gȩ Dio wȩ'ä̧wa̧ kärenä̧ rütäwode äpate, yodó ba'epü rä'epü iku päinä̧u̧:

²⁰ «Tätukui, Dio-rü ukuokuäkuäwodettü ä̧rä̧mi̧'ü̧ pi̧yȩ kkä̧kuä̧wä̧ wȩnȩ ttü̧ja̧rü̧ jikuäwätukua.»

²¹ Pi̧yȩ ä̧ju̧kuä̧jä̧'kotü ji̧nä̧ yo̧ä̧i̧ ja̧'a̧ku̧ Dio-rü ukuokuäkuäwodenä̧ dodepü kka̧kuä̧mü̧ wo̧juȩti̧nä̧tü̧. Ja̧'wa̧nü̧ ja̧'a̧nä̧, sacerdote-tü̧ ttu̧ru̧wa̧mä̧, kkorotüku ichi'ü, Iraettü ukuo isotüku ka̧ka̧ku̧ pȩjä̧mü̧ we'inä̧tü̧ apótore-rü kärenä̧ ttü̧'ȩja̧'a̧ttü̧ ttȩmä̧ji̧ya̧tü̧ pä'ü.

²² Ja̧'wa̧nü̧ wȩttä̧u̧ su̧ro̧do̧u̧mä̧ juätürü kärenära̧'a̧ttü̧ ȩmo̧po̧'ü̧ tti̧'chä̧ja̧'a̧, tottomȩnä̧ yorisotä toinä̧u̧. Ja̧'wa̧nü̧ ji̧yä̧u̧ ppa̧'ä̧chä̧chä̧jä̧'kotü ji'äu,

²³ pä'inä̧tü̧: —Kärenä̧ jakuämä̧ jo̧mȩnü̧ ppe'tädäkuäwa'anä̧, su̧ro̧do̧u̧'i̧nä̧ äpatemä̧ tta̧ttä̧ra̧'a̧nä̧; ba'epü totomȩnä̧ ya̧tȩ'i̧nä̧ yoriso toäja'a.

²⁴ Pätta'a ä̧ju̧ku̧ Dio-rü ukuokuäkuäwode tta̧'a̧rä̧tü̧ ttu̧ru̧wa̧'i̧nä̧, sacerdote-tü̧ tturuwotü'i̧nä̧, jua̧u̧nu̧mä̧ toku jä̧ja̧'a̧ jä̧ttü̧, pä'ü amükuädinä̧tü̧.

²⁵ Ja̧'wa̧nü̧ ja̧'a̧, ya̧tȩ ichi'opo'ü jiäwinä̧u̧: —Ukutu kärenä̧ kutäjätukuä̧u̧mä̧, Dio-rü ukuokuäkuäwodettü ttü̧ja̧rü̧ wo̧juȩtü̧ kka̧kuä̧jä̧tü̧.

²⁶ Ja̧'wa̧nü̧ ja̧'a̧ Dio-rü ukuokuäkuäwode tta̧'a̧rä̧tü̧ ttu̧ru̧wa̧mä̧ umüwäyotüku 'chä̧wi̧'ü̧ kuäkuäoka'atä ȩmo̧po̧'ü̧ i̧wi̧nä̧u̧, ttü̧ja̧ inä̧wiyänä̧ ikuäu ttikuätü pä'ü yekua'attü̧.

²⁷ Ja̧'wa̧nü̧ i'kächipü, ruwotü ttä'ka jo̧mȩ ȩpü̧ ttu̧ju̧nä̧u̧ru̧, sacerdote-tü̧ ttu̧ru̧wa̧mä̧ päinä̧u̧:

²⁸ —Ujutu, Jua̧u̧ ütü'kümä̧ yoriso ku̧wo̧juȩtä̧tu̧kuä̧ pätäja'amä̧. Jitämä̧ Jerusarȩ́ ütawiyä o'kajuiyünä̧ wo̧juȩtü̧ ikuäjätüjä̧, Jua̧u̧ 'koru juoächinü̧'i̧nä̧ ujuturutä wȩnȩtü̧.

²⁹ Pä̧ttä̧u̧ Peduru'i̧nä̧, apótore'i̧nä̧ ttädätinä̧u̧: —Dio-rü tukuota pä'ü rekuä rü̧ja̧'a̧, pi̧jä̧ ttü̧ja̧rü̧ tukuotäkua'a ä'kanä̧mä̧.

³⁰ Tü̧tä̧mü̧ mi̧nä̧ ttü̧ä̧nä̧wa̧ Dio-mä̧, Jesú-ru wa'arettü tto'ädinü̧, ukutu daunä̧ ü̧jü̧nä̧ kuä'ü kuikuinä̧tu̧kuä̧ku̧rü̧mä̧.

³¹ Jua̧u̧ru̧mä̧ Dio-mä̧ u̧wo̧jua̧'a̧ku̧nä̧ rütäu, ru̧wa̧ päi'ünä̧ jȩpü̧ ra̧wä̧pi̧jü̧ttü̧ ttü̧ji̧pü̧nä̧ ppädäkuäwä i̧sa̧ päi'ünä̧ jȩi̧nä̧ku̧, Irae ttü̧ja̧rü̧ suronä̧ jȩttü̧ttü̧ kättädi'a pä'ü ja̧'wa̧ta̧nü̧ suronä̧ jȩttä̧'i̧jü̧ jȩpü̧ ikuatü pä'ü.

³² Pi̧yȩ topinä̧tü̧mä̧ ujututäjä̧ ja̧'wa̧ta̧nü̧ Dio, churutä ukuotätürü iyinä̧ku̧ Epíritu Sa̧tu̧'i̧nä̧ wo̧jua̧.

³³ Ja̧'wa̧nü̧ pätta'a ä̧ju̧ku̧, tta̧mi̧ su̧rä̧chi̧'ä̧u̧, kuä'ü ttikua pättinä̧u̧.

³⁴ Ja̧'wa̧nü̧ ja̧'a̧nä̧, juätü ruwotüku kki̧nü̧ ya̧tȩ Fariseo wa̧, Gamalie pä'ü mi̧kua̧, weäwä wȩnȩ wo̧juȩkuä̧ i̧sa̧, ttü̧ja̧ rü̧ȩnä̧ ttukuotäku. Jua̧u̧mä̧ ä̧rä̧mi̧'ü̧, apótore-rü jurunä̧tä̧ rättepo'a pä'ü we'inü̧.

³⁵ Ja̧'wa̧nü̧ jȩpo̧'ü̧ pä'inü̧: —Irae ttü̧ja̧, ttu̧'ȩpä̧rü̧nü̧ adiwomȩnä̧ amükuädätukui pitü ttü̧ja̧rü̧ jȩ'kuä̧tu̧kuä̧kuȩmä̧.

³⁶ Ja̧'wa̧ta̧nü̧ amükuädätukui, ya̧tȩ Teudas pä'ü mi̧kua̧ rä'opinü̧, ukuo i̧sa̧sä̧ pä'ü ja̧'wa̧nü̧ jȩo̧mȩnä̧ cuatrocientos-nü̧ rekuätü eseku jua̧u̧ku̧ 'chi̧nä̧tü̧. Ja̧'wa̧nü̧ ja̧'a̧nä̧, kuä'ü ttikuinä̧ku̧. Ja̧'wa̧nü̧ päi'omȩnä̧ jua̧u̧ru̧ esetäjätümä̧, ttipperekuächomȩnä̧, be'ipächinä̧tü̧.

³⁷ Jua̧u̧nü̧ o'ka'a, censo jȩttü̧ mo̧ro̧, Galirea i̧sa̧, Juda rä'opinü̧, jua̧u̧ru̧'i̧nä̧ ttü̧ja̧ yotukunä̧ esekuinä̧tü̧; ja̧'wa̧nü̧ ja̧'a̧, jua̧u̧ru̧'i̧nä̧ kuä'ü ikuinä̧tü̧, kuä'ü ttikuomȩnä̧ umüwäyotümä̧ pperekuächinä̧tü̧.

³⁸ Ja̧'wa̧nü̧ ja̧'a̧ ukuturu pä'üsä: Pitürümä̧ ja̧'a̧tä̧ topätukui, mȩkuo̧pä̧rä̧tukuä̧tü̧; isopäi'ünä̧ pi̧yȩ ttü̧ja̧ jäwä jü̧ttü̧mä̧ 'kuäopächä̧kuȩ;

³⁹ Ja̧'wa̧nü̧ ja̧'a̧nä̧, Dio jäwä jü̧ttü̧mä̧ jȩpü̧mä̧ ikuokotüjä̧; Dio-ku rowäwätüjä̧ 'kua̧ra̧'a̧. Päomȩnä̧ ttesetinä̧ku̧.

⁴⁰ Ja̧'wa̧nü̧ jua̧u̧ku̧ esekuäjä'kotü; apótore-rü wopo'ü, kuäkuättünä̧ we'äjä'kotü, Jesú i̧mi̧nä̧ ttukuoku juiyünä̧tä̧ ye'epe'ipü, rä'epü tti̧kui̧nä̧u̧.

⁴¹ Ja̧'wa̧nü̧ ja̧'a̧ juätü ruwotüttü rä'opächü, apótore-mä̧ eseäkuäwinä̧tü̧ Jesú i̧mi̧nä̧ usurä ȩmä̧jä̧'kotü.

⁴² Ja̧'wa̧nü̧ ja̧'a̧mä̧, mo̧ro̧ ji̧nü̧'a̧kuä̧, Dio-rü ukuokuäwodenä'i̧nä̧, ttü̧ja̧ ttoju odewiyänä̧'i̧nä̧ wo̧juȩtü̧ kkä̧nü̧, ji'äwinä̧tü̧ Jesú jäwämä̧.