Hechos 4 - Nuevo Testamento Uwotjüja

Peduru-ku, Ju̧a̧-ku̧ ruwotü ttä'kattü ukuokuinä̧tü̧

¹ Ja̧'wa̧nü̧ Peduru-mä̧, Ju̧a̧-ku̧ ttü̧ja̧rü̧ ukuoku ttü̧ja̧kua̧'a̧ 'kä̧tȩnä̧, ichi'inä̧tü̧ sacerdote-tü̧mä̧, Dio-rü ukuokuäkuäwode su̧ro̧do̧u̧ tturuwotüku, saduceo wotüku, jü̧nä̧.

² Rü̧ȩnä̧ tta̧mi̧surinä̧u̧, Jesú wa'arettü ttoächäja'a ttü̧ja̧rü̧ jittäwiyä̧u̧.

³ Ja̧'wa̧nü̧ ja̧'a̧, 'chu'ädü, kärenä̧ ttütinä̧u̧, ni̧pä̧ro̧mȩ ji̧yä̧u̧, kkoro mo̧ro̧tä̧ tottatü pä'ü.

⁴ Ja̧'wa̧nü̧ ja̧'a̧nä̧, jittäwa'a ä̧ju̧kuä̧jä̧tü̧mä̧, rekuätü esetinä̧tü̧; suro u̧mä̧tü̧tä̧mä̧ cinco mil jo̧mȩnä̧ ji̧na̧'a̧.

⁵ Ja̧'wa̧nü̧ ja̧'a̧ kkoro mo̧ro̧ ka̧ka̧kui̧nä̧tü̧ Jerusarȩ́-nä̧, Judío tturuwotü'i̧nä̧, judío-ttü a̧ci̧a̧nu̧ wotü'i̧nä̧, weäwä wȩnȩ wo̧juȩkuä̧ isotü'i̧nä̧,

⁶ ja̧'wa̧ta̧nü̧ sacerdote ttu̧ru̧wa̧ Aná'i̧nä̧, Caifái̧nä̧ ja̧'wa̧ta̧nü̧ Ju̧a̧'i̧nä̧, Alejandro'i̧nä̧ ja̧'wa̧ta̧nü̧ sacerdote-tü̧ ttawaruwämä̧ o'katoi'ünä̧ jo̧mȩnä̧;

⁷ ja̧'wa̧nü̧ ttü̧'ȩjo̧mȩ kkä'ko päte'ü, Peduru-rü'i̧nä̧, Ju̧a̧-rü̧'i̧nä̧ kku̧nä̧jä̧'kotü jä̧ttȩpä̧ri̧nä̧u̧: —¿Ukutumä̧, dí weäwänä̧ ja̧'wa̧ta̧nü̧ dí i̧mi̧nä̧ jȩ'kuä̧tu̧kua̧'a̧jä̧ttü̧ pi̧yȩmä̧?

⁸ Pättiyäku, Peduru-mä̧ Epíritu jäwä jo̧mȩnü̧ kkä̧ku̧ ädätinä̧u̧: —Ukutu ttü̧ja̧ tturuwotürü ja̧'wa̧ta̧nü̧ Iraettü ukuo isotürü pä'üsä:

⁹ Isopäi'ünä̧, jitä pi̧yȩ mo̧ro̧, ya̧tȩ umäricheittü ü̧'i̧pä̧jä̧mȩnä̧, toku ü̧'i̧pä̧ja̧ ja̧ pä'ü, ujuturu jä'epü ä̧ju̧kuä̧tü̧jä̧.

¹⁰ Pi̧yȩmä̧ o'katoi'ünä̧ kuä̧ju̧kuä̧tu̧kua̧ pä'ü ja̧'a̧ ukuturumä̧ ja̧'wa̧ta̧nü̧ Irae ttü̧ja̧'i̧nä̧, pide kuä'katuku jo̧mȩnü̧ adiwächäji̧'ka̧ ü̧ja̧'a̧mä̧, ukutu ü̧jo̧kä̧ jäinä̧ kuä'ü kuikuinä̧tu̧kuä̧ku̧, wa'arettü Dio ttoädinä̧ku̧ Jesucrito i̧mi̧nä̧ adiwächäji.

¹¹ Pide Jesú-mä̧, ukutu isode adikuä isotü, ido'ki surojo'ki pä'ü kuju'kätukuoko'ki ji̧no̧'ki ja̧'a̧nä̧, ji̧nä̧so yo'kitä kkada'ka iso'ki päi'ünä̧ pärowächino'ki ja̧'a̧.

¹² Ya̧tȩtä̧ Jesú-tä ja̧'a̧ surojüttü kki̧'ä̧kuä̧wä̧ ujuru kku̧nä̧rü̧mä̧; pi̧jä̧ra̧'a̧ mo̧ro̧jä̧ra̧'a̧ttü̧ weinä̧ku̧ kka̧ra̧mä̧ toa'a; Jua̧u̧tä̧tä̧ ja̧'a̧ i̧mi̧nä̧ ra̧wä̧pi̧jü̧ttü̧ ttü̧ja̧ kki̧'ä̧kuä̧wa̧mä̧.

¹³ Ja̧'wa̧nü̧ ja̧'a̧, Peduru'i̧nä̧, Ju̧a̧'i̧nä̧ kuyärumä̧ ttu̧wo̧jui̧'o̧ka̧'a̧ ji̧na̧'a̧nä̧, wo̧juȩku̧nä̧ yeäwä juiyünä̧ ttu̧kuo̧kui̧yä̧u̧, to̧o̧ to̧pä̧rü̧ kkä̧nü̧ isopäi'ünä̧ pitümä̧ Jesú-ku kue'ächinä̧tü̧ ja̧'a̧ pä'ü ttu̧wo̧jui̧nä̧u̧.

¹⁴ Ja̧'wa̧ta̧nü̧ umäricheittü pi̧'ä̧ji̧'i̧nä̧ juȩnȩtä̧, juätütäku ü̧ja̧'a̧ topü, to'ija̧'a̧ku̧mä̧ pättü juiyünä̧ ji̧nä̧u̧.

¹⁵ Ja̧'wa̧nü̧ ja̧'a̧, juätürü u̧mi̧ku̧ rätto'ünä̧ we'opo'ü iku, jitütä ukuokuäkuäwinä̧tü̧:

¹⁶ —¿Däjé jȩta̧'a̧jä̧ttü̧ pitürümä̧? Isopäi'ünä̧ Jerusarȩ́ ttü̧ja̧mä̧ o'katoi'ünä̧ ä̧ju̧kuä̧jä̧tü̧, pitü jȩtto̧kü̧ juei jȩttä̧ja̧'a̧mä̧, jua̧u̧ to'ija̧'a̧ku̧ päta pä'ümä̧ juiya'a.

¹⁷ Ja̧'wa̧nü̧ ja̧'a̧ttü̧, pi̧yȩ jua'a yabonü̧ yoäwi'ü juiyäkua'anü̧, porü yabokumä̧ ya̧tȩrü̧'i̧nä̧ Jesú iminämä̧ ttukuoku juiyünä̧tä̧ ye'epe'ünü̧ wetatü.

¹⁸ Ja̧'wa̧nü̧ ja̧'a̧ttü̧ wopo'ü, ya'utekutä Jesú i̧mi̧nä̧mä̧ ukuoku'i̧nä̧, wo̧juȩtü̧'i̧nä̧ jȩttü̧ juiyünä̧tä̧ pä'ü ttu̧ju̧ni̧nä̧u̧.

¹⁹ Ja̧'wa̧nü̧ pä̧ttä̧u̧ Peduru-mä̧, Ju̧a̧-ku̧ ttädätinä̧u̧: —Ukututä amükuädü topätukui, Dio ä'ka jo̧mȩttü̧mä̧, ¿ä̧kuo̧mȩnä̧mä̧ ukuturu tukuota pä'ü adiwa'a tä̧jí̧, Dio-ttü'i̧nä̧ abonä̧nü̧?

²⁰ Isopäi'ünä̧ ujutu totinü̧mä̧ ja̧'wa̧ta̧nü̧ tä̧ju̧kui̧nü̧mä̧ tä̧ppü̧ti̧'a̧ pä'ümä̧ juiya'a.

²¹ Ja̧'wa̧nü̧ pä̧tti̧yä̧u̧ ye'epe'ipütä rä'epü tti̧kui̧nä̧u̧. Ro̧'ȩpü̧ suronä̧ jȩtta̧tü̧ pättäja'anä̧ suronä̧ jȩttä̧ji̧ jui̧yi̧yä̧u̧ ja̧'wa̧ta̧nü̧ ttü̧ja̧rü̧'i̧nä̧ ye'eku. Ttü̧ja̧mä̧ Dio-rü rü̧ȩnä̧ o'katoi'ünä̧ esewinä̧tü̧ ja̧'wa̧nü̧ 'kuäopäjämȩnä̧.

²² Jua̧u̧ umäricheittü pi̧'ä̧ji̧mä̧, cuarenta años yabonä̧nü̧ kku̧nä̧ri̧nü̧.

Jesucrito-rü esetätümä̧ Dio-rü ukuokuinä̧tü̧

²³ Ja̧'wa̧nü̧ ja̧'a̧ jua'attü rä'epü tti̧kuä̧jä̧u̧mä̧ jitütäku esetä'ijätü ttü̧ja̧kua̧'a̧ku̧ ichi'opo'ü ji'äwinä̧tü̧ sacerdote tturuwotü pättäji'i̧nä̧, ukuo isotü pättäji'i̧nä̧, jü̧nä̧.

²⁴ Ja̧'wa̧nü̧ ja̧'a̧ jua̧u̧ ä̧ju̧kuo̧po̧'ü̧mä̧ o'katoi'ünä̧ yo̧mȩtȩnä̧ Dio-rü ukuokuinä̧tü̧, pa̧'a̧nü̧: Tü̧ä̧nä̧wa̧ Dio u̧wä̧mȩnä̧ wa̧jä̧, mo̧ro̧jä̧'i̧nä̧ pi̧jä̧'i̧nä̧, rü̧ä̧ dubora'i̧nä̧ jua̧u̧nä̧ kka̧ku̧'i̧nä̧ o'kajuiyünä̧ aditinü̧jä̧;

²⁵ Ukumä̧ Dawi änä̧, Epíritu Sa̧tu̧ a̧'kua̧ iweyenä̧ pä'inü̧jä̧: ¿Tta̧'a̧nü̧ pä'ü ttü̧ja̧mä̧ ra̧wä̧rü̧, surojütä amükuädätüjä̧ttü̧?

²⁶ Pi̧jä̧ttü̧ ruwotümä̧ ja̧'wa̧ta̧nü̧ ttippeyänä̧ we'ätü'i̧nä̧ Ttu̧ru̧wa̧rü̧, Crito-rü ka̧ka̧ku̧ suronä̧ jȩtta̧ pä'ü amükuädinä̧tü̧.

²⁷ «Isopäi'ünä̧ ukú kui̧tti̧ surojü jui̧'a̧rü̧ suronä̧ jȩtta̧ pä'ü ka̧ka̧kui̧nä̧tü̧, Herodes'i̧nä̧, Poncio Pilato'i̧nä̧, Irae ttü̧ja̧ wokotü'i̧nä̧, Irae ttü̧ja̧'i̧nä̧, jü̧nä̧.

²⁸ Ja̧'wa̧nü̧ ja̧'a̧nä̧, juätü jȩttü̧mä̧ suro uku ku̧wo̧juo̧mȩnä̧ amükuädü ku̧ju̧ni̧nü̧tä̧ 'kuäopa'a.

²⁹ Ja̧'wa̧nü̧ ja̧'a̧ttü̧, Chu̧ru̧wa̧ jua̧u̧ yettepe'ü topi ja̧'wa̧ta̧nü̧ ku̧wo̧juȩtä̧u̧rü kui̧wȩnȩ ttujuruku jitäunä̧ iyitü.

³⁰ Ku̧mü̧ te'ädü ppä'äditü na̧nȩpä̧tü̧ ttü̧'ȩji̧'ü̧nä̧, jȩtto̧kü̧ juei, kui̧tti̧ Jesú i̧mi̧nä̧ jȩtü̧nä̧.»

³¹ Ja̧'wa̧nü̧ pä'ü Dio-rü ukuoku kättädomȩnä̧, juȩnȩ ttü̧'ȩjo̧mȩmä̧ tti̧ȩ́'i̧na̧'a̧; ja̧'wa̧nü̧ päi'omȩnä̧ juȩnȩ kka̧kuä̧tü̧ o'katoi'ünä̧ Epíritu Sa̧tu̧ jäwä jo̧mȩnü̧ pätti'omȩnä̧, Dio i̧wȩnȩ ttujuruku ji'äwinä̧tü̧.

Ji̧nä̧ ji̧yȩtȩnä̧ ppä'ädäkuäu ttü̧ji̧nü̧ wȩnȩ

³² Jesucrito-rü esetätü rekuätü o'katoi'ünä̧ ji̧yȩtȩnä̧tä̧ amükuädinä̧tü̧ ja̧'wa̧ta̧nü̧ ji̧yȩtȩnä̧tä̧ a̧'kua̧ri̧nä̧tü̧. Yotüte ttu̧ju̧nä̧rü̧, ttütä chiäre pättümä̧ juiyina̧'a̧, o'katoi'ünä̧ ttiäre jü̧nä̧tä̧ ji̧na̧'a̧.

³³ Apótore-mä̧, rü̧ȩnä̧ ujuru kkü̧nä̧ ji'äwinä̧tü̧ Jesú wa'arettü ttoächinü̧ wȩnȩmä̧. Ja̧'wa̧nü̧ jo̧mȩnä̧ o'katoi'ünä̧ tteseäkuäu kki̧na̧'a̧.

³⁴ Ja̧'wa̧nü̧ ja̧'a̧ttü̧ ya̧tȩ'i̧nä̧ rekuä rü̧jä̧ku̧mä̧ toina̧'a̧; jua'amä̧ tti'ättiyu kku̧nä̧rä̧tü̧ ja̧ pä'ü'i̧nä̧, ttojusode kku̧nä̧rä̧tü̧ ja̧ pä'ü'i̧nä̧, iyü ikuipü mikuämä̧ i'kächü iyinä̧tü̧,

³⁵ Apótore ttiyä'cha pä'ü. Ja̧'wa̧nü̧ ja̧'a̧ rekuä rü̧ja̧'a̧ttü̧ topü yotukunä̧rü̧ 'kȩchä̧u̧ iyinä̧tü̧.

³⁶ Ja̧'wa̧nü̧ jȩpi̧nü̧, ya̧tȩ Rewi isotü i̧sa̧, José pä'ü mi̧kua̧, Chipre i̧sä̧sa̧ kkä'kosä̧sa̧ i̧sa̧, Apótore-mä̧ Bernawé pä'ü ottinä̧ku̧ (Jua̧u̧ pä'ümä̧: A̧'u̧ ro̧ȩkuä̧ i̧tti̧ pä'ü päwä ji̧nü̧).

³⁷ Pidemä̧ i'ätta kku̧nä̧rü̧ ja̧'a̧, juätta iyü ikuäji̧'ka̧ mikuämä̧ apótore-rü i'kächü iyinü̧, ttiyä'cha pä'ü.