Hechos 28 - Nuevo Testamento Uwotjüja

Pauru, Malta kkä'ko i̧sä̧sa̧nä̧ ü̧ji̧nü̧ wȩnȩ

¹ O'katoi'ünä̧ tote'ächü'anü̧ ja̧'a̧nä̧ kka̧kui̧pä̧jä̧'kotümä̧, juä̧sa̧ kkä'ko i̧sä̧sa̧mä̧ Malta pä'ü mi̧kuä̧sa̧ pä'ü wo̧jui̧'i̧nä̧tü̧jä̧.

² Juä̧sa̧nä̧ kka̧kuä̧tü̧ ttü̧ja̧mä̧ adiu ppättädinä̧u̧jä̧; okurä kkuwopo'ü o'katoi'ünä̧rü̧ okurä tütünä̧ jȩtti̧nä̧u̧jä̧, ajiya icha'a ja̧'a̧, diyo ttütiyä̧u̧.

³ Pauru-mä̧ okuränä̧ mi̧ ü̧tta̧to̧mȩnä̧, okurättü du'i'äku rä'opächü, ä̧ka̧mä̧ Pauru u̧mü̧nä̧ yü̧'ö̧ ikuinü̧.

⁴ Ja̧'wa̧nü̧ Pauru u̧mü̧nä̧ yü̧'ö̧ ü̧rä̧mäda̧'a̧ topü, juȩnȩ ttü̧ja̧mä̧, yotukunä̧ pä'äkuäwinä̧tü̧: «Pidemä̧ ttü̧ja̧rü̧ kuä'äwä'ijü ja̧'a̧ tä̧jí̧, aje rü̧o̧tottümä̧ ü̧ji̧pä̧ja̧'a̧nä̧, ttü̧ä̧nä̧wa̧ u̧mü̧ttü̧mä̧ ü̧ji̧pü̧ juiyünä̧ jȩä̧ku̧.»

⁵ Ja̧'wa̧nü̧ ja̧'a̧nä̧ Pauru-mä̧, ä̧ka̧rü̧mä̧ okurä jakuäku ppe'oku ikuinä̧ku̧, kkorojueimä̧ päi'oka'atä.

⁶ Ja̧'wa̧nü̧ päi'äjiyä̧u̧, Pauru-mä̧ ü̧jo̧mȩ kkä'kottü ji̧ä̧mi̧'ä̧kua̧kü̧, ma̧ä̧mä̧kua̧kü̧ pä'ü o'katoi'ünä̧ tta̧'ä̧ri̧nä̧tü̧; ja̧'wa̧nü̧ rekuó to̧ttä̧ro̧mȩnä̧ ji̧yo̧ko̧u̧mä̧, amükuädi'inä̧tü̧, Pauru-mä̧ dio ja̧'a̧ pä'ü.

⁷ Juȩnȩ tü'künä̧nü̧mä̧, ya̧tȩ Publio pä'ü mi̧kua̧, juä̧sa̧ kkä'ko i̧sä̧sa̧ttü̧ ukuo i̧sa̧ kki̧nü̧; i'ättiyu kku̧nä̧rü̧, jua̧u̧mä̧ wäbodäkuä mo̧ro̧ jo̧mȩnä̧ do'ädäji'ka̧ ppädinä̧u̧jä̧.

⁸ Publio jä'o, du'unä̧ na̧'ä̧chü̧, kuo 'cha̧bi̧ttü̧ cama-nä̧ ü̧'a̧'a̧, Pauru-mä̧ do'ächo'ü 'chä̧ji̧'ka̧, Dio-rü ukuoku, u̧mü̧nä̧ mȩo̧mȩnä̧, umäricheittü pi̧'i̧nü̧.

⁹ Ja̧'wa̧nü̧ jä̧ji̧yä̧u̧, juȩnȩ kka̧kuä̧tü̧mä̧ kkorotü na̧nȩpä̧tü̧'i̧nä̧ i̧jȩku̧ tticha'a aditü ikuinä̧u̧.

¹⁰ Juätü'i̧nä̧ adiu ppättädinä̧u̧jä̧; täkü rätopomȩnä̧mä̧ tiäre rekuä rü̧jü̧ iyü ppättädinä̧u̧jä̧.

Pauru, Roma-ra̧'a̧ i̧rȩbȩwi̧nü̧ wȩnȩ

¹¹ Kkä̧wa̧tü̧mä̧ wä̧mȩtukuä jo̧mȩnä̧ kkä'ko i̧sä̧sa̧nä̧ kka̧kuä̧jä̧'kotü, Alejandría woi'kanä̧, juä'ka'i̧nä̧ juȩnȩtä̧ a̧'ȩ 'kuättopäja'a ja̧'a̧; juä'kanä̧ pȩjä̧mi̧nä̧tü̧jä̧ ttü̧ä̧nä̧wo̧tü̧ Cátorü'i̧nä̧, Pólux-rü'i̧nä̧ tti̧mi̧pi̧yä̧ wȩyu̧kua̧'a̧ pä'ka.

¹² Juorü rä'opäjätümä̧, Sirakusa ttawaränä̧, wäbodäkuä mo̧ro̧ jo̧mȩnä̧ kka̧kuo̧po̧'i̧nä̧tü̧jä̧,

¹³ Juorü rä'opächü jäyotonä̧ i̧u̧ Regio ütawiyänä̧ rȩbȩwi̧nä̧tü̧jä̧. Kkoro mo̧ro̧mä̧, kkä̧rü̧'koppamä̧ kkä̧wa̧ räopomȩ ü'owekunä̧ ja̧'a̧ku̧ttü̧ icha'attü, kkoro mo̧ro̧tä̧ Pozzuoli ttawaränä̧ rȩbȩä̧kuä̧wi̧'i̧nä̧tü̧jä̧,

¹⁴ Juorümä̧ yotüte tawaruwä tü̧jä̧wa̧tü̧rü̧ po̧kui̧pi̧nä̧tü̧jä̧; juätükumä̧ jä̧ttȩpä̧u̧ ya'ute semana jo̧mȩnä̧ kka̧kui̧'i̧nä̧tü̧jä̧. Juorü kkä̧nü̧tä̧ Roma ütawiyära̧'a̧ rȩbȩwi̧nä̧tü̧jä̧.

¹⁵ Roma ütawiyä isotü tawaruwä tü̧jä̧wa̧tü̧mä̧ ticha'a ukuowa'a ttäju̧kuä̧ja̧'a̧ttü̧ topü tti̧chi̧nä̧u̧jä̧ Foro de Apio pättomȩbü ja̧'wa̧ta̧nü̧ Tres Tabernas mi̧kuomȩbü. Juätürü topü, Pauru-mä̧ Dio-rü eseunu̧ a̧'kua̧ adiwächi'inä̧ku̧.

¹⁶ Roma ütawiyänä̧ ti̧rȩbȩwi̧'ä̧ja̧'a̧mä̧, su̧ro̧do̧u̧ ttu̧ru̧wa̧mä̧ Pauru-rü we'inü̧, i̧mi̧ku̧nä̧ ü̧jü̧nä̧ ya̧tȩ su̧ro̧do̧u̧ i̧sa̧tä̧ tta̧wä̧ra̧'a̧nä̧.

Pauru-mä̧ Roma-ttü̧ Dio i̧wȩnȩ ji'äwinü̧

¹⁷ I̧rȩbȩwi̧'ä̧ja̧'a̧ttü̧mä̧, wäbodäkuätä mo̧ro̧ o'ka'a, Pauru-mä̧ Roma ütawiyättü Judío tturuwotürü ttü̧ka̧ka̧kui̧'a̧ pä'ü ä̧tȩpä̧ji̧'ka̧, juätürü pä'inü̧: —Chawaruwä chü̧jä̧wa̧tü̧, ttümä̧ judío-rü'i̧nä̧ ja̧'wa̧ta̧nü̧ tü̧tä̧mü̧ mi̧nä̧ jäwä jȩpü̧ ttü̧jä̧'i̧jü̧'i̧nä̧ to'ija̧'a̧ku̧mä̧ suronä̧mä̧ jȩcho̧ka̧'a̧ ji̧na̧'a̧nä̧, Jerusarȩ́-ttü̧ kkä̧mä̧dü̧ kärenä̧ra̧'a̧ iyü ttikuinä̧ku̧sä̧, Roma ttü̧ja̧ ttu̧mü̧nä̧;

¹⁸ ja̧'wa̧nü̧ ja̧'a̧nä̧ juätümä̧ rä'epü ttikua pättinä̧ku̧sä̧, jä̧'ȩpä̧rü̧ tottomȩnä̧ suronä̧ jȩcho̧ka̧'a̧ jä̧ji̧yä̧u̧.

¹⁹ Ja̧'wa̧nü̧ ja̧'a̧nä̧ judío yabonü̧ ttüarodi'omȩttü̧ ru̧wa̧ emperador Césa ü̧ja̧'a̧ chicha pä'ü jä'epinü̧sä̧, chidepiyu ttü̧ja̧rü̧ suronä̧ jidäwa pä'ümä̧ jȩcho̧ka̧'a̧nä̧.

²⁰ Ja̧'wa̧nü̧ ja̧'a̧ttü̧ ukuturu topü kkä̧nü̧ pi̧yȩtä̧ jidäwa pä'ü wopäjisä; ujutu Irae ttü̧ja̧ tta̧tä̧rä̧'i̧jü̧ jäwä jo̧mȩttü̧, pa̧'a̧nü̧mä̧, pi̧sa̧ kärenä̧sa̧ nü̧'käwa'amä̧ kkü̧sä̧.

²¹ Ja̧'wa̧nü̧ ji̧ä̧wä̧u̧, juätümä̧ pä'inä̧tü̧: —Ujutumä̧ Judea rȩjȩra̧'a̧ttü̧'i̧nä̧ ja̧'wa̧ta̧nü̧ tawaruwä tü̧jä̧wa̧tü̧'i̧nä̧ uku kutü'kümä̧, adiu'i̧nä̧, surojü'i̧nä̧ wȩyu̧kua̧'a̧mä̧ wettoka'attü̧ jerupätüjä̧.

²² Ja̧'wa̧nü̧ ja̧'a̧nä̧ ukuttütä tä̧ju̧kua̧ pä'ätüjä̧, jua̧u̧ tü'kü toku päkuaja pä'ü. Pi̧jä̧ pa̧ja̧kuä̧chü̧nä̧ ukuowa'a ä̧ju̧kuä̧tü̧jä̧, jua̧u̧ jareünä̧ esetäkuäwä ttü̧ja̧ ttüjü'koka'a ttukuokua'amä̧.

²³ Ja̧'wa̧nü̧ ja̧'a̧ttü̧, ji̧yȩtȩ mo̧ro̧ ttü̧ka̧ka̧kua̧ pä'ü, pätetü ttu̧ju̧nä̧ja̧'a̧ rekuätü ichinä̧tü̧ Pauru ü̧jodenä̧. Juodettü jiäwinä̧u̧ ru̧wa̧ Dio weü wȩnȩ yo̧ä̧i̧ ü̧jä̧mä̧dä̧ja̧'a̧mä̧ ni̧pä̧ro̧mȩbü päi'ünä̧. Pauru-mä̧ jiäwinä̧u̧ Moisé weäwä wȩnȩnä̧'i̧nä̧ ja̧'wa̧ta̧nü̧ profeta-tü̧ ttukuokuinü̧nä̧'i̧nä̧, jü̧nä̧; Jesú-ru tesetiyarü pä'ümä̧.

²⁴ Pauru jiäu wȩnȩmä̧ yotukunä̧tä̧ tteseta'anä̧, kkorotümä̧ esetokotü pinä̧tü̧.

²⁵ Ja̧'wa̧nü̧ yoräteunä̧ ttesetoka'a rättekuächiyäku, rättekuächäkua'a ä'kanä̧ Pauru-mä̧ päinä̧u̧: —Pa̧'a̧nü̧ ji̧yä̧ku̧ Epíritu Sa̧tu̧mä̧, tä̧do̧tü̧ mi̧nä̧rü̧mä̧ profeta Isaía-nä̧ ukuokuinü̧:

²⁶ Irae ttü̧ja̧rü̧ 'chä̧nü̧ ji'äwäji: ä̧ju̧ku̧mä̧, kuä̧ju̧kuä̧tu̧kua̧'a̧nä̧ wo̧jui̧'o̧ko̧tü̧jä̧, pä'ü; topümä̧, to'kuätukua'anä̧, uwäwächi'oko̧u̧jä̧, pä'ü.

²⁷ Isopäi'ünä̧ tta̧mi̧so'kimä̧ 'ki'ächächinä̧tü̧, Ttä̧ja̧wi̧yä̧mä̧ du̧mä̧chä̧chi̧nä̧u̧, tti'äriyä'i̧nä̧ mu̧chä̧wä̧chi̧nä̧u̧. Tti'äriyänä̧ tottü juiya pä'ü'i̧nä̧, ttä̧ju̧ku̧ juiyünä̧'i̧nä̧. Tta̧mi̧so'kinä̧ wo̧jui̧'ü̧, ttü'ärowächomȩnä̧, Ttü aditü chiku juiyatü pä'ü.

²⁸ Ja̧'wa̧nü̧ ja̧'a̧ttü̧ ä̧ju̧kuä̧tu̧kui̧, pi̧yȩ ra̧wä̧pi̧jü̧ttü̧ kki̧'i̧kuä̧ wȩnȩmä̧ judío pokotürü rȩbȩä̧kuä̧wo̧mȩnä̧mä̧; juätütä ja̧'a̧ pi̧yȩ adiu ttä̧ju̧kuä̧kuo̧tü̧mä̧.

²⁹ Ja̧'wa̧nü̧ ja̧'a̧, Pauru-mä̧ pi̧yȩ pä'ü kädäji o'ka'a, judío-mä̧ jitütä pä'ä'chäkuäwäyotü i̧wi̧nä̧tü̧.

³⁰ Pauru-mä̧ todäre años jo̧mȩnä̧ kki̧nü̧ juȩnȩmä̧, yodete isode ü̧jü̧ mikuä mitäu kkä̧nü̧. Ja̧'wa̧nü̧ ü̧ja̧'a̧ttü̧ o'katoi'ünä̧ topü ichätürümä̧, dopepü tottünä̧ jȩpi̧nü̧.

³¹ Ru̧wa̧ Dio weü wȩnȩmä̧, Tu̧ru̧wa̧ Jesucrito ütü'kü'i̧nä̧ wäjuönä̧, wȩnȩ juiyünä̧tä̧ ji'äwinü̧.