Hechos 27 - Nuevo Testamento Uwotjüja

Pauru-rü Roma-ra̧'a̧ wettinü̧ wȩnȩ

¹ Täkü ujuturu, Itaria rȩjȩra̧'a̧ we'ü ttikuomȩmä̧, Pauru-rü'i̧nä̧, kkorotürü'i̧nä̧ kärenä̧ pȩjä̧tü̧rü̧mä̧, su̧ro̧do̧u̧ ttu̧ru̧wa̧ Juriu pä'ü mi̧kua̧, emperador u̧mü̧wä̧ya̧ u̧mü̧nä̧ we'inä̧tü̧.

² Ja̧'wa̧nü̧ ja̧'a̧, Adramitio ttawarättü woi'kanä̧ pȩjä̧mü̧ 'chi̧nä̧tü̧jä̧, Asia ttawaränä̧ rä̧mä̧di̧'ü̧ 'kuäopäkua'a ja̧'a̧. Ja̧'wa̧ta̧nü̧ ujutukumä̧, Aritarco Macedonia rȩjȩttü̧, Tesalónica ütawiyättü i̧chä̧kuä̧wa̧'i̧nä̧ ji̧na̧'a̧.

³ Kkoro mo̧ro̧mä̧ rȩbȩwi̧nä̧tü̧jä̧, Sidón ütawiyänä̧, juorümä̧ su̧ro̧do̧u̧ ttu̧ru̧wa̧ Juriu-mä̧ Pauru-rü ukuotünü̧ jȩpi̧nü̧, jua̧u̧ awaruwä ppättäda'anä̧.

⁴ Ja̧'wa̧nü̧ ja̧'a̧ juorü rä'opächümä̧, kkä̧rü̧'koppa to'ija̧'a̧ku̧ kkä̧rü̧'ko̧wi̧yä̧u̧, Chipre kkä'ko i̧sä̧sa̧ jä̧yä̧sa̧nä̧ 'kuä'opinä̧tü̧jä̧.

⁵ Ciricia rȩjȩ'i̧nä̧, Panfilia rȩjȩ'i̧nä̧ pä̧tȩkuä̧nü̧ 'kuä'opäjä'kotü Mira ütawiyä, Ricia rȩjȩnä̧ rȩbȩä̧kuä̧wi̧'i̧nä̧tü̧jä̧.

⁶ Ja̧'wa̧nü̧ ja̧'a̧, su̧ro̧do̧u̧ ttu̧ru̧wa̧ Juriu-mä̧ juorü po̧kui̧pi̧nü̧ Alejandría woi'ka, Itaria rȩjȩra̧'a̧ 'chä̧'ka. Juä'kanä̧ tü̧'ȩjä̧mü̧nä̧ wȩä̧u̧, pȩjä̧mü̧ 'chi̧nä̧tü̧jä̧.

⁷ Rekuo mo̧ro̧ a̧'kuo̧pa̧ja̧'a̧ 'chä̧jä̧'kotü, usurä ȩmä̧u̧nu̧ 'chä̧wi̧'i̧nä̧tü̧jä̧ Cnido ütawiyä pä̧tȩkuä̧nü̧ jo̧mȩ. Ja̧'wa̧nü̧ ja̧'a̧nä̧, ji̧nä̧ kkä̧rü̧'ko̧wä̧u̧ Creta kkä'ko i̧sä̧sa̧ aboja̧'a̧ku̧nä̧ wi̧sä̧ti̧'ü̧ 'kuä'o'inä̧tü̧jä̧, Salmona kkä'ko i̧sä̧sa̧ pä̧tȩkuä̧nü̧ jo̧mȩnä̧.

⁸ Rü̧ȩnä̧ kkä̧rü̧'ko̧wa̧'a̧ aje rü̧o̧to jueükunä̧ ti̧'cho̧mȩnä̧, rȩbȩwi̧nä̧tü̧jä̧ Buenos Puertos pättomȩ ttawaränä̧. Juȩnȩmä̧ Lasea ütawiyä tü'kü ji̧na̧'a̧.

⁹ Täkü, rekuo mo̧ro̧ 'kuäopächäjiyäku ja̧'wa̧ta̧nü̧ aje rü̧o̧tonä̧ 'chä̧kuä̧wä̧nä̧, a̧'ȩ tü'küwächa'a ja̧'a̧ ra̧wä̧pi̧ji̧yä̧ku̧, ttu̧kuȩ'i̧nä̧ ppäi ttuttä ja̧'a̧, Pauru-mä̧ ro̧ȩpi̧nä̧u̧:

¹⁰ —Pa̧'a̧nü̧ pä'ü: Chawaruwä, po ti̧'cha̧'a̧mä̧ rü̧ȩnä̧ ra̧wä̧pi̧ja̧'a̧, tiäre'i̧nä̧, woi'ka'i̧nä̧ ja̧'wa̧ta̧nü̧ ujututä'i̧nä̧ tote'ächü'anü̧ ja̧'a̧.

¹¹ Päku, su̧ro̧do̧u̧ ttu̧ru̧wa̧mä̧ Pauru-rü esetü jui'ü, woi'ka kui̧'ȩpä̧rü̧rü̧tä̧ ja̧'wa̧ta̧nü̧ woi'ka u̧ru̧wa̧rü̧tä̧ esetinü̧.

¹² Ja̧'wa̧ta̧nü̧, juȩnȩ ttawaränä̧, a̧'ȩ 'kuättopü juiyünä̧ suroji̧yä̧u̧, o'katoi'ünä̧ amükuädinä̧tü̧, juorü rä'opächü tti̧'cha̧ pä'ü Fenice ütawiyä ttawaränä̧ 'kuättopäkua'anü̧, a̧'ȩmä̧. Fenice-mä̧ juȩnȩtä̧ Creta kkä'ko i̧sä̧sa̧nä̧ kki̧'i̧na̧'a̧, juorütä kkä̧wa̧ räopa'aku'i̧nä̧, ma̧ä̧cha̧'a̧ku̧'i̧nä̧ rättopa pä'ü adiwomȩ ja̧'a̧ttü̧.

Aje rü̧o̧to kkä'kottü kkä̧rü̧'koppa tawipina̧'a̧

¹³ Kkä̧rü̧'koppamä̧ kkä̧wa̧ ü'oweja'a̧ku̧nä̧ttü̧ a̧'u̧ku̧nä̧tä̧ kkä̧rü̧'ko̧wi̧yä̧u̧, woi'ka u̧ru̧wa̧mä̧ ti̧'cha̧ pä'ü adiwa'akü̧ pä'ü amükuädinä̧tü̧. Ja̧'wa̧nü̧ pä'ü tta̧mü̧kuäda'attü̧ Creta jäyänä̧ 'chi̧nä̧tü̧jä̧.

¹⁴ Ja̧'wa̧nü̧ jä̧ja̧'a̧, a̧'u̧kua̧'a̧tä̧ jä̧ji̧ o'ka'attü, kkä̧wa̧ räopa'akuttü, kkä̧rü̧'koppa rü̧ȩnä̧ düina̧'a̧ woi'kanä̧.

¹⁵ Ja̧'wa̧nü̧ päi'omȩnä̧, kkä̧rü̧'koppa kki'opü i̧kuä̧u̧, jȩtü̧ juiyünä̧ ja̧'a̧ttü̧, ja̧'a̧tä̧ topinä̧tü̧jä̧ ȩpa̧'a̧nä̧tä̧.

¹⁶ Kkä̧rü̧'koppa juiyünä̧nü̧ jo̧mȩnä̧, kkä'ko i̧sä̧sa̧ Clauda pä'ü mi̧kuä̧sa̧nä̧ 'kuä'o'ü usurä ȩmä̧u̧ kkä̧nü̧ ȩmi̧nä̧tü̧jä̧, rippanü̧ ri̧'ä̧kuäwä'ka woi'ka.

¹⁷ Ja̧'wa̧nü̧ ja̧'a̧ juä'ka do'opü wȩnä̧jä̧'kotü, ppü'kepü ti̧'ä̧di̧nä̧tü̧, woi'ka suropäi'ü pä'ü, Sirte pä'ü mi̧kuä̧ba̧ rȩba̧nä̧ düttomȩnä̧. Ja̧'wa̧ta̧nü̧ o̧ta̧'i̧nä̧ jui'ädü ikuäjä'kotü pȩji̧nä̧tü̧, ja̧'a̧tä̧ kkä̧rü̧'koppa ȩpa̧'a̧nä̧tä̧.

¹⁸ Kkoro mo̧ro̧mä̧, kkä̧rü̧'koppamä̧ yabonü̧tä̧ rü̧ȩnä̧ ji̧na̧'a̧ ja̧'wa̧nü̧ ji̧yä̧u̧ woi'kanä̧ pȩjü̧ ajeku dochäu ikuinä̧tü̧;

¹⁹ Ja̧'wa̧ta̧nü̧ wäbodäkuä mo̧ro̧ päi'omȩnä̧, woi'ka juȩpä̧rä̧kuä̧wä̧ o̧chü̧mä̧ o'kajuiyünä̧ dochäu ikuinä̧tü̧jä̧.

²⁰ Ja̧'wa̧ta̧nü̧ rekuó mo̧ro̧ jo̧mȩnä̧ kkä̧wa̧rü̧'i̧nä̧, si̧ri̧'kü̧rü̧'i̧nä̧ topokotü pinä̧tü̧jä̧, ajemä̧ kädoka'atä kkä̧rü̧'ko̧u̧nä̧ ppa̧wä̧u̧, täkü kki̧'i̧po̧ko̧tü̧jä̧kü̧ pä'ü amükuädinä̧tü̧jä̧.

²¹ Täkü, tu̧kuȩ rekuó mo̧ro̧ tukuoka'a jä̧ja̧'a̧, Pauru-mä̧ o'katoi'ünä̧ ttü̧'kä̧tȩ jo̧mȩttü̧ ä̧rä̧mi̧'ü̧ pä'inü̧: —Chawaruwä, ttü pädü esetü, Creta-ttü rätopü juiyäjittümä̧, pa̧'a̧nü̧ usurä ȩmä̧u̧ kkä̧nü̧mä̧, järe'i̧nä̧ to'e'ächokotü pa̧ja̧tü̧jä̧.

²² Ja̧'wa̧nü̧ ja̧'a̧nä̧, kua̧'kua̧ tta̧kuȩkuä̧tu̧kuä̧, woi'kamä̧ toe'ächa'anä̧, ukutumä̧ ya̧tȩ'i̧nä̧ to'e'ächokotü kuäkuotüjä̧.

²³ Mo̧ro̧ji̧ yodomä̧, Dio i̧sa̧ á̧gȩ i̧wä̧chä̧ji̧. Jua̧u̧ Dio-rü esetü ukuotü cha'attü ttümä̧,

²⁴ Jua̧u̧mä̧ pä'äji: Pauru, yekuekuä; ukumä̧ Roma ütawiyä ru̧wa̧ emperador ä'ka kui̧'cha̧ pä'ü rekuä rü̧ja̧'a̧. Ja̧'wa̧ta̧nü̧ ukuku 'chä̧tü̧rü̧mä̧ o'katoi'ünä̧ totte'ächü juiyünä̧tä̧ jȩpä̧ji̧ Dio-mä̧.

²⁵ Ja̧'wa̧nü̧ ja̧'a̧ttü̧, chawaruwä, kua̧'kua̧ tta̧kuȩkuä̧tu̧kuä̧; ttümä̧ Dio-rü cha̧'kua̧ wȩnä̧rü̧sä̧ ja̧'wa̧nü̧ pä'äjita'anü̧ jä̧kua̧'a̧ pä'ü.

²⁶ Ja̧'wa̧nü̧ ja̧'a̧nä̧ ji̧sa̧tȩ kkä'ko i̧sä̧sa̧ tü̧'o̧kui̧'ä̧kuo̧tü̧jä̧.

²⁷ Ja̧'wa̧ta̧nü̧ ttü̧jä̧pü̧ttü̧ pa̧ja̧kuä̧nü̧ yodó päi'äja'a, aje rü̧o̧to Adriático pä'ü mi̧kuotonä̧ ti̧'cho̧mȩnä̧, yodó kkä'ko päi'äja'a woi'ka päjure ji'äwärä̧tü̧mä̧, kko̧ro̧jä̧ rȩjȩnä̧ rȩbȩwi̧pä̧tü̧jä̧kü̧ pä'ü amükuädinä̧tü̧.

²⁸ Aje jakuoto pa̧ja̧tü̧ tottomȩnä̧ treinta y sei-nü̧ metros jo̧mȩnä̧ täkuina̧'a̧; ja̧'wa̧nü̧ jä̧ja̧'a̧ jua'a yabonä̧ pä'äjita'anü̧ pa̧ja̧tü̧ tottomȩnä̧, veintisiete metros-nü̧ jo̧mȩnä̧tä̧ täkuina̧'a̧.

²⁹ Ja̧'wa̧nü̧ ji̧yä̧u̧ ye'inä̧tü̧ i̧nä̧wänä̧ dütäkuotüjä̧kü̧ pä'ü. Ja̧'wa̧ta̧nü̧ woi'ka ubü'ka ja̧'a̧ku̧nä̧ttü̧ pa̧ja̧kuä̧nü̧ jo̧mȩnä̧ ancla pä'ü miku okä kkä'ü ikuinä̧tü̧, jurunä̧nü̧ mo̧ro̧ juoiyatüdo pä'ü amükuä̧rü̧nü̧.

³⁰ Ja̧'wa̧nü̧ ja̧'a̧ woi'ka päjure to̧pä̧rä̧tü̧mä̧ woi'kattü tüttipächa pä'ü amükuädü, ancla pä'ü ottü okä yabonä̧nü̧ ttikua pä'ü jä̧'i̧nü̧'a̧nü̧ jȩpü̧ kkä̧nü̧, woi'ka rippanü̧ rä'ka jui'ädinä̧tü̧.

³¹ Ja̧'wa̧nü̧ ja̧'a̧nä̧ Pauru-mä̧ su̧ro̧do̧u̧ ttu̧ru̧wa̧rü̧ ji'äu kkä̧nü̧, su̧ro̧do̧u̧ru̧'i̧nä̧ pä'inü̧: —Jitüja woi'kattü düttekuächüttümä̧, ukutumä̧ yoriso kki̧'i̧po̧ko̧tü̧ kuäkuotüjä̧.

³² Ja̧'wa̧nü̧ pä̧i̧yä̧u̧ su̧ro̧do̧u̧mä̧ rippanü̧ rä'ka woi'ka ti̧ä̧dä̧kuä̧wä̧ o̧chu̧ 'kui'opü ttikuomȩnä̧, jakuoto ma̧i̧na̧'a̧.

³³ Täkü, mo̧ro̧ juomȩnä̧, Pauru-mä̧ o'katoi'ünä̧rü̧ ukuokuinü̧ ttu̧kuȩ ttukuiyarü pä'ü:

³⁴ Ku̧kuȩtu̧ku̧mä̧ kuätukui, ku̧ja̧kui̧'ä̧tu̧kuä̧kua̧'a̧nü̧, kuwo'chetukuttü yoite'i̧nä̧ toe'ächoka'a jä̧kua̧'a̧.

³⁵ Ja̧'wa̧nü̧ pä'ü kä'ädü, o'katoi'ünä̧ ttä'ka jo̧mȩttü̧ Pauru-mä̧ Dio-rü ukuokuopo'ü u̧kuȩ kuinü̧.

³⁶ Ja̧'wa̧nü̧ jȩi̧yä̧u̧, o'katoi'ünä̧ esewächi'ü, kkorotü'i̧nä̧ ttu̧kuȩ kuinä̧tü̧.

³⁷ Ja̧'wa̧nü̧ ja̧'a̧ woi'kanä̧mä̧, o'katoi'ünä̧mä̧ doscienta setenta y sei-nü̧ jo̧mȩnä̧ ji̧na̧'a̧, ttü̧ja̧mä̧.

³⁸ Ja̧'wa̧nü̧ o'katoi'ünä̧ jo̧mȩnü̧ tu̧kuȩ kuä̧nü̧ kätädäji o'ka'a. Woi'ka jojeächi'ünä̧ aje rü̧o̧toku dochäu ikuinä̧tü̧ trigo a̧ppi̧yä̧mä̧.

Woi'ka ma̧'ä̧chü̧ toe'ächinü̧ wȩnȩ

³⁹ Mo̧ro̧ juomȩnä̧, woi'ka päjäre'ka to̧ä̧rä̧kuä̧wä̧ isotümä̧, rȩjȩ ttü̧rȩmä̧dä̧jo̧mȩmä̧ ttieruwa'anä̧; suwakuächomȩ rȩba̧ pa̧'a̧ topü, jua'atä woi'kamä̧ rä̧mä̧dü̧nä̧ ttȩpa̧ pä'ü amükuädinä̧tü̧.

⁴⁰ Ancla pättü okä 'chu̧ä̧rü̧ o̧chu̧ 'kui'opü ikuinä̧tü̧ aje rü̧o̧toku ma̧ä̧chü̧nä̧. Ja̧'wa̧ta̧nü̧ woi'ka kui̧ȩpä̧rü̧ odiyä ejädü iku, te'ädinä̧tü̧ päjäre'kanä̧ juȩpä̧rü̧ o̧ta̧. Ja̧'wa̧nü̧ ja̧'a̧ kkä̧rü̧'koppa kki'opü ikuomȩnä̧, woi'kamä̧ kkiokuächina̧'a̧ rȩba̧ po̧mȩku̧mä̧.

⁴¹ Ja̧'wa̧nü̧ päi'äja'anä̧ rȩba̧nä̧ wä̧mä̧dü̧nä̧ düomȩnä̧, päjäre'kamä̧ rȩba̧ttü̧ a̧ttä̧chi̧'o̧mȩnä̧, kkiyü kkä̧mä̧da̧'a̧ttü̧ ubü'ka ja̧'a̧ku̧nä̧ aje ppa'ü rü̧ȩnä̧ düomȩnä̧, woi'kamä̧ sarächi'ina̧'a̧.

⁴² Ja̧'wa̧nü̧ päi'i̧yä̧u̧ su̧ro̧do̧u̧mä̧, kärenä̧ pȩjä̧tü̧ ttȩpä̧u̧ru̧ kuä'äu ttikua pä'ü amükuädinä̧tü̧, kuo'ü düttekuächü juiyünä̧.

⁴³ Ja̧'wa̧nü̧ ja̧'a̧nä̧ su̧ro̧do̧u̧ ttu̧ru̧wa̧mä̧, Pauru-rü ppäda pä'ü, ja̧'wa̧nü̧ jȩttü̧ juiyünä̧tä̧, ajenä̧ kuottü'anü̧ wotümä̧ ä'kanä̧ kuotti'iyarü pä'ütä we'inü̧, rȩjȩra̧'a̧ päti'a pä'ümä̧.

⁴⁴ Ja̧'wa̧nü̧ ja̧'a̧ttü̧, kkorotümä̧ kuo'inä̧tü̧jä̧ tabla odiyänä'i̧nä̧, ja̧'a̧tä̧ woi'ka jäwänä̧'i̧nä̧ rȩjȩra̧'a̧ tu̧wä̧mi̧'a̧ pä'ümä̧. Ja̧'wa̧nü̧ jȩpü̧ o'katoi'ünä̧ tote'oka'a rȩba̧nä̧ wȩjä̧mi̧nä̧tü̧jä̧.