Hechos 26 - Nuevo Testamento Uwotjüja

Pauru, ru̧wa̧ rey Agripa ä'kattü ukuokuinü̧

¹ Ja̧'wa̧nü̧ ja̧'a̧ ru̧wa̧ rey Agripa-mä̧, Pauru-rü pä'inü̧: —Kua̧mü̧nä̧ pa̧ja̧tü̧ ji'äkuäwi. Päku, Pauru-mä̧ u̧mü̧ kä'epü ukuokuinü̧:

² o'kajuiyünä̧ judío, ttü chütü'kü ttukuokuäji kuä'kattü chukuokuomȩnä̧ juiyo eseusä, ru̧wa̧ rey Agripa,

³ jua'amä̧, ukumä̧ judío ttü̧tä̧mü̧ mi̧nä̧ jäwä jü̧ttü̧'i̧nä̧, ttukuoku'i̧nä̧ o'kajuiyünä̧ ku̧wo̧jua̧'a̧ttü̧. Ja̧'wa̧nü̧ kuomȩttü̧, adiu kuä̧ju̧kua̧ttü̧ pä'üsä.

⁴ Ttü mü̧ä̧ya̧ttü̧ päi'ünä̧ chidepiyu Jerusarȩ́-ttü̧ chü̧ji̧nü̧mä̧, o'kajuiyünä̧ wo̧juä̧tü̧ judío-mä̧;

⁵ Ja̧'wa̧ta̧nü̧ wo̧juä̧tü̧ ä̧kuo̧mȩnä̧ttü̧tä̧ päi'ünä̧, fariseo wotü jü̧nä̧ chesetina̧'a̧mä̧, jittäwa pättüttümä̧ ji'äwätü, juätütä ja̧'a̧ 'kiyünä̧ Dio-rü esetätümä̧.

⁶ Ja̧'wa̧nü̧ ja̧'a̧ jitämä̧, tü̧tä̧mü̧ mi̧nä̧rü̧ Dio iya pä'inü̧ chesetomȩttü̧, wottäkusä kuä'ü ttikuattü pä'ümä̧;

⁷ Ujutu tü̧tä̧mü̧mi̧nä̧ttü̧ doce-nü̧ wotü judío-mä̧, juätürü iya päinü̧ tta̧'ä̧rü̧mä̧ Dio ü̧rü̧ä̧ eseäkuäwätü, mo̧ro̧'i̧nä̧, yodo'i̧nä̧, jü̧nä̧. Ja̧'wa̧nü̧ jȩcho̧mȩttü̧ judío-mä̧ kuä'ü ttikuattü pättäkusä, ru̧wa̧ rey Agripa.

⁸ ¡Jua̧u̧nu̧mä̧! ¿Dio wa'arettü ttoädomȩnä̧mä̧, ya̧tȩ'i̧nä̧ ttesetoka'a tä̧jí̧, ukutu isotümä̧?

Pauru-mä̧, suronä̧ jȩi̧na̧'a̧ ji'äwinü̧

⁹ Ttütä'i̧nä̧ ä'kojimä̧ amükuädinü̧sä̧, kka̧ku̧nä̧mä̧ o'kajuiyünä̧tä̧ jȩpü̧, Jesú nasaret i̧sa̧ i̧mi̧ surojuodepa pä'ü,

¹⁰ Ja̧'wa̧nü̧ ja̧'a̧ttü̧ Jerusarȩ́-ttü̧mä̧, sacerdote-tü̧, a̧ pättäku, Jesú-ru esetätürümä̧ kärenä̧ rütä'chinü̧sä̧; juätürü kuä'ü ttikua pä'ü'i̧nä̧, ppä'ädinü̧sä̧.

¹¹ Ja̧'wa̧ta̧nü̧ tta̧'kua̧ ttu̧wȩnä̧rä̧ku̧ru̧ suronä̧ pätta pä'ümä̧, suronä̧ jȩchi̧nä̧u̧ sinagogas odewiyä o'kajuiyünä̧, jua'a yabo juätürü chami̧suräkumä̧ usú kue'ächinü̧sä̧ kko̧ro̧jä̧ra̧'a̧'i̧nä̧.

¹² Ja̧'wa̧nü̧ jȩpü̧ kue'ächü, Damasco ütawiyära̧'a̧ 'chi̧nü̧sä̧, sacerdote-tü̧ tturuwotü ttukuonä̧, weäwi'äjäku.

¹³ Ja̧'wa̧nü̧ chi̧'cha̧'a̧ jakuänä̧, ¡ru̧wa̧ rey!, mä̧nä̧ kkä'kottü, kkä̧wa̧ jueü kkü̧rü̧ päia'a, mo̧ro̧jä̧ra̧'a̧ttü̧ tȩya̧u̧ kkȩdȩ'i̧na̧'a̧, kkä̧wa̧ttü̧'i̧nä̧ abonä̧nü̧ tȩya̧u̧ topinü̧sä̧, ujutumä̧ jakuätä päti'ünä̧.

¹⁴ Ja̧'wa̧nü̧ päi'omȩnä̧ o'katoi'ünä̧ rȩjȩ ma̧tä̧mä̧ja̧'a̧, hebreo wȩnȩnä̧, ukuokua'a ä̧ju̧kui̧nü̧sä̧: «Sauro, Sauro, ¿ta̧'a̧nü̧ pä'ü, ru̧kuä̧rä̧ku̧sä̧ttü̧? ¡Ttüku rowäwätümä̧ tta̧mü̧kuädü jui'ätütä ja̧'a̧!»,

¹⁵ pä'ü ukuokuäku aditinü̧sä̧: ¿chu̧ru̧wa̧, dí kua'ajä̧ttü̧? pädäku ädätinä̧ku̧sä̧: Ttümä̧ Jesú-sä, ttürü ja̧'a̧ ru̧kuä̧ra̧'a̧mä̧.

¹⁶ Ja̧'wa̧nü̧ ja̧'a̧nä̧, ä̧rä̧mi̧'i̧, ttü chu̧mü̧wä̧ya̧ päi'ünä̧ kua pä'ü chi̧jȩkuä̧ku̧jä̧ ja̧'wa̧ta̧nü̧ jitä ttü chütü'kü to'ku'i̧nä̧, juȩnȩ o'komȩnä̧ chi̧jȩpä̧kuȩ'i̧nä̧ jikuäwäkua'anü̧.

¹⁷ Ukutä kuawaruwä judío-ttü'i̧nä̧, judío pokotüttü'i̧nä̧ ku̧ji̧pü̧nä̧ rä'epü chikuäkua̧jä̧ ja̧'wa̧ta̧nü̧ juätürü jikuäwa pä'ü wedäkujä̧,

¹⁸ tti'äre bakuepa pä'ü, yo̧ü̧ttü̧ tȩya̧u̧ku̧ tti'ärowächa pä'ü; Satanás ujuruttü Dio-ku tti'ärowächa pä'ü; suronä̧ jȩttä̧'i̧ja̧'a̧, jua̧u̧ jȩpü̧ chi̧kuä̧u̧, tta̧'kua̧ wȩnä̧kuä̧wä̧ ttüttü tȩmä̧kua̧'a̧nü̧, surojü jui'ätü jü̧nä̧tä̧.

¹⁹ «Ja̧'wa̧nü̧ jä̧ku̧, ¡ru̧wa̧ rey Agripa!, jarodokü pinü̧sä̧ mo̧ro̧jä̧ jäwä i̧jȩkuo̧mȩnä̧mä̧,

²⁰ ja̧'wa̧nü̧ jä̧ku̧, ä̧kuo̧mȩnä̧ Damasco ütawiyä ttü̧ja̧rü̧, jua̧u̧nü̧ o'ka'a Jerusarȩ́-nä̧'i̧nä̧, Judea rȩjȩ o'kajuiyünä̧ kka̧kuä̧tü̧rü̧'i̧nä̧ ja̧'wa̧ta̧nü̧ judío pokotürü'i̧nä̧ ji'äwinü̧sä̧, surojü kä'ädäkuäu Dio-rü ukuotü kkä̧kuä̧wä̧ wȩnȩmä̧.

²¹ Ja̧'wa̧nü̧ jidäwomȩnä̧ judío-mä̧, Dio-rü ukuokuäkuäwodettü 'chu'ädäjä'kotü kuä'ü ttikua pä'ü jȩtti̧nä̧ku̧sä̧.

²² Ja̧'wa̧nü̧ ja̧'a̧nä̧, Dio ppädinä̧ku̧sä̧, jitäbü päi'ünä̧ yabonü̧ chi̧'cha̧'a̧mä̧, ppo̧'ä̧tü̧rü̧'i̧nä̧, tä̧mü̧rü̧'i̧nä̧ o'katoi'ünä̧ jidäwa'amä̧. Profeta-tü̧'i̧nä̧, Moisé'i̧nä̧ jä̧kua̧'a̧ pä'ü jittäwinü̧ttü̧mä̧ i̧mi̧ku̧nä̧mä̧ ji'äwoküsä:

²³ Pä'inä̧tü̧, Crito-mä̧ 'korujuoächä̧kua̧, 'korujuo'ächi̧'ü̧'ka̧ jua̧u̧ jä̧kua̧'a̧ ä̧kuo̧mȩnä̧ wa'inä̧tü̧ttü̧ tto̧ä̧chä̧kua̧mä̧ tȩya̧u̧ jiäwa pä'ü, judío-rü'i̧nä̧, judío pokotürü'i̧nä̧, jü̧nä̧.»

Pauru-mä̧, Agripa-rü eseta pä'ü ji'äwinü̧

²⁴ Pi̧yȩ päomȩnä̧, Feto-mä̧ wopi'inü̧: —¡Kuamükuädü jui'ächächüjä̧, Pauru! rü̧ȩnä̧ ku̧wo̧jui̧'o̧mȩnä̧.

²⁵ Päku, Pauru-mä̧ ädätinü̧: —Chamükuädümä̧ jui'ächoküsä, ¡ukuo i̧sa̧ Feto!; pärokua'aku jueünä̧tä̧ ukuokusä, jueü wȩnȩtä̧.

²⁶ Pi̧yȩ chukuokumä̧ wo̧jua̧ ru̧wa̧ rey Agripa-mä̧ ja̧'wa̧nü̧ ja̧'a̧ttü̧ wäjuönä̧ ukuokusä; pi̧yȩ tü'kü yä̧u̧nä̧ jü̧mä̧ juiya'a, o'kajuiyünä̧ u̧wo̧juö̧tä̧ ja̧'a̧.

²⁷ ¿Esetüjä̧, ru̧wa̧ rey Agripa profeta-tü̧rü̧mä̧? Esetü pä'ümä̧ chu̧wo̧juä̧ku̧jä̧.

²⁸ Agripa-mä̧ ädätinü̧: —Crito-rü chesetü'anü̧ päi'ünä̧ kukuokuäkusä.

²⁹ Päiyäku Pauru-mä̧ pä'inü̧: —A̧'u̧ku̧nä̧tä̧ ja̧ pä'ü'i̧nä̧, rü̧ȩnä̧ ja̧ pä'ü'i̧nä̧, ¡chu̧ru̧wa̧ ukuo i̧sa̧!, Dio-rü pä̧wä̧rü̧ja̧'a̧, o'katoi'ünä̧ ttü jü̧'a̧nü̧ juokuächätukua pä'ü, jua'akumä̧ pi̧sa̧ kärenä̧sa̧ juiyünä̧tä̧.

³⁰ Ja̧'wa̧nü̧ ukuoku käda'a, ru̧wa̧ rey Agripa'i̧nä̧, gobernador Feto'i̧nä̧, Berenice'i̧nä̧, kkorotü juätütäku pȩjä̧jä̧tü̧mä̧ ä̧rä̧mi̧'ä̧kuä̧wi̧nä̧tü̧,

³¹ ja̧'wa̧nü̧ ja̧'a̧ jäyäku pä'i'ü ukuokuäkuäwinä̧tü̧: —Pidemä̧ kuä'ü ttikuarü pä'ü'i̧nä̧, kärenä̧ ü̧'a̧ pä'ü'i̧nä̧ wokü ja̧'a̧, pä'ü.

³² Ja̧'wa̧nü̧ ja̧'a̧ Agripa-mä̧ Feto-rü pä'inü̧: —Pidemä̧ kärenä̧ttü̧ rä'epü ttikuarü pä'ü wäji ja̧'a̧, chutä emperador Césa ü̧ja̧'a̧ i̧'cha̧ pä'ü jä'epü juiyäjittümä̧.