Hechos 25 - Nuevo Testamento Uwotjüja

Pauru, Feto ä'kattü ukuokuinü̧ wȩnȩ

¹ Feto-mä̧ Cesarea ütawiyänä̧ Gobernador jü̧nä̧ ü̧'ä̧mä̧da̧ pä'ü ichäja'attümä̧, wäbodäkuä mo̧ro̧ o'ka'a, Jerusarȩ́ ütawiyära̧'a̧ 'chi̧nü̧.

² Juorümä̧ sacerdote-tü̧ tturuwotü'i̧nä̧, judío-ttü ukuo isotü'i̧nä̧ ä'ka jo̧mȩ ichi'äkuäu, suronä̧ amükuädü Pauru-rü 'chuttäda pä'ü jättepinä̧ku̧.

³ Jerusarȩ́ ütawiyära̧'a̧ jua̧u̧ru̧ weiyatü pä'ü; mä̧nä̧nä̧ tti'chächomȩttü̧ kuä'ü ttikuarü pä'ü jo̧mȩnü̧ amükuädü ku̧nä̧jä̧'kotü pä'inä̧tü̧;

⁴ Ja̧'wa̧nü̧ pätta'anä̧ Feto-mä̧ päinä̧u̧, Pauru-mä̧ Cesarea-nä̧ kärenä̧ ü̧'ä̧kua̧ jitätämä̧; jua'akumä̧ jua'atä chi̧'chä̧kua̧sä̧ ttütä'i̧nä̧,

⁵ Tticha pättüttümä̧, —ttichü'anü̧ ja̧'a̧, jua̧u̧ suronä̧ jȩi̧nü̧ttü̧mä̧, kuruwotükumä̧ jua'attütä jittäwa jȩpü̧ kku̧nä̧tu̧kui̧.

⁶ Feto-mä̧, Jerusarȩ́ ütawiyänä̧, kko̧ro̧mü̧ttü̧nü̧ wäbodäkuä mo̧ro̧ päi'ünä̧ mo̧ro̧ kkä̧ji̧'ka̧, kkoro mo̧ro̧mä̧ Cesarea ütawiyänä̧ uruwo deäkänä̧ pä̧mä̧dü̧, Pauru-rü tti'chächiyarü pä'ü we'inü̧.

⁷ Ja̧'wa̧nü̧ jä̧ja̧'a̧, Pauru doächi'omȩnä̧, judío-mä̧ Jerusarȩ́-ra̧'a̧ttü̧ ichäjätümä̧, surojü rü̧ȩnä̧ ji'äwinä̧tü̧ Pauru ütü'kümä̧; ja̧'wa̧nü̧ ja̧'a̧nä̧ jueünä̧mä̧ ttukuoku juiyünä̧ winä̧tü̧;

⁸ Jittäwiyäku, Pauru-mä̧ ukuokuinü̧: —Ttümä̧, judío ttukuotü weäwä wȩnȩ'i̧nä̧, Dio-rü ukuokuäkuäwode'i̧nä̧, ru̧wa̧ Emperador Césa ütü'kü'i̧nä̧ suronä̧ to'ija̧'a̧ku̧mä̧ jȩpo̧kü̧ pä'ijüsä.

⁹ Ja̧'wa̧nü̧ ja̧'a̧nä̧ Feto-mä̧, judío-rü tteseunä̧ ü̧ji̧pa̧ pä'ü, Pauru-rü jä'epü ä̧ju̧kui̧nü̧: —¿Jerusarȩ́ ütawiyära̧'a̧ kui̧'cha̧ pä'üjä̧, jua'attü pi̧yȩ tü'kü, jo̧mȩnü̧ adiwomȩnä̧ pätäkua'anü̧, chä'ka jo̧mȩttü̧?

¹⁰ Päiyäku, Pauru-mä̧ ädätinü̧: —Judío-rü suronä̧ jȩcho̧kü̧ jä̧ji̧mä̧ wo̧jua̧jä̧. Ja̧'wa̧ta̧nü̧ pä'ü, Roma isotü, ruwotü ttä'ka jo̧mȩ kkü̧sä̧, suronä̧ jȩchä̧ji̧ttü̧mä̧ ukututä päkuätukua pä'ü ja̧'a̧.

¹¹ Isopäi'ünä̧, ttü tode'a pä'ü mikuäwächünä̧ jü̧, surojü jȩchä̧ji̧ttü̧mä̧, isopäi'ünä̧tä̧ tode'a pä'ü ja̧'a̧; ja̧'wa̧nü̧ ja̧'a̧nä̧ pitü pättü yapare jäwätä jo̧mȩnä̧mä̧, ya̧tȩ'i̧nä̧ juätürü iyü ttikuattü pä'ümä̧ juiya'a. Ja̧'wa̧nü̧ ja̧'a̧ttü̧ ru̧wa̧ Césa ü̧ja̧'a̧tä̧ chi̧'cha̧ pä'üsä.

¹² Ja̧'wa̧nü̧ ja̧'a̧ Feto-mä̧, aditäwä isotüku ukuokuäkuäwopo'ü, pä'inü̧: —Emperador Césa ü̧ja̧'a̧, i̧'cha̧ pä'attü̧; jua̧u̧nu̧mä̧, jua'atä i̧'chä̧kua̧, pä'inü̧.

Pauru-rü, ru̧wa̧ rey Agripa ä'ka jo̧mȩ ȩpi̧nä̧tü̧

¹³ A̧'u̧ku̧nä̧tä̧ mo̧ro̧ 'kuäopäji o'ka'a, ru̧wa̧ rey Agripa-mä̧, Berenice-ku Cesarea ütawiyära̧'a̧ ichinä̧tü̧ Feto-rü te'äu.

¹⁴ Ja̧'wa̧nü̧ ja̧'a̧, rekuonä̧nü̧ mo̧ro̧ ttü̧ja̧kua̧'a̧ttü̧, Feto-mä̧ Pauru ütü'kü ru̧wa̧ rey Agripa-rü ji'äu, pä'inü̧: —Ya̧tȩ kärenä̧ pü̧, Felíx üti'inä̧ku̧,

¹⁵ Jerusarȩ́ ütawiyära̧'a̧ chi̧'chä̧ja̧'a̧, sacerdote tturuwotü'i̧nä̧, judío-ttü a̧ci̧a̧nu̧tu̧'i̧nä̧, jättepinä̧ku̧sä̧ jua̧u̧ru̧ kuä'ü ttikunä̧ wediyatü pä'ü.

¹⁶ Ja̧'wa̧nü̧ ja̧'a̧nä̧ pädinä̧u̧: ujutu Roma ttü̧ja̧mä̧, suronä̧ jȩä̧jä̧u̧'i̧nä̧, chutä suronä̧ jȩpä̧ji̧'i̧nä̧, jo̧mȩnü̧ adiu ttukuokuoka'anä̧mä̧, kuä'ü ttikunä̧mä̧ jȩpo̧ko̧tü̧jä̧, jü̧nä̧.

¹⁷ Ja̧'wa̧nü̧ jä̧ja̧'a̧ttü̧, po ichi'ä̧ji̧'ka̧mä̧, rekuo tta̧dä̧ro̧ka̧'a̧, kkoro mo̧ro̧ ruwo deäkänä̧ pä̧mä̧dü̧ we'inü̧sä̧ jua̧u̧ru̧ tti'kächa pä'ü.

¹⁸ Ja̧'wa̧nü̧ ja̧'a̧nä̧, kuä'ü ttikua pä'ü jä'epätümä̧, ttümä̧ suronä̧ jȩä̧ji̧ ji̧yȩtä̧ ttukuokuäkuotükü̧ pädäja'amä̧, yorisotä juiyina̧'a̧.

¹⁹ Ja̧'wa̧nü̧ ja̧jü̧ jueimä̧ jitütä ttü̧ä̧nä̧wa̧rü̧ tesetü wȩnȩtä̧ ja̧'wa̧ta̧nü̧ Jesú 'korujuo'ächinü̧rü̧, Pauru-mä̧ a̧'kua̧ra̧ pä'ü jiäutä ji̧na̧'a̧.

²⁰ Ttümä̧ pi̧yȩ tü'kü chieruwuönä̧ jä̧ku̧ Pauru-rü jä'epü ä̧ju̧kui̧nü̧sä̧, yottütä Jerusarȩ́-ttü̧ jo̧mȩnü̧ päi'ünä̧ ttukuokua pä'ü.

²¹ Ja̧'wa̧nü̧ ja̧'a̧nä̧ Pauru-mä̧ jä'epinü̧, tu̧ru̧wa̧ Emperador Césa-rütä, pi̧yȩ tü'kü päarü pä'ümä̧. Ja̧'wa̧nü̧ ji̧na̧'a̧ttü̧ kärenä̧ chü̧tä̧rä̧ku̧ jua'a wedarü pä'ü.

²² Ja̧'wa̧nü̧ ja̧'a̧, Agripa-mä̧ Feto-rü pä'inü̧: —Ttü'i̧nä̧ jua̧u̧ru̧, chä̧ju̧kua̧ pä'üsä. Päku, Feto-mä̧ pä'inü̧: —Yo̧i̧mo̧ro̧, kuä̧ju̧kua̧rü̧jä̧.

²³ Kkoro mo̧ro̧, Agripa-mä̧ Berenice-ku ruwo isode i̧so̧ka̧nä̧ dodepinä̧tü̧, tturuwoku, su̧ro̧do̧u̧ tturuwotüku ja̧'wa̧ta̧nü̧ ütawiyä ukuo isotüku, jü̧nä̧. Ja̧'wa̧nü̧ ja̧'a̧ Feto-mä̧, Pauru-rü tti'chächiyarü we'äji̧'ka̧,

²⁴ pä'inü̧: —Ru̧wa̧ rey Agripa ja̧'wa̧ta̧nü̧ chawaruwä, ukuo isotü pȩnȩ́ pȩjä̧tü̧: Jua̧u̧sä̧ chudo ppättäjäkumä̧. Judío-mä̧ o'katoi'ünä̧ Jerusarȩ́-ra̧'a̧ttü̧mä̧ ja̧'wa̧ta̧nü̧ porü Cesarea-ttü'i̧nä̧, yoriso kättädoka'a wottäkusä, pide toe'a pä'ümä̧;

²⁵ Ja̧'wa̧nü̧ ja̧'a̧nä̧ ttü tochomȩnä̧, toe'ächa pä'ümä̧ jui̧'a̧ ja̧'a̧nä̧, chutä jäepäjomȩttü̧, tu̧ru̧wa̧ Césa-rü weda pä'ü chu̧ju̧nä̧rä̧ku̧.

²⁶ Ja̧'wa̧nü̧ ja̧'a̧ttü̧, tu̧ru̧wa̧ emperado-rü chi̧wȩyu̧tä̧kuȩ adiu chu̧wo̧jui̧pü̧juiyünä̧ jä̧ku̧, ukutu kuä'katuku jo̧mȩ i'kächäjisä, ji̧nä̧somä̧, uku kuä'ka jo̧mȩ ru̧wa̧ rey Agripa, jä̧kuȩpä̧rä̧tu̧kua̧rü̧ pä'ü, adiu wȩyu̧tu̧ wedäkua'anü̧;

²⁷ Isopäi'ünä̧ ttü tochomȩnä̧ ja̧'a̧tä̧ jä̧ku̧sä̧, kärenä̧ pü̧rü̧ weda'anä̧, suronä̧ jȩä̧ji̧'i̧nä̧ jidäu juiyomȩnä̧mä̧.