Hechos 24 - Nuevo Testamento Uwotjüja

Pauru-mä̧, Felíx ä'ka jo̧mȩttü̧ ukuokuinü̧

¹ Ji̧mü̧tȩ mo̧ro̧ 'kuäopäji o'ka'a, sacerdote-tü̧ ttu̧ru̧wa̧, Ananía pä'ü mi̧kua̧ Cesarea-ra̧'a̧ rȩbȩwi̧pi̧nü̧, A̧ci̧a̧nu̧tu̧ wotüku ja̧'wa̧ta̧nü̧ ya̧tȩ abogado Tértulo pä'ü mi̧kua̧ku̧, jü̧nä̧. Pitümä̧ Gobernador ä'ka jo̧mȩ, Pauru-rü ütü'kü suronä̧ ttukuokua pä'ü ichi'inä̧tü̧.

² Ja̧'wa̧nü̧ ja̧'a̧ Pauru-rü tti'kächipäja'a, Tértulo-mä̧ kkä̧mä̧dü̧ suronä̧ ukuoku, Felix-rü pä'inü̧: —Ukuru eseusä, chu̧ru̧wa̧ Gobernador, wȩnȩ juiyünä̧ tü̧ja̧ku̧nä̧ kuadita'attü̧, wo̧juȩku̧nä̧ ttü̧ja̧rü̧ wekua'attü̧.

³ Ukuo i̧sa̧ Felíx, 'kuäopünä̧tä̧ ukurumä̧ esewätü̧jä̧, o'kajuiyünä̧ tü̧jo̧mȩ pünä̧mä̧.

⁴ Ja̧'wa̧nü̧ ja̧'a̧nä̧, rekuo chukuoku juiyäkua'anü̧ kuä̧ju̧kua̧tü̧ pä'ü jä'epüsä.

⁵ Pide ütü'kü wo̧jui̧'i̧nä̧tü̧jä̧ pi̧jä̧ o'kajuiyünä̧, ttü̧ja̧rü̧ surojuoepümä̧ ja̧'wa̧ta̧nü̧ judío-rü rowäkuäu 'kȩttȩkuä̧chü̧nä̧ aditü'i̧nä̧, nazarenos ttu̧ru̧wa̧ jü̧nä̧ aditü kue'ächü jȩa̧'a̧mä̧.

⁶ Juȩnȩ yabo päi'ünä̧ [Dio-rü ukuokuäkuäwode'i̧nä̧ ukuotoka'a suronä̧ jȩ'a̧ pä̧i̧yä̧u̧, 'chu'ädäjä'kotü ujuturu weü wȩnȩ weü'akuä̧ jȩta̧rü̧ pätäjäku.

⁷ Ja̧'wa̧nü̧ ja̧'a̧nä̧ su̧ro̧do̧u̧ ttu̧ru̧wa̧ Lisia, ujuruku pä̧i̧ku̧nä̧ ttu̧mü̧ttü̧ 'choipo'ächä̧jä̧u̧jä̧.

⁸ Ukutä jä̧'ȩpä̧rü̧ ä̧ju̧ku̧tä̧ ku̧wo̧juä̧kua̧jä̧,] pi̧yȩ pätü, isopäi'ünä̧ ja̧'a̧ pä'ümä̧.

⁹ Juȩnȩ kka̧kuä̧tü̧ judío-mä̧, iweye ja̧'wa̧nü̧tä̧ ja̧'a̧ pä'ü ppättädinä̧ku̧.

¹⁰ Ja̧'wa̧nü̧ ja̧'a̧ Gobernador-mä̧ Pauru-rü ukuokui pä'ü u̧mü̧nä̧ jȩpi̧nü̧ ja̧'wa̧nü̧ weäku Pauru-mä̧ pä'inü̧: —Ukumä̧ pi̧jä̧ ti̧rȩjä̧nä̧ juez jü̧nä̧ wekua'amä rekuo años ja̧'a̧ pä'ü wo̧juö̧, Eseunu̧, chütü'kümä̧, kuä'kattü ukuokusä,

¹¹ Ukutä jä̧'ȩpä̧rü̧ ku̧wo̧juä̧kua̧jä̧, ttü Dio-rü eseu ukuoku Jerusarȩ́-ra̧'a̧ku̧ chichäja̧'a̧ttü̧mä̧, ttü̧jä̧pü̧ttü̧nü̧ todäre mo̧ro̧tä̧ ja̧'a̧ pä'ümä̧.

¹² Ja̧'wa̧nü̧ jä̧ja̧'a̧mä̧, Dio-rü ukuokuäkuäwodettü'i̧nä̧, sinagogas odewiyättü'i̧nä̧, ji̧yȩtä̧ ütawiyättü'i̧nä̧ suronä̧ ukuoku, ttü̧ja̧rü̧ ttürowäwuönä̧ jȩcha̧'a̧mä̧ ttü̧'o̧kui̧'o̧ko̧ku̧ päjisä.

¹³ Ja̧'wa̧nü̧ ja̧'a̧ttü̧, pitü ttü̧ja̧, ttü chütü'kü jittäumä̧ ji̧yȩtȩ'i̧nä̧ jueünä̧mä̧ jo̧ka̧'a̧.

¹⁴ Ja̧'wa̧nü̧ ja̧'a̧nä̧ isopäi'ünä̧ pä'üsä, surojü esetü pätta'amä̧, tü̧tä̧mü̧ mi̧nä̧ ji̧nü̧ta'anü̧ Chä'o Dio-rümä̧ esetüsä, weäwä wȩnȩ päü'a̧kuä̧ ja̧'wa̧ta̧nü̧ profetas tti̧wȩyu̧ti̧nü̧ o'kajuiyünä̧ päü'a̧kuä̧, jü̧nä̧.

¹⁵ Ja̧'wa̧ta̧nü̧ Dio-nä̧mä̧ tta̧'ä̧rü̧sä̧, adiu jȩpä̧tü̧'i̧nä̧, suronä̧ jȩpä̧tü̧'i̧nä̧ yodojimä̧ ttottächäkuotü pä'ü.

¹⁶ Ja̧'wa̧nü̧ ja̧'a̧ttü̧, Dio ä'ka jo̧mȩttü̧'i̧nä̧, ttü̧ja̧ ttä'ka jo̧mȩttü̧'i̧nä̧ 'kuäopünä̧tä̧, chunä̧ surojü chȩnä̧ra̧mä̧ pä'oküsä.

¹⁷ Rekuo años jo̧mȩnä̧ kkoro rȩjȩra̧'a̧ kue'ächinü̧'ka̧, chi̧rȩjä̧ra̧'a̧ usurä isotürü ppädäkuäwä'i̧nä̧, ofrendas'i̧nä̧ iyü ichäjisä.

¹⁸ Ja̧'wa̧nü̧ pi̧yȩ jȩpü̧mä̧, weäwä wȩnȩ weü'akuä̧ surojü tükäu ikuäji̧'ka̧ jȩcha̧'a̧ Asia rȩjȩ ttü̧ja̧tä̧ tottinä̧ku̧sä̧, ttü̧ja̧rü̧ suronä̧ jȩpü̧ wocha'a'i̧nä̧ tottokoku pinü̧sä̧.

¹⁹ Juätü ja̧'a̧, ttü suronä̧ jȩchä̧ji̧ttü̧mä̧, pȩnȩ́ kuä'ka jo̧mȩ ichi'ü ji'äwajatümä̧.

²⁰ Ja̧'wa̧nü̧ jü̧ juiyüttü'i̧nä̧ pȩnȩ́ kka̧kuä̧tü̧ jittäu'anü̧ ja̧'a̧, judío ukuo isotü ttä'ka jo̧mȩ wottäjäku, juätü ttü suronä̧ jȩchä̧ji̧ pättäja pä'ü'i̧nä̧.

²¹ Ja̧'wa̧nü̧ ja̧'a̧nä̧, juorümä̧ ji̧yȩtȩtä̧ wopi'äjisä pä̧i̧ku̧nä̧: «wa'ü ikuinä̧tü̧rü̧, juätümä̧ ttottächäkuotü pä'ü chesetomȩttü̧ jȩ'kuä̧tu̧kuä̧ku̧sä̧,» jü̧nä̧.

²² Pi̧yȩ ä̧ju̧ku̧ kä'ädü, ttü̧ja̧rü̧ we'ü iku Felíx-mä̧, jo̧mȩnü̧ u̧wo̧jua̧'a̧ttü̧ pä'inü̧: —Su̧ro̧do̧u̧ ttu̧ru̧wa̧ Lisias ichomȩnä̧tä̧, pi̧yȩ tü'kü adiumä̧ tu̧wo̧juä̧tu̧kua̧jä̧.

²³ Ja̧'wa̧ta̧nü̧ Felíx-mä̧, su̧ro̧do̧u̧ ttu̧ru̧wa̧rü̧ we'ü kku̧ni̧nü̧, Pauru-mä̧ kärenä̧mä̧ ü̧'a̧'a̧nä̧, jua'akumä̧ tta̧ttä̧ra̧'a̧nä̧, awäruwärü'i̧nä̧ do'ächü tottünä̧.

²⁴ A̧'u̧kua̧'a̧tä̧ mo̧ro̧ 'kuäopäji o'ka'a, Felíx-mä̧ irekua Drusila-mä̧ judío isaju ja̧'a̧, Pauru-rü ä̧tȩpä̧'kotü ä̧ju̧kui̧nä̧tü̧, Jesú-ru tta̧'kua̧ wȩnä̧rä̧kuä̧wä̧ wȩnȩ ukuokua'a.

²⁵ Ja̧'wa̧nü̧ ja̧'a̧nä̧ Pauru-mä̧ adiwomȩnä̧ jȩpü̧ kkä̧kuä̧wä̧'i̧nä̧, surojuoepokomȩnä̧ kkä̧kuä̧wä̧'i̧nä̧, yodoji Dio ro̧ȩpä̧kuȩ'i̧nä̧ jiäwomȩnä̧ ye'i'ü, Felíx-mä̧ päinä̧ku̧: —Täkü täi, pä'äjita'anü̧tä̧ wochakujä̧.

²⁶ Ja̧'wa̧nü̧ ja̧'a̧nä̧ pätekua'anä̧mä̧, Felíx-mä̧, Pauru pärätä iyarü pä'ü tta̧'ä̧rü̧ jȩpi̧nü̧; ja̧'wa̧nü̧ ja̧'a̧ttü̧ jueipünä̧ ukuokuarü pä'ü woä'chinä̧ku̧.

²⁷ Ja̧'wa̧nü̧ ja̧'a̧tä̧mä̧ todäre años 'kuäopäji o'ka'a, Felíx-mä̧ uruwo iyipinü̧ Porcio Feto pä'ü mi̧kua̧rü̧. Ja̧'wa̧nü̧ ja̧'a̧nä̧ Felíx-mä̧ judío ttesewarü pä'ü, Pauru-rümä̧ kärenä̧ rütipinü̧.