Hechos 23 - Nuevo Testamento Uwotjüja

¹ Ja̧'wa̧nü̧ ja̧'a̧ Pauru-mä̧ ukuo isotü Sanedrín, pättä̧u̧ru̧ topünü̧, pä'inü̧: —Chawaruwä chü̧jä̧wa̧tü̧, kkoro juei juiyünä̧ amükuädü kkä̧'i̧jü̧sä̧ Dio ä'ka jo̧mȩttü̧, jitä pi̧yȩ mo̧ro̧bü päi'ünä̧.

² Ja̧'wa̧nü̧ ja̧'a̧ sacerdote-tü̧ ttu̧ru̧wa̧, Ananía pä'ü mi̧kua̧mä̧ ippeyänä̧ pȩjä̧tü̧rü̧, Pauru-rü änä̧ kuättarü pä'ü we'inü̧.

³ Ja̧'wa̧nü̧ pä'a ä̧ju̧ku̧ Pauru-mä̧ päinä̧ku̧: —¡Ukumä̧ Dio-tä kuä̧kua̧jä̧, yaparetü jȩä̧'chä̧kuä̧wä̧ i̧sa̧! ye, ukumä̧ wȩyu̧kuä̧ wȩnȩ pä'aku ro̧kuȩpä̧ttü̧ pä'ü wȩ'ä̧wa̧ kua'anä̧, ¿toku pä'ü weäwä wȩnȩ weoka'aku kuättattü pä'ümä̧ wekua'ajä̧ttü̧?

⁴ Juȩnȩ kka̧kuä̧tü̧mä̧ pä'inä̧tü̧: —¿Ja̧'wa̧nü̧ ku̧ra̧wä̧ra̧'a̧ tä̧jí̧, Dio ütinä̧ku̧ sacerdote-tü̧ ttu̧ru̧wa̧rü̧mä̧?

⁵ Pättiyäku, Pauru-mä̧ pä'inü̧: Chawaruwä chü̧jä̧wa̧tü̧, sacerdote-tü̧ ttu̧ru̧wa̧mä̧kü̧kü̧ pä'äjisä; wȩyu̧kuä̧ wȩnȩmä̧ pä'a: «Kuawaruwä ttu̧ru̧wa̧rü̧mä̧ suronä̧mä̧ päkuä'chä,» jü̧nä̧.

⁶ Jua̧u̧ pä'ü kä'ädü, yotukunä̧mä̧ saduceo wotü'i̧nä̧, kkorotümä̧ Fariseo wotü'i̧nä̧ ji̧yä̧ku̧ Pauru-mä̧ pä̧i̧ku̧nä̧ pä'inü̧: —Chawaruwä chü̧jä̧wa̧tü̧, ttümä̧ fariseo wotü i̧sa̧sä̧ ja̧'wa̧ta̧nü̧ jua̧u̧ esetätütä tti̧tti̧sä̧; Ja̧'wa̧nü̧ ja̧'a̧ttü̧ wa'ü ikuinä̧tü̧mä̧ ttottächäkuotü pä'ü tta̧dä̧ro̧mȩttü̧ ro̧ttȩpa̧ pä'ü 'chuttädäjäkusä.

⁷ Ja̧'wa̧nü̧ pä'a ä̧ju̧ku̧ fariseo wotü'inä̧, saduceo wotü'i̧nä̧ pä'äkuäwinä̧tü̧. Ja̧'wa̧ta̧nü̧ ttü̧ja̧ ka̧ka̧kuä̧jä̧tü̧mä̧ 'kȩ'ȩkuä̧chi̧nä̧tü̧.

⁸ Jua'amä̧, saduceo wotümä̧ 'korujuo'ächätümä̧ tto'ächokotü, Á̧gȩrȩ'i̧nä̧ toa'a, epíritu-tu̧'i̧nä̧ toa'a pä'ü ttesetoka'attü̧. Pärokua'aku, fariseo wotümä̧ jua̧u̧ o'kajuiyünä̧tä̧ tteseta'attü̧.

⁹ Ja̧'wa̧nü̧ ja̧'a̧ rü̧ȩnä̧ wopinä̧tü̧; ja̧'wa̧ta̧nü̧ Fariseo wotü, weäwä wȩnȩ wo̧juȩkuä̧ isotüttü, ä̧rä̧mi̧'ü̧ pä'inä̧tü̧: —Pidemä̧ suronä̧mä̧ jȩpo̧kü̧ päji ja̧'a̧; Epíritu ja̧ pä'ü'i̧nä̧, á̧gȩ ja̧ pä'ü'i̧nä̧ ttukuokuäjittümä̧. Dio-rümä̧ to'ija̧'a̧ku̧mä̧ pätü juiyü'anü̧ ja̧'a̧.

¹⁰ Ja̧'wa̧nü̧ ja̧'a̧nä̧ ttü̧ja̧mä̧ yaboku wottiyäku, su̧ro̧do̧u̧ ttu̧ru̧wa̧mä̧, Pauru-rü kuä'ü ttiku 'kua̧ra̧'a̧ pä'ü ye'eku, su̧ro̧do̧u̧ru̧ wopo'inü̧ juorü rä'epü iku, pä'äjita'anü̧ kärenä̧ra̧'a̧ ttȩpa̧rü̧ pä'ü.

¹¹ Kkoro yodó, Tu̧ru̧wa̧mä̧ Pauru-rü i̧jȩku̧, pä'inü̧: «Pauru kua̧'kua̧ tta̧kuȩkuä̧, porü Jerusarȩ́-ttü̧ Ttü chütü'kü jikuäwäjita'anü, Roma ütawiyättü'i̧nä̧ kukuokua pä'ü rekuä rü̧ja̧'a̧.»

Pauru-rü kuä'ü ttikua pä'ü ukuoku kku̧ni̧nä̧tü̧

¹² Kkoro mo̧ro̧, Pauru-rü kuä'ü ttikua pä'ü amükuädü kku̧ni̧nä̧tü̧, suronä̧ pä'äu kku̧nu̧, kuä'ü ttikuomȩbü päi'ünä̧ ajiya'i̧nä̧, ttu̧kuȩ'i̧nä̧ ttüku juiya pä'ü.

¹³ Pa̧'a̧nü̧ pä'äu kku̧nä̧jä̧tü̧mä̧, cuarenta-nü̧ jo̧mȩnä̧ winä̧tü̧.

¹⁴ Juätümä̧, sacerdote-tü̧'i̧nä̧, a̧ci̧a̧nu̧tu̧'i̧nä̧ ttä'ka jo̧mȩ 'chä̧wi̧'ü̧, pä'inä̧tü̧: —Ujutumä̧, suronä̧ pä'äu kku̧nä̧jä̧tü̧jä̧, tu̧kuȩ ta̧do̧chi̧'a̧ pä'ü, Pauru-rü kuä'ü tikuomȩbü päi'ünä̧.

¹⁵ Jitämä̧ ukutu'i̧nä̧, ütawiyä ukuo isotüku yo̧mȩtȩnä̧ jä'epätukui su̧ro̧do̧u̧ ttu̧ru̧wa̧rü̧, yo̧i̧mo̧ro̧ kuä'katuku jo̧mȩ i'kächarü, kkorojuei jä̧ttȩpä̧ra̧rü̧ 'kua̧rü̧nä̧, ujutumä̧ jo̧mȩnü̧ tü̧ja̧kuä̧kuo̧tü̧jä̧ ichi'äkua'a ä'kanä̧ kuä'ü tikuarü pä'ümä̧.

¹⁶ Ja̧'wa̧nü̧ ja̧'a̧nä̧ Pauru ijäwaju kki̧tti̧mä̧, jua̧u̧ ttukuokua'a ä̧ju̧kuä̧ji̧'ka̧, kärenä̧ra̧'a̧ do'ächächü i̧ya̧rü̧ ji'äu 'chi̧nü̧.

¹⁷ Jua̧u̧ ä̧ju̧ku̧, Pauru-mä̧ su̧ro̧do̧u̧ tturuwotüttü ya̧tȩrü̧ wopo'ü pä'inü̧: Pide mü̧ä̧ya̧rü̧ ku̧ru̧wa̧ ü̧ja̧'a̧ o'ipi, ji̧yȩtȩ jiäwarü.

¹⁸ Jua̧u̧, su̧ro̧do̧u̧ ttu̧ru̧wa̧mä̧, jua'a yabo u̧ru̧wa̧ comu̧da̧te pättäku ü̧ja̧'a̧ o'ipäji̧'ka̧, 'chä̧wi̧'ü̧ pä'inü̧: —Kärenä̧ pü̧ Pauru-mä̧, ttürü wopäji'ka̧ jäepäjäkusä, pide mü̧ä̧ya̧rü̧ kuä'ka jo̧mȩ chi'kächiyarü pä'ü, ukuru ji̧yȩtȩ jiäwa'anä̧.

¹⁹ Jua̧u̧ comu̧da̧te pättäkumä̧, mü̧ä̧ya̧rü̧ u̧mü̧nä̧ 'chu'ädo'ü o'ipächü, jä'epü ä̧ju̧kui̧nä̧ku̧: —¿Däjé jikuäwa päkuäjättüttü̧? pä'ü.

²⁰ Mü̧ä̧ya̧mä̧ pä'inü̧: —Judío-mä̧ ukuokuäkuäu kku̧nä̧jä̧tü̧, ukuru yo̧i̧mo̧ro̧ jättepa pä'ü, ukuo isotü Junta Suprema ttä'ka jo̧mȩ Pauru-rü rä'epü ku̧ju̧ni̧ya̧tü̧ pä'ü. Jua̧u̧ru̧ yaboku jä̧ttȩpä̧ra̧ pä'ü jä̧'i̧nü̧'a̧nü̧,

²¹ ja̧'wa̧nü̧ ja̧'a̧nä̧ kuesetätü, täkü cuarenta-nü̧ jo̧mȩnä̧ suronä̧ ukuokuäkuäu kku̧nä̧jä̧tü̧, ttu̧kuȩ'i̧nä̧, ajiya'i̧nä̧ ttau juiya pä'ü, Pauru-rü kuä'ü ttikuomȩbü päi'ünä̧. Jitämä̧ uku wekua'anä̧tä̧ tta̧'a̧rä̧tü̧.

²² Ja̧'wa̧nü̧ ja̧'a̧, jua̧u̧ comu̧da̧temä̧, mü̧ä̧ya̧rü̧ we'ü ikuinü̧, pi̧yȩ tü'kümä̧ ya̧tȩrü̧'i̧nä̧ jiäwoka'a ä̧ppü̧ti̧'ü̧nä̧tä̧ ji'äu kkä̧nü̧.

Pauru-rü Felíx ü̧ja̧'a̧ku̧ wettinü̧ wȩnȩ

²³ Ja̧'wa̧nü̧ ji̧yä̧ku̧, comu̧da̧temä̧, i̧dȩa̧'a̧nä̧ we'ätü capita̧tü̧ ta̧ju̧ru̧ wopo'äji̧'ka̧, we'inü̧ dosciento-nü̧ jo̧mȩnä̧ su̧ro̧do̧u̧ru̧mä̧, cabayu-tü̧mä̧ setenta-nü̧ jo̧mȩnä̧, dakuodiyä ȩpä̧tü̧mä̧ dosciento-nü̧ jo̧mȩnä̧ pojopü ttu̧ju̧ni̧ya̧rü̧, Cesarea ütawiyära̧'a̧, yodó las nueve päi'omȩnä̧ rättopäkua'a ja̧'a̧.

²⁴ Ja̧'wa̧ta̧nü̧, Pauru-rü ttȩpä̧kua̧ cabayurü'i̧nä̧ jo̧mȩnü̧ jȩpü̧ ttu̧ju̧nu̧nä̧ we'ü kkä̧nü̧, kkorojuei 'kuäopü juiyünä̧ Gobernador Felíx ä'ka jo̧mȩ ttȩpa̧rü̧ pä'ü we'inü̧,

²⁵ juätükumä̧ kuyäru isojä, pa̧'a̧nü̧ pä'a we'inü̧:

²⁶ «Ttü Claudio Lisias, uku Gobernador Felix-rü ukuo i̧sa̧rü̧: Te'äusä.

²⁷ Judío-mä̧ pide ttü̧ja̧sa̧rü̧ 'chu'ädäjä'kotü kuä'ü ttikuarü pä'ü jȩtta̧'a̧, Roma ttü̧ja̧sa̧ ji̧yä̧ku̧, chumüwäyotü su̧ro̧do̧u̧ku̧ 'chä̧wi̧'ü̧, juätü ttu̧mü̧ttü̧ rä'epü chikuäjäku.

²⁸ Ja̧'wa̧nü̧ jä̧ja̧'a̧, däjé jȩä̧jo̧mȩnä̧ jȩttä̧ku̧ttü̧ pä'ü, ukuo isotü Junta Suprema ttä'ka jo̧mȩ chȩpä̧ja̧'a̧mä̧,

²⁹ Jitütä wettäu jäwä wȩnȩnä̧ jä̧ja̧'a̧; ja̧'wa̧nü̧ ja̧'a̧nä̧ wȩnȩmä̧ jui'äji, kuä'ü ttikuarü pä'ümä̧ ja̧'wa̧ta̧nü̧ kärenä̧ ü̧'a̧ pä'ü'i̧nä̧, juiya'a.

³⁰ Ja̧'wa̧nü̧ ja̧'a̧nä̧ Judío kuä'ü ttikuarü pä'ü jȩtta̧'a̧ wo̧jui̧'ä̧ji̧'ka̧, ukurutä wedäku; ja̧'wa̧ta̧nü̧ jua̧u̧ ütü'kü suronä̧ ukuokuätürümä̧, kuä'ka jo̧mȩttü̧ ttukuokua pä'ü wȩdä̧jä̧u̧. Adiutä 'kuä'opi.»

³¹ Ja̧'wa̧nü̧ ja̧'a̧ttü̧ su̧ro̧do̧u̧mä̧, ttu̧ru̧wa̧ weäjita'anü̧, Pauru-rü yodó ȩmi̧pi̧nä̧tü̧ Antípatris ä'ka jo̧mȩku̧.

³² Ja̧'wa̧nü̧ ja̧'a̧ kkoro mo̧ro̧mä̧, su̧ro̧do̧u̧ rȩjȩnä̧ 'chä̧jä̧tü̧mä̧ ppa̧'ä̧chi̧nä̧tü̧ ttaditäwomȩku̧, suro cabayu-tü̧nä̧ 'chä̧jä̧tü̧tä̧ Pauru-rü ttȩpa̧'a̧nä̧.

³³ Ja̧'wa̧nü̧ ja̧'a̧ Cesarea-ra̧'a̧ rȩbȩwi̧pü̧mä̧, gobernado-rü wȩyu̧kuojä iyinä̧tü̧ ja̧'wa̧ta̧nü̧ Pauru-rü'i̧nä̧ jua̧u̧ku̧tä̧ iyipü kkä̧nü̧.

³⁴ Ttiyojä ukuoku kä'ädü, Pauru-rü jä'epinü̧ idepiyumä̧ tȩnȩ́ ja̧ pä'ü; ja̧'wa̧nü̧ ja̧'a̧ Ciricia i̧sa̧ ja̧'a̧ pä'ü wo̧jui̧'ü̧mä̧,

³⁵ Päinä̧ku̧: —Ukuru ukuokuätü ttukuokuomȩnä̧tä̧ chä̧ju̧kuä̧kua̧jä̧. Jua̧u̧nü̧ o'ka'a, Herode aditinodenä̧ tta̧ttä̧rü̧nä̧ weinä̧ku̧.