Hechos 22 - Nuevo Testamento Uwotjüja

¹ «Chawaruwä chü̧jä̧wa̧tü̧, ttütä chütü'kü chukuokua'a ä̧ju̧kuä̧tu̧kui̧.»

² Hebreo tti̧wȩnȩnä̧ ukuokua'a ä̧ju̧ku̧, jua'a yabonü̧ 'koruchi'ü ttä̧ju̧kua̧'a̧, Pauru-mä̧ päinä̧u̧:

³ Ttümä̧ isopäi'ünä̧ judío i̧sa̧sä̧, Ciricia rȩjȩnä̧ttü̧, Taso ütawiyättü uwäpächinü̧sä̧ ja̧'wa̧nü̧ ja̧'a̧nä̧ pi̧yȩtä̧ ütawiyättü büó juo'inü̧sä̧, Gamalie u̧wo̧juȩti̧nä̧ku̧sä̧, tü̧tä̧mü̧ mi̧nä̧ ttü̧ji̧nü̧nä̧ kkä̧kuä̧wä̧ i̧sa̧sä̧, tü̧ä̧nä̧wa̧ Dio-rü esetü Ä'kuoyäunü̧ kkü̧sä̧, jitä pi̧yȩ pä̧nä̧ ukutu o'katoi'ünä̧ ku̧jä̧tu̧ku̧ta'anü̧.

⁴ Ä'kojimä̧ pi̧yȩ jareü wȩnȩnä̧ kka̧kuä̧tü̧rü̧mä̧, 'chu'ädü, kärenä̧ rütä'chü jȩpi̧nü̧sä̧, u̧mä̧tü̧rü̧'i̧nä̧, nä̧tü̧rü̧'i̧nä̧, totte'ächünä̧.

⁵ Sacerdote ttu̧ru̧wa̧'i̧nä̧, judío-ttü a̧ci̧a̧nu̧ wotü'i̧nä̧ topinä̧tü̧, pi̧yȩ pädümä̧. Juätütä ttiyinä̧ku̧sä̧ wȩyu̧kuojämä̧, Damasco-ttü Jesucrito-rü esetätürü, 'chudädäja pä'ümä̧, porü Jerusarȩ́-ttü̧ ro̧ttȩpa̧tü̧ pä'ü.

⁶ Ja̧'wa̧nü̧ amükuädü kkä̧nü̧, Damasco ütawiyära̧'a̧ tü'künä̧nü̧ pädi'omȩnä̧, kkä̧wa̧ jueü kkü̧rü̧ päi'ä'ijü juei isomȩ kkü̧rü̧, chu̧ni̧chä̧ra̧'a̧nä̧ mo̧ro̧jä̧ra̧'a̧ttü̧ tȩya̧u̧ kkȩdȩ'i̧nä̧ku̧sä̧, jakuätä pädi'ünä̧.

⁷ Ja̧'wa̧nü̧ päi'omȩnä̧, rȩjȩ ma̧dä̧ma̧'a̧ttü̧, rä̧mi̧pi̧nä̧ku̧sä̧: Sauro, Sauro, ¿tta̧'a̧nü̧ pä'ü ttürümä̧, kü̧sä̧ra̧'a̧ jä̧ttü̧?

⁸ Päiyäku, jä'epinü̧sä̧: ¿Dí kua'ajä̧ttü̧, Chu̧ru̧wa̧? pädäku ädätinü̧: Ttü ru̧kuä̧rä̧ku̧mä̧, Jesú-sä Nazare i̧sa̧sä̧.

⁹ Ttüku 'chä̧tü̧mä̧, isopäi'ünä̧ tȩya̧u̧mä̧ totta'anä̧; i̧wȩnȩ rä̧mi̧pü̧nä̧ ä̧ju̧kuo̧ko̧tü̧ pinä̧tü̧.

¹⁰ Ja̧'wa̧nü̧ jä̧ku̧ pä'inü̧sä̧: «¿Chu̧ru̧wa̧, däjé jȩchä̧kua̧'a̧jä̧ttü̧? Chu̧ru̧wa̧mä̧ ädätinä̧ku̧sä̧: Ä̧rä̧mi̧'ü̧, Damasco ütawiyänä̧ do'ächi. Jua'attü o'kajuiyünä̧ jiäkuäwäkua'a jȩ'kuä̧kuȩmä̧.»

¹¹ Tȩya̧u̧ kkȩdȩ'o̧mȩnä̧ chä̧to̧kä̧chi̧'ä̧ja̧'a̧, ttütäku ichäjätümä̧ chu̧mü̧nä̧ 'chu̧ä̧rä̧nü̧ ttȩpi̧nä̧ku̧sä̧ Damasco ütawiyära̧'a̧ku̧mä̧.

¹² Juȩnȩmä̧ kki̧nü̧, ya̧tȩ Ananía pättäku, Dio-rü rü̧ȩnä̧ ukuotü kkä̧nü̧, Moisé weäwä wȩnȩ'i̧nä̧ ukuotü kkü̧; jua̧u̧ ütü'kümä̧ adiutä ukuokuinä̧tü̧, judío juȩnȩ Damasco-nä̧ kka̧kuä̧tü̧ o'katoi'ünä̧.

¹³ Ananía-mä̧ ttürütä topü ichäji̧'ka̧, ichi'ü pä'inü̧: Cha̧wa̧ru̧wa̧ chi̧jä̧wa̧ Sauro, pä'äjita'anü̧ kui'äre topi. Päomȩnä̧, ji̧yȩtä̧ hora-nä̧ topinü̧sä̧.

¹⁴ Ja̧'wa̧ta̧nü̧ pä'inü̧: Tü̧tä̧mü̧ mi̧nä̧ Ttü̧ä̧nä̧wa̧ Dio-mä̧ ȩmä̧jä̧ku̧jä̧, Churutä pä̧wä̧rü̧jü̧ ku̧wo̧jua̧ pä'ü'i̧nä̧, adiwä i̧sa̧rü̧ to'kua pä'ü'i̧nä̧ ja̧'wa̧ta̧nü̧ chutä i̧wȩnȩ kuä̧ju̧kua̧ pä'ü'i̧nä̧, jü̧nä̧.

¹⁵ Ja̧'wa̧nü̧ ja̧'a̧ttü̧, ukumä̧ jua̧u̧ ütü'kü, pi̧jä̧ ttü̧ja̧rü̧ o'katoi'ünä̧ ji̧kuä̧wä̧kua̧jä̧, to'kuäji'i̧nä̧, kuä̧ju̧kuä̧ji̧'i̧nä̧, jü̧nä̧.

¹⁶ Ja̧'wa̧nü̧ ja̧'a̧ttü̧, yabonü̧ rekuomä̧ tta̧kuä̧ro̧ka̧'a̧, ä̧rä̧mi̧'ü̧, bautizo jȩpä̧kuä̧u̧, Ku̧ru̧wa̧rü̧ ajuäkuäunü̧ jä'epi surojü jȩpü̧ ikuaku.

¹⁷ Ja̧'wa̧nü̧ ja̧'a̧ Jerusarȩ́ ütawiyära̧'a̧ ppa̧'ä̧chä̧ji̧'ka̧, Dio-rü ukuokuäkuäwodenä̧, Dio-rü ukuoku chü̧'a̧'a̧ i̧jȩkuä̧cha̧'a̧ttü̧,

¹⁸ Chu̧ru̧wa̧rü̧ tochäku, päinä̧ku̧sä̧: Jurunä̧, rä'opächi Jerusarȩ́ ütawiyättümä̧, Ttü chütü'kü jikuäumä̧ ttesetokäkua̧jä̧.

¹⁹ Päku chädätinä̧ku̧: Chu̧ru̧wa̧, juätümä̧ wo̧juä̧tü̧, ukuru esetätürü, ttü kärenä̧ 'chu'äde'ü sinagoga odewiyättü kuäkuättünä̧ jȩchi̧nü̧mä̧,

²⁰ Ja̧'wa̧ta̧nü̧ uku kui̧wȩnȩ jiäkuäwä i̧sa̧ Esteba̧-rü̧ kuä'ü ttikuomȩ'i̧nä̧, kki̧nü̧sä̧, kuä'ü ttikua'a ppä̧'ä̧dä̧rü̧ ja̧'wa̧ta̧nü̧ kuä'ü ikuätü ttiärȩti̧yu̧'i̧nä̧ tta̧'ä̧ri̧nü̧sä̧.

²¹ Päda'anä̧ Chu̧ru̧wa̧mä̧ päinä̧ku̧sä̧: Täkü täi, judío pokotü tti̧rȩjä̧ra̧'a̧, otó wedäkujä̧.

Pauru-rü, su̧ro̧do̧u̧ ttu̧ru̧wa̧ jȩi̧nü̧ wȩnȩ

²² Ja̧'wa̧nü̧ ja̧'a̧mä̧, juȩnȩbütä ä̧ju̧kui̧'i̧pü̧; pä̧i̧ku̧nä̧ wopi'inä̧tü̧: «¡Pide ttü̧ja̧sa̧ ü̧ja̧ pä'ümä̧ juiya'a! ¡pi̧jä̧ttü̧mä̧ si'epü ikuirü!», jü̧nä̧.

²³ Ja̧'wa̧nü̧ wopü kkä̧nü̧mä̧, tti̧ä̧rȩti̧yu̧ ikuäu'i̧nä̧, rȩjȩ i̧sa̧ppȩ'i̧nä̧ ju'tojuku ikuäu wopinä̧tü̧,

²⁴ Su̧ro̧do̧u̧ ttu̧ru̧wa̧mä̧, Pauru-rü kärenä̧ jakuä do'ädo'ü iku, tta̧'a̧nü̧ pä'ü ja̧'wa̧nü̧ wottarü ja̧ pä'ü, jä̧'ȩpä̧rü̧ kkä̧nü̧ kuäkuättarü pä'ü we'inü̧.

²⁵ Ja̧'wa̧nü̧ ja̧'a̧ kuäkuättarü pä'ü nü̧'kü ttu̧ju̧nä̧jä̧ku̧, Pauru-mä̧ su̧ro̧do̧u̧ ttu̧ru̧wa̧ juȩnȩ kkü̧rü̧ pä'inü̧: ¿Roma ttü̧ja̧sa̧rü̧mä̧ kuäkuätta pä'ü ja̧'a̧, jueces pä̧ttä̧u̧ wettoka'anä̧mä̧?

²⁶ Pä'a ä̧ju̧kuo̧'ü̧, su̧ro̧do̧u̧ ttu̧ru̧wa̧mä̧, jua'a yabo ttu̧ru̧wa̧rü̧ 'chä̧wi̧'ü̧ pä'inü̧: ¿Däjé jȩ'kuä̧kua̧jä̧ttü̧? Pidemä̧ Roma ttü̧ja̧sa̧ ja̧'a̧mä̧.

²⁷ Ja̧'wa̧nü̧ ja̧'a̧, jua̧u̧ ttu̧ru̧wa̧mä̧ Pauru-rü 'chä̧wi̧'ü̧ pä'inü̧: ¿Jü̧do, isopäi'ünä̧ ukumä̧ Roma ttü̧ja̧sa̧ jä̧? Päku, Pauru-mä̧ pä'inü̧: A̧'a̧.

²⁸ Päiyäku, su̧ro̧do̧u̧ ttu̧ru̧wa̧mä̧ pä'inü̧: Ttümä̧, rü̧ȩnä̧ mitäwinü̧sä̧ Roma ttü̧ja̧sa̧ pädi'a pä'ümä̧. Päku, Pauru-mä̧ ädätinü̧: Ttümä̧ pi̧jä̧ttü̧tä̧ uwäpächinü̧sä̧.

²⁹ Ja̧'wa̧nü̧ päomȩnä̧, Pauru-rü kuäkuätta pä'äjätümä̧ kättädi'inä̧ku̧; Chutä su̧ro̧do̧u̧ ttu̧ru̧wa̧'i̧nä̧ ye'ekue'inü̧, kärenäsa̧nä̧ ttü̧nü̧'karü pä'ü we'äji̧'ka̧.

Pauru-rü, judío tturuwotü ttä'ka jo̧mȩ ȩpi̧nä̧tü̧

³⁰ Kkoro mo̧ro̧ päi'äja'a, su̧ro̧do̧u̧ ttu̧ru̧wa̧mä̧, Pauru-rü tta̧'a̧nü̧ pä'ü jȩpü̧ wottäja pä'ü, adiu u̧wo̧jua̧ pä'ü, nu̧'käwäjä̧sa̧ ejädü ttikunä̧ we'inü̧. Ja̧'wa̧nü̧ jȩpü̧, sacerdote tturuwotürü'i̧nä̧, judío tturuwotürü'i̧nä̧, ä̧tȩpä̧ji̧'ka̧, Pauru-rümä̧, juätü ttä'ka jo̧mȩ rä'epü ttu̧ju̧nu̧nä̧ we'inü̧.