Hechos 21 - Nuevo Testamento Uwotjüja

Pauru Jerusarȩ́-ra̧'a̧ i̧'chi̧nü̧ wȩnȩ

¹ Ja̧'wa̧nü̧ ja̧'a̧ tawaruwä ti̧jä̧wa̧tü̧ttü̧ 'kȩ'i̧pä̧chü̧ Cos ütawiyära̧'a̧ku̧ jueünä̧ 'chi̧nä̧tü̧jä̧, jua̧u̧nü̧ o'ka'a kkoro mo̧ro̧mä̧ Rodas kkä'ko i̧sä̧sa̧ku̧ 'chi̧nä̧tü̧jä̧, juorü kkä̧nü̧tä̧ Pátara ütawiyänä̧ rȩbȩwi̧nä̧tü̧jä̧.

² Ja̧'wa̧nü̧ jä̧ja̧'a̧ juorümä̧ Fenicia rȩjȩra̧'a̧ 'chä̧'ka woi'kanä̧ pȩjä̧mi̧nä̧tü̧jä̧.

³ 'Kuätopomȩnä̧, Chipre kkä'ko i̧sä̧sa̧mä̧ tieruwa'akunä̧ kki̧'a̧'a̧nä̧, Siria rȩjȩra̧'a̧ku̧ 'chi̧nä̧tü̧jä̧. Ja̧'wa̧nü̧ ja̧'a̧nä̧, woi'kamä̧ Tiro ütawiyä ttawaränä̧ rä̧mä̧di̧na̧'a̧, juȩnȩ ttiäre wȩnä̧dü̧ ttikua pä'ü.

⁴ Juorümä̧ Jesucrito-rü esetätürü po̧kui̧pü̧, juätütäku kki̧'i̧'o̧po̧'i̧nä̧tü̧jä̧ kko̧ro̧mü̧ttü̧nü̧ todäre mo̧ro̧ jo̧mȩnä̧tä̧; ja̧'wa̧nü̧ ja̧'a̧ juätümä̧, Epíritu jiäwä̧u̧, Pauru-rü ji'äwinä̧tü̧ Jerusarȩ́-ra̧'a̧ i̧'chü̧ juiya pä'ü.

⁵ Ja̧'wa̧nü̧ ja̧'a̧, jua̧u̧ mo̧ro̧ 'kuäopäji o'ka'a, jua̧u̧ ütawiyättü rä'opinä̧tü̧jä̧ o'katoi'ünä̧, ppo̧'ä̧tü̧'i̧nä̧, nä̧tü̧'i̧nä̧, jü̧nä̧. Ja̧'wa̧nü̧ jä̧ja̧'a̧ rȩba̧ttü̧ tiwe'kiyunä̧ kkä̧mä̧dü̧ Dio-rü ukuokuinä̧tü̧jä̧.

⁶ Jua̧u̧ o'ka'a te'äwi'ipütä woi'kanä̧ tü̧'ä̧mä̧da̧'a̧nä̧, juätümä̧ ttojusodera̧'a̧ku̧ ppa̧'ä̧chi̧nä̧tü̧.

⁷ Ja̧'wa̧nü̧tä̧ ji̧na̧'a̧ ajenä̧ kuetächäjimä̧. Tiro-ttü pȩjä̧mü̧ i̧wä̧jä̧tü̧mä̧ rü̧jä̧mi̧nä̧tü̧jä̧ Tolemaida ütawiyänä̧. Ja̧'wa̧nü̧ ja̧'a̧, juorümä̧ tawaruwä tü̧jä̧wa̧tü̧rü̧ te'äwäjä'kotü, juätütäku ya'ute mo̧ro̧ kki̧'i̧'o̧po̧'i̧nä̧tü̧jä̧.

⁸ Kkoro mo̧ro̧mä̧, Pauru'i̧nä̧, jua̧u̧tä̧ku̧ kue'ächätü'i̧nä̧ rä'opinä̧tü̧jä̧, Cesarea ütawiyära̧'a̧ku̧. Jua'attümä̧ Felipe Jareü Wȩnȩ jiäkuäwä i̧sa̧ ojusodenä̧ rȩbȩä̧kuä̧wä̧jä̧'kotü kka̧kui̧nä̧tü̧jä̧. Jua̧u̧mä̧ Apótore-rü ppä'ädä̧rä̧'i̧jä̧tü̧, sietenü̧ wotü i̧sa̧ ji̧na̧'a̧.

⁹ Felipe-mä̧ i̧tti̧mü̧ nä̧tü̧ pa̧ja̧kuä̧nü̧ wotürü, uborü jerupätürü kku̧nä̧ri̧nü̧, profeta-tü̧ jü̧nä̧ ji'äwätürü.

¹⁰ Täkü rekuonä̧nü̧ mo̧ro̧ ttü̧ja̧kuä̧ji̧ o'ka'a, Judea rȩjȩra̧'a̧ttü̧ ichinü̧, ya̧tȩ profeta wa̧, Agabo pä'ü mi̧kua̧.

¹¹ Jua̧u̧mä̧ ujuturu topü i̧chä̧ji̧'ka̧, Pauru äkäsäya ȩmo̧po̧'ü̧, juäyanä̧tä̧ u̧mü̧pi̧yä̧'i̧nä̧, i̧jä̧pi̧yä̧'i̧nä̧ nü̧'käwo'ü pä'inü̧: Epíritu Sa̧tu̧mä̧ pa̧'a̧nü̧ pä'ü, piya u̧ru̧wa̧rü̧mä̧ Jerusarȩ́-ra̧'a̧ i̧'chi̧'o̧mȩnä̧mä̧ Judío-mä̧ pa̧'a̧nü̧ nü̧'kü, judío pokotürü iyü tti̧kuä̧kua̧ pä'ü.

¹² Ja̧'wa̧nü̧ pä'a ä̧ju̧ku̧, ujutu'i̧nä̧, juȩnȩ Cesarea ütawiyä ttü̧ja̧'i̧nä̧, Pauru-rümä̧ Jerusarȩ́ ütawiyära̧'a̧ku̧mä̧ kui̧'chü̧ juiyü'anü̧ ja̧'a̧, pä'ü ajuäkuäunü̧ jätepa'anä̧,

¹³ Pauru-mä̧ adätinä̧u̧jä̧: —¿Tta̧'a̧nü̧ pä'ü ajuäkuäwätüjä̧ttü̧, ttü'i̧nä̧ cha̧'kua̧ tta̧dȩku̧nä̧? Ttümä̧ Jerusarȩ́-ra̧'a̧ttü̧mä̧, suro ttü̧nü̧'kattütämä̧ pä'oküsä, Tu̧ru̧wa̧ Jesú i̧mi̧nä̧mä̧ wa'ü'i̧nä̧ chikua pä'üsä.

¹⁴ Jitäwomȩnä̧ üarodä̧u̧, kä'ädi'ü pätinä̧ku̧: Jua̧u̧nu̧mä̧ «Tu̧ru̧wa̧rü̧ pä̧wä̧rü̧jo̧mȩnä̧tä̧ 'kuäopakujä̧.»

¹⁵ Ja̧'wa̧nü̧ jü̧ mo̧ro̧ 'kuäopäji o'ka'a, jo̧mȩnü̧ jȩpi̧'i̧pü̧ Jerusarȩ́ ütawiyära̧'a̧ 'chi̧nä̧tü̧jä̧.

¹⁶ Ti̧'cho̧mȩnä̧ Cesarea ütawiyättü yotukunä̧ Jesucrito-rü esetätü'i̧nä̧ ichinä̧tü̧, Mnasón-rü̧'i̧nä̧ o'ipü, ojusodenä̧ ti̧rȩbȩwi̧yä̧kua̧rü̧, Chipre ttü̧ja̧sa̧, täkü rekuo Jesucrito-rü esetinü̧rü̧.

Pauru, Sa̧ti̧a̧ku̧rü̧ do'ächü i̧'chi̧nü̧ wȩnȩ

¹⁷ Jerusarȩ́ ütawiyära̧'a̧ ti̧'chi̧'o̧mȩnä̧, tawaruwä ti̧jä̧wa̧tü̧mä̧ eseunü̧tä̧ dottädinä̧u̧jä̧.

¹⁸ Ja̧'wa̧nü̧ ja̧'a̧ Pauru-mä̧ kkoro mo̧ro̧, ujututäku Sa̧ti̧a̧ku̧, Jesú i̧jä̧wa̧rü̧ do'ächü 'chi̧nü̧ ja̧'wa̧nü̧ ja̧'a̧ igresia-ttü a̧ci̧a̧nu̧ wotümä̧ o'katoi'ünä̧ ka̧ka̧kuä̧jä̧'kotü pȩji̧nä̧tü̧.

¹⁹ Ja̧'wa̧nü̧ ja̧'a̧ Pauru-mä̧ juätürü te'äwäji̧'ka̧, ji̧yȩku̧pü̧nä̧ ji'äwinü̧, aditü kueächomȩnä̧ judío pokotürü Dio jȩä̧'i̧jü̧ wȩnȩ.

²⁰ Ja̧'wa̧nü̧ jiäwa'a ä̧ju̧ku̧ Dio ü̧rü̧ä̧ eseäkuäu, Pauru-rü pä'inä̧tü̧: Ä̧ju̧kui̧tü̧ cha̧wa̧ru̧wa̧ chi̧jä̧wa̧, rekuätü judío esetü ikuätümä̧, o'katoi'ünä̧ Moisé weäwä wȩnȩmä̧ yaboku ukuotü tti̧'cha̧ pä'ätü.

²¹ Ja̧'wa̧nü̧ ja̧'a̧nä̧ ukú kutü'kümä̧ ä̧ju̧kuä̧jä̧tü̧, kko̧ro̧jä̧ rȩjȩnä̧ kka̧kuä̧tü̧ judío-rü Moisé weäwä wȩnȩ ttukuotü juiyünä̧'i̧nä̧, tti̧tti̧mü̧rü̧ circuncisión jȩttü̧ juiyünä̧'i̧nä̧, ujutu judío jȩpü̧ tü̧jä̧'i̧jü̧'i̧nä̧ jȩttü̧ juiya pä'ü we'üdo pä'ü ukuowa'a.

²² ¿Ja̧'wa̧nü̧ ja̧'a̧mä̧, toku jä̧kua̧'a̧jä̧ttü̧? ichi'äji pätta'a ä̧ju̧ku̧, ttü̧ja̧mä̧ ttü̧ka̧ka̧kui̧'ä̧kuo̧tü̧.

²³ Ja̧'wa̧nü̧ ja̧'a̧ttü̧ pi̧yȩ pätü'a̧kuä̧ jȩpi̧: pȩnȩ́ tü̧'kä̧tȩnä̧ kka̧kuä̧tü̧, pa̧ja̧kuä̧nü̧ wotü u̧mä̧tü̧, Dio-rü jȩtä̧kuo̧tü̧jä̧ pättinü̧ jȩtta̧ pä'ätü.

²⁴ Juätürü o'ipächü 'chä̧nü̧, juätütäku surojü tükäu iku ja̧'wa̧ta̧nü̧ kuimitäwiyatüjä̧ ttuwo'che 'kui'ü ttikuatü'i̧nä̧. Ja̧'wa̧nü̧ jȩ'kua̧'a̧ topü, pide ütü'kü jittäwäjimä̧ yapare jä̧ja̧'a̧ tä̧jí̧, weäwä wȩnȩmä̧ ukuotü ja̧'a̧nä̧, pättäkuotü.

²⁵ Ja̧'wa̧ta̧nü̧ judío pokotü Jesucrito-rü esetätürü'i̧nä̧, tamükuädäji wȩyu̧tu̧ we'ü ikuinä̧tü̧jä̧: Suro, ttü̧ä̧nä̧wo̧tü̧rü̧ iyü ttukuokutä, isotü ttukuojatä, nu̧'ä̧wo̧tü̧rü̧tä̧ ja̧'wa̧ta̧nü̧ ttü'käwokokuarü kkä̧'chä̧kuä̧wuö̧ jȩttü̧ juiya pä'ütä.

Dio-rü ukuokuäkuäwodettü, Pauru-rü 'chu'ädinä̧tü̧

²⁶ Ja̧'wa̧nü̧ ja̧'a̧ttü̧ Pauru-mä̧, juätü pa̧ja̧kuä̧nü̧ wotürü o'ipächü 'chä̧ji̧'ka̧, kkoro mo̧ro̧ juätütäku tükäu ikuinü̧; ikuäji̧'ka̧ Dio-rü ukuokuäkuäwodenä̧ do'ächinü̧, juätü ofrenda ttütäkuȩ beipächü mo̧ro̧ jiäwa pä'ü.

²⁷ Dio-rü jȩtä̧kuo̧tü̧jä̧ pä'inä̧tü̧, ttiyü sietenü̧ mo̧ro̧ beipächa pä'ümä̧ a̧'u̧ku̧nä̧tä̧ juiya'a, yotüte Asia rȩjȩttü̧ ichäjätü, judío topo'inä̧tü̧ Pauru-rü, Dio-rü ukuokuäkuäwodenä̧ ü̧ja̧'a̧. Topo'ü, ttü̧ja̧rü̧ wopo'ü jȩpü̧, Pauru-rü 'chu'ädü,

²⁸ wopinä̧tü̧: «¡Irae ttü̧ja̧, ppä'ädätukuitü! ¡pide ja̧'a̧ ujutu jäwä'i̧nä̧, weäwä wȩnȩ'i̧nä̧, ja̧'wa̧ta̧nü̧ tü̧jo̧mȩ'i̧nä̧ to'ija̧'a̧ku̧ ji'äu wo̧juȩtä̧'i̧jü̧mä̧. Ja̧'wa̧ta̧nü̧ jitämä̧ yotüte Griego-rü'i̧nä̧ do'ädäji Dio-rü ukuokuäkuäwode surojuoächünä̧!»

²⁹ Jua'amä̧ wopinä̧tü̧, ä'kanä̧mä̧ ütawiyättü Éfeso i̧sa̧, Trófimo-ku̧ kueächa'a topäjä'kotü, jua̧u̧ru̧'i̧nä̧ Dio-rü ukuokuäkuäwodenä̧ do'ädäjikü̧ pä'ü.

³⁰ Ja̧'wa̧nü̧ jȩtto̧mȩnä̧, ttü̧ja̧ ma̧'ä̧mi̧pü̧; Pauru-rü 'chu'ädo'ü, Dio-rü ukuokuäkuäwodettü rä'epü iku, u̧mi̧ku̧ do'opü ikuipü äpatiyä mü̧'ȩpü̧ ikuinä̧tü̧.

³¹ Täkü kuä'ü ttikua pä'ü jȩtta̧'a̧, Roma su̧ro̧do̧u̧ ttu̧ru̧wa̧ ä̧ju̧kuo̧po̧'i̧nü̧, Jerusarȩ́-mä̧ o'kajuiyütä wȩnȩ ja̧'a̧ pätta'a.

³² Jua̧u̧mä̧, umüwäyotü su̧ro̧do̧u̧ru̧ ȩmi̧pü̧ jua'aku topo'ü 'chi̧nü̧. Ja̧'wa̧nü̧ ja̧'a̧ ttü̧ja̧mä̧, su̧ro̧do̧u̧'i̧nä̧, ttu̧ru̧wa̧'i̧nä̧ ichi'a'a topü, Pauru-rü kuäkuättäja'amä̧ kä'ädäkuäwinä̧tü̧.

³³ Ja̧'wa̧nü̧ ja̧'a̧, su̧ro̧do̧u̧ ttu̧ru̧wa̧mä̧, Pauru-rü 'chuttäda pä'ü we'ünü̧, kärenä̧sa̧ to̧sa̧rȩnä̧ ttü̧nü̧'karü pä'ü we'inü̧. Ja̧'wa̧nü̧ jȩttü̧nä̧ wȩ'ä̧ji̧'ka̧ jä'epü ä̧ju̧kui̧nü̧, jua̧u̧mä̧ tidejua̧'a̧ ja̧ pä'ü ja̧'wa̧ta̧nü̧ däjé jȩä̧ja̧ ja̧ pä'ü.

³⁴ Ja̧'wa̧nü̧ jä'epü ä̧ju̧kuo̧mȩnä̧ kkorotümä̧ i̧mi̧ku̧nä̧ wotta'anä̧, kkorotü'i̧nä̧ kkara'aku wopinä̧tü̧ ja̧'wa̧nü̧ rü̧ȩnä̧ wotta'a ä̧ju̧kuä̧kuä̧wä̧ juiyäku, kärenä̧ ttü̧'ȩjo̧mȩku̧ ttȩmi̧pa̧rü̧ pä'ü weinä̧ku̧.

³⁵ Dodepü ttu̧wä̧mi̧'ä̧'i̧jo̧mȩku̧ tti̧'chi̧'o̧mȩnä̧, su̧ro̧do̧u̧mä̧ Pauru-rümä̧ wä̧do̧wi̧'ü̧tä̧ ȩmi̧pi̧nä̧tü̧, ttü̧ja̧ ra̧wä̧rü̧ suronä̧ jȩttü̧'a̧nü̧ ji̧yä̧u̧;

³⁶ jua'amä̧ o'katoi'ünä̧ o'ka'anä̧ 'chä̧nü̧, wopinä̧tü̧: «Kuä'ü ikuätukuirü» pä'ü.

Pauru-mä̧ ttü̧ja̧ ttä'ka jo̧mȩttü̧ ukuokuinü̧

³⁷ Täkü kärenä̧ra̧'a̧ su̧ro̧do̧u̧ do'ädü ttikuäku, Pauru-mä̧ su̧ro̧do̧u̧ ttu̧ru̧wa̧rü̧ jä'epü ä̧ju̧kui̧nü̧: ¿Ukuku a̧'u̧ku̧nä̧ chukuoku'anü̧ ja̧'a̧? päku, su̧ro̧do̧u̧ ttu̧ru̧wa̧mä̧ ädätinä̧ku̧: ¿Grecia ttü̧ja̧ tti̧wȩnȩ ukuokuäkuäwä wo̧jua̧jä̧?

³⁸ ¿Ukumä̧kü̧ ji̧na̧'a̧, Egito i̧sa̧, Roma ruwotürü ra̧wä̧rü̧ rȩbi̧yu̧ dȩ'a̧ra̧'a̧ cuatro mil-nü̧ jo̧mȩnä̧ ttü̧ja̧rü̧ kuä'äwätürü ȩpi̧nü̧mä̧?

³⁹ Päku, Pauru-mä̧ pä'inü̧: —Ttümä̧kü̧. Ttümä̧ judío i̧sa̧ cha'anä̧, Taso ütawiyättü uwäpächinü̧sä̧, rü̧ȩnä̧ ukuowä'ijomȩ, Ciricia rȩjȩnä̧ttü̧. ¿Ttü̧ja̧rü̧ chukuokua pä'ümä̧ weku'anü̧ ja̧'a̧ tä̧jí̧?

⁴⁰ Päku, su̧ro̧do̧u̧ ttu̧ru̧wa̧mä̧ weäku, Pauru-mä̧ ä̧rä̧mi̧'ü̧, wä̧mi̧pü̧ doächäkuäwomȩ kkä̧mä̧dü̧, u̧mü̧ iwi'kuo'omȩnä̧ ttü̧ja̧mä̧ 'koruchi'inä̧tü̧. Ja̧'wa̧nü̧ ttü'koruchi'a'anä̧, hebreo tti̧wȩnȩnä̧ ukuoku, pä'inü̧: