Hechos 20 - Nuevo Testamento Uwotjüja

Pauru, Macedonia-ra̧'a̧'i̧nä̧ Grecia-ra̧'a̧'i̧nä̧ i̧'chi̧nü̧ wȩnȩ

¹ Ja̧'wa̧nü̧ ja̧'a̧, wȩnȩ 'kuäopäji o'ka'a, Pauru-mä̧ Jesucrito-rü esetätürü wopo'ü tä̧bo̧tü̧ ro̧'ȩpi̧nü̧. Ja̧'wa̧nü̧ ukuokuäji̧'ka̧ te'äwi'ipütä, Macedonia rȩjȩra̧'a̧ 'chi̧nü̧.

² Juorümä̧ o'kajuiyünä̧ do'ächü ukuoku wo̧juȩtä̧ji̧'ka̧ Grecia rȩjȩra̧'a̧ rȩbȩwi̧nü̧.

³ Juȩnȩmä̧ kkä̧wa̧tü̧ wä̧mȩtukuä jo̧mȩtä̧ kkä̧ji̧'ka̧, Siria rȩjȩra̧'a̧ woi'kanä̧ i̧'cha̧ pä'ü amükuädäja'a, judío suronä̧ jȩtta̧rü̧ pä'ü tta̧mü̧kuädäja'a ä̧ju̧kuä̧kuä̧u̧. Macedonia rȩjȩra̧'a̧nä̧tä̧, pä'äji jä̧ji̧ta̧'a̧nü̧ ppa̧wä̧cha̧ pä'ü amükuädäji̧'ka̧, icha'a,

⁴ Jua̧u̧ku̧ 'chä̧tü̧mä̧ pitü ji̧na̧'a̧: Berea i̧sa̧, Pirro i̧tti̧, Sópater'i̧nä̧; Tesalónica ütawiyä isotü, Aritarco'i̧nä̧, Segundo'i̧nä̧; Derbe ütawiyä i̧sa̧ Gayo'i̧nä̧; ja̧'wa̧ta̧nü̧ Asia rȩjȩ ttü̧ja̧mä̧, Timoteo'i̧nä̧, Tíquico'i̧nä̧, Trófimo'i̧nä̧ ji̧na̧'a̧.

⁵ Juätümä̧, ä'kanä̧ 'chä̧jä̧'kotü Tróade ütawiyänä̧ tta̧ttä̧ri̧nä̧u̧jä̧.

⁶ Ujutu Pauru-kumä̧, levadura juiyünä̧ kuäkuäwä pan pä'käri jȩttü̧ mo̧ro̧ 'kuä'opäjä'kotü, Filipo ütawiyä ttawarättü woi'kanä̧ rä'opäjä'kotü ji̧mü̧tȩ mo̧ro̧ päi'omȩnä̧ Tróade ütawiyänä̧ rȩbȩwi̧pi̧nä̧tü̧jä̧, ä'kanä̧ 'chä̧jätü̧ ttü̧ja̧kuo̧mȩ, juȩnȩmä̧ kko̧ro̧mü̧ttü̧ todäre mo̧ro̧ jo̧mȩnä̧ kka̧kui̧nä̧tü̧jä̧.

Pauru, Tróa ttü̧ja̧rü̧ doächü i̧'chi̧nü̧ wȩnȩ

⁷ Domiku̧ mo̧ro̧ Tu̧ru̧wa̧ u̧kuȩ ukuinü̧ tukua pä'ü tü̧'ȩjä̧ma̧ja̧'a̧, Pauru-mä̧, rü̧ȩnä̧ wo̧juȩti̧nü̧ Jesucrito-rü esetätürü. Kkoro mo̧ro̧, juorü räopäkua'a jä̧ku̧, yodó kkä'kobü päi'ünä̧ jiäwomȩnä̧.

⁸ Ra̧pa̧ri̧yu̧ rȩdȩkua̧'a̧ rü̧ȩnä̧ kuoina̧'a̧, juo̧ka̧ ju'toju i̧so̧ka̧ ka̧ka̧kuä̧jä̧'kotü ttü̧'ȩjo̧ka̧mä̧.

⁹ Ja̧'wa̧nü̧ ja̧'a̧, ya̧tȩ mü̧ä̧ya̧ Eutico, ventana-nä̧ wi̧nü̧. Ja̧'wa̧nü̧ ja̧'a̧, Pauru rekuo ukuokuomȩnä̧ pü̧di̧ri̧jä̧chi̧'ä̧ku̧, ä'i'ü ma̧'ä̧chi̧nü̧, wäbodäkuä piso ja̧'a̧ttü̧, 'korupä'i'äjirütä ttäräbe'ünä̧.

¹⁰ Ja̧'wa̧nü̧ ma̧o̧po̧'ä̧chä̧ja̧'a̧ Pauru-mä̧ mȩyȩwä̧chü̧, u̧wä̧mȩ ma̧'ä̧mü̧, wa'adi'ä̧ji̧'ka̧, pä'inü̧: —Yekuätukuä, ji̧nä̧ a̧'kua̧rü̧ ja̧'a̧.

¹¹ Ja̧'wa̧nü̧ jä̧jí̧ o'ka'a Pauru-mä̧, pä'äjita'anü̧ ju'tojuku 'cha'ächächäji̧'ka̧, ttukunä̧, iyä'chü kä'ädi'ü, mo̧ro̧ juoächa'abü päi'ünä̧ ukuokuinü̧. Ja̧'wa̧nü̧ jȩpi̧'i̧pü̧tä̧ rä'opächü i̧wi̧nü̧.

¹² Mü̧ä̧ya̧ päjirümä̧, a̧'kua̧ra̧rü̧tä̧ ȩpü̧ i̧wi̧nä̧tü̧, rü̧ȩnä̧ eseäkuäukkä̧nü̧.

Tróa-ttümä̧, Mileto ütawiyära̧'a̧ku̧ 'chi̧nü̧

¹³ Ujutumä̧, ä'kanä̧ woi'kanä̧ 'chi̧nä̧tü̧jä̧ Asón ütawiyättü Pauru-rü tȩma̧ pä'ü ja̧'wa̧nü̧ päjä̧u̧, chutämä̧ rȩjȩnä̧ 'chä̧nü̧.

¹⁴ Ja̧'wa̧nü̧ ja̧'a̧ttü̧, Pauru-rü Asón ütawiyättü woi'kanä̧ ȩmi̧pü̧ 'kuä'opäjä'kotü, Mitirene ütawiyänä̧ rȩbȩwi̧nä̧tü̧jä̧.

¹⁵ Juorü kkoro mo̧ro̧ rä'opächü i̧wä̧jä̧tü̧mä̧, Quío kkä'ko i̧sä̧sa̧ pä̧tȩkuä̧nü̧ rȩbȩwi̧nä̧tü̧jä̧ ja̧'wa̧nü̧ ja̧'a̧, kkoro mo̧ro̧mä̧ Samos ütawiyäku kkäwä'kotümä̧, Trogilio-nä̧ topi'ü kkoro mo̧ro̧tä̧ rȩbȩwi̧nä̧tü̧jä̧ Mileto ütawiyänä̧mä̧.

¹⁶ Ja̧'wa̧nü̧ 'chi̧nä̧tü̧jä̧, Pauru-mä̧ Jerusarȩ́-nä̧ Pentecostés pä'käri kka̧'a̧ i̧'chi̧'a̧ pä'ü amükuäda ja̧'a̧, Éfeso-mä̧ 'kuä'o'ütä, Asia rȩjȩttü̧ rekuo päi'ü'anü̧ ji̧yä̧ku̧.

Pauru Mileto-ttü te'äwi'ü jiäwinü̧ wȩnȩ

¹⁷ Pauru-mä̧, Mileto ütawiyänä̧ kkä̧nü̧, Éfeso ütawiyä igresia-ttü tturuwotürü jittäwäja pä'ü we'inü̧.

¹⁸ Juätü tti̧rȩbȩwi̧'ä̧ja̧'a̧ päinä̧u̧: Ukutumä̧ wo̧juä̧tü̧jä̧, Asia rȩjȩnä̧ ä̧kuo̧mȩnä̧ dodächinü̧ mo̧ro̧ttü̧ kkä̧mä̧dü̧ päi'ünä̧ jitäbü päi'ünä̧ jȩchä̧'i̧jü̧mä̧.

¹⁹ Tu̧ru̧wa̧ weäwä aditümä̧, ukuotünü̧'i̧nä̧, ajuäunü̧'i̧nä̧ aditä'ijüsä ja̧'wa̧ta̧nü̧ ttünä̧ ichina̧'a̧ kka̧kuä̧mü̧ toäkuäwä, judío suronä̧ jȩtta̧ttü̧ pä'ü tta̧mü̧kuädomȩnä̧.

²⁰ Ja̧'wa̧nü̧ ja̧'a̧nä̧, ukutu ku̧jä̧tu̧kua̧ pä'ü ppädümä̧ chü'koruchi'oka'a wo̧juȩtä̧'i̧jü̧sä̧, ttü̧ja̧ ttä'kattü'i̧nä̧ ja̧'wa̧ta̧nü̧ ttojusodettü'i̧nä̧, jü̧nä̧.

²¹ Judío-rü'i̧nä̧, griego-rü'i̧nä̧, ji'äwä'ijüsä Dio-ku ppa̧'ä̧chü̧, Tu̧ru̧wa̧ Jesucrito-rü tteseta pä'ümä̧.

²² Ja̧'wa̧nü̧ ja̧'a̧nä̧, jitämä̧ Epíritumä̧ wea'attü̧, Jerusarȩ́ ütawiyära̧'a̧ 'chü̧sä̧, juorü 'kuäopäkuȩmä̧ chieruwa'anä̧.

²³ Ji̧yȩtȩtä̧ wo̧jua̧sä̧, Epíritu Sa̧tu̧mä̧ chi̧'cho̧mȩ pünä̧mä̧ jiäwäkusä, suronä̧ usurä chȩmä̧wä̧kua̧'a̧'i̧nä̧, kärenä̧ ttütäkua'a'i̧nä̧, jü̧nä̧.

²⁴ Ja̧'wa̧nü̧ ja̧'a̧nä̧, cha̧'kua̧rü̧mä̧ ukuo te'äwoküsä, Chu̧ru̧wa̧ttü̧ chȩmi̧nü̧ chaditäwä, eseunu̧ kädäda pä'ütä amükuädüsä, Dio rettü iyinü jareü wȩnȩ ji'äunu̧.

²⁵ Ja̧'wa̧nü̧ ja̧'a̧ttü̧, jitämä̧ wo̧jua̧sä̧, täkü ttürümä̧ topokotü kuäkuotüjä̧, ku̧'kä̧tȩtu̧ku̧nä̧ jareünä̧ ru̧wa̧ Dio weü wȩnȩ jidäwä'ija'amä̧.

²⁶ Ja̧'wa̧nü̧ ja̧'a̧ttü̧ jitä mo̧ro̧ pä'üsä, täkü kukuojatukumä̧ wȩjo̧ko̧ku̧sä̧, jü̧nä̧.

²⁷ Isopäi'ünä̧ Dio amükuädinü̧mä̧, yedekuoka'a o'kajuiyünä̧ ji'äwinü̧sä̧.

²⁸ Ja̧'wa̧nü̧ ja̧'a̧ttü̧ to̧pä̧rä̧kuä̧u̧ kka̧kuä̧tu̧kui̧, Epíritu Sa̧tu̧ igresia-nä̧ pató-tü̧ päi'ünä̧ tta̧kuä̧rä̧tu̧kua̧ pä'ü iyina̧'a̧mä̧, Tu̧ru̧wa̧ ukuojanä̧ i̧mi̧täwina̧'a̧ttü̧.

²⁹ Ja̧'wa̧nü̧ ja̧'a̧ttü̧ wo̧jua̧sä̧, ttü cho'komȩ päi'omȩnä̧, ku̧'kä̧tȩtu̧ku̧nä̧ dodettäkuotü Rowo isotü pä̧i̧kuä̧tü̧ igresia ttü̧ja̧rü̧ be'epäjipü ttikua pä'ü.

³⁰ Ja̧'wa̧ta̧nü̧ ukututtütä'i̧nä̧ rättopäkuotü, yapareu wȩnȩ wo̧juȩtä̧tü̧, Jesucrito-rü esetätürü 'kȩ'ȩpü̧ iku ottipächa pä'ü.

³¹ Ja̧'wa̧nü̧ ja̧'a̧ttü̧ to̧pä̧rä̧kuä̧u̧ kka̧kuä̧tu̧kui̧; wäbodäkuä años jo̧mȩnä̧, mo̧ro̧'i̧nä̧, yodo'i̧nä̧, kädädi'oka'a chi̧'chȩrȩjaku chu̧wo̧juȩti̧nü̧, ukutu yotukunä̧rü̧.

³² Ja̧'wa̧nü̧ ja̧'a̧ttü̧ chawaruwä chü̧jä̧wa̧tü̧ Dio u̧mü̧nä̧ wedipä̧u̧jä̧ ja̧'wa̧ta̧nü̧ rettü iyipinü̧ i̧wȩnȩnä̧. Jua̧u̧tä̧tä̧ ja̧'a̧ Epíritu jäwänä̧ buojuokuätukunä̧ ppä̧dä̧kua̧mä̧ ja̧'wa̧ta̧nü̧ Chutä ȩmi̧nä̧u̧ o'katoi'ünä̧rü̧ chi̧yä̧kua̧sä̧ pä'inü̧, iyümä̧.

³³ Kkorotü ttiäre pärätä'i̧nä̧, pü̧jä̧ti̧yu̧'i̧nä̧, ttiyattü pä'ümä̧ pä'okü pä'ijüsä;

³⁴ Ja̧'wa̧nü̧ jo̧ka̧'a̧, ttüku kue'ächätürü'i̧nä̧, ttürütä'i̧nä̧ rekuä rü̧jü̧mä̧, chu̧mü̧nä̧ aditü ȩmä̧'i̧jü̧sä̧.

³⁵ O'kajuiyünä̧tä̧ chu̧wo̧juȩtä̧'i̧jä̧ujä̧, rekuä rü̧jä̧u̧ru̧ ppätäda pä'ümä̧, tadita pä'ü rekuä rü̧ja̧'a̧ pä'ü. Tu̧ru̧wa̧ Jesú pa̧'a̧nü̧ päinü̧ amükuädü: iyäwänä̧mä̧, Ȩmä̧wä̧ttü̧'i̧nä̧ abonä̧nü̧ eseäkuäwä kka̧'a̧ pä'ü.

³⁶ Ja̧'wa̧nü̧ pä'ü kä'ädü, Pauru-mä̧ iwe'kiyunä̧ kkä̧mä̧dü̧, juätütäku o'katoi'ünä̧ Dio-rü ukuokuinü̧.

³⁷ Ja̧'wa̧nü̧ jȩi̧yä̧u̧ o'katoi'ünä̧, Pauru-rü u̧ru̧pä̧'kȩnä̧ wa'ade'ü, 'chu̧'o̧pȩ'ü̧ ajuäkuäwinä̧tü̧.

³⁸ Rü̧ȩnä̧ tta̧'kua̧ tta̧'ȩkui̧nä̧tü̧, jua'amä̧ täkü to'kuätukuokokusä päjiyä̧u̧. Woi'kabü päi'ünä̧ jui'ädü tti̧wi̧nä̧ku̧.