Hechos 2 - Nuevo Testamento Uwotjüja

Epíritu Sa̧tu̧ ichinü̧ wȩnȩ

¹ Pentecostés pättü pä'käri pä̧nä̧ päi'omȩnä̧, Jesucrito-rü esetätümä̧ ji̧nä̧ yo̧mȩtȩ ka̧ka̧kuä̧jä̧'kotü ttü̧ja̧kua̧'a̧,

² ttu̧ni̧chä̧ra̧'a̧nä̧ mo̧ro̧jä̧ra̧'a̧ttü̧ kkä̧rü̧'koppa toriri päia'a ä̧ju̧kui̧nä̧tü̧. Rü̧ȩnä̧ kkä̧rü̧'koppa ppüomȩnä̧ rä̧mi̧pä̧'i̧nü̧'a̧nü̧; rä̧mi̧pi̧na̧'a̧ ttü̧jo̧denä̧ o'kajuiyünä̧tä̧ pa̧ja̧kuä̧chü̧nä̧ 'kȩ'kȩ päi'ünä̧;

³ ja̧'wa̧nü̧ päi'omȩnä̧ topäkuäwinä̧tü̧, ttu wä̧mȩ pünä̧ yotükupünä̧rü̧ okuriyä ppo̧ü̧ kka̧kuä̧ma̧'a̧,

⁴ Ja̧'wa̧nü̧ päi'omȩnä̧ Epíritu Sa̧tu̧ jäwä jo̧mȩnü̧ pätti'a'attü, kkorotü tti̧wȩnȩnä̧ ukuokuinä̧tü̧; Epíritu ttukuokua pä'ü iyü'akuä̧.

⁵ Juȩnȩ Jerusarȩ́-nä̧mä̧, judío kka̧kui̧nä̧tü̧ kkara'a rȩjȩra̧'a̧ttü̧ ichäjätü, Dio-rü rü̧ȩnä̧ ukuotätü.

⁶ Ja̧'wa̧nü̧ rü̧ȩnä̧ rä̧mi̧pi̧yä̧u̧ ä̧ju̧ku̧, ttü̧ja̧mä̧ ka̧ka̧kui̧pü̧: to̧o̧ to̧pä̧ri̧nä̧tü̧, däjé päia'akuä pä'ü; Jesú umüwäyotümä̧, jitütä tti̧wȩnȩnä̧ ttukuokua'a ä̧ju̧ku̧.

⁷ Ja̧'wa̧nü̧ to̧o̧ to̧pä̧rü̧ kkä̧nü̧, pä'inä̧tü̧: —Topittü̧, ¿pitü ukuokuätümä̧ o'katoi'ünä̧, Galirea ttü̧ja̧mä̧kü̧ tä̧jí̧?

⁸ ¿Tta̧'a̧nü̧ ja̧'a̧, ya̧ku̧nä̧ ujutu ti̧wȩnȩ jü̧'a̧kuä̧ ukuokuätüttü̧, tä̧ju̧ku̧nä̧?

⁹ Partos tti̧wȩnȩnä̧'i̧nä̧, medos tti̧wȩnȩnä̧'i̧nä̧, Elam ttü̧ja̧ tti̧wȩnȩnä̧'i̧nä̧; Mesopotamia ttü̧ja̧ tti̧wȩnȩnä̧'i̧nä̧, Judea ttü̧ja̧ tti̧wȩnȩnä̧'i̧nä̧, Capadocia ttü̧ja̧ tti̧wȩnȩnä̧'i̧nä̧, Ponto ttü̧ja̧ tti̧wȩnȩnä̧'i̧nä̧, Asia ttü̧ja̧ tti̧wȩnȩnä̧'i̧nä̧,

¹⁰ Frigia ttü̧ja̧ tti̧wȩnȩnä̧'i̧nä̧, Panfilia ttü̧ja̧ tti̧wȩnȩnä̧'i̧nä̧, Egito ttü̧ja̧ tti̧wȩnȩnä̧'i̧nä̧, África ttü̧ja̧ tti̧wȩnȩnä̧'i̧nä̧, Cirene yabo Ribia rȩjȩku̧ ttü̧ja̧ tti̧wȩnȩnä̧'i̧nä̧. Ja̧'wa̧ta̧nü̧ Roma ttü̧ja̧ pȩnȩ́ kka̧kuä̧tü̧ tti̧wȩnȩnä̧'i̧nä̧;

¹¹ judío kkara'attü ichinä̧tü̧'i̧nä̧ ja̧'wa̧ta̧nü̧ Creta-ra̧'a̧ttü̧, Arabia-ra̧'a̧ttü̧ ichäkuäwotü'i̧nä̧ ti̧wȩnȩnä̧ ttukuokua'a ä̧ju̧kuä̧tü̧jä̧, ¡Dio üadiwämä̧!

¹² Ja̧'wa̧nü̧ ji̧yä̧u̧ o'katoi'ünä̧, to̧o̧ to̧pä̧rä̧kuä̧u̧ pä'äkuäwinä̧tü̧: —¿Toku pä'ü ja̧'a̧jä̧ttü̧ pi̧yȩmä̧?

¹³ Kkorotümä̧ ja̧'wa̧nü̧ pätta'anä̧, kkorotütä ya̧'a̧wä̧'chü̧ pä'inä̧tü̧: —¡Juätümä̧ tä̧'ä̧mä̧kuä̧wä̧tü̧!, jü̧nä̧.

Peduru jiäwinü̧ wȩnȩ

¹⁴ Ja̧'wa̧nü̧ ja̧'a̧ Peduru-mä̧, kkorotü apótore o̧cȩnü̧ wotüku ä̧rä̧mi̧'ü̧ pä̧i̧ku̧nä̧ pä'inü̧: ukutu Judío'i̧nä̧ ja̧'wa̧ta̧nü̧ Jerusarȩ́-nä̧ kka̧kuä̧tü̧ o'katoi'ünä̧ pi̧yȩ pädü, adiu ä̧ju̧kuä̧tu̧kui̧:

¹⁵ Pitümä̧, ukutu kuamükuädätuku'anü̧mä̧ tä̧'ä̧mä̧kuä̧wo̧ko̧tü̧, jitä yo̧ä̧i̧mä̧ las nueve ja̧'a̧,

¹⁶ Ja̧'wa̧nü̧ ja̧'a̧ttü̧ pi̧yȩmä̧ 'kuäopa'a, profeta Joel pa̧'a̧nü̧ päinü̧'a̧kuä̧:

¹⁷ Dio-mä̧ pä'inü̧, rüjí mo̧ro̧ päi'omȩnä̧mä̧, pi̧jä̧ ttü̧ja̧ o'katoi'ünä̧rü̧ chi̧yä̧kua̧sä̧ ttü i̧sa̧ Epíritu Sa̧tu̧rü̧ jo̧mȩnü̧; ja̧'wa̧nü̧ jo̧mȩnä̧ kui̧tti̧mü̧tu̧ku̧ u̧mä̧tü̧'i̧nä̧, nä̧tü̧'i̧nä̧ chi̧wȩnȩ jittäwäkuotü; ja̧'wa̧ta̧nü̧ mü̧ä̧yotü'i̧nä̧ Dio i̧jȩpü̧ tottäkuotü ja̧'wa̧ta̧nü̧ büäkuätümä̧ ttu̧'kuo̧ti̧nä̧ tottäkuotü;

¹⁸ Isopäi'ünä̧tä̧, ji̧yȩnü̧ mo̧ro̧mä̧, chumüwäyotü nä̧tü̧rü̧'i̧nä̧, u̧mä̧tü̧rü̧'i̧nä̧ chi̧yä̧kua̧sä̧ jo̧mȩnü̧ ttü i̧sa̧ Epíritu-rumä̧ chi̧wȩnȩ jittäwuönä̧.

¹⁹ Mo̧ro̧jä̧ra̧'a̧ttü̧mä̧ rü̧ȩnä̧ jü̧ tottünä̧ chi̧jȩpä̧kua̧sä̧; pi̧jä̧nä̧ttü̧mä̧: ttukuoja'i̧nä̧, okurä'i̧nä̧, ajiya isoppa'i̧nä̧ chi̧jȩpä̧kua̧sä̧.

²⁰ Mo̧ro̧ kkä̧wa̧'i̧nä̧ yo̧i̧'ä̧kua̧'a̧, yodó kkä̧wa̧'i̧nä̧ ttukuoja 'kua̧rü̧nä̧ kuokuäkua'a, Tu̧ru̧wa̧ ichü adiu jȩä̧kuȩ, ukuo mo̧ro̧ ä'kanä̧mä̧.

²¹ O'katoi'ünä̧ Tü̧ä̧nä̧wa̧ i̧mi̧nä̧ jä'epü ajuäkuäwätümä̧, ra̧wä̧pi̧jü̧ttü̧ ttü̧ji̧pä̧kuo̧tü̧.

²² Irae ttü̧ja̧, pi̧yȩ jidäu adiu ä̧ju̧kuä̧tu̧kui̧: Jesú Nasaret i̧sa̧ ütü'kümä̧ wo̧juä̧tü̧jä̧, Jua̧u̧nä̧ Dio jo̧mȩnü̧ i̧jȩpi̧nü̧mä̧; Jua̧u̧nä̧mä̧ tottünä̧ jȩtto̧kü̧ juei jȩpi̧nü̧, i̧jȩkuä̧chü̧nä̧.

²³ Ja̧'wa̧nü̧ wa̧rü̧, aboja̧'a̧nä̧ ukuokuäkuäu jȩpü̧ iyü ikú, kuä'ü ikuinä̧tü̧jä̧, ü̧jo̧kä̧nü̧ toe'ächünä̧, suronä̧ jȩpä̧tü̧ ttu̧mü̧nä̧.

²⁴ Jua̧u̧ru̧mä̧, Dio-mä̧ wa'are ubarattü äräbe'inü̧; wa'are 'chuädi'arü pä'ümä̧, yoriso juiyina̧'a̧.

²⁵ Ru̧wa̧ rey Dawi-mä̧, Jesú ütü'kü pä'inü̧: 'Kuäopünä̧ chä'kanä̧tä̧ topinü̧sä̧ Chu̧ru̧wa̧rü̧mä̧; jua'amä̧ chu̧wo̧jua̧'a̧ku̧nä̧ ü̧ja̧'a̧ttü̧, ma̧dä̧chü̧ juiyünä̧.

²⁶ Ja̧'wa̧nü̧ ja̧'a̧ttü̧ cha̧mi̧ iso'ki esewäku, eseu ra̧'ü̧sä̧, cha̧'kua̧ wȩnä̧rü̧ kkä̧nü̧;

²⁷ Isopäi'ünä̧ ukumä̧ wa'arenä̧mä̧ kuikuipokoku chä̧kua̧sä̧ ja̧'wa̧ta̧nü̧ kuemi̧nä̧ku̧ cha'attü surojü tochünä̧mä̧ jȩ'kuo̧ko̧ku̧ chä̧kua̧sä̧.

²⁸ Kkä̧kuä̧wä̧ mä̧nä̧ chu̧wo̧juö̧nä̧ kui̧jȩpi̧nä̧kü̧sä̧; ja̧'wa̧ta̧nü̧ ttüku ku̧jo̧mȩnä̧ rü̧ȩnä̧ cheseunä̧ jä̧ku̧sä̧.

²⁹ Chawaruwä chi̧jä̧wa̧tü̧, patriaca Dawi ütü'kümä̧, wäjuönä̧ pä'ätüjä̧, jua̧u̧mä̧ toe'ächina̧'a̧ 'turu ttikuinä̧ku̧; uwapäreba po̧mȩ'i̧nä̧ wo̧juä̧tü̧jä̧.

³⁰ Ja̧'wa̧nü̧ ji̧na̧'a̧nä̧ Dawi-mä̧ profeta ja̧'a̧ttü̧, Dio-mä̧ i̧tti̧mü̧ttü̧ Crito-rü äräbe'äkua'a jiäwinä̧ku̧.

³¹ Ja̧'wa̧nü̧ ja̧'a̧ttü̧, Dawi-mä̧ wo̧jui̧nü̧, Dio jȩä̧kua̧'a̧ ukuokuinü̧mä̧. Ja̧'wa̧nü̧ ja̧'a̧ttü̧ Dio weäku idepämä̧ wa'are rejuttü pparuwächoka'a, tto̧ä̧chä̧kua̧ pä'inü̧.

³² Jesú-rumä̧, Dio-mä̧ wa'arettü tto'ädinü̧; ujutu o'katoi'ünä̧ topinä̧tü̧jä̧.

³³ Ja̧'wa̧nü̧ jȩpü̧, Dio-mä̧ mo̧ro̧jä̧ra̧'a̧ ȩpü̧, ujuru uruwo iyü u̧wo̧jua̧'a̧ku̧nä̧ ütinä̧ku̧; Epíritu Sa̧tu̧rü̧ ȩmi̧nü̧'ka̧ ujuturu'i̧nä̧ iyäjä̧u̧jä̧, jitä to'kuätukumä̧.

³⁴ Ja̧'wa̧nü̧ ja̧'a̧ttü̧ Dawi-mä̧ mo̧ro̧jä̧ra̧'a̧ i̧'cho̧ka̧'a̧nä̧, pä'inü̧: «Chu̧ru̧wa̧mä̧, Chu̧ru̧wa̧rü̧ pä'inü̧: Chu̧wo̧jua̧ku̧nä̧ pä̧mä̧di̧,

³⁵ kuaboiyotürü kkȩdü̧ kuikuomȩbü päi'ünä̧.»

³⁶ «Ja̧'wa̧nü̧ ja̧'a̧ttü̧, ukutu Irae ttü̧ja̧ o'katoi'ünä̧ ku̧wo̧juä̧tu̧kua̧ pä'ü ja̧'a̧, pide Jesú ü̧jo̧kä̧nü̧ kku̧nu̧ kuä'ü kuikuinä̧tu̧kuä̧ku̧rü̧mä̧, Dio-mä̧ Jesú-ru Tu̧ru̧wa̧ Crito jü̧nä̧ jȩi̧nä̧ku̧ pä'ü.»

³⁷ Ja̧'wa̧nü̧ jiäwa'a ä̧ju̧ku̧, tta̧'kua̧tta̧ pä̧'i̧'ä̧u̧, Peduru-rü'i̧nä̧ ja̧'wa̧ta̧nü̧ kkorotü apótore-rü'i̧nä̧ jä'epü ä̧ju̧kui̧nä̧tü̧: —Chawaruwä chi̧jä̧wa̧tü̧ ¿däjé jȩtü̧'a̧nü̧ttü̧ ujutumä̧?

³⁸ Peduru-mä̧ ädätinä̧u̧: —Suronä̧ jȩ'kuä̧'i̧jä̧tu̧ku̧ttü̧ kä'ädäkuäu Jesucrito i̧mi̧nä̧ yotukunä̧ bautizo jȩpä̧kuä̧wä̧tu̧kui̧; suronä̧ jȩ'kuä̧tu̧ku̧ Dio jȩpü̧ ikuomȩnä̧, pärokuä Epíritu Sa̧tu̧ iyü kuȩmä̧tu̧kua̧ pä'ümä̧.

³⁹ Pi̧yȩ iya päinü̧mä̧, ukuturu iya pä'inü̧, kui̧tti̧mü̧tu̧ku̧ru̧'i̧nä̧ ja̧'wa̧ta̧nü̧ kkorotü otó kka̧kuä̧tü̧rü̧'i̧nä̧; suro juätütämä̧kü̧, Tu̧ru̧wa̧ Dio wo̧ä̧u̧mä̧ o'katoi'ünä̧rü̧.

⁴⁰ Peduru-mä̧ pi̧yȩ'i̧nä̧ pä'ükkä̧nü̧, kkoro'i̧nä̧ pa̧'a̧nü̧ päinä̧u̧: —Pitü ttü̧ja̧rü̧ ro̧ȩkuä̧kuȩ surojüttü rä'opächü kki̧'ä̧tu̧kui̧.

⁴¹ Ja̧'wa̧nü̧ jiäu esetäjätümä̧, bautizo jȩtti̧nä̧u̧, jua̧u̧nü̧ mo̧ro̧tä̧mä̧ tres mil-nü̧ jo̧mȩnä̧ ji̧na̧'a̧, Jesucrito-rü esetätümä̧.

⁴² Ja̧'wa̧nü̧ ja̧'a̧, apótore ttu̧wo̧juȩtü̧nä̧ kka̧kui̧nä̧tü̧, rekuä rü̧jü̧ ppä'ädäkuäu, ji̧nä̧ yo̧mȩtȩnä̧ kuä̧nü̧ ja̧'wa̧ta̧nü̧ Dio-rü ukuoku'i̧nä̧, jü̧nä̧.

Ä̧kuo̧mȩnä̧ Jesú-ru esetü tü̧ja̧kui̧nü̧ wȩnȩ

⁴³ Apótore jȩtto̧kü̧ juei'i̧nä̧, ttieruwuö'i̧nä̧ jȩtta̧'a̧ topü, o'katoi'ünä̧rü̧ rü̧ȩnä̧ yetteku rȩbȩä̧kuä̧wi̧na̧'a̧;

⁴⁴ O'katoi'ünä̧ Jesú-ru esetätümä̧ ji̧nä̧ ji̧yȩtȩnä̧ kka̧kui̧nä̧tü̧ ja̧'wa̧ta̧nü̧ rekuä rü̧jü̧'i̧nä̧ ji̧nä̧ ji̧yȩtȩnä̧tä̧ ppä'ädäkuäwinä̧tü̧.

⁴⁵ Ja̧'wa̧nü̧ jȩpü̧, ttiäre'i̧nä̧ mikuä pä'ü iyä'chü, yotukunä̧rü̧ rekuä rü̧jü̧'a̧kuä̧ ppä'ädäkuäwinä̧tü̧.

⁴⁶ 'Kuäopünä̧ mo̧ro̧ ji̧nü̧'a̧kuä̧, yo̧mȩtȩnä̧ Dio-rü ukuokuäkuäwodenä̧ ka̧ka̧kui̧nä̧tü̧, ttojusodettümä̧ ji̧nä̧ yo̧mȩtȩnä̧ kuä̧nü̧, rü̧ȩnä̧ eseäkuäwinä̧tü̧.

⁴⁷ Dio-rü rü̧ȩnä̧ eseu ttü̧ja̧rü̧'i̧nä̧ o'katoi'ünä̧rü̧ ppä'ädinä̧tü̧. Ja̧'wa̧nü̧ jo̧mȩnä̧, mo̧ro̧ ji̧nü̧'a̧kuä̧ Dio-mä̧ igresia yaboku rü̧ä̧chü̧nä̧ jȩpi̧nü̧, ra̧wä̧pi̧jü̧ttü̧ ttü̧ji̧pü̧nä̧.