Hechos 19 - Nuevo Testamento Uwotjüja

Pauru-mä̧ Éfeso ütawiyättü ji'äwinü̧

¹ Aporo-mä̧, Corinto ütawiyänä̧ ü̧ja̧'a̧nä̧, Pauru-mä̧ müä'kiyu ja̧'a̧nä̧ 'kuä'opäji̧'ka̧ Éfeso ütawiyänä̧ i̧rȩbȩwi̧'o̧mȩnä̧, juorü Jesucrito-rü esetätürü po̧kui̧pü̧,

² jä'epü ä̧ju̧kui̧nä̧u̧: ¿Jesucrito-rü kuesetätukuomȩnä̧mä̧ Epíritu Sa̧tu̧rü̧ Ȩmi̧nä̧tü̧jä̧? Juätü ttädätinä̧ku̧: Yoriso Epíritu Sa̧tu̧ kkü̧ pä'ü jittäwa'amä̧ ä̧ju̧kuo̧ko̧tü̧ pinä̧tü̧jä̧.

³ Päinä̧u̧: ¿Ti̧yȩ bautizo-nä̧ jȩtti̧nä̧tu̧kuä̧ku̧ttü̧? pä̧u̧, ädätinä̧tü̧: Ju̧a̧ jȩi̧nü̧ jäwä bautizo-nä̧.

⁴ Pättiyäku, Pauru-mä̧ päinä̧u̧: Ju̧a̧-mä̧, surojüttü kättädi'a pä'ütä, bautizo jȩpü̧ pä'inü̧: Cho'ka'anä̧ ichürü kuesetätukua pä'ü ja̧'a̧, jua̧u̧mä̧ Jesú jä̧kua̧'a̧, Crito-mä̧.

⁵ Jua̧u̧ ttä̧ju̧kuä̧ji̧ o'ka'a, Tu̧ru̧wa̧ Jesú i̧mi̧nä̧ bautizo jȩtti̧nä̧u̧.

⁶ Ja̧'wa̧nü̧ ja̧'a̧ Pauru-mä̧ juätürü u̧mü̧nä̧ mȩ'ü̧ Dio-rü ukuokuomȩnä̧, Epíritu Sa̧tu̧mä̧ juätürü kkä̧mä̧di̧nü̧; ja̧'wa̧nü̧ päi'omȩnä̧ tti̧wȩnȩ jo̧kü̧nä̧ ukuokuinä̧tü̧ profetas 'kua̧rü̧nä̧.

⁷ Juätü o'katoi'ünä̧mä̧ ttü̧jä̧pü̧ttü̧ ta̧ju̧nü̧ jo̧mȩnä̧ ji̧na̧'a̧, u̧mä̧tü̧mä̧.

⁸ Ja̧'wa̧nü̧ ja̧'a̧, juorümä̧ sinagoga-nä̧ do'ächärü, yekuäkuäwä juiyünä̧, kkä̧wa̧tü̧ wä̧mȩtukuä jo̧mȩnä̧ ji'äwinü̧, esetü ttikuä'chünä̧, ru̧wa̧ Dio weü wȩnȩ.

⁹ Ja̧'wa̧nü̧ ja̧'a̧nä̧ yotukunä̧, tta̧mi̧ 'ki'eku, jua̧u̧nä̧ kkä̧kuä̧wä̧ wȩnȩ esetü jui'ü ttü̧ja̧ ttä'ka jo̧mȩttü̧ jȩpü̧ wottiyäku Pauru-mä̧ juätüttü 'kȩ'i̧pä̧chü̧, Jesucrito-rü esetätürü'i̧nä̧ 'kȩ'ȩpü̧ ikuinü̧ ja̧'wa̧ta̧nü̧ Tirano pättäku u̧wo̧juȩtodettü rü̧ȩnä̧ ukuokuinü̧, mo̧ro̧ ji̧nü̧'a̧kuä̧.

¹⁰ Ja̧'wa̧nü̧ ji'äwinü̧ todäre años jo̧mȩnä̧ ja̧'wa̧nü̧ ja̧'a̧ttü̧ Asia rȩjȩnä̧ kka̧kuä̧tü̧mä̧ o'katoi'ünä̧ ä̧ju̧kui̧nä̧tü̧, judío-ttü'i̧nä̧, judío pokotüttü'i̧nä̧, griego-ttü'i̧nä̧, jü̧nä̧, Tu̧ru̧wa̧ Jesú i̧wȩnȩmä̧.

¹¹ Dio-mä̧ rü̧ȩnä̧ jȩtto̧kü̧ juei'i̧nä̧ jȩpi̧nü̧ Pauru-nä̧mä̧,

¹² ja̧'wa̧nü̧ ja̧'a̧ttü̧, Pauru mȩä̧ji̧ o̧'ko̧'o̧ta̧ pañuelo o̧ta̧'i̧nä̧, pü̧jä̧ti̧yu̧'i̧nä̧ ȩpi̧nä̧tü̧ ttü̧ja̧mä̧, ja̧'wa̧nü̧ ja̧'a̧ na̧'ä̧chä̧tü̧ ttu̧wä̧mȩ ttu̧wȩno̧mȩnä̧ ttumä̧richeittü pȩji̧pȩ'i̧nä̧tü̧ ja̧'wa̧ta̧nü̧ epíritu-tu̧ suropätü'i̧nä̧ juätü ttü̧jä̧u̧ttü̧mä̧ rä'ekuächä'chinä̧tü̧.

¹³ Ja̧'wa̧nü̧ ja̧'a̧nä̧, yotukunä̧ judío mä̧ri̧mü̧ mä̧nä̧nä̧ kue'ächü, epíritu-tu̧ suropätürü, ttü̧ja̧ttü̧ rättopächünä̧ Jesú i̧mi̧nä̧ jȩtta̧ pä'ü, pä'inä̧tü̧: «Pauru jiäwä'ijäku Jesú i̧mi̧nä̧ räkuepä'chätukua pä'ü, wȩdä̧u̧jä̧.»

¹⁴ Pi̧yȩ jȩpi̧nä̧tü̧mä̧, judío i̧sa̧, sacerdote wotü ttu̧ru̧wa̧, Esceva pä'ü mi̧kua̧, i̧tti̧mü̧ kko̧ro̧mü̧ttü̧nü̧ ta̧ju̧ jo̧mȩnä̧ ji̧na̧'a̧.

¹⁵ Ja̧'wa̧nü̧ pättäku epíritu su̧ro̧pa̧mä̧ ädätinä̧u̧: Jesú-rumä̧ wo̧jua̧sä̧ ja̧'wa̧ta̧nü̧ Pauru-rü'i̧nä̧ wo̧jua̧sä̧; ja̧'wa̧nü̧ ja̧'a̧nä̧ ukutumä̧, ¿titü juo'otü kuätukuättü̧?

¹⁶ pä'ü kkä̧nü̧, epíritu su̧ro̧pa̧ ü̧jä̧ku̧mä̧, juätürü tü'ü rä̧mä̧dü̧ suronä̧ jȩi̧nä̧u̧, juodettümä̧ ttü̧'ka̧tä̧wä̧ti̧yu̧ jui'ätütä ja̧'wa̧ta̧nü̧ ttüttawiyä juoepä̧jä̧u̧tä̧ dü'ekuinä̧tü̧.

¹⁷ Ja̧'wa̧nü̧ jä̧ja̧'a̧, Éfeso ütawiyänä̧ kka̧kuä̧tü̧ o'katoi'ünä̧, ukuowa'a ä̧ju̧ku̧ rü̧ȩnä̧ ye'inä̧tü̧, judío'i̧nä̧, griegos'i̧nä̧, jü̧nä̧; ja̧'wa̧nü̧ jo̧mȩnä̧ Tu̧ru̧wa̧ Jesú i̧mi̧mä̧ rü̧ȩnä̧ ukuounä̧ rü̧ä̧chi̧na̧'a̧.

¹⁸ Ja̧'wa̧ta̧nü̧ rekuätü Jesú-ru esetü ikuätümä̧, ichinä̧tü̧ ttü̧ja̧ ttä'ka jo̧mȩttü̧ suronä̧ jȩttä̧'i̧jü̧ ji'äu iku,

¹⁹ Ja̧'wa̧ta̧nü̧ rekuätü märipä jȩpä̧'i̧jä̧tü̧'i̧nä̧ ttiäre kuyäru i'kächü kkuwü ikuinä̧tü̧, ttü̧ja̧ o'katoi'ünä̧ ttä'ka jo̧mȩttü̧. Jua̧u̧ kuyäru mikuämä̧, jȩpü̧ tottomȩnä̧, cincuenta mil-nü̧ mikuäwomȩ, ä̧tȩkuo̧mȩ ji̧na̧'a̧, pärätämä̧.

²⁰ Ja̧'wa̧nü̧ ujuruku, rü̧ä̧chi̧na̧'a̧ Tu̧ru̧wa̧ i̧wȩnȩmä̧.

²¹ Pi̧yȩ 'kuäopäji o'ka'a, Pauru-mä̧ amükuädinü̧ Jerusarȩ́-ra̧'a̧ i̧'cha̧ pä'ü, jua'a 'chä̧nü̧ kkä̧nü̧mä̧, Macedonia rȩjȩnä̧'i̧nä̧, Acaya rȩjȩnä̧'i̧nä̧ 'kuäopa pä'inü̧. Ja̧'wa̧nü̧ juorü Jerusarȩ́-ttü̧ kkä̧nü̧mä̧ Roma-ra̧'a̧ i̧'cha̧ pä'ü amükuädinü̧.

²² Ja̧'wa̧nü̧ pä'ü Macedonia rȩjȩra̧'a̧ we'inü̧, churutä ppä'ädä̧rä̧'i̧jä̧tü̧ ta̧ju̧ru̧, Timoteo-rü'i̧nä̧, Erasto-rü'i̧nä̧, jü̧nä̧, chutämä̧ ji̧nä̧ a̧'u̧ku̧nä̧ mo̧ro̧, Asia-nä̧ ü̧ji̧pa̧'a̧nä̧.

Éfeso ütawiyättü ra̧wä̧rü̧ wopinä̧tü̧

²³ Ji̧yȩnü̧ pä̧nä̧ Éfeso ütawiyättü rü̧ȩnä̧ wȩnȩ kki̧na̧'a̧, kkä̧kuä̧wä̧ wȩnȩ tü'kü,

²⁴ Ya̧tȩ Demetrio pättäku, pärätättü adikuä i̧sa̧ pinü̧. Jua̧u̧mä̧ pärätättü ttü̧ä̧nä̧wa̧ju̧ Artemisa-rü ukuokuäkuäwode jü̧'a̧kuä̧ a̧di̧tä̧rü̧ iyinü̧, jua̧u̧ru̧ ppä'ädä̧rä̧tü̧mä̧ pärätä rü̧ȩnä̧ ȩmi̧nä̧tü̧.

²⁵ Ja̧'wa̧nü̧ ja̧'a̧, jua̧u̧mä̧ chutä jü̧ta̧'a̧nü̧ juatäjuei aditä'ijätürü ka̧ka̧to̧'ü̧ pä'inü̧: Chawaruwä, ukutumä̧ wo̧juä̧tü̧jä̧, pi̧yȩttü̧tä̧ aditü tü̧ja̧kuä̧'i̧ja̧'a̧mä̧.

²⁶ Ja̧'wa̧nü̧ ja̧'a̧nä̧ ukutu to'kuätukutämä̧ ja̧'wa̧ta̧nü̧ kuä̧ju̧kuä̧tu̧ku̧tä̧mä̧, pide Pauru pä'a ä̧ju̧kuä̧tü̧jä̧, ttu̧mü̧ttü̧ adikuotü ttü̧ä̧nä̧wa̧tü̧mä̧, ttü̧ä̧nä̧wa̧tü̧mä̧kü̧, jü̧nä̧; suro, porü Éfeso ütawiyättütämä̧kü̧, Asia rȩjȩnä̧'i̧nä̧ o'kajuiyünä̧tä̧ rekuätü esetü ttikunä̧ jȩa̧'a̧mä̧.

²⁷ Suro, taditäwä ma̧ä̧cha̧ pä'ütämä̧ ra̧wä̧pi̧jo̧ka̧'a̧, tü̧ä̧nä̧wa̧ju̧ Artemisa-rü ukuokuäkuäwode'i̧nä̧, yajurutä'i̧nä̧ ukuo juiyünä̧tä̧ juoächa pä'ü ja̧'a̧, Asia rȩjȩ o'kajuiyünä̧'i̧nä̧ ja̧'wa̧ta̧nü̧ pi̧jä̧ o'kajuiyünä̧'i̧nä̧ ttesetäkua'a ja̧'a̧mä̧.

²⁸ Ja̧'wa̧nü̧ pä'a ä̧ju̧ku̧, ra̧wä̧ri̧pü̧ wopinä̧tü̧: «Efesio ttü̧ja̧ ttü̧ä̧nä̧wa̧ju̧ Artemisa-mä̧, ukuo isaju,» ja̧'a̧ pä'ü.

²⁹ Ja̧'wa̧nü̧ päi'omȩnä̧, ütawiyämä̧ juo'eku ra̧wä̧ri̧pi̧nä̧tü̧. Ja̧'wa̧nü̧ 'kuäopa'anä̧, kkorotümä̧ Pauru awäruwä Macedonia-ra̧'a̧ttü̧ ichäjätü, Gayo-rü'i̧nä̧, Aritarco-rü'i̧nä̧, 'chu'ädü do'inä̧tü̧ teatro pättomȩku̧.

³⁰ Pauru-mä̧ ttü̧ja̧ ttä'ka jo̧mȩ rä'o'ü ukuokua pä'anä̧, awaruwä Jesú-ru esetätü wettokoku pinü̧.

³¹ Ja̧'wa̧ta̧nü̧ Asia-ttü awaruwä ruwotü'i̧nä̧, tti̧wȩnȩ wettinä̧ku̧, teatro-ra̧'a̧mä̧ i̧'chü̧ juiya pä'ü.

³² Ja̧'wa̧ta̧nü̧ ttü̧ka̧ka̧kui̧'ä̧ja̧'a̧mä̧, yotütemä̧ kkara'aku wota'anä, kkorotütä i̧mi̧ku̧nä̧ wopinä̧tü̧; juȩnȩ ka̧ka̧kuä̧jä̧tü̧mä̧ jerupü päte'üra̧'a̧tä̧ wopinä̧tü̧, ji̧nä̧so pätetü ttü̧ka̧ka̧kuä̧ji̧'i̧nä̧ jerupinätü̧.

³³ Ja̧'wa̧nü̧ ja̧'a̧nä̧, yotüte Alejandro-rü jua̧u̧ tü'kü jiäwa pä'ü, judío-mä̧ ttü̧ja̧ ttä'ka jo̧mȩku̧ kkittopinä̧ku̧. Ja̧'wa̧nü̧ päi'äku, judío-rü ppä'ädü ukuokua pä'ü, u̧mü̧nä̧ ttü'koruchi'a pä'ü jȩo̧mȩnä̧.

³⁴ Jua̧u̧mä̧ judío i̧sa̧ pä'ü wo̧jui̧'ü̧, ttü̧ja̧mä̧ o'katoi'ünä̧, todäre hora jo̧mȩnä̧ wopinätü: «Efesio ttü̧ja̧ ttü̧ä̧nä̧wa̧ju̧ Artemisa-mä̧ ukuo isaju, pä'ü.»

³⁵ Juȩnȩ ütawiyä i̧sa̧, kuyäru wȩyu̧kuä̧ i̧sa̧, ttü̧ja̧rü̧ ttü'koruchi'ünä̧ we'ü pä'inü̧: Chawaruwä Éfeso ttü̧ja̧, ¿ditä jä̧ttü̧ tü̧ä̧nä̧wa̧ju̧ Artemisa-rü ukuokuäkuäwode tta̧tä̧ra̧'a̧'i̧nä̧ ja̧'wa̧ta̧nü̧ juäju kka̧'kua̧juä̧ mo̧ro̧jä̧ra̧'a̧ttü̧ ma̧i̧na̧'a̧ tta̧tä̧ra̧'a̧'i̧nä̧, jȩru̧pa̧mä̧?

³⁶ Pi̧yȩ to'ija̧'a̧ku̧ pätta pä'ümä̧ juiya'attü̧, ttu̧wȩkuä̧nä̧tä̧ amükuädätukui, suro jurunä̧mä̧ jȩ'kuä̧tu̧kuä̧.

³⁷ Pitü u̧mä̧tü̧ kui'chächäjä̧tu̧kuä̧u̧mä̧ ku̧ä̧nä̧wa̧ju̧tu̧ku̧ Artemisa-rü ukuokuäkuäwodemä̧ ja̧'wa̧ta̧nü̧ yajurutämä̧ suronä̧mä̧ pä'okotü päjätü ja̧'a̧.

³⁸ Ja̧'wa̧nü̧ ja̧'a̧ttü̧ Demetrio'i̧nä̧ ja̧'wa̧ta̧nü̧ jua̧u̧tä̧ku̧ aditätü'i̧nä̧, juätuku wȩnȩ ttu̧ju̧nä̧rü̧ttü̧mä̧, kka̧kuä̧tü̧ jueces pä̧ttä̧u̧, juätuku ttukuokua pä'ü'i̧nä̧ ja̧'a̧, yotukunä̧ wȩnȩ ttu̧ju̧nä̧rü̧ pünä̧.

³⁹ Ja̧'wa̧nü̧ ja̧'a̧nä̧, kkoro juei wȩnȩ kukuokua päkuätukuttümä̧, ruwotü ttu̧wo̧juö̧nä̧ ka̧ka̧ku̧ ttukuoku'anü̧ ja̧'a̧.

⁴⁰ Isopäi'ünä̧ pi̧yȩ mo̧ro̧ 'kuäopäjinä̧mä̧, ttü̧ja̧rü̧ suronä̧ jȩttü̧nä̧ jȩpä̧tü̧ pättü'anü̧ wotüjä̧, kkorojueimä̧ juiya'anä̧tä̧ jä̧ja̧'a̧ttü̧.

⁴¹ Pi̧yȩ pä'ü kä'ädi'ipütä, ttü̧ja̧rü̧ tti̧wa̧ pä'ü we'ü ikuinü̧.