Hechos 18 - Nuevo Testamento Uwotjüja

Corinto ütawiyänä̧ Pauru ü̧ji̧nü̧ wȩnȩ

¹ Pi̧yȩ o'komȩnä̧mä̧, Pauru-mä̧ Atenas ütawiyättü rä'opächü Corinto ütawiyära̧'a̧ku̧ 'chi̧nü̧.

² Juorümä̧, ya̧tȩ judío i̧sa̧ ja̧'a̧nä̧, Ponto rȩjȩttü̧ uwäpächinü̧rü̧ topinü̧, Aquira pä'ü mi̧kua̧rü̧, irekua Priscira-ku Itaria rȩjȩra̧'a̧ttü̧ i̧rȩbȩwi̧'ä̧ja̧'a̧. Jua'amä̧ Roma-ttü̧ rättopächäja'a ji̧na̧'a̧, emperador Claudio judío-rümä̧ o'katoi'ünä̧rü̧ rättopächa pä'ü weomȩttü̧. Ja̧'wa̧nü̧ ichäjätürü Pauru-mä̧ do'ächü 'chi̧nü̧.

³ Ja̧'wa̧nü̧ ja̧'a̧ juätü jü̧ta̧'a̧nü̧, isotü tti̧jȩti̧yu̧ttü̧ odewiyä o̧ta̧ aditü ja̧'a̧, juätütäku kki̧'i̧nü̧ yo̧mȩtȩnä̧ adita pä'ü.

⁴ Ja̧'wa̧nü̧ ja̧'a̧, sawaru mo̧ro̧ jü̧ta̧'a̧nü̧ Pauru-mä̧ sinagoga isodenä̧ ji'äwinü̧, judío'i̧nä̧, griegos'i̧nä̧ esetä'chü ttikunä̧.

⁵ Sira'i̧nä̧, Timoteo'i̧nä̧ Macedonia rȩjȩra̧'a̧ttü̧ tti̧'chi̧'o̧mȩnä̧mä̧, Pauru-mä̧ jo̧mȩnü̧tä̧ judío-rü jareü wȩnȩ ji'äwinü̧, Jesú-mä̧ Crito ja̧'a̧ pä'ü.

⁶ Ja̧'wa̧nü̧ juätü to'ija̧'a̧ku̧ suronä̧ pä'ü kkü'kü jui'ü wottäku, Pauru-mä̧ ü̧'ka̧tä̧wä̧ta̧ käroku iku, päinä̧u̧: ukututä jäwä ja̧'a̧, Dio ukuturu ro̧ȩpü̧ttü̧mä̧, täkü ukuturumä̧ jidäwa'attü̧. Porü yabokumä̧ judío pokotürütä jidäwä̧kua̧sä̧.

⁷ Juorü rä'opächü, ya̧tȩ Ticio Justo pä'ü mi̧kua̧, Dio-rü rü̧ȩnä̧ ukuotü ojusodeku 'chi̧nü̧. Sinagoga ppeyä wodenä̧ ü̧ja̧'a̧ ja̧'a̧.

⁸ Ja̧'wa̧nü̧ ja̧'a̧, Crispo pä'ü mi̧kua̧mä̧, sinagoga isode u̧ru̧wa̧ ja̧'a̧ ojusodenä̧ kka̧kuä̧tu̧ku̧ o'katoi'ünä̧ esetü ikuinü̧, Tu̧ru̧wa̧rü̧mä̧. Ja̧'wa̧ta̧nü̧ Corinto ttü̧ja̧'i̧nä̧ ä̧ju̧ku̧ rekuätü tteseta'a bautizo jȩtti̧nä̧u̧.

⁹ Ji̧yȩtȩ yodó, Tu̧ru̧wa̧mä̧ Pauru-rü i̧jȩkuä̧cha̧'a̧ toünä̧, pä'inü̧: Yekuekuä, yabokutä ji'äwi, ku'koruchi'oka'a.

¹⁰ Isopäi'ünä̧ ttümä̧ ukutäku kkü̧sä̧, ya̧tȩ'i̧nä̧ ukurumä̧ suronä̧ jȩpo̧kü̧ jä̧kua̧; pi̧yȩ ütawiyänä̧mä̧ rekuätü ttü chȩmi̧nä̧u̧ru̧ kku̧nä̧rü̧sä̧.

¹¹ Ja̧'wa̧nü̧ ja̧'a̧ttü̧ Pauru-mä̧, Corinto ttü̧ja̧rü̧mä̧, ji̧yȩtȩ año 'kuäo'ünä̧ kkoro año ju'to jo̧mȩnä̧, wo̧juȩti̧nü̧ Dio i̧wȩnȩmä̧.

¹² Ja̧'wa̧nü̧ ja̧'a̧nä̧ Acaya rȩjȩnä̧mä̧, Galió̧ pä'ü mi̧kua̧ Gobernador weü pä̧nä̧ ja̧'a̧, judío-mä̧ Pauru-rü suronä̧ amükuädü 'chu'ädäjä'kotü ruwotü tribunal pä̧ttä̧u̧ ttä'ka jo̧mȩku̧ ȩpä̧jä̧'kotü,

¹³ pä'inä̧tü̧: Pidemä̧ ttü̧ja̧ ttesetächünä̧ ji'äu, Dio ü̧rü̧ä̧ tteseunä̧tä̧, jua̧u̧mä̧ ujutu jȩtü̧ weäwä wȩnȩmä̧ to'ija̧'a̧ku̧ ja̧'a̧.

¹⁴ Pauru-mä̧ ukuokua pä'ü kkä̧mä̧dü̧ jȩa̧'a̧, Galió̧-mä̧ judío-rü pä'inü̧: Suronä̧ jȩä̧ji̧ttü̧mä̧ ja̧'wa̧ta̧nü̧ kuä'ü ikuäwä tü'kü jü̧ttü̧mä̧, ttümä̧ ukuturu ä̧ju̧kua̧jü̧sä̧, adiwomȩnä̧;

¹⁵ Ja̧'wa̧nü̧ ja̧'a̧nä̧, ukututä kukuokuätuku jäwä, i̧mi̧pi̧yä̧ jäwä ja̧'wa̧ta̧nü̧ weäwä wȩnȩ jäwä jü̧ttü̧mä̧, ukututä topätukui; Ttümä̧ jua̧u̧ jäwämä̧ weda pä'ümä̧ jui̧'a̧sä̧.

¹⁶ Pä'ü, tribunal pättomȩttü̧ rä'epü ikuinä̧u̧.

¹⁷ Ja̧'wa̧nü̧ ja̧'a̧ sinagoga u̧ru̧wa̧ Sóstenes-rü̧ o'katoi'ünä̧ 'chu'ädo'ü, kuäkuäpü jȩpi̧nä̧tü̧, Tribunal isotü ttä'ka jo̧mȩttü̧; ja̧'wa̧nü̧ jȩtta̧'a̧nä̧ Galió̧-mä̧ ja̧'a̧tä̧ toinä̧u̧.

Pauru, Antioquía-ra̧'a̧ ppa̧wä̧chi̧nü̧ wȩnȩ

¹⁸ Pauru-mä̧ Corinto ütawiyänä̧mä̧ rekuó mo̧ro̧ kkä̧ji̧'ka̧, awärüwä ü̧jä̧wa̧tü̧rü̧ te'äwi'ipü, Priscira-ku ja̧'wa̧ta̧nü̧ Aquira-ku yo̧mȩtȩnä̧ Siria rȩjȩra̧'a̧ woi'kanä̧ 'chi̧nü̧. Cencrea ütawiyättümä̧, räopäkua'a ä'kanä̧ u kiräu ikuinü̧, Dio-rü jȩchä̧kua̧sä̧ pä'a jä̧ku̧.

¹⁹ Ja̧'wa̧nü̧ ja̧'a̧, Éfeso ütawiyänä̧ tti̧rȩbȩwi̧'ä̧ja̧'a̧, Pauru-mä̧ juätürü juȩnȩtä̧ kku̧ni̧pü̧, sinagoga isodera̧'a̧ 'chi̧nü̧, judío-ku ukuoku.

²⁰ Juätümä̧ rekuonä̧nü̧ ü̧jí̧'a̧ pätta'anä̧, kkü'kokü pinü̧,

²¹ te'äwi'ipütä päinä̧u̧: «Dio-rü pä̧wä̧rü̧jo̧mȩnä̧ jü̧ttü̧tä̧, pä'äjita'anü̧mä̧ do'ächü chichäkuä̧u̧jä̧,» jitämä̧ Jerusarȩ́-ra̧'a̧ pä'kärinä̧ chü̧ja̧ pä'ü jä̧ku̧sä̧. Pä'ipütä, Éfeso ütawiyära̧'a̧, woi'kanä̧ 'chi̧nü̧.

²² Cesarea ütawiyänä̧ rȩbȩwi̧pä̧ji̧'ka̧mä̧, igresia wotürü te'äu i̧wä̧ji̧'ka̧, Antioquía ütawiyära̧'a̧ku̧ 'chi̧nü̧.

Pauru-mä̧ Galacia-nä̧'i̧nä̧, Frigia-nä̧'i̧nä̧ ji'äwinü̧

²³ Juȩnȩ a̧'u̧kua̧'a̧tä̧ kkä̧ji̧'ka̧, esetinä̧tü̧rü̧ yaboku wo̧juȩtü̧ 'chä̧nü̧ rä'opinü̧ Galacia rȩjȩnä̧'i̧nä̧ ja̧'wa̧ta̧nü̧ Frigia rȩjȩnä̧'i̧nä̧, ji̧yȩku̧pü̧nä̧.

Aporo-mä̧, Éfeso-nä̧ Dio i̧wȩnȩ ji'äwinü̧

²⁴ Ja̧'wa̧nü̧ ja̧'a̧, ya̧tȩ judío i̧sa̧ Aporo pä'ü mi̧kua̧, Alejandría ütawiyä i̧sa̧ Éfeso ütawiyänä̧ rȩbȩwi̧nü̧, ukuokuäkuäwä wo̧jua̧ ja̧'wa̧ta̧nü̧ Wȩyu̧kuä̧ Wȩnȩ'i̧nä̧ rü̧ȩnä̧ adiu wo̧jua̧.

²⁵ Jua̧u̧mä̧, Tu̧ru̧wa̧ i̧wȩnȩ wo̧jui̧pi̧nü̧ ji̧na̧'a̧ ja̧'wa̧nü̧ ja̧'a̧ttü̧ ujuruku wo̧juȩku̧nä̧ wo̧juȩti̧nü̧ Tu̧ru̧wa̧ ütü'kümä̧, suro Ju̧a̧ bautizo jȩi̧nü̧tä̧ u̧wo̧jua̧'a̧nä̧.

²⁶ Aporo-mä̧ sinagoga-ttü wäjuönä̧ ukuokua'a ä̧ju̧ku̧, Priscira'i̧nä̧, Aquira-ku i̧mi̧ku̧nä̧ o'ipächäjä'kotü adiu jittäwinä̧ku̧ Dio i̧wȩnȩmä̧.

²⁷ Ja̧'wa̧nü̧ ja̧'a̧ Aporo-mä̧ Acaya rȩjȩra̧'a̧ku̧ i̧'cha̧ pä'ü amükuädiyä̧u̧, awaruwä i̧jä̧wa̧tü̧mä̧ eseu kuyäru isojä wȩyu̧tu̧ iyü ppättädinä̧ku̧ jua'a Acaya-ttü Jesucrito-rü esetätü adiu ppättädarü pä'ü. Acaya rȩjȩra̧'a̧ i̧'chi̧'o̧mȩnä̧, rekuätürü ppä'ädinü̧ Dio re ü̧ji̧nü̧ jäwänä̧ esetätürü.

²⁸ Aporo-mä̧ o'katoi'ünä̧ ttä'ka jo̧mȩttü̧ judío Jesucrito-rü esetokotürü ji'äwinü̧, Wȩyu̧kuä̧ Wȩnȩ päü'a̧kuä̧, Jesú-mä̧ Crito ja̧'a̧ pä'ü jiäwinä̧u̧.