Hechos 17 - Nuevo Testamento Uwotjüja

Tesalónica-ttü wȩnȩ kki̧na̧'a̧

¹ Pauru-mä̧, Sira-ku Anfípolis ütawiyänä̧'i̧nä̧, Apolonia ütawiyänä̧'i̧nä̧ 'kuä'opäjä'kotü Tesalónica ütawiyänä̧ rȩbȩä̧kuä̧wi̧'i̧nä̧tü̧, judío ttiäre sinagoga isode kko̧mȩ.

² Pauru-mä̧ aditä'ijü'a̧kuä̧, wäbodäkuä sawaru mo̧ro̧ jo̧mȩnä̧, juätü ttiäre sinagoga isodenä̧ 'chä̧nü̧ ukuokuinü̧ Dio i̧wȩnȩ wȩyu̧kuä̧mä̧.

³ Jua̧u̧ ji'äumä̧ pä'inü̧: —Dio i̧wȩnȩ wȩyu̧kua̧'a̧ku̧tä̧ 'kuäopina̧'a̧ Jesucrito-rümä̧, wa'ü ikuipü'ka̧, wa'arettü ttoächa pä'ümä̧, jua̧u̧tä̧ ja̧'a̧ Crito, ttü jidäwäkumä̧ pä'ü ji'äwinü̧.

⁴ Ja̧'wa̧nü̧ jo̧mȩnä̧, Pauru-ku, Sira-ku jittäwa'a esetü, judío'i̧nä̧ yotukunä̧ juätütäku ppä'ächi'inä̧tü̧; ja̧'wa̧ta̧nü̧ griegos'i̧nä̧, nä̧tü̧ ukuo isotü'i̧nä̧ rekuätü Jesucrito-rü esetinä̧tü̧.

⁵ Ja̧'wa̧nü̧ ja̧'a̧nä̧, kkorotü judío esetokotümä̧ juätürü ä'kuoyäu ra̧wä̧rü̧, ttaditäwä jui'ätürü'i̧nä̧, ttü̧ja̧ suropätürü'i̧nä̧ ka̧ka̧ti̧nä̧tü̧ ütawiyä ttü̧ja̧rü̧ ttü̧ra̧wä̧ri̧pü̧nä̧ jȩtta̧ pä'ü; ja̧'wa̧nü̧ jȩpü̧ Jasó̧ ojusodettü Pauru'i̧nä̧, Sira-rü'i̧nä̧ ttü̧ja̧ ttä'ka jo̧mȩku̧ rä'epü ttikuatü pä'ü jȩpi̧nä̧tü̧.

⁶ Ja̧'wa̧nü̧ ja̧'a̧nä̧, juätürü ttü̧'o̧kui̧'ü̧ juiyünä̧ jä̧u̧, Jasó̧-rü̧tä̧ ja̧'wa̧ta̧nü̧ kkorotü Jesucrito-rü esetätürütä, 'chu'ädi'ü dodopü ttȩmi̧pi̧nä̧u̧, pa̧'a̧nü̧ wopü kkä̧nü̧: —¡Pitü, pi̧jä̧ o'kajuiyünä̧ suro juo'epä'ijätümä̧, po'i̧nä̧ suro juo'epü ichäjätü!

⁷ Ja̧'wa̧nü̧ ja̧'a̧nä̧, Jasó̧-mä̧ ojusodenä̧ do'ädäji juätürü; ¡juätümä̧ o'katoi'ünä̧, Césa i̧wȩyu̧ti̧nü̧ to'ija̧'a̧ku̧ wotü, jua'amä̧ kka̧ra̧ jareünä̧ ru̧wa̧ rey-mä̧, Jesú ja̧'a̧ pätta'attü̧!

⁸ Ja̧'wa̧nü̧ wotta'a ä̧ju̧ku̧ ütawiyä ttü̧ja̧'i̧nä̧, ruwotü'i̧nä̧ rü̧ȩnä̧ ttüjü'kü juiyünä̧ päi'inä̧u̧.

⁹ Ja̧'wa̧nü̧ ja̧'a̧nä̧ Jaso̧'i̧nä̧, kkorotü'i̧nä̧ pärätä tti̧mi̧täwomȩnä̧ kä'ädü tti̧kui̧nä̧u̧.

Berea ütawiyättü Dio i̧wȩnȩ ji'äwinä̧tü̧

¹⁰ Yodó päi'omȩnä̧, Jesucrito-rü esetätümä̧ Pauru-rü'i̧nä̧, Sira-rü'i̧nä̧, Berea ütawiyära̧'a̧ku̧ tti̧wi̧'a̧ pä'ü we'ü tti̧kui̧nä̧u̧. Jua'a rȩbȩä̧kuä̧wi̧'ä̧'kotümä̧ judío ttiäre sinagoga-nä̧ dodepinä̧tü̧.

¹¹ Juätü judío-mä̧ Tesalónica-nä̧ kka̧kuä̧tü̧ttü̧'i̧nä̧ abonä̧nü̧ adiu eseäkuäwinä̧tü̧, Dio i̧wȩnȩmä̧ eseunu̧ ä̧ju̧kui̧nä̧tü̧, mo̧ro̧ ji̧nü̧'a̧kuä̧ wȩyu̧kuä̧ wȩnȩ topü wo̧jui̧pi̧nä̧tü̧, jittäumä̧ isopäi'ünä̧ ja̧ pä'ü.

¹² Ja̧'wa̧nü̧ ja̧'a̧ttü̧, juätüttümä̧ rekuätü Jesucrito-rü esetinä̧tü̧, Grecia ttü̧ja̧ nä̧tü̧ ukuo isotü'i̧nä̧, u̧mä̧tü̧'i̧nä̧, jü̧nä̧.

¹³ Ja̧'wa̧nü̧ ja̧'a̧nä̧, Tesalónica ttü̧ja̧ judío-mä̧, Pauru-mä̧ Berea ütawiyänä̧'i̧nä̧, Dio i̧wȩnȩ ji'äudo pätta'a ä̧ju̧kuä̧jä'kotü, jua'atä 'chä̧nü̧ ttü̧ja̧rü̧ suronä̧ wottünä̧ jȩpi̧nä̧tü̧.

¹⁴ Ja̧'wa̧nü̧ jȩtta̧'a̧nä̧, Jesucrito-rü esetätümä̧ yotäku Pauru-rü rü̧ä̧ ajeku we'opo'ü ikuinä̧tü̧; Sira-ku, Timoteo-kutä juȩnȩmä̧ ttü̧ji̧pa̧'a̧nä̧.

¹⁵ Ja̧'wa̧nü̧ ja̧'a̧ Pauru-rü o'ipäjätümä̧, chutäku 'chi̧nä̧tü̧ Atenas ütawiyäbü. Ja̧'wa̧nü̧ jä̧ja̧'a̧ juätürütä Pauru-mä̧ we'inü̧, kka̧kui̧pä̧jä̧tü̧mä̧ Sira'i̧nä̧, Timoteo'i̧nä̧ jurunä̧nü̧ juȩnȩtä̧ ttü̧ka̧ka̧kui̧'a̧ pä'ü.

Atenas ütawiyänä̧, Pauru ü̧ji̧nü̧ wȩnȩ

¹⁶ Ja̧'wa̧nü̧ Pauru-mä̧, Atenas ütawiyänä̧ Sira-rü'i̧nä̧, Timoteo-rü'i̧nä̧ tta̧'ä̧rü̧ ü̧jo̧mȩnä̧, ttü̧ä̧nä̧wo̧tü̧rü̧ esetü jȩä̧kuä̧wä̧ rü̧ȩnä̧ kka̧'a̧ toomȩnä̧ a̧'kua̧ tta̧'ȩkui̧nü̧.

¹⁷ Ja̧'wa̧nü̧ ji̧yä̧ku̧ judío-ku'i̧nä̧, Dio-rü esetätuku'i̧nä̧ sinagoga-ttü ukuokuinü̧ ja̧'wa̧ta̧nü̧ ttu̧kuȩ ȩmä̧wo̧mȩttü̧'i̧nä̧ ka̧ka̧kuä̧tü̧rü̧ mo̧ro̧ ji̧nü̧'a̧kuä̧ ukuokuinü̧.

¹⁸ Ja̧'wa̧ta̧nü̧ kkorotü, tta̧'kua̧ adiunä̧ kkä̧kuä̧wä̧tä̧ ji̧nä̧so ji̧yȩtä̧mä̧ pä'ü wo̧juȩtä̧tu̧ku̧'i̧nä̧ ukuoku kkä̧nü̧, kkorotü surojü jȩttü̧ juiya pä'ümä̧ tta̧mü̧nä̧ pa̧ja̧tü̧tä̧ jȩä̧kuä̧wa̧'a̧ pä'ü wo̧juȩtä̧tu̧ku̧'i̧nä̧ ukuokuinü̧. Ja̧'wa̧nü̧ ja̧'a̧nä̧ kkorotü pä'inä̧tü̧: —¿Däjé ukuokuttü̧ chujua, wiräkuäwä i̧sa̧mä̧? Ja̧'wa̧ta̧nü̧ kkorotümä̧ pä'inä̧tü̧: —Kko̧ro̧jä̧ttü̧ ttü̧ä̧nä̧wo̧tü̧rü̧ ji'äu ja̧'a̧, pättinä̧ku̧. Jua'amä̧ jareü wȩnȩ Jesú u̧wo̧juȩti̧nü̧'i̧nä̧ ja̧'wa̧ta̧nü̧ ttoächinü̧'i̧nä̧ jiäwiyä̧u̧.

¹⁹ Ja̧'wa̧nü̧ ja̧'a̧, Areópago pä'ü mikuomȩku̧ ȩmi̧pü̧, pättinä̧ku̧: —¿Tu̧wo̧jui̧pü̧nä̧ ji'äwitü, ti̧yȩjä̧ttü̧ ji̧nä̧so ji̧yȩtä̧ kkä̧kuä̧wä̧ wȩnȩ jikuäumä̧?

²⁰ Tä̧ju̧kuo̧mȩnä̧, tu̧wo̧jui̧pü̧ juiyünä̧ jä̧u̧jä̧. Ja̧'wa̧nü̧ ja̧'a̧ttü̧, däjé pä'ü päwä ja̧ pä'ü, adiu ji'äwitü.

²¹ (Jua'amä̧ Atenas ttü̧ja̧mä̧ ja̧'wa̧ta̧nü̧ kkara'attü ichäkuäwotü'i̧nä̧ o'katoi'ünä̧, jareü wȩnȩtä̧ ä̧ju̧ku̧, ukuokuäkuäwätä ttüjü'ka'attü ji̧na̧'a̧).

²² Ja̧'wa̧nü̧ ja̧'a̧, Pauru-mä̧ Areópago-ttü ä̧rä̧mi̧'ü̧, ttü̧'kä̧tȩttü̧ päinä̧u̧: Ukutu Atenas ttü̧ja̧mä̧, tochomȩnä̧, o'katoi'ünä̧ ku̧ä̧nä̧wo̧tü̧rü̧ esetätüjä̧;

²³ ku̧ä̧nä̧wo̧tü̧rü̧ kukuokuä'ijomȩku̧ 'kuädopomȩnä̧ topäjisä, yo̧mȩtȩ wȩyu̧kua̧'a̧ pa̧'a̧: «dio jȩru̧päkuä̧wa̧rü̧,» jü̧nä̧. Jua̧u̧ kuieruwätukua'anä̧ esetü kukuotätukuäku ja̧'a̧, ttü jidäwäkumä̧.

²⁴ Jua̧u̧ tü̧ä̧nä̧wa̧ Dio-tä ja̧'a̧, pi̧jä̧'i̧nä̧, pi̧jä̧nä̧ kka̧ku̧'inä̧ o'kajuiyütä aditinü̧mä̧, jua̧u̧mä̧ mo̧ro̧jä̧'i̧nä̧, pi̧jä̧'i̧nä̧ u̧ru̧wa̧ ja̧'a̧ttü̧, ttü̧ja̧ ttu̧mü̧nä̧ adikuode, ttü̧ä̧nä̧wa̧rü̧ ukuokuäkuäwodenä̧mä̧ kko̧kü̧,

²⁵ Ja̧'wa̧ta̧nü̧ ttu̧mü̧nä̧ aditü ttiyarü pä'ü'i̧nä̧ rekuä rü̧jo̧ko̧ku̧, jua̧u̧mä̧ o'katoi'ünä̧rü̧ tta̧'kua̧rü̧'i̧nä̧, juättoppa'i̧nä̧, rekuä rü̧jü̧'i̧nä̧ iyü ja̧'a̧ttü̧.

²⁶ Jua̧u̧mä̧ pi̧jä̧ ttü̧ja̧rü̧mä̧, ttü̧ja̧sa̧ ya̧tȩttü̧tä̧ aditinü̧ rekuächü pi̧jä̧ o'kajuiyünä̧ ttü̧ja̧ku̧nä̧; ja̧'wa̧nü̧ jȩpü̧ tü̧ja̧kuä̧kuo̧mȩ'i̧nä̧, ttü̧ja̧kuä̧kuȩ mo̧ro̧'i̧nä̧ jo̧mȩnü̧ jȩpü̧ kku̧ni̧nü̧;

²⁷ Dio-rü Ttüsä pä'ü, päte'üra̧'a̧'i̧nä̧ ttü̧'o̧kui̧'a̧rü̧ ja̧ pä'ü, ujututtü yotukunä̧mä̧ otó kko̧kü̧ ja̧'a̧nä̧.

²⁸ Isopäi'ünä̧ jua̧u̧nä̧tä̧, a̧'kua̧rü̧ kuetächa'attü̧; ja̧'wa̧ta̧nü̧ ukutu isotü yotüte poesía ukuokuätü pa̧'a̧nü̧ pättinü̧ta̧'a̧nü̧: Jua̧u̧ Dio-ttütä ichinä̧tü̧jä̧.

²⁹ Ja̧'wa̧nü̧ Dio-ttü ichinä̧tü̧ ta'amä̧, Tü̧ä̧nä̧wa̧ Dio-mä̧ oro jü̧'a̧nü̧mä̧, pärätä jü̧'a̧nü̧mä̧, i̧nä̧wä jü̧'a̧nü̧mä̧, ttu̧mü̧nä̧ ttaditü'anü̧mä̧, amükuädü jȩttü̧'a̧nü̧mä̧ wokü ja̧'a̧.

³⁰ Ja̧'wa̧nü̧ ja̧'a̧ttü̧, Dio-mä̧ ttü̧ja̧ ttieruwiyäku ja̧'a̧tä̧ toinü̧ mo̧ro̧ ji̧na̧'a̧nä̧, jitämä̧ o'katoi'ünä̧rü̧ ttü̧ja̧kuo̧mȩ pünä̧mä̧ surojüttü kättädi'a pä'ü.

³¹ Ja̧'wa̧nü̧ ja̧'a̧ttü̧ Dio-mä̧ ji̧yȩtȩ mo̧ro̧ amükuädü kku̧ni̧nü̧, ütäbota pä'ü ü'ojo'ä̧kuȩ mo̧ro̧, ya̧tȩ we'ü u̧ju̧ni̧nä̧ku̧nä̧, jua̧u̧nä̧tä̧ o'katoi'ünä̧ tta̧'kua̧ ttu̧wȩnä̧rü̧nä̧ wa'arettü ttoädinä̧ku̧ ja̧'a̧ttü̧.

³² Pi̧yȩ, wa'arettü ttoächäkuäwä ä̧ju̧ku̧, yotukunä̧mä̧ ya̧'ä̧wä̧'chi̧nä̧tü̧ ja̧'wa̧ta̧nü̧ kkorotümä̧ pä'inä̧tü̧: —Pi̧yȩmä̧ kko̧ro̧nü̧tä̧ adiu tä̧ju̧kuä̧kuo̧tü̧jä̧.

³³ Ja̧'wa̧nü̧tä̧, juätüttümä̧ Pauru-mä̧ rä'opächinü̧.

³⁴ Ja̧'wa̧nü̧ ja̧'a̧nä̧, kkorotümä̧ Pauru-ku ppä'ächi'ü esetinä̧tü̧; juätükumä̧ Areópago jäwänä̧ wotü i̧sa̧ Dionisio'i̧nä̧, isaju Dámari pättäkua'i̧nä̧, kkorotü'i̧nä̧ ji̧na̧'a̧.