Hechos 16 - Nuevo Testamento Uwotjüja

Timoteo, Pauru-ku Sira-ku i̧'chi̧nü̧ wȩnȩ

¹ Ja̧'wa̧nü̧ ja̧'a̧ Pauru-mä̧ Derbe-ra̧'a̧'i̧nä̧, Ritra-ra̧'a̧'i̧nä̧ i̧rȩbȩwi̧'o̧mȩnä̧ ya̧tȩ Jesú-ru esetürü, Timoteo pä'ü mi̧kua̧rü̧ po̧kui̧pi̧nü̧, ja̧ju̧ttu̧mä̧ Judío i̧sa̧ ja̧'a̧nä̧, jä'ottümä̧ Grecia ttü̧ja̧sa̧rü̧.

² Ja̧'wa̧nü̧ ja̧'a̧, Ritra-ttü'i̧nä̧, Iconio-ttü̧'i̧nä̧ Dio-rü esetätümä̧ jua̧u̧ ütü'kümä̧ adiu ukuokuinä̧tü̧.

³ Pauru-mä̧, Timoteo-rü oipa pä'ü amükuädinü̧ ja̧'wa̧nü̧ ja̧'a̧nä̧ ä̧kuo̧mȩnä̧mä̧ circuncisión jȩtta̧rü̧ pä'ü weinä̧ku̧, juȩnȩ kka̧kuä̧tü̧ Judío suronä̧ tta̧mü̧kuädü juiya pä'ü. Jua'amä̧ Timoteo, jä'omä̧ Grecia ttü̧ja̧sa̧ pä'ü ttü̧wo̧jui̧yä̧ku̧ jȩpi̧nü̧.

⁴ Ja̧'wa̧nü̧ ja̧'a̧, ütawiyä dottächomȩ pünä̧mä̧, apótore-tü̧, igresia-ttü ukuo isotü Jerusarȩ́-ra̧'a̧ttü̧ wettäji, jȩpü̧ ttü̧jä̧kuȩ iyü kue'ächinä̧tü̧.

⁵ Ja̧'wa̧nü̧ ja̧'a̧ igresia wotümä̧ juayabokutä tta̧'kua̧ wȩnä̧rü̧nü̧ ja̧'wa̧ta̧nü̧ Jesucrito-rü esetätü'i̧nä̧ mo̧ro̧ ji̧nü̧'a̧kuä̧ rekuächinä̧tü̧.

Pauru-rü i̧jȩkuä̧chi̧nü̧ wȩnȩ

⁶ Frigia rȩjȩnä̧'i̧nä̧, Galacia rȩjȩnä̧'i̧nä̧ 'kuättopomȩnä̧ Epíritu Sa̧tu̧mä̧, Dio i̧wȩnȩ jittäu juiyünä̧ päinä̧u̧ Asia-nä̧mä̧.

⁷ Ja̧'wa̧nü̧ ja̧'a̧ Misia rȩjȩ beipomȩ rȩbȩä̧kuä̧wi̧'ä̧jä̧'kotü, Bitinia rȩjȩra̧'a̧ tti̧'cha̧ pätta'anä̧ Epíritu Sa̧tu̧mä̧ wȩo̧ko̧u̧ pinä̧tü̧.

⁸ Ja̧'wa̧nü̧ ja̧'a̧ Misia rȩjȩnä̧ 'kuäo'ü Tróade ütawiyära̧'a̧ rȩbȩä̧kuä̧wi̧'i̧nä̧tü̧.

⁹ Ja̧'wa̧nü̧ ja̧'a̧ juorümä̧, Pauru-rü yodó i̧jȩkui̧na̧'a̧: ya̧tȩ Macedonia ttü̧ja̧ i̧sa̧ kkä̧nü̧ ajuäkuäwa'a: «Po Macedonia-ra̧'a̧ 'kuä'o'ü ppä'ädächitü ujuturu'i̧nä̧», pä'aku.

¹⁰ Ja̧'wa̧nü̧ Pauru-rü i̧jȩkuä̧ja̧'a̧mä̧, yotäku Macedonia-ra̧'a̧ ti̧'cha̧ pä'inä̧tü̧jä̧, jua'amä̧ Dio jareü wȩnȩ jitäwiyarü pä'ü wo̧ä̧u̧jä̧ päta'attü̧.

Filipo-ttü kärenä̧ ttü̧'ȩji̧nü̧ wȩnȩ

¹¹ Ja̧'wa̧nü̧ jä̧ja̧'a̧mä̧ Tróade ütawiyättü pȩjä̧mü̧, jueünä̧ Samotracia kkä'ko i̧sä̧sa̧ra̧'a̧ 'chä̧jä̧'kotümä̧, kkoro mo̧ro̧ Neápori ütawiyänä̧ rȩbȩä̧kuä̧wi̧nä̧tü̧jä̧;

¹² Juorü kkä̧nü̧mä̧ Filipo ütawiyära̧'a̧ 'chi̧nä̧tü̧jä̧, Macedonia rȩjȩttü̧ ukuo isomȩ ja̧'a̧, Roma ttü̧ja̧ ttü̧ja̧kuo̧mȩ; juȩnȩmä̧ a̧'u̧ku̧nä̧tä̧ mo̧ro̧ kka̧kui̧nä̧tü̧jä̧.

¹³ Ya'utenä̧, Sawaru mo̧ro̧, ütäwiyättü rä'opächü, aje jäyoto Dio-rü ttukuokuä'ijome pȩjä̧mü̧, juȩnȩ ka̧ka̧kuä̧jä̧tü̧ nä̧tü̧rü̧ ukuokuinä̧tü̧jä̧.

¹⁴ Ja̧'wa̧nü̧ ja̧'a̧, yajute Lidia pä'ü mi̧kuaju; púrpura pättü iyäwä isaju, Tiatira ütawiyä ttü̧ja̧saju, Dio-rü esetä'ijäju juȩnȩ ä̧ju̧kuä̧rü̧ pinä̧ju̧, Pauru jiäwa'a. Juäjuru kka̧mi̧so'ki ba'epinü̧ Tu̧ru̧wa̧mä̧, Pauru jiwa'a adiu kkä̧ju̧kua̧ pä'ü.

¹⁵ Juäjumä̧, kkawaruwätäku Bautizo jȩttä̧jä̧kua̧ o'kaju, jäjepinä̧u̧jä̧: —Isopäi'ünä̧ Tu̧ru̧wa̧rü̧ ukuotäju päkuätukuttümä̧, chojusodera̧'a̧ kuä'ekuätukua ichätukui. Ja̧'wa̧nü̧ pä'ü kkojusodenä̧ tü̧ja̧kui̧'a̧ pä'ü jäjepinä̧u̧jä̧.

¹⁶ Ja̧'wa̧nü̧ ja̧'a̧, Dio-rü ttukuokuä'ijomȩku̧ ti̧'cho̧mȩnä̧, po̧kui̧pi̧nä̧tü̧jä̧ müäyajuru epíritu su̧ro̧pa̧ weäkua, jä̧kuȩmä̧ wo̧juȩku̧nä̧ wo̧jua̧ju̧ru̧. Juäjumä̧ ttu̧mü̧wäyaju ja̧'a̧ ja̧'wa̧nü̧ ji'äwe'ümä̧, kkuruwotürü rü̧ȩnä̧ pärätä ttȩmü̧nä̧ jȩpä̧'i̧jä̧ju̧ ji̧na̧'a̧.

¹⁷ Juäju mü̧ä̧yajumä̧, Pauru'i̧nä̧, ujuturu'i̧nä̧ to'ka'anä̧ ichü wopinä̧ju̧: —¡Pitü ttü̧ja̧mä̧, Dio mo̧ro̧jä̧ ru̧wa̧ umüwäyotü ja̧'a̧ ja̧'wa̧nü̧ ukuturu kki̧'ä̧kuä̧wä̧ mä̧nä̧ ji'äwätümä̧!

¹⁸ Ja̧'wa̧nü̧tä̧ jȩpi̧nä̧ju̧ rekuäinä̧ mo̧ro̧ ja̧'wa̧nü̧ jȩji̧yä̧ku̧ Pauru-mä̧ kkärächi'ü, juäjunä̧ kkü̧ epíritu su̧ro̧pa̧rü̧ pä'inü̧: —Jesucrito i̧mi̧nä̧ wedäkujä̧, juäjuttümä̧ räkuopächa pä'ü. Ja̧'wa̧nü̧ päomȩnä̧, yotäku rä'opächinü̧, epíritumä̧, juäjuttümä̧.

¹⁹ Ja̧'wa̧nü̧ päi'omȩnä̧ kkuruwotümä̧, pärätä ttȩmä̧'i̧ja̧'a̧ juiyächipä̧u̧ Pauru-rü'i̧nä̧, Sira-rü'i̧nä̧, 'chu'ädo'ü dotto'inä̧u̧ ütawiyä kkä'ko ukuo isomȩku̧, ruwotü ttä'ka jo̧mȩku̧.

²⁰ Ja̧'wa̧nü̧ ja̧'a̧ juätü ruwotürü pä'inä̧tü̧: Pitü Judío-mä̧ tidepiyu ttü̧ja̧rü̧ suronä̧ ji'äu surojuo'epätü.

²¹ Ja̧'wa̧ta̧nü̧ wo̧juȩtä̧tü̧, ujutu jȩpü̧ tü̧jo̧kü̧'i̧nä̧, jȩtü̧ juiyü'anü̧ jü̧'i̧nä̧ jü̧nä̧. Ujutumä̧ Roma ttü̧ja̧jä̧ jua̧u̧mä̧ jȩpo̧ko̧tü̧jä̧.

²² Pä'ü jittäwiyä̧u̧, ttü̧ja̧mä̧ juätürü ttüjü'kü juiyünä̧ päi'inä̧u̧, ja̧'wa̧ta̧nü̧ ruwotümä̧, juätürü ttü̧'ka̧tä̧wä̧ti̧yu̧ kko̧sü̧ ttikunä̧ we'ü, o̧'ki̧yä̧nä̧ kuäkuättatü pä'ü wȩtti̧nä̧u̧.

²³ Ja̧'wa̧nü̧ rü̧ȩnä̧ kuäkuättünä̧ we'äjä'kotü, kärenä̧ rütü, juȩnȩ tta̧wä̧rä̧kuä̧wä̧ i̧sa̧rü̧ adiu tta̧wä̧rü̧nä̧ wettinä̧ku̧.

²⁴ Ja̧'wa̧nü̧ wettäjäku, kärenä̧ tta̧'ä̧rü̧mä̧, kärenä̧ isode jakuäku do'ädü iku, ttü̧jä̧pü̧nä̧ cepo pättünä̧ ppi̧'ȩpü̧ ütinä̧u̧.

²⁵ Ja̧'wa̧nü̧ ja̧'a̧ yodó kkä'ko päi'omȩnä̧, Pauru-rü'i̧nä̧, Sira-rü'i̧nä̧ Dio-rü ra̧wä̧wä̧ ra̧tta̧'a̧ ä̧ju̧kui̧nä̧tü̧, kkorotü juȩnȩ kärenä̧ pȩjä̧tü̧mä̧.

²⁶ Ja̧'wa̧nü̧ ja̧'a̧ ttu̧ni̧chä̧ra̧'a̧nä̧ kärenä̧ pä̧kuä̧wode kkada'ka rü̧ȩnä̧ tti̧ȩpi̧na̧'a̧. Ja̧'wa̧nü̧ päi'omȩnä̧, äpatiyä o'kajuiyünä̧ bawekuächa'attü, kärenä̧ pȩjä̧tü̧rü̧ ti̧ä̧dä̧kuä̧wä̧ o̧sa̧'i̧nä̧ ejächipina̧'a̧.

²⁷ Kärenä̧ pȩjä̧tü̧rü̧ tta̧'a̧rä̧ji̧mä̧ porächi'ü toomȩnä̧ äpatiyä bawekuäkuäwänü̧ kka̧kui̧yä̧ku̧, ukurodä ȩmä̧wo̧'i̧nü̧ kuä'äkuäu ikua pä'ü, kärenä̧ pȩjä̧jä̧tü̧mä̧ rä'ekuächäjätükü̧ pä'ü.

²⁸ Ja̧'wa̧nü̧ jȩi̧yä̧ku̧ Pauru-mä̧ woi'inä̧ku̧: —¡Kuä'äkuäumä̧ kuikuä, o'katoi'ünä̧ pȩnȩtä̧ kka̧kuä̧tü̧jä̧!

²⁹ Ja̧'wa̧nü̧ ja̧'a̧ kärenä̧ tta̧'a̧rä̧ji̧mä̧, ttitejädiyarü pä'ü jä'epü, jakuojuku tti̧'ä̧u̧ kkä̧nü̧ jopipü iwe'kiyunä̧ pä̧mä̧di̧nü̧ Pauru'i̧nä̧, Sira'i̧nä̧ ttä'ka jo̧mȩ;

³⁰ Ja̧'wa̧nü̧ ja̧'a̧ juätürü rä'epü ikumä̧ päinä̧u̧: —Chawaruwä, ¿Dajé jȩchü̧'a̧nü̧ jä̧ttü̧ surojüttü chü̧ji̧pa̧ pä'ümä̧?

³¹ Päomȩnä̧ ttädätinä̧ku̧: —Jesucrito-rü kuesetüttümä̧, uku'i̧nä̧, kuojusodenä̧ kka̧kuä̧tü̧'i̧nä̧ surojüttümä̧ ku̧ja̧kui̧'ä̧kuo̧tü̧jä̧.

³² Ja̧'wa̧nü̧ jä̧ja̧'a̧ Pauru-mä̧, Sira-ku Tu̧ru̧wa̧ i̧wȩnȩ ji'äwinä̧tü̧ churutä'i̧nä̧, ojusodenä̧ kka̧kuä̧tü̧rü̧'i̧nä̧ o'katoi'ünä̧rü̧.

³³ Jua̧u̧nu̧tä̧ yodó, o'ipächü ttüttawiyä ȩ'i̧nä̧u̧; jua̧u̧nu̧tä̧ bautizo jȩtti̧nä̧ku̧, ojusodenä̧ kka̧kuä̧tü̧rü̧'i̧nä̧ o'katoi'ünä̧.

³⁴ Ja̧'wa̧ta̧nü̧ o'ka'amä̧ ojusodera̧'a̧ o'ipü ttu̧kuȩ iyinä̧u̧; ja̧'wa̧ta̧nü̧ ojusodenä̧ kka̧kuä̧tu̧ku̧ o'katoi'ünä̧ esewinü̧ Dio-rü esetäji'ka̧.

³⁵ Ja̧'wa̧nü̧ ja̧'a̧ kkoro mo̧ro̧ päi'äja'a ruwotü päjätümä̧, su̧ro̧do̧u̧ru̧ we'inä̧tü̧ Pauru'i̧nä̧, Sira-rü'i̧nä̧, kärenä̧ ttü̧'ȩja̧'a̧, juätürü rä'epü ttikuiyatü pä'ü.

³⁶ Ja̧'wa̧nü̧ wettäjäku, kärenä̧ pȩjä̧tü̧rü̧ tta̧'ä̧rü̧mä̧ Pauru-rü pä'inü̧: —Ruwotümä̧ wettäjäkusä ukuturu rä'epü chikua pä'ü ja̧'wa̧nü̧ ja̧'a̧ttü̧ unichä̧rü̧ i̧wä̧tu̧kui̧.

³⁷ Ja̧'wa̧nü̧ päku Pauru-mä̧ su̧ro̧do̧u̧ru̧ pä'inü̧: —Ujutumä̧ Roma ttü̧ja̧ ta'anä̧, ttü̧ja̧ ttä'ka jo̧mȩttü̧ kuäkuäpü, kärenä̧ rütü jȩttä̧jä̧u̧jä̧ juicio pättümä̧ jȩtto̧ka̧'a̧nä̧; ¿ja̧'wa̧nü̧ ttü̧ja̧ ttieruwünä̧tä̧ jȩpä̧jä̧'kotü jitämä̧ ja̧'wa̧nü̧tä̧ rä'epü ttikua pätta'a tä̧jí̧? ¡ja̧'wa̧nü̧mä̧ pä'okotüjä̧! Jitütä rä'epü ttikuächatü pä'itü.

³⁸ Ja̧'wa̧nü̧ su̧ro̧do̧u̧ ji̧ttä̧wä̧u̧ ruwotü kärenä̧ rütäjätümä̧, rü̧ȩnä̧ ye'inä̧tü̧, ¿Roma ttü̧ja̧ jä̧ja̧'a̧? pä'ü.

³⁹ Ja̧'wa̧nü̧ ja̧'a̧ttü̧, kärenä̧ rütäjätü ruwotümä̧, Pauru-rü'i̧nä̧, Sira-rü'i̧nä̧ ichi'äkuäwi'ü jättepinä̧u̧, jua̧u̧ ütawiyättümä̧ rättekuächa pä'ü.

⁴⁰ Ja̧'wa̧nü̧ ja̧'a̧, kärenä̧ttü̧ rä'ekuächümä̧ Lidia kkojusodenä̧ dodepü, Jesucrito-rü esetätürü ro̧'ȩpi̧'i̧pü̧tä̧, juorütä i̧wi̧nä̧tü̧.