Hechos 15 - Nuevo Testamento Uwotjüja

Apótore'i̧nä̧, a̧ci̧a̧nu̧tu̧'i̧nä̧ ka̧ka̧ku̧ ukuokuinä̧tü̧

¹ Ja̧'wa̧nü̧ ja̧'a̧ Judea rȩjȩttü̧ Antioquía ütawiyära̧'a̧ 'chä̧jä̧tü̧mä̧, Jesucrito-rü esetäjätürü wo̧juȩti̧nä̧tü̧: Moisé weinüta'anü̧ circuncisión jȩ'kuä̧kuä̧wä̧tu̧ku̧ juiyüttümä̧, surojüttümä̧ kki̧'o̧ko̧tü̧jä̧ pä'ü.

² Ja̧'wa̧nü̧ ji̧yä̧u̧ Pauru-mä̧, Bernawé'i̧nä̧ juätuku rü̧ȩnä̧ pä'ä'kuäwinä̧tü̧ ja̧'wa̧nü̧ jä̧jí̧ o'ka'a Antioquía-ttü igresia tturuwotümä̧, Pauru-rü'i̧nä̧, Bernawérü'i̧nä̧, kkorotürü'i̧nä̧ Jerusarȩ́-ra̧'a̧ tti̧'chi̧ya̧tü̧ pä'ü we'inä̧tü̧; pi̧yȩ tü'kü, jua̧u̧ ütawiyära̧'a̧ttü̧, apótore-ku, igresia-ttü a̧ci̧a̧nu̧ wotüku ttukuokuäja pä'ü.

³ Ja̧'wa̧nü̧ pä'ü, igresia jü̧nä̧ wȩttä̧jä̧u̧mä̧, Fenicia rȩjȩnä̧'i̧nä̧, Samaria rȩjȩnä̧'i̧nä̧ 'kuä'opü ji'äwinä̧tü̧ judío pokotü Jesucrito-rü jareünä̧ esetü ttiku wȩnȩmä̧; jua̧u̧ ä̧ju̧ku̧ Jesucrito-rü esetätümä̧ rü̧ȩnä̧ eseäkuäwinä̧tü̧.

⁴ Ja̧'wa̧nü̧ ja̧'a̧ Pauru-mä̧, Bernawé-ku Jerusarȩ́-nä̧ tti̧rȩbȩä̧kuä̧wi̧'ä̧ja̧'a̧, igresia wotümä̧, apótore'i̧nä̧, a̧ci̧a̧nu̧tu̧'i̧nä̧ dottädinä̧u̧. Ja̧'wa̧nü̧ ja̧'a̧ ji'äwinä̧tü̧, jitünä̧tä̧ Dio jȩä̧ji̧mä̧ o'kajuiyünä̧tä̧.

⁵ Ja̧'wa̧nü̧ jittäwa'a ä̧ju̧ku̧, Fariseo wotü ja̧'a̧nä̧ Jesucrito-rü esetätü yotukunä̧mä̧ pä'inä̧tü̧: —Judío pokotü, Jesucrito-rü esetü ikuätümä̧, Moisé weinü̧, circuncisión jȩttä̧kuä̧wa̧ pä'ü'i̧nä̧ ja̧'wa̧ta̧nü̧ weäwä wȩnȩ ttukuota pä'ü'i̧nä̧ ja̧'a̧.

⁶ Ja̧'wa̧nü̧ jo̧mȩnä̧, apótore-mä̧ ja̧'wa̧ta̧nü̧ igresia-ttü a̧ci̧a̧nu̧ wotümä̧ ka̧ka̧kui̧nä̧tü̧ pi̧yȩ tü'kü ttukuokua pä'ü.

⁷ Ja̧'wa̧nü̧ pȩjä̧mä̧jä̧'kotü, rekuätü ttukuokuäji o'ka'a, Peduru ä̧rä̧mi̧'ü̧ päinä̧u̧: Chawaruwä chi̧jä̧wa̧tü̧ ukutumä̧ wo̧juä̧tü̧jä̧, ukutu ku̧'kä̧tȩtu̧ku̧ttü̧, judío pokotürü, jareü wȩnȩ, Dio i̧wȩnȩ juätü'i̧nä̧ ttesetünä̧ jidäwiyarü pä'ü, ttürü ȩmi̧nü̧mä̧.

⁸ Ja̧'wa̧nü̧ ja̧'a̧, Dio-mä̧ tta̧mi̧ iso'ki wo̧jua̧ ja̧'a̧ttü̧ juätürü'i̧nä̧ Epíritu Sa̧tu̧rü̧ iyinä̧u̧ totünä̧, ujuturu jü̧ta̧'a̧nü̧;

⁹ ja̧'wa̧nü̧ ja̧'a̧ttü̧, Dio-mä̧ ujutu jü̧ta̧'a̧nü̧tä̧ jȩi̧nä̧u̧, tta̧'kua̧ ttu̧wȩnä̧ra̧'a̧ttü̧, tta̧mi̧ iso'ki tükü ikumä̧.

¹⁰ Ja̧'wa̧nü̧ ja̧'a̧ttü̧mä̧ ¿ukutumä̧ tta̧'a̧nü̧ pä'ü, Dio jȩü̧mä̧ to'ija̧'a̧ku̧ kuamükuädätukua'ajä̧ttü̧, pitü Jesucrito-rü esetätürü, ujutu'i̧nä̧, tü̧tä̧mü̧ mi̧nä̧'i̧nä̧, jȩttü̧ juiyünä̧ ji̧nü̧ kä'epü wȩnü̧mä̧?

¹¹ Ja̧'wa̧nü̧ ji̧yä̧u̧, ujutumä̧ esetätüjä̧ ji̧nä̧somä̧, Jesucrito rettü mippoünä̧ ppädino̧mȩttü̧ surojüttümä̧ kki̧'i̧nä̧tü̧jä̧ pä'ü, jitüja jü̧ta̧'a̧nü̧.

¹² Ja̧'wa̧nü̧ ukuokuomȩnä̧ o'katoi'ünä̧tä̧ 'koruchi'äjä'kotü ä̧ju̧kuä̧ri̧nä̧tü̧. Ja̧'wa̧ta̧nü̧ Pauru-mä̧, Bernawé-ku ukuokuinä̧tü̧ judío pokotü ttü̧'kä̧tȩttü̧ Dio jȩi̧nü̧ wȩnȩ, juätürü.

¹³ Ja̧'wa̧nü̧ ji'äu kättädomȩnä̧, Sa̧ti̧a̧ku̧ pä'inü̧: —Chawaruwä chi̧jä̧wa̧tü̧, ä̧ju̧kuä̧tu̧kui̧:

¹⁴ Simón Peduru-mä̧ jiäwäu̧jä̧, ä̧kuo̧mȩnä̧ judío pokotürü Dio ichinü̧ wȩnȩ, juätüttü'i̧nä̧ Chutä i̧mi̧ ä̧rä̧mi̧ya̧rü̧ pä'ü.

¹⁵ Pi̧yȩmä̧ profetas tti̧wȩyu̧ti̧nü̧nä̧ pa̧'a̧nü̧ pä'ijü'akuätä ja̧'a̧:

¹⁶ —Pi̧yȩ 'kuäopü o'ka'a ppa̧'ä̧chi̧'i̧pü̧'ka̧mä̧, Dawi ojusode ma̧ä̧chi̧na̧'a̧ pä'äjita'anü̧ aditü chäräbȩ'ä̧kua̧sä̧.

¹⁷ Kkorotü ttü̧ja̧'i̧nä̧ Tu̧ru̧wa̧rü̧ ttusunä̧ ja̧'wa̧ta̧nü̧ judío pokotü'i̧nä̧ Chi̧mi̧ ttusunä̧ chȩmä̧kua̧sä̧,

¹⁸ pä'ü Tu̧ru̧wa̧mä̧, pi̧yȩmä̧ mo̧ täbokütä päi'ünä̧, ttu̧wo̧juö̧nä̧ ukuokuinü̧ ja̧'a̧ttü̧.

¹⁹ Ja̧'wa̧nü̧ ja̧'a̧ttü̧ ttümä̧ pä'üsä, judío pokotü Dio-rü esetü ikuätürümä̧ jua'a yabonü̧mä̧ wetü juiyü'anü̧ ja̧'a̧, pä'ü.

²⁰ Suro, ttü̧ä̧nä̧wo̧tü̧rü̧ wȩnȩtü̧ ukuokuäkuäwa'a ttukutä, ttü'käwoka'a ttü̧jä̧'chü̧'tä̧ ja̧'wa̧ta̧nü̧ nu̧'ä̧wo̧tü̧rü̧ ttukutä, isotü ttukuoja ttukutä, kättädäkuäwa pä'ü wȩyu̧kuojänä̧ wȩyu̧tu̧ wȩtta̧ja̧u̧,

²¹ isopäi'ünä̧, Moisé weäwä wȩnȩmä̧ mo̧ täbokütä päi'ünä̧, sawaru mo̧ro̧ jü̧ta̧'a̧nü̧, sinagogas odewiyänä̧mä̧ ji'äu tukuokuä'ijiyäku, weyeku juiyünä̧.

Judío pokotürü wȩyu̧tu̧ wettinü̧ wȩnȩ

²² Apótore-mä̧, igresia-ttü a̧ci̧a̧nu̧ wotüku, igresia wotüku amükuädü tottomȩnä̧ adiwina̧'a̧, jitütä ttü̧'kä̧tȩttü̧ a̧'u̧ku̧nä̧ wotürü, Pauru-ku, Bernawé-ku tti̧'cho̧mȩttü̧ we'ü ttikuatü pä'ü; ja̧'wa̧nü̧ ja̧'a̧ttü̧, Juda ja̧'a̧nä̧, Barsabás pättä'ijäku'i̧nä̧, Sira-rü'i̧nä̧, ukuo isotü päi'ünä̧ wotürü we'inä̧tü̧. Ja̧'wa̧ta̧nü̧ juätükumä̧ pa̧'a̧nü̧ wȩyu̧tu̧ we'inä̧tü̧:

²³ Ujutu apótore-mä̧, igresia-ttü a̧ci̧a̧nu̧ wotüku, ji̧nä̧ ji̧yȩtȩnä̧ wotümä̧, ukutu judío pokotü ttü̧'kä̧tȩnä̧, Antioquía-nä̧'i̧nä̧, Siria-nä̧'i̧nä̧, Ciricia-nä̧'i̧nä̧ kka̧kuä̧tü̧rü̧: Te'äwätüjä̧.

²⁴ Ujutu pottümä̧ ä̧ju̧kuä̧jä̧tü̧jä̧, ujutumä̧ wetoka'anä̧ pottütä 'chä̧jä̧'kotü ukuturu, kua̧'kua̧ tta̧kuȩkuä̧tu̧ku̧nä̧, circuncisión'i̧nä̧, weäwä wȩnȩ'i̧nä̧ jȩ'kuä̧tu̧kua̧ pä'ü wȩttä̧u̧do pätta'a.

²⁵ Ja̧'wa̧nü̧ ji̧yä̧u̧, amükuädü totomȩnä̧ adiwiyä̧u̧, ti̧jä̧wa̧tü̧ Pauru-ku, Bernawé-ku, yotüterü we'ätüjä̧, ukuturu dottächächa pä'ü.

²⁶ Juätümä̧, yettekuoka'a tta̧'kua̧rü̧ iyäwinä̧tü̧, Tu̧ru̧wa̧ Jesucrito i̧mi̧nä̧.

²⁷ Ja̧'wa̧nü̧ ja̧'a̧ttü̧ wȩtä̧u̧jä̧, Juda-rü'i̧nä̧, Sira-rü'i̧nä̧, jü̧nä̧: Juätütä jä̧kua̧'a̧, ukuturu pi̧yȩ tü'kü jittäwäkuotümä̧.

²⁸ Isopäi'ünä̧ Epíritu Sa̧tu̧rü̧'i̧nä̧, ujuturu'i̧nä̧, adiwäja'a, kkoromä̧ wetoka'a, pi̧yȩ, rekuä rü̧jü̧tä̧ jȩ'kuä̧tu̧ku̧nä̧ weta pä'ü:

²⁹ Ttü̧ä̧nä̧wa̧ dio-tü̧rü̧ ukuoku jȩttü̧ kuäkuäwätä ja̧'wa̧ta̧nü̧ isotü ttukuoja kuäkuäwätä, nu̧'ä̧wo̧tü̧rü̧ kuäkuäwätä, ttȩmo̧ka̧'a̧nä̧ nä̧tü̧rü̧ kkä̧'chä̧kuä̧wä̧tä̧, jȩ'kuä̧tu̧kua̧mä̧ pä'okotüjä̧. ¡Adiutä 'kuä'opätukui!

³⁰ Ja̧'wa̧nü̧ ja̧'a̧ttü̧, wȩttä̧jä̧u̧mä̧, Antioquía ütawiyära̧'a̧ 'chä̧jä̧'kotü, rȩbȩä̧kuä̧wi̧'ü̧mä̧ Jesucrito-rü esetätürü ka̧ka̧to̧po̧'ü̧, wȩyu̧kuojämä̧ iyinä̧tü̧, juätürü.

³¹ Ja̧'wa̧nü̧ ja̧'a̧, juojänä̧ pȩjü̧ topü, rü̧ȩnä̧ eseäkuäwinä̧tü̧.

³² Ja̧'wa̧ta̧nü̧ Juda-mä̧, Sira-ku, profetas wotü ja̧'a̧, Jesucrito-rü esetätürü rü̧ȩnä̧ ji'äwinä̧tü̧ tteseäkuäwünä̧.

³³ Ja̧'wa̧nü̧ ja̧'a̧ rekuinü̧ o'ka'a, juorü Jesucrito-rü esetätümä̧, juätürümä̧, pä'äji ji̧nü̧ta'anü̧ ppa̧ttä̧chü̧nä̧ we'ü ikuinä̧tü̧, ä'koji ji̧nü̧ta'anü̧ we'inä̧tü̧ ttü̧ja̧kua̧'a̧ku̧. [

³⁴ Ja̧'wa̧nü̧ ja̧'a̧nä̧ Sira-mä̧ juȩnȩtä̧ kki̧'i̧pi̧nü̧.]

³⁵ Ja̧'wa̧nü̧ ppa̧ttä̧cha̧'a̧nä̧, Pauru-mä̧, Bernawé-ku Antioquía-nä̧ kka̧kui̧pi̧nä̧tü̧, kkorotüku Tu̧ru̧wa̧ i̧wȩnȩ jareü wȩnȩ ji'äu.

Pauru Bernawé-ttü 'kȩi̧pä̧chi̧nü̧ wȩnȩ

³⁶ Rekuinü̧ o'ka'a, Pauru-mä̧ Bernawé-rü pä'inü̧: —Pä'äji ta̧'a̧nü̧ ppa̧'ä̧chü̧ dotächäja, Tu̧ru̧wa̧ i̧wȩnȩ jitäwinomȩ ütawiyä pünä̧, Jesucrito-rü esetätürü toku ttü̧ja̧kua̧ pä'ü.

³⁷ Päku, Bernawé-mä̧, Ju̧a̧ ja̧'a̧nä̧ Maruku pättäkuru oipa pä'inü̧;

³⁸ Ja̧'wa̧nü̧ ja̧'a̧nä̧, Pauru-rümä̧ adiwoka'a ji̧na̧'a̧, jua̧u̧ru̧ ȩpa̧ pä'ümä̧, aditü kuettächomȩnä̧ Panfilia rȩjȩra̧'a̧ttü̧ ji̧'ȩ'ü̧ i̧wi̧'i̧nä̧u̧ ja̧'a̧.

³⁹ Ja̧'wa̧nü̧ ja̧'a̧mä̧, rü̧ȩnä̧ pä'äkuäwinä̧tü̧, juorütä 'kȩttȩkuä̧chü̧nä̧; Bernawé-mä̧ Maruku-rütä o'ipächü Chipre-ra̧'a̧ 'chi̧nü̧.

⁴⁰ Ja̧'wa̧nü̧ ja̧'a̧nä̧ Pauru-mä̧, Sira-rütä o'ipü 'chi̧nü̧, Jesucrito-rü esetätü, Dio-rü ttukuokuäji o'ka'a.

⁴¹ Ja̧'wa̧nü̧ ja̧'a̧mä̧, Siria rȩjȩnä̧'i̧nä̧, Ciricia rȩjȩnä̧'i̧nä̧ 'kuä'opü ji'äwinä̧tü̧ tteseäkuäwünä̧, igresia wotü ttü̧ja̧kuo̧mȩmä̧.