Hechos 14 - Nuevo Testamento Uwotjüja

Iconio ütawiyättü Dio i̧wȩnȩ ji'äwinä̧tü̧

¹ Ja̧'wa̧nü̧ ja̧'a̧ Iconio ütawiyättümä̧, Pauru-mä̧, Bernawé-ku ji̧nä̧ yo̧mȩtȩnä̧ dodepinä̧tü̧ judío ttiärode sinagoga isodenä̧. Ja̧'wa̧nü̧ dodepü jittäwomȩnä̧ rekuätü esetinä̧tü̧ judío'i̧nä̧ ja̧'wa̧ta̧nü̧ judío pokotü'i̧nä̧, jü̧nä̧.

² Ja̧'wa̧nü̧ ja̧'a̧nä̧ judío Jesú-ru esetokotümä̧, juätü judío pokotürü suronä̧ ji'äwinä̧tü̧, Dio i̧wȩnȩ esetätürü tta̧mi̧ surächi'ünä̧.

³ Ja̧'wa̧nü̧ ja̧'a̧nä̧, Pauru'i̧nä̧, Bernawé'i̧nä̧ Iconio ütawiyänä̧ rekuo mo̧ro̧ kka̧ku̧ ji'äwinä̧tü̧ Tu̧ru̧wa̧ ttujuru iya'attü, Jua̧u̧tä̧tä̧ adiunä̧ u̧wo̧juȩtä̧ra̧'a̧nä̧ ji'äwinä̧tü̧. Tu̧ru̧wa̧mä̧ jȩtto̧kü̧ juei'i̧nä̧ jȩttü̧nä̧ ppä̧dinä̧u̧.

⁴ Ja̧'wa̧nü̧ jo̧mȩnä̧, Iconio ttü̧ja̧mä̧ ttieruwünä̧ ji̧nä̧u̧, ju'totümä̧ judío-rü ttesekua'anä̧, kkorotütä Pauru-rü, Bernawé-rü esekuinä̧tü̧.

⁵ Ja̧'wa̧nü̧ jä̧ja̧'a̧ttü̧mä̧, judío-mä̧, judío pokotüku'i̧nä̧ ja̧'wa̧ta̧nü̧ ruwotüku'i̧nä̧ esekuäjä'kotü ra̧wä̧rü̧ inä̧dunä̧ ikuäu ttikua pä'ü jȩpi̧nä̧tü̧ Pauru-rü'i̧nä̧, Bernawérü'i̧nä̧, jü̧nä̧.

⁶ Ja̧'wa̧nü̧ jȩtta̧tü̧ pä'ü tta̧mü̧kuädäja'a, ä̧ju̧kuä̧kuä̧wo̧'ü̧ Pauru-mä̧, Bernawé-kumä̧ tü'ipächü i̧wi̧'i̧nä̧tü̧ Ritra ütawiyära̧'a̧ku̧, Derbe-ra̧'a̧ku̧, Ricaonia rȩjȩnä̧ tü'künä̧nü̧ wȩjü̧ ütawiyä pünä̧.

⁷ Jua'attütä ji'äwinä̧tü̧ jareü wȩnȩmä̧.

Pauru-rü Ritra-ttü inä̧dunä̧ ikuäu ikuinä̧tü̧

⁸ Ritra ütawiyänä̧ pi̧nü̧ ya̧tȩ kueächü juiyünä̧ wa̧. Uwäpächinü̧tä̧ päi'ünä̧ kue'ächokü pä'ijü ji̧na̧'a̧.

⁹ Pauru-mä̧ ukuokua'a ä̧ju̧kuä̧ri̧yä̧ku̧, toinä̧ku̧ ja̧'wa̧nü̧ toomȩnä̧ ü̧'i̧pü̧'a̧nü̧ a̧'kua̧ u̧wȩnä̧ri̧yä̧ku̧,

¹⁰ pä̧i̧ku̧nä̧ päinä̧ku̧: —¡ä̧rä̧mi̧'ü̧ ku̧jä̧pü̧nä̧ kkä̧mä̧di̧! Ja̧'wa̧nü̧ päomȩnä̧, tü'ächünä̧nü̧, kue'ächinü̧.

¹¹ Ja̧'wa̧nü̧ Pauru jȩa̧'a̧ topü, ttü̧ja̧mä̧ Ricaonia tti̧wȩnȩnä̧ pä̧i̧ku̧nä̧ wopinä̧tü̧: —¡Ttü̧ä̧nä̧wo̧tü̧ dio-tü̧, ttü̧ja̧ 'kua̧rü̧nä̧ tti̧mȩyȩwä̧jä̧u̧jä̧!, pä'ü.

¹² Ja̧'wa̧nü̧ ja̧'a̧ Bernawé-rümä̧, ttü̧ä̧nä̧wa̧ dio Zeus pättinä̧ku̧ ja̧'wa̧ta̧nü̧ Pauru-rütä, ttü̧ä̧nä̧wa̧ dio Hermes pä'ü ottinä̧ku̧, jua̧u̧mä̧ ji̧yȩtä̧ wȩnȩ ji̧ä̧wi̧yä̧u̧.

¹³ Ja̧'wa̧nü̧ ja̧'a̧ ttü̧ä̧nä̧wa̧ dio Zeus-ru esetätü ttiäre culto isode sacerdote päi'ünä̧ wa̧, ütawiyä ä'ka wodenä̧ kkä̧'i̧jü̧, ttü̧ja̧ku̧ ichinü̧ juätürü sacrificio jȩa̧ pä'ü pä̧kä̧yü̧rü̧'i̧nä̧, ä̧'u̧'i̧nä̧, i'kächü.

¹⁴ Ja̧'wa̧nü̧ ja̧'a̧, Pauru-mä̧, Bernawé-ku ja̧'wa̧nü̧ jȩtta̧ pä̧ttä̧u̧ wo̧jui̧'ü̧ ttü̧'ka̧tä̧wä̧ti̧yu̧ o̧ta̧ sȩrä̧wo̧'ü̧ iku, ttü̧ja̧ ttü̧'kä̧tȩ jo̧mȩnä̧ do'ächi'ü wopinä̧tü̧:

¹⁵ Chawaruwä, ¿tta̧'a̧nü̧ pä'ü pi̧yȩmä̧ jȩ'kuä̧tu̧kua̧'a̧jä̧ttü̧? ujutu'i̧nä̧ ukutu jü̧ta̧'a̧nü̧ ttü̧ja̧jä̧. Suronä̧ jȩ'kuä̧tu̧ku̧ttü̧ kä'ädi'ü, Dio a̧'kua̧rü̧ku̧, mo̧ro̧jä̧'i̧nä̧, pi̧jä̧'i̧nä̧, rü̧ä̧ aje'i̧nä̧, juotonä̧ kka̧ku̧'i̧nä̧ o'kajuiyünä̧ aditinü̧ku̧ ppa̧kuä̧chä̧tu̧kua̧ pä'ü ji'äwätüjä̧.

¹⁶ Mo̧ täbokümä̧ Dio-mä̧, pä̧wä̧rü̧ja̧'a̧ku̧ jȩtta̧'a̧nä̧, ja̧'a̧tä̧ topinü̧.

¹⁷ Ja̧'wa̧nü̧ ja̧'a̧nä̧'i̧nä̧, chutä üadiwämä̧ i̧jȩkui̧nü̧; mo̧ro̧jä̧ra̧'a̧ttü̧ ajiya ichünä̧ jȩpü̧'i̧nä̧, kuäwä'i̧nä̧ wȩjü̧nä̧, ttu̧kuȩ kuä̧nü̧'i̧nä̧ tteseäkuäwünä̧.

¹⁸ Pa̧'a̧nü̧ pä'ü jittäwa'anä̧'i̧nä̧ ttü̧ja̧mä̧ jarodi'ü sacrificio jȩtti̧nä̧u̧.

¹⁹ Ja̧'wa̧nü̧ ja̧'a̧ jakuänä̧ Antioquía-ttü'i̧nä̧, Iconiottü̧'i̧nä̧ Judío-mä̧ ichi'ü ttü̧ja̧rü̧ esekuinä̧tü̧; ttesekuä̧u̧ Pauru-rü inä̧dunä̧ ikuäu ikuäjä'kotü, täkü 'koru pä'i'äjikü̧ pä'ü, ütawiyättü dodopü rä'epü ttikuinä̧ku̧.

²⁰ Ja̧'wa̧nü̧ jä̧ja̧'a̧nä̧, Jesucrito-rü esetätümä̧ Pauru ü̧'o̧mȩ 'chä̧wi̧'ü̧ sobükuächünä̧ ttü̧ka̧ka̧kui̧'ä̧ja̧'a̧, ä̧rä̧mi̧'ü̧ pä'äjita'anü̧ ütawiyänä̧ do'ächi'inü̧; jua̧u̧nü̧ o'ka'a, kkoro mo̧ro̧mä̧ Bernawé-ku Derbe ütawiyära̧'a̧ 'chi̧nä̧tü̧.

²¹ Jua̧u̧ ütawiyänä̧ jareü adiwä wȩnȩ ji'äwi'ipü, rekuätü ttesetäji o'ka'a, Ritra ütawiyära̧'a̧ku̧, Iconio ütawiyära̧'a̧ku̧ ja̧'wa̧ta̧nü̧ Antioquía ütawiyära̧'a̧ku̧ ppa̧'ä̧chi̧nä̧tü̧.

²² Jua̧u̧ ütawiyä pünä̧ rȩbȩä̧kuä̧u̧mä̧, ttesetäjinä̧ tta̧'kua̧ wȩnä̧rü̧ yaboku tti̧'chü̧nä̧ jittäwinä̧u̧; jua̧u̧ ji'äumä̧ pättinä̧u̧: Dio weomȩ dodeta pä'ümä̧, rü̧ȩnä̧ usurä ȩmä̧u̧tä̧ dotächa pä'ü rekuä rü̧ja̧'a̧, pä'ü jittäwinä̧u̧.

²³ Ja̧'wa̧ta̧nü̧ igresia jü̧'a̧kuä̧ A̧ci̧a̧nu̧tu̧-tü̧rü̧ kku̧nä̧'chi̧nä̧tü̧; ttu̧kuȩ a̧do̧chü̧ Dio-rü ukuoku, Ttu̧ru̧wa̧ ttesetäkuru iyü ukuokuinä̧tü̧.

Pauru-mä̧, Bernawé-ku Antioquía-ra̧'a̧ ppa̧'ä̧chi̧nä̧tü̧

²⁴ Ja̧'wa̧nü̧ ja̧'a̧ Pisidia rȩjȩnä̧ 'kuä'opü, Panfilia rȩjȩnä̧'i̧nä̧ rȩbȩä̧kuä̧wi̧nä̧tü̧.

²⁵ Ja̧'wa̧nü̧ ja̧'a̧mä̧, Perge ütawiyänä̧ jareü adiwä wȩnȩ ji'äwäjä'kotümä̧, Atalia ütawiyära̧'a̧ku̧ 'chi̧nä̧tü̧.

²⁶ Juorü rä'opächümä̧ woi'kanä̧ kkäu 'chi̧nä̧tü̧, Antioquía ütawiyära̧'a̧ku̧, Siria rȩjȩra̧'a̧ku̧. Ä̧kuo̧mȩnä̧ Dio re ü̧jü̧ wȩnȩ jittäwa pä'ü ttü̧ja̧kuä̧mi̧no̧mȩku.

²⁷ Juȩnȩ rȩbȩä̧kuä̧u̧mä̧, igresia wotüku ka̧ka̧ku̧ ji'äwinä̧tü̧, kuettächomȩnä̧ Dio judío pokotürü rü̧ȩnä̧ jȩä̧ji̧ wȩnȩ.

²⁸ Ja̧'wa̧nü̧ ja̧'a̧ juȩnȩmä̧, Pauru-mä̧, Bernawé-ku rekuo mo̧ro̧ kka̧kui̧nä̧tü̧ Jesucrito-rü esetätukumä̧.