Hechos 13 - Nuevo Testamento Uwotjüja

Bernawé-ku, Sauro-ku jareü wȩnȩ kkä̧mä̧dü̧ ji'äwinä̧tü̧

¹ Antioquía ütawiyättü igresia jü̧nä̧ wotükumä̧, profeta'i̧nä̧, wo̧juȩkuä̧ isotü'i̧nä̧ kka̧kui̧nä̧tü̧. Juätümä̧ Bernawé'i̧nä̧, Simón-ja̧'a̧nä̧ (Niger pättinä̧ku̧'i̧nä̧), Cirene i̧sa̧ Ruciu'i̧nä̧, Herode Antipas-ku püttächinü̧ Menahem'i̧nä̧, Sauro'i̧nä̧ ji̧na̧'a̧.

² Ya'utenä̧ Dio-rü ukuoku kkä̧nü̧, ttu̧kuȩ'i̧nä̧ tta̧do̧chä̧ja̧'a̧, Epíritu Sa̧tu̧ päinä̧u̧: «Bernawérü'i̧nä̧, Sauro-rü'i̧nä̧ 'kȩ'ȩpi̧yä̧tu̧kui̧ttü̧, ttadita pä'ü wochinü̧ wedatü.»

³ Ja̧'wa̧nü̧ ja̧'a̧ttü̧, Dio-rü ttukuokuäji'i̧nä̧, ttu̧kuȩ tta̧do̧chä̧ji̧'i̧nä̧ kä'ädäkuäumä̧; ttu̧mü̧ mȩ'ü̧ Dio-rü ukuoku we'ü tti̧kui̧nä̧u̧.

Chipre-ttü Dio i̧wȩnȩ ji'äwinä̧tü̧

⁴ Ja̧'wa̧nü̧ ja̧'a̧ Epíritu Sa̧tu̧ wȩä̧jä̧u̧mä̧, Sereucia ütawiyäku 'chä̧wi̧'ü̧mä̧ Chipre-ra̧'a̧ku̧ kkäwinä̧tü̧.

⁵ Salamina ütawiyä ttawaränä̧ rȩbȩä̧kuä̧wi̧'ü̧, judío ttiäre sinagogas odewiyättü Dio i̧wȩnȩ ji'äwinä̧tü̧. Ja̧'wa̧ta̧nü̧ Ju̧a̧-rü̧mä̧ ppä̧dä̧ra̧ pä'ütä ottipinä̧ku̧.

⁶ Juä̧sa̧ kkä'ko i̧sä̧sa̧ jä̧ttä̧ji̧yä̧sa̧ 'kuä'o'ü Pafora̧'a̧ rȩbȩä̧kuä̧wi̧'i̧nä̧tü̧, juorü topinä̧tü̧ Barjesús pättäku, judío i̧sa̧ ja̧'a̧nä̧ märirü, ya̧pa̧rȩwa̧ profeta-rü.

⁷ Jua̧u̧ märimä̧, ru̧wa̧ Gobernador Sergio Pauro rü̧ȩnä̧ wo̧jua̧ku̧ kki̧nü̧. Jua̧u̧ ru̧wa̧mä̧ wopinü̧ Bernawérü'i̧nä̧, Sauro-rü'i̧nä̧ Dio i̧wȩnȩ jittäwa'a ä̧ju̧kua̧ pä'ü.

⁸ Ja̧'wa̧nü̧ ja̧'a̧nä̧ jua̧u̧ märimä̧, griego wȩnȩnä̧mä̧ Elima pättäku ja̧'a̧, ru̧wa̧ gobernado-rü Dio-rü esetü juiyünä̧ jȩpi̧nü̧.

⁹ Ja̧'wa̧nü̧ jȩi̧yä̧ku̧, Sauro-ja̧'a̧nä̧ Pauru-mä̧ Epíritu Sa̧tu̧ ujuru jo̧mȩnü̧ kku̧nä̧rü̧ ja̧'a̧, jua̧u̧ mä̧ri i'ärenä̧ pätetü topü,

¹⁰ päinä̧ku̧: —¡Isoo, yapareäkuäwätä, surojütä jo̧mȩnü̧ wa̧jä̧, äwettätä i̧tti̧jä̧, adiwä wȩnȩ aboi̧ya̧tä̧ wa̧jä̧! ¿Tu̧ru̧wa̧ u̧mä̧nä̧ jueü mä̧nä̧, surojuokuepa'amä̧ ti̧yȩnü̧tä̧ käkuädäkua'ajä̧ttü̧?

¹¹ Ja̧'wa̧nü̧ ja̧'a̧ttü̧ Tu̧ru̧wa̧mä̧ ro̧ȩpä̧ku̧jä̧; kuä̧to̧kä̧chü̧nä̧, kkä̧wa̧rü̧mä̧ rekuo topokü kuä̧kua̧jä̧. Päüta'anü̧, yotäku toü juiyünä̧ päi'inä̧ku̧; i̧'cho̧mȩnä̧mä̧, kkorotü u̧mü̧nä̧ dodottarü pä'ütä usinü̧.

¹² Ja̧'wa̧nü̧ ja̧'a̧ topü, ru̧wa̧ gobernador-mä̧, esetinü̧, Tu̧ru̧wa̧ i̧wȩnȩnä̧ kkä̧kuä̧wä̧mä̧, ¡isoó! pä'ü amükuädü.

Pisidia rȩjȩnä̧ Antioquía ütawiyättü Dio i̧wȩnȩ ji'äwinä̧tü̧

¹³ Pauru-mä̧ awaruwäku Pafo-ttü pä̧mä̧dä̧jä̧'kotümä̧, Perge pä'ü mi̧kuomȩ, Panfilia rȩjȩra̧'a̧ rȩbȩä̧kuä̧wi̧'i̧nä̧tü̧; ja̧'wa̧nü̧ ja̧'a̧nä̧ Ju̧a̧-mä̧ juätü ttü̧ja̧kui̧'a̧'a̧nä̧ Jerusarȩ́-ra̧'a̧ ppa̧'ä̧chä̧chi̧nü̧.

¹⁴ Ja̧'wa̧nü̧ ja̧'a̧nä̧, Perge-ttü 'kuä'o'ü Antioquía ütawiyänä̧ pisidia rȩjȩnä̧ rȩbȩä̧kuä̧wi̧nä̧tü̧; ja̧'wa̧nü̧ jä̧ja̧'a̧mä̧, sawaru mo̧ro̧ sinagoga isodenä̧ dodepipü pȩjä̧mi̧nä̧tü̧.

¹⁵ Weäwä wȩnȩ'i̧nä̧, profeta-tü̧ wȩyu̧kuä̧'i̧nä̧ to̧pä̧rü̧ ttukuokuäji o'ka'a, sinagoga isode uruwotümä̧ jättepinä̧u̧: —Chawaruwä chi̧jä̧wa̧tü̧, ttü̧ja̧rü̧ jikuäwa päkuätuku kkü̧ttü̧mä̧ jitätä ji'äwätukui, pättinä̧u̧.

¹⁶ Pättiyäku, Pauru ä̧rä̧mi̧'ü̧, ttü'koruchi'a pä'ü u̧mü̧nä̧ jȩpü̧nü̧, pä'inü̧: —Ä̧ju̧kuä̧tu̧kui̧ Irae ttü̧ja̧'i̧nä̧ ja̧'wa̧ta̧nü̧ kkorotü Dio-rü ukuotü esetätümä̧:

¹⁷ Irae ttü̧ja̧ ttü̧ä̧nä̧wa̧ Dio-mä̧, tü̧tä̧mü̧ mi̧nä̧rü̧ pojopü ȩmi̧nü̧; Egito-nä̧ kko̧ro̧jä̧ ttü̧ja̧ jü̧nä̧ ttü̧ja̧kua̧'a̧nä̧ ttukuo'i̧nä̧ äräbe'inä̧u̧, jua̧u̧nü̧ o'ka'a ujuru i̧jȩpü̧ rä'epü ikuinä̧u̧ juä̧jä̧ttü̧mä̧.

¹⁸ Ja̧'wa̧nü̧ ji̧nü̧ o'ka'a, rȩbi̧yu̧ dȩ'a̧ra̧'a̧ttü̧ cuarenta-nü̧ año jo̧mȩnä̧ tta̧wä̧ri̧nä̧u̧ Dio-mä̧.

¹⁹ Ja̧'wa̧ta̧nü̧ Canaá̧ rȩjȩnä̧ttü̧, kko̧ro̧mü̧ttü̧ to̧jä̧rȩ jo̧mȩnä̧ si'epü ikuinü̧, pärokuotü tä̧do̧tü̧ mi̧nä̧rü̧ tti̧rȩjä̧ päi'ünä̧ iya pä'ümä̧.

²⁰ Ja̧'wa̧nü̧ 'kuättopümä̧, cuatrocientos cincuenta-nü̧ año jo̧mȩnä̧ ji̧na̧'a̧. Jua̧u̧nü̧ o'ka'amä̧ jueces-tü̧ pä̧ttä̧u̧ wettünä̧ jȩi̧nä̧u̧, profeta Samue-bü päi'ünä̧.

²¹ Ja̧'wa̧nü̧ ji̧nü̧ o'ka'a, ya̧tȩ rey jü̧nä̧ weatü pä'ü jä'epinä̧tü̧. Ja̧'wa̧nü̧ ji̧yä̧ku̧, Dio-mä̧ iyinä̧u̧ ru̧wa̧ rey Saúrü. Jua̧u̧mä̧ cuarenta-nü̧ años jo̧mȩnä̧ we'inü̧; Cis i̧tti̧ ji̧na̧'a̧, Benjamín isotü i̧sa̧.

²² Jua̧u̧ 'kuäopinü̧ o'ka'a, Dio-mä̧ Saúrü rä'epü iku, pä̧ro̧kua̧ Dawi-rü rütü pä'inü̧: «po̧kui̧pä̧ji̧sä̧ Dawi-rü, Isaí i̧tti̧rü̧, ttü chamükuädüta'anü̧ amükuädürü, jua̧u̧tä̧ jä̧kua̧'a̧ ttürü pä̧wä̧rü̧jo̧mȩnä̧ jȩä̧kua̧mä̧.»

²³ Täkü, jua̧u̧ Dawi i̧tti̧mü̧ päjuriyättütä, Dio-mä̧ ukuokuinü̧ta'anü̧ rä'epinü̧ Jesú-ru, Irae ttü̧ja̧rü̧ surojüttü rä'epü i̧kuä̧kua̧rü̧mä̧.

²⁴ Ja̧'wa̧nü̧ ji̧na̧'a̧ttü̧, jua̧u̧ ichäkua'a ä'kanä̧, Ju̧a̧-mä̧ ji'äwinü̧ Irae ttü̧ja̧rü̧ o'katoi'ünä̧ bautizo jȩpä̧kuä̧u̧ surojü kättädi'a pä'ü.

²⁵ Ja̧'wa̧nü̧ ja̧'a̧, Ju̧a̧-mä̧ aditäwä jo̧mȩnü̧ kä'ädäkuäumä̧ pä'inü̧: Ttümä̧, ukutu jua̧u̧tä̧ ja̧'a̧ pä'ü kuamükuädä'ijätukuäkumä̧kü̧sä̧; ja̧'wa̧nü̧ ja̧'a̧nä̧ ttü cho'ka'anä̧ ichü, ya̧tȩ, jua̧u̧ru̧ ttümä̧ ü̧jä̧pü̧ isäya isappä'i̧nä̧ chejäda pä'ümä̧ weü juiyü'anü̧ wa̧sä̧.

²⁶ Chawaruwä chi̧jä̧wa̧tü̧, Abraha̧ i̧tti̧mü̧ isotürü ja̧'wa̧ta̧nü̧ ukutu Dio-rü ukuotätürü ja̧'a̧tȩ'ü̧ ja̧'a̧, pi̧yȩ ra̧wä̧pi̧jü̧ttü̧ kki̧'i̧kuä̧ wȩnȩmä̧.

²⁷ Isopäi'ünä̧, Jerusarȩ́-nä̧ kka̧kuä̧tü̧mä̧ ja̧'wa̧ta̧nü̧ tturuwotü'i̧nä̧ Jesú ütü'kü wo̧jui̧'o̧ko̧tü̧ pinä̧tü̧ sawaru mo̧ro̧ jü̧ta̧'a̧nü̧ profeta-tü̧ tti̧wȩyu̧ti̧nü̧mä̧ ttukuokua'anä̧. Ja̧'wa̧nü̧ ttu̧wo̧jui̧po̧ka̧'a̧ttü̧, profeta-tü̧ ttukuokuinü̧'a̧kuä̧ kuä'ü ttikunä̧ wettinä̧ku̧.

²⁸ Kuä'ü ttikuarü pä'ümä̧, suronä̧ jȩä̧ji̧mä̧ ttü̧'o̧kui̧'o̧ka̧'a̧ jä̧ja̧'a̧nä̧, Pilato-rü jä'epinä̧tü̧ kuä'ü ttikuarü pä'ütä.

²⁹ Jua̧u̧nü̧ o'ka'a, o'kajuiyünä̧tä̧ wȩyu̧kuä̧ pü̧ta̧'a̧nü̧ jȩpä̧jä̧'kotümä̧, dauttü mȩyȩdü̧ iku, wa'are idoränä̧ ttütinä̧ku̧.

³⁰ Ja̧'wa̧nü̧ jȩttä̧ja̧'a̧nä̧'i̧nä̧ Dio-mä̧ wa'ü ikuinä̧tü̧ ttü̧'kä̧tȩttü̧ ttoädinä̧ku̧.

³¹ Ja̧'wa̧nü̧ ji̧na̧'a̧mä̧, rekuo mo̧ro̧ jo̧mȩnä̧ i̧jȩkui̧nü̧ Galirea-ttü Jerusarȩ́-ra̧'a̧ku̧ chutäku 'chi̧nä̧tü̧rü̧mä̧; ja̧'wa̧nü̧ ja̧'a̧ jitämä̧ juätütä ja̧'a̧, Jesú-ru 'kuäopa'a tottinü̧ ttü̧ja̧rü̧ ji'äwätümä̧.

³² Ja̧'wa̧nü̧ ja̧'a̧ jitämä̧ ukuturu pi̧yȩ jareü wȩnȩ ji'äwätüjä̧: Tü̧tä̧mü̧ mi̧nä̧rü̧, Dio-mä̧ jȩchä̧kua̧sä̧ päinü̧ta'anü̧ jȩpi̧nü̧ pä'ü,

³³ jua̧u̧ ji̧nü̧mä̧, ujutu tti̧tti̧mü̧ o'kotürü iyinü̧. Ja̧'wa̧nü̧ jȩpü̧mä̧, Jesú-ru tto'ädinü̧, salmo-ttü̧ capíturu 2-nä̧ pa̧'a̧nü̧ pä'ijü'akuä: «Ukumä̧ ttü chi̧tti̧jä̧; jitä mo̧ro̧ chuwäbe'äkujä̧.»

³⁴ Idepä pparuwächü juiya pä'ü, wa'arettü ttoädäkua'amä̧, täkü ä'koji pa̧'a̧nü̧ päinü̧ o'ka'a ji̧na̧'a̧: «Dawi-rü chi̧yä̧kua̧jä̧ pä'ü chukuokuinü̧mä̧, jueünä̧tä̧ chi̧yä̧kua̧sä̧.»

³⁵ Ja̧'wa̧ta̧nü̧ kkoro salmo-nä̧ pä'a: «Uku ku̧mü̧wä̧ya̧ kuȩmi̧nä̧ku̧ru̧mä̧ wa'are idorättü; idepä pparuwächa'anä̧mä̧ ja̧'a̧tä̧ topokü chä̧kua̧sä̧.»

³⁶ Isopäi'ünä̧ Dawi-mä̧, Dio-rü pä̧wä̧rü̧jo̧mȩnä̧ ukuojattü awaruwärü ppä'ädinü̧ ja̧'wa̧nü̧ ja̧'a̧ 'korujuoächomȩnä̧mä̧, idepä pparuwächinä̧ku̧.

³⁷ Ja̧'wa̧nü̧ ja̧'a̧nä̧, Chú Dio ttoädinä̧ku̧mä̧, idepämä̧ pparuwächokü pinü̧.

³⁸ Ja̧'wa̧nü̧ ja̧'a̧ttü̧ chawaruwä chi̧jä̧wa̧tü̧ pi̧yȩ wo̧jui̧'ä̧tu̧kui̧: Isopäi'ünä̧ jua̧u̧tä̧ ja̧'a̧ surojü jȩpü̧ ikua'a ji̧'ä̧kuä̧wa̧mä̧.

³⁹ Ja̧'wa̧nü̧ ja̧'a̧ttü̧ Moisé weinü̧ jäwänä̧, adiwä jueiku juo'ächokotü pinä̧tü̧mä̧, Jua̧u̧nä̧tä̧ ja̧'a̧ surojüttü adiwä jueiku ttü'ärowächa'amä̧.

⁴⁰ Ja̧'wa̧nü̧ ja̧'a̧ttü̧ ttu̧'ȩpä̧rä̧kuä̧u̧ kka̧kuä̧tu̧kui̧, profetas jittäwinü̧ ro̧ȩkuä̧ wȩnȩ 'kuäopü juiyätukuaku pä'ümä̧:

⁴¹ «Ukutu kkü'kokotümä̧, dü'eku i̧wä̧tu̧kui̧. Isopäi'ünä̧ ku̧jä̧tu̧ku̧ mo̧ro̧mä̧ ji̧yȩtȩ chaditäkua̧sä̧, jittäwomȩnä̧'i̧nä̧ kuesetätukuokü jäwä.»

⁴² Pä'ü ukuokui'ipü, Pauru-mä̧ awaruwäku, judío ttü̧'ȩjä̧'i̧jode sinagoga-ttü rättekuächomȩnä̧, judío pokotümä̧ jättepinä̧u̧ kkoro mo̧ro̧, sawaru mo̧ro̧ juätürü'i̧nä̧ jua̧u̧ tü'kü jittäwatü pä'ü.

⁴³ Ttü̧ja̧rü̧ we'ü ttikuäji o'ka'a, rekuätü judío'i̧nä̧, judío pokotü'i̧nä̧ Pauru-ku, Bernawé-ku 'chi̧nä̧tü̧. Ja̧'wa̧nü̧ ja̧'a̧ juätürü ro̧'ȩpi̧nä̧tü̧, 'kuättächi'oka'a Dio re ü̧jü̧ jäwä ttesetäjinä̧ tti̧'cha̧ pä'ü.

⁴⁴ Ja̧'wa̧nü̧ ja̧'a̧ttü̧, kkoro sawaru mo̧ro̧, ütawiyä ttü̧ja̧ o'katoi'ünä̧ jo̧mȩnä̧ ka̧ka̧kui̧nä̧tü̧ Dio i̧wȩnȩ jittäwa'a ttä̧ju̧kua̧ pä'ü.

⁴⁵ Ja̧'wa̧nü̧ ttü̧ja̧ rekuätü ttü̧ka̧ka̧kuo̧mȩnä̧, judío-mä̧ Pauru-rü ra̧wä̧ri̧pü̧, Pauru jiäu to'ija̧'a̧ku̧ pä'ä'chinä̧tü̧, suronä̧'i̧nä̧ pä'ä'chinä̧tü̧.

⁴⁶ Ja̧'wa̧nü̧ pä̧tti̧yä̧u̧, Pauru-mä̧, Bernawé-ku pä̧i̧ku̧nä̧ pättinä̧u̧: —Isopäi'ünä̧, ä̧kuo̧mȩnä̧mä̧ ukutu judío-rü, Dio i̧wȩnȩ jitäwa pä'ü ji̧na̧'a̧nä̧; kkü'kü jui'ü ya'oku kkä̧kuä̧wä̧ i'ko'i̧nä̧ kuȩma̧ päkuätukuoka'attü̧, judío pokotürütä ji'äu 'chä̧tü̧jä̧.

⁴⁷ Tu̧ru̧wa̧mä̧, pa̧'a̧nü̧ pä'ü weinä̧u̧jä̧: «Ukurumä̧ kku̧nu̧sä̧, judío pokotürü tȩya̧u̧ kkȩdȩpü̧nä̧ ku̧ja̧ pä'ü, pi̧jä̧ beipomȩbü päi'ünä̧ surojüttü kki̧'ä̧kuä̧wä̧ ȩpü̧ kuiya pä'ü,».

⁴⁸ Pi̧yȩ pätta'a ä̧ju̧ku̧, judío pokotümä̧ rü̧ȩnä̧ eseäkuäwinä̧tü̧, Tu̧ru̧wa̧ i̧wȩnȩmä̧; Ja̧'wa̧ta̧nü̧ kkä̧kuä̧wä̧ i'ko tteseta pä'ü wotümä̧ esetinä̧tü̧.

⁴⁹ Ja̧'wa̧nü̧tä̧ rü̧ä̧chi̧na̧'a̧, Tu̧ru̧wa̧ i̧wȩnȩ juä̧jä̧ rȩjȩnä̧mä̧.

⁵⁰ Ja̧'wa̧nü̧ ja̧'a̧nä̧ judío-mä̧, juȩnȩ ütawiyättü, nä̧tü̧ adiu Dio-rü esetätürü'i̧nä̧, ukuo isotürü'i̧nä̧ ja̧'wa̧ta̧nü̧ ruwotürü'i̧nä̧ esekuinä̧tü̧, Pauru-rü'i̧nä̧, Bernawérü'i̧nä̧ juä̧jä̧ttü̧ rä'epü ttikunä̧.

⁵¹ Ja̧'wa̧nü̧ jȩttä̧u̧, tti̧jä̧pi̧yä̧ ppüsäwi'ütä rä'opächinä̧tü̧ Iconio ütawiyära̧'a̧ku̧.

⁵² Ja̧'wa̧nü̧ ja̧'a̧nä̧ Jesucrito-rü esetätümä̧ jo̧mȩnü̧ eseäkuäwinä̧tü̧ ja̧'wa̧ta̧nü̧ Epíritu Sa̧tu̧rü̧ jo̧mȩnü̧ winä̧tü̧.