Hechos 12 - Nuevo Testamento Uwotjüja

Sa̧ti̧a̧ku̧-rü̧tä̧ kuä'ü iku, Peduru-rümä̧ kärenä̧ rütinä̧tü̧

¹ Ji̧yȩnü̧ pä̧nä̧ rey Herode ru̧wa̧ pä̧nü̧ ra̧wä̧rü̧, igresia jü̧nä̧ wotü, yotukunä̧rü̧ suronä̧ jȩttü̧nä̧ we'inü̧.

² Ja̧'wa̧nü̧ ja̧'a̧, Ju̧a̧ ubüo Jacobo-rü kurodänä̧ kuä'ü ttikunä̧ weinä̧ku̧;

³ Ja̧'wa̧nü̧ jȩä̧ja̧'a̧ judío ttesewiyäku, Peduru-rü'i̧nä̧ kärenä̧ 'chuttäda pä'ü we'inü̧. Pi̧yȩmä̧ 'kuäopina̧'a̧, pan levadura juiyünä̧ ttüku pä'käri mo̧ro̧.

⁴ Herode-mä̧ Peduru-rü 'chuttädünä̧ su̧ro̧do̧u̧ru̧ we'äji̧'ka̧ pa̧ja̧kuä̧nü̧ osa pünä̧ tta̧ttä̧rü̧nä̧ we'ü ütinä̧ku̧. Pacua o'ka'a päi'omȩ ttü̧ja̧ ttä'ka jo̧mȩ i̧jȩpa̧ pä'ü amükuädü jȩpi̧nü̧.

⁵ Ja̧'wa̧nü̧ ja̧'a̧ttü̧, Peduru-mä̧ kärenä̧ pi̧nü̧, rü̧ȩnä̧ tta̧ttä̧ra̧'a̧nä̧tä̧; ja̧'wa̧nü̧ ja̧'a̧nä̧, igresia jü̧nä̧ wotümä̧ yoriso kättädi'oka'a, Dio-rü ukuokuinä̧tü̧, jua̧u̧ ütü'kümä̧.

Á̧gȩ-mä̧ Peduru-rü kärenä̧ttü̧ rä'epü ikuinü̧

⁶ Herode-mä̧ jua̧u̧nu̧tä̧ yodó, ttü̧ja̧ ttä'ka jo̧mȩ i̧jȩpa̧rü̧ pä'ü räepa päjaku ja̧'a̧, Peduru-mä̧ su̧ro̧do̧u̧ ta̧ju̧ ttü̧'kä̧tȩ jo̧mȩ pi̧nü̧, kä̧rȩnä̧sa̧nä̧ ti̧'ä̧dü̧ rütäwa'a, kkorotümä̧ kärenä̧ pä̧kuä̧wode äpate ä'ka tta̧ttä̧ra̧'a̧nä̧.

⁷ Ttu̧ni̧chä̧ra̧'a̧nä̧, Tu̧ru̧wa̧ i̧sa̧ á̧gȩ kkä̧mä̧di̧nü̧, kärenä̧ pä̧kuä̧wo̧ka̧mä̧ kkȩdȩ'ü̧nä̧tä̧. Ja̧'wa̧nü̧ päi'a'attü, jua̧u̧ á̧gȩ-mä̧ Peduru-rü i'esubänä̧ mȩ'ü̧ porädü päinä̧ku̧: «Jurunä̧ ä̧rä̧mi̧'i̧» päüta'anü̧, yotäku kärenä̧sa̧, Peduru u̧mü̧nä̧ nü̧'käwä̧jä̧sa̧mä̧ ejächi'ü ttawäwipa'anä̧,

⁸ á̧gȩ-mä̧ pä'inü̧: «ku̧'ka̧tä̧wä̧ta̧ 'ka̧tä̧wo̧'ü̧, ku̧jä̧pü̧ isäya kku̧nä̧wo̧'i̧.» Päüta'anü̧ Peduru-mä̧ jȩpi̧nü̧. Ja̧'wa̧ta̧nü̧, á̧gȩ-mä̧ päinä̧ku̧ «wä̧mȩnä̧ 'ku̧'ka̧tä̧wä̧'i̧jä̧ta̧ 'ka̧tä̧wo̧'ü̧ cho'ka'anä̧ ichi.»

⁹ Ja̧'wa̧nü̧ o'ka'anä̧ Peduru-mä̧ rä'opü kkä̧nü̧, isopäi'ünä̧ ja̧'a̧ tä̧jí̧, yaparekü̧ päomȩ'i̧nä̧ juiya'attü̧, 'kuo̧ti̧nä̧ jä̧'i̧nü̧'a̧nü̧ jä̧ku̧sä̧kü̧ pä'ütä amükuädinü̧.

¹⁰ Ja̧'wa̧nü̧ ja̧'a̧, su̧ro̧do̧u̧ru̧mä̧ ä̧kuo̧mȩnä̧ tta̧'ä̧rä̧tü̧rü̧'i̧nä̧, juȩnȩ o'komȩnä̧ tta̧'ä̧rä̧tü̧rü̧'i̧nä̧, 'kuä'o'äjä'kotü, u̧mi̧ku̧ räokuate kuoräukätä jate'i̧nä̧, tti̧'chi̧'o̧mȩnä̧, ja̧'a̧tä̧tä̧ bawekuächina̧'a̧; ja̧'wa̧nü̧ päia'anä̧ rä'opächäjä'kotü, mä̧nä̧mä̧ ji̧mä̧tȩ 'kuättopäji o'ka'a, á̧gȩ-mä̧ kkatätä ü̧ji̧pa̧'a̧nä̧, ji̧ȩ'i̧nä̧ku̧.

¹¹ Ja̧'wa̧nü̧ päi'äku, Peduru-mä̧ wo̧jui̧'ü̧ pä'inü̧: «jitämä̧ wo̧jui̧'ü̧sä̧, isopäi'ünä̧ Chu̧ru̧wa̧mä̧, Herodes'i̧nä̧, Judío'i̧nä̧ suronä̧ jȩtta̧ pättiyäku rä'epü ikuäjäkusätí̧, pä'ü.»

¹² Ja̧'wa̧nü̧ jä̧ku̧mä̧, Peduru-mä̧, Ju̧a̧ ja̧ju̧ kkojusodera̧'a̧tä̧ 'chi̧nü̧, ja̧'a̧tä̧ i̧mi̧mä̧ Maruku pättä'ijäku, juodenä̧ rekuätü ka̧ka̧kuä̧jä̧'kotü Dio-rü ukuoku pȩji̧nä̧tü̧.

¹³ Ja̧'wa̧nü̧ ja̧'a̧, Peduru-mä̧ u̧mi̧nä̧ttü̧ äpatenä̧ wooiyäkua, yajute mü̧ä̧yaju Rode pä'ü mi̧kuaju, bajepa pä'ü kki̧'chi̧'o̧mȩnä̧.

¹⁴ Peduru i̧wȩnȩ ä̧ju̧kui̧'i̧pü̧, rü̧ȩnä̧ esewipü bajepoka'atä, ppa̧'ä̧chä̧chü̧ jakuoju pȩjä̧tü̧rü̧, ji'äwinä̧ju̧: Peduru-mä̧ äpate ä'ka u̧mi̧nä̧ kkü̧ pä'ü.

¹⁵ Jijäwiyä̧u̧ pättinä̧kua̧: —¡suripächäju!, jü̧nä̧. Ja̧'wa̧nü̧ ja̧'a̧nä̧ yabonü̧tä̧, pä'inä̧ju̧ isopäi'ünä̧ jua̧u̧tä̧ ja̧'a̧, päjiyä̧u̧, juätümä̧ pä'inä̧tü̧. —¡A̧'kua̧ru̧wa̧ á̧gȩ ja̧'a̧!, jü̧nä̧.

¹⁶ Ja̧'wa̧nü̧ 'kuäopa'anä̧ Peduru-mä̧ yabonü̧tä̧ wopinü̧; ja̧'wa̧nü̧ woiyä̧u̧ ba'epümä̧, to̧o̧ to̧pä̧ri̧nä̧tü̧.

¹⁷ Ja̧'wa̧nü̧ ja̧'a̧nä̧, u̧mü̧nä̧tä̧ ttü'koruchi'ünä̧ jȩpü̧nü̧, Ttu̧ru̧wa̧ rä'epü ikuäja'a ji'äunu̧, pa̧'a̧nü̧ pä'inü̧: —Ja̧'wa̧ta̧nü̧ pi̧yȩmä̧ ji'äwäjätukui, Sa̧ti̧a̧ku̧rü̧'i̧nä̧, Crito-nä̧ ti̧jä̧wa̧tü̧rü̧'i̧nä̧, jü̧nä̧. Pä'ipütä kkara'a rä'opächü 'chi̧nü̧.

¹⁸ Ja̧'wa̧nü̧ ja̧'a̧ mo̧ro̧ juomȩnä̧mä̧, su̧ro̧do̧u̧mä̧ Peduru päjimä̧ ¿toku jä̧ja̧'a̧jo pä'ü juo'ekuinä̧tü̧?

¹⁹ Ja̧'wa̧nü̧ ja̧'a̧, Herode-mä̧ ttusäjarü pä'ü weäja'anä̧, ttü̧'o̧kui̧'i̧yo̧ko̧ku̧ pä̧ji̧'ka̧mä̧, kuä'ü ttikuarü pä'ü we'inü̧. Pi̧yȩ o'ka'a Herode-mä̧, Judea rȩjȩra̧'a̧ttü̧ rä'opächäji̧'ka̧mä̧, Cesarea-ra̧'a̧tä̧ kki̧'i̧pi̧nü̧.

Herode 'koru juo'ächinü̧ wȩnȩ

²⁰ Ja̧'wa̧nü̧ ja̧'a̧ Herode-mä̧ Tiro ttü̧ja̧rü̧'i̧nä̧, Sidón ttü̧ja̧rü̧'i̧nä̧ a̧mi̧surinä̧ku̧; ja̧'wa̧nü̧ ja̧'a̧nä̧ jua̧u̧ ütawiyä ttü̧ja̧mä̧, ru̧wa̧ Herode u̧mü̧wä̧ya̧ tta̧wä̧rä̧kuä̧wä̧ i̧sa̧ Blasto-rü mitü esekuinä̧tü̧, wȩnȩ juiyünä̧ ttü̧ja̧ pä'ü, jua'amä̧ tti̧rȩjä̧mä̧ jua̧u̧tä̧ ukuäje'ä'i̧jä̧u̧ ja̧'a̧ttü̧.

²¹ Ja̧'wa̧nü̧ ja̧'a̧ Herode-mä̧, ji̧yȩnü̧ mo̧ro̧ päi'omȩnä̧, i̧ä̧rȩta̧ ukuo i̧sä̧ta̧ 'ka̧tä̧wi̧'ä̧ji̧'ka̧, uruwo deäkänä̧ pä̧mä̧dü̧ ujuruku we'ü ukuokuinä̧u̧.

²² Ja̧'wa̧nü̧ jä̧u̧ ttü̧ja̧mä̧ wopinä̧tü̧: «¡ttü̧ja̧sa̧ 'kua̧rü̧ juiyünä̧, dio 'kua̧rü̧nä̧tä̧ ukuoku! pä'ü.»

²³ Wotta'anä̧ yotäku, Tu̧ru̧wa̧ i̧sa̧ á̧gȩ jȩä̧ku̧ na̧'ä̧chi̧pinü̧, Dio-rü esewokomȩnä̧ ja̧'wa̧nü̧ ja̧'a̧ttü̧ mi̧yü̧ kuä̧nü̧ ttikuäku 'korujuo'ächinü̧.

²⁴ Ja̧'wa̧nü̧ ja̧'a̧nä̧, Dio i̧wȩnȩmä̧ yabonü̧ rü̧ä̧chi̧na̧'a̧.

²⁵ Ja̧'wa̧nü̧ ja̧'a̧ Bernawé'i̧nä̧, Sauro'i̧nä̧ aditäjä'kotü Jerusarȩ́-ttü̧ kä'ädäkuäwipü, Antioquía-ra̧'a̧ku̧ ppa̧'ä̧chä̧chi̧nä̧tü̧. Ju̧a̧-rü̧ ȩmi̧pinä̧tü̧, Maruku pä'ü ottinä̧ku̧ru̧.