Hechos 11 - Nuevo Testamento Uwotjüja

Peduru-mä̧, Jerusarȩ́ igresia-rü ji'äwinü̧

¹ Apótore'i̧nä̧, kkorotü Jesucrito-rü esetätü'i̧nä̧ Judea-nä̧ kka̧kuä̧tü̧mä̧ ä̧ju̧kui̧nä̧tü̧, Judío pokotü'i̧nä̧ Dio i̧wȩnȩ ä̧ju̧kuä̧tü̧do pä'ü ukuowi'a'a.

² Ja̧'wa̧nü̧ jä̧ja̧'a̧ Peduru Jerusarȩ́-ra̧'a̧ i̧'chi̧'o̧mȩnä̧, Circuncisión jäwä esetü ukuotätümä̧, rü̧ȩnä̧ pä'ü,

³ pättinä̧ku̧: —¿Tta̧'a̧nü̧ pä'ü, ukumä̧ circuncisión ukuotokotükumä̧ pä̧mä̧dü̧ kukua'ajä̧ttü̧?

⁴ Pättäku, Peduru-mä̧ 'kuäopäji kkä̧mä̧dü̧ jiäwinä̧u̧:

⁵ Jope ütawiyättü Dio-rü chukuokuomȩnä̧, 'kuo̧ti̧nä̧ 'kua̧rü̧nä̧ i̧jȩkuä̧cha̧'a̧ topinü̧sä̧; sa̧wa̧na̧'kua i̧sä̧ta̧, pa̧ja̧kuä̧nü̧ jo̧mȩnä̧ ti̧ä̧dä̧kuä̧wa̧'a̧, ttü chü̧jo̧mȩku̧ mo̧ro̧jä̧ra̧'a̧ttü̧ mȩyȩwi̧'i̧na̧'a̧.

⁶ Ja̧'wa̧nü̧ jä̧ku̧ adiu tochomȩnä̧, de'a po̧i̧rü̧'i̧nä̧, ttu̧kuä̧ba̧nä̧ do'ä'wä'ijü juo'otürü'i̧nä̧, ju'tojunä̧ ko̧'ä̧rä̧tü̧rü̧'i̧nä̧, topinü̧sä̧.

⁷ Ja̧'wa̧nü̧ päi'a'attü, ji̧yȩtȩ rȩmi̧pa̧'a̧ ä̧ju̧kui̧nü̧sä̧: «Peduru, ä̧rä̧mi̧'i̧; kuä'ü kuiti,» jü̧nä̧.

⁸ Päku, pä'inü̧sä̧: kuoküsä Chu̧ru̧wa̧, ttümä̧ surojümä̧, yorisotä kuokü pä'ijüsä.

⁹ Ja̧'wa̧nü̧ pädomȩnä̧, todärenä̧ päi'ünä̧ mo̧ro̧jä̧ra̧'a̧ttü̧ ädätinä̧ku̧sä̧: «Dio aditü tükü ikuinü̧mä̧, ukumä̧, surojü pä'ümä̧, okuä,» jü̧nä̧.

¹⁰ Pi̧yȩmä̧, wäbodäkuä jo̧mȩnä̧ päinä̧ku̧sä̧ ja̧'wa̧nü̧ jä̧ji̧ o'ka'a o'kajuiyünä̧tä̧ pä'äjita'anü̧ mo̧ro̧jä̧ra̧'a̧ku̧ käekuächina̧'a̧.

¹¹ Ja̧'wa̧nü̧ päia'anä̧, ttü̧ja̧ wä̧mȩtukuä, Cesarea-ra̧'a̧ttü̧ ttürütä ä̧tȩkuä̧nä̧ we'äwotü, chü̧jodenä̧ ichi'inä̧tü̧.

¹² Ja̧'wa̧nü̧ ja̧'a̧ Epíritu Sa̧tu̧mä̧, kuarodoka'a juätütäku täi päinä̧ku̧sä̧. Ja̧'wa̧ta̧nü̧, pitü kko̧ro̧mü̧ttü̧nü̧ ya̧tȩ wotü esetätuku 'chä̧ji̧'ka̧, ya̧tȩ ojusodenä̧ dodepinä̧tü̧jä̧,

¹³ Ja̧'wa̧nü̧ ja̧'a̧ jua̧u̧mä̧ pä'inü̧: ya̧tȩ á̧gȩ-rü̧ topäjisä chojusodettü, jua̧u̧mä̧ kkä̧mä̧dü̧ päjäkusä: «Yotüterü, Jope ütawiyära̧'a̧ we'í, Simón-ja̧'a̧nä̧ Peduru pä'ü ottäkuru ichi'a jittäwäja»

¹⁴ Jua̧u̧tä̧ ja̧'a̧ ukuru ji̧ä̧wä̧kua̧mä̧ kuawaruwä'i̧nä̧ o'katoi'ünä̧ ukutä'i̧nä̧ surojüttü ku̧ji̧pä̧tu̧kua̧ pä'ü.

¹⁵ Ja̧'wa̧nü̧ kkä̧mä̧dü̧ chukuokua'a, Epíritu Sa̧tu̧ juätürü kkä̧mä̧di̧nü̧, ujuturu ä̧kuo̧mȩnä̧ ü̧jä̧mä̧di̧nü̧ta̧'a̧nü̧.

¹⁶ Ja̧'wa̧nü̧ ji̧yä̧ku̧ amükuädi'inü̧sä̧, Tu̧ru̧wa̧ päinü̧: Isopäi'ünä̧ Ju̧a̧-mä̧ ajiyanä̧ bautizo jȩpä̧'i̧jü̧ ja̧'wa̧nü̧ ja̧'a̧nä̧ ukutumä̧ Epíritu Sa̧tu̧nä̧ bautizo jȩä̧kuä̧u̧jä̧ pä'inü̧, ji̧nü̧.

¹⁷ Ja̧'wa̧nü̧ ja̧'a̧ Dio-mä̧ ujutu Jesucrito-rü esetätürü, mipponä̧ jäwä iyinü̧ta̧'a̧nü̧, juätürü'i̧nä̧ iya'amä̧ ¿Dí cha'ajä̧ttü̧, Dio-rü to'ija̧'a̧ku̧ päda pä'ümä̧?

¹⁸ Ja̧'wa̧nü̧ jiäwa'a ä̧ju̧ku̧, 'koruchi'ijä'kotü Dio-rütä eseu pä'inä̧tü̧: —¡Ja̧'wa̧nü̧ jü̧ttü̧mä̧, Dio-mä̧ Judío pokotürü'i̧nä̧ surojüttü kki̧'ä̧kuä̧wä̧ra̧'a̧ku̧ ttü̧ji̧pi̧ya̧rü̧ pä'ü iyäja'a tä̧jí̧!

Antioquía-ttü Jesú-ru ttesetinü̧ wȩnȩ

¹⁹ Esteba̧-rü̧ kuä'ü ttikuinü̧ o'ka'a, Jesucrito-rü esetätürümä̧ ya'äu suronä̧ jȩtti̧nä̧u̧. Ja̧'wa̧nü̧ jä̧u̧ rekuätü tü'ipü i̧wi̧nä̧tü̧ Fenicia-ra̧'a̧'i̧nä̧, Chipre kkä'ko i̧sä̧sa̧ra̧'a̧'i̧nä̧, Antioquía ttawaränä̧'i̧nä̧, jü̧nä̧. Juätü tü'ipätümä̧, kkorotürümä̧ jittäwoka'anä̧, judío-rütä ji'äwinä̧tü̧ Dio i̧wȩnȩmä̧.

²⁰ Ja̧'wa̧nü̧ ja̧'a̧nä̧, juätüttü 'kä̧wi̧na̧'a̧, Chipre ttü̧ja̧ttü̧ a̧'u̧ku̧nä̧'i̧nä̧ ja̧'wa̧ta̧nü̧ Cirene ttü̧ja̧ttü̧'i̧nä̧, jü̧nä̧; Antioquía-ra̧'a̧, Judío pokotürü Jesucrito jäwä, jareü wȩnȩ ji'äwinä̧tü̧mä̧.

²¹ Ja̧'wa̧nü̧ jo̧mȩnä̧, Tu̧ru̧wa̧ Dio jäwä juätütäku kka̧'a̧ttü̧, rekuätü Tu̧ru̧wa̧ Jesucrito-rü esetü ikuinä̧tü̧.

²² Ja̧'wa̧nü̧ jua̧u̧ 'kuäopa'a ä̧ju̧ku̧, Jerusarȩ́-ttü̧ igresia jü̧nä̧ esetätümä̧; Bernawé-rü we'inä̧tü̧ Antioquía-ra̧'a̧ i̧'cha̧ pä'ü.

²³ Bernawé-mä̧ jua'a i̧'chi̧'o̧mȩnä̧, Dio jäwä rü̧ȩnä̧ kki̧yä̧ku̧, juätütäku eseu, jiäwinä̧u̧, tta̧mi̧so'ki o'kajuiyünä̧ Ttu̧ru̧wa̧nä̧tä̧ ukuotü tti̧'cha̧ pä'ü.

²⁴ Jua̧u̧ Bernawé-mä̧ adiwä jueinä̧ ü̧ja̧'a̧ttü̧, Epíritu Sa̧tu̧rü̧'i̧nä̧, tta̧'kua̧ wȩnä̧rä̧kuä̧wä̧'i̧nä̧ jo̧mȩnü̧ winü̧. Ja̧'wa̧nü̧ jo̧mȩnä̧ rekuätü, Tu̧ru̧wa̧rü̧ esetü ikuinä̧tü̧.

²⁵ Jua̧u̧ o'ka'a, Bernawé-mä̧, Taso ütawiyära̧'a̧ttü̧ Sauro-rü o'ü i̧wä̧ji̧'ka̧, Antioquía-ra̧'a̧ku̧ i'kächinü̧.

²⁶ Ja̧'wa̧nü̧ ja̧'a̧, juorü igresia jü̧nä̧ wotükumä̧, ya'ute año jo̧mȩnä̧ kka̧kui̧nä̧tü̧, rekuätürü wo̧juȩtü̧; Juorü Antioquía-ttü ji̧na̧'a̧, ä̧kuo̧mȩnä̧ Jesucrito-rü esetätürü, critiano pä'ü ottina̧'a̧mä̧.

²⁷ Ji̧yȩnü̧ pä̧nä̧, profetas jü̧nä̧ wotü yotüte, Jerusarȩ́-ttü̧ Antioquía-ra̧'a̧ku̧ 'chi̧nä̧tü̧.

²⁸ Juätüttü ya̧tȩ, Agabo pä'ü mi̧kua̧ ä̧rä̧mi̧'ü̧ Epíritu Sa̧tu̧ a̧'kua̧ iweyenä̧ ukuokuinü̧: pi̧jä̧ ttü̧ja̧ ttü̧ja̧kuo̧mȩ pünä̧mä̧ o'kajuiyünä̧ ppäi mo̧ro̧ rȩbȩä̧kuä̧wä̧kua̧'a̧ pä'ü; Ja̧'wa̧nü̧ jiäwinü̧ o'ka'a, ru̧wa̧ Emperador Claudio ü̧'ü̧ pä̧nä̧, päinü̧ta'anü̧ 'kuäopina̧'a̧.

²⁹ Ja̧'wa̧nü̧ ja̧'a̧ Antioquía-ttü, Jesucrito-rü esetätümä̧ Judea rȩjȩnä̧ kka̧kuä̧tü̧rü̧ ppä'ädümä̧ rekuä rü̧jü̧ we'inä̧tü̧.

³⁰ Ja̧'wa̧nü̧ pärätä ppä'ädümä̧, Bernawé'i̧nä̧, Sauro'i̧nä̧ ȩpü̧ iyinätü̧ Jerusarȩ́ igresia-ttü a̧ci̧a̧nu̧ wotü ttu̧mü̧nä̧.