Hechos 10 - Nuevo Testamento Uwotjüja

Cornelio-mä̧ Peduru-rü jittäwäja pä'ü we'inü̧

¹ Ya̧tȩ kki̧nü̧, Cornelio pä'ü mi̧kua̧ Cesarea ütawiyänä̧, su̧ro̧do̧u̧ ttu̧ru̧wa̧ ciȩnü̧ wotü su̧ro̧do̧u̧ ttu̧ru̧wa̧ «Itariana» pä̧ttä̧u̧.

² Jua̧u̧ Cornelio-mä̧ Dio-rü esetinü̧ i̧tti̧mü̧tä̧ku̧ o'katoi'ünä̧, rü̧ȩnä̧ usurä isotürü'i̧nä̧ ppä'ädinü̧ ja̧'wa̧ta̧nü̧ 'kuäopünä̧ Dio-rü ukuokuinü̧.

³ Ji̧yȩtȩ mo̧ro̧, ttu̧'kuo̧ti̧nä̧ jä̧'i̧nü̧'a̧nü̧, las tres-nä̧ ni̧pä̧ro̧mȩku̧, topinü̧ ya̧tȩ Dio wȩ'ä̧wa̧ á̧gȩ do'ächi'ü pä'a: «¡Cornelio!»

⁴ Päku, to̧pä̧rü̧ kkä̧nü̧, ye'ünä̧nü̧ jä'epinü̧: ¿Däjéjä̧ttü̧ chu̧ru̧wa̧? jäepäku, á̧gȩ-mä̧ pä'inü̧: Dio-mä̧ topäji, Churutä jä'epü kukuokuä'ijümä̧ ja̧'wa̧ta̧nü̧ usurä isotürü ppäkuädä'ijü'i̧nä̧.

⁵ Ja̧'wa̧nü̧ ja̧'a̧ttü̧, yotüterü we'i Jope ütawiyära̧'a̧ttü̧, Simón ja̧'a̧nä̧, Peduru pättä'ijäkuru ottäja.

⁶ Jua̧u̧mä̧ kka̧ra̧ Simón, isotü tti̧jȩti̧yu̧ adikuä i̧sa̧ ojusodenä̧ kkü̧, rü̧ä̧ aje jäyoto; jua̧u̧tä̧ jä̧kua̧'a̧ jȩ'kua̧ pä'ü rekuä rü̧jü̧ ji̧ä̧wä̧kua̧mä̧.

⁷ Ja̧'wa̧nü̧ ja̧'a̧, jua̧u̧ á̧gȩ i̧wi̧'ä̧ji̧ o'ka'a umüwäyotüttü ta̧ju̧ru̧ wopo'ü ja̧'wa̧ta̧nü̧ u̧mü̧wä̧ya̧ su̧ro̧do̧u̧ i̧sa̧ rü̧ȩnä̧ ukuotä'ijürü wopo'ü.

⁸ O'kajuiyünä̧ ji'äwäji̧'ka̧, Jope ütawiyära̧'a̧ weinä̧ku̧.

⁹ Jua̧u̧nü̧ o'ka'a, kkoro mo̧ro̧, kkä̧wa̧ weü kkü̧rü̧ ja̧'a̧, juätü päjätümä̧ Jope tü'kü jo̧mȩ tti̧'cha̧'a̧, Peduru-mä̧ isode wä̧mȩ ja̧'a̧ku̧ 'cha'ächächinü̧ Dio-rü ukuoku 'chä̧nü̧ ojusodettümä̧.

¹⁰ Rü̧ȩnä̧ ukua ppä̧ri̧ja̧'a̧ ja̧'a̧, u̧kuȩ datta'anä̧ i̧'chi̧'ä̧ja̧'a̧; 'kuo̧ti̧nä̧ 'kua̧rü̧nä̧ i̧jȩkua̧'a̧ttü̧:

¹¹ Topinü̧, mo̧ro̧jä̧ bawekuächa'attü, sawana'kua i̧sä̧ta̧ ju'ta'au pa̧ja̧kuä̧nü̧ jo̧mȩnä̧ ti̧ä̧dä̧kuä̧wä̧ta̧ mȩyȩwi̧na̧'a̧ pi̧jä̧ra̧'a̧ku̧.

¹² Juä̧ta̧ jakuämä̧ ȩji̧nä̧tü̧, rȩjȩnä̧ kue'ächätüttü'i̧nä̧, rȩjȩnä̧ do'äwätüttü'i̧nä̧ ja̧'wa̧ta̧nü̧ ju'tojunä̧ ko̧'ä̧rä̧tü̧ttü̧'i̧nä̧, jü̧nä̧.

¹³ Ja̧'wa̧nü̧ ja̧'a̧, rä̧mi̧pi̧na̧'a̧ Peduru-rü: «Peduru, ä̧rä̧mi̧'ü̧, kuä'ü kuiti,» jü̧nä̧.

¹⁴ Ja̧'wa̧nü̧ rä̧mi̧pä̧ku̧, Peduru-mä̧ pä'inü̧: Chu̧ru̧wa̧, chuku juiyü'anü̧ ja̧'a̧; ttümä̧ ro̧'ȩkuo̧tü̧rü̧mä̧ ja̧'wa̧ta̧nü̧ suropätürümä̧, yorisotä kuokü pä'ijüsä.

¹⁵ Pä'äjita'anü̧ rä̧mi̧pi̧nä̧ku̧: «Dio tükü ikuinü̧mä̧, ukumä̧ surojü pä'ümä̧ okuä,» jü̧nä̧.

¹⁶ Pa̧'a̧nü̧mä̧, wäbodäkuä jo̧mȩnä̧ 'kuäopinä̧ku̧; ja̧'wa̧nü̧ jä̧ji̧ o'ka'a, sa̧wa̧na̧'kua i̧sä̧ta̧mä̧, pä'äjita'anü̧ mo̧ro̧jä̧ra̧'a̧ku̧ käekuächina̧'a̧.

¹⁷ Ja̧'wa̧nü̧ 'kuäopäjäku, Peduru-mä̧, tta̧'a̧nü̧ pä'ü ja̧'wa̧nü̧ i̧jȩkuä̧jä̧ku̧sä̧jó, pä'ü amükuäda'anä̧, Cornelio wȩä̧jä̧u̧mä̧, tȩnȩ́jä̧ttü̧ Simón ojusodemä̧ pä'ü jä̧'ȩpä̧rä̧yotü, äpate ä'ka ichi'inä̧tü̧.

¹⁸ Ja̧'wa̧nü̧ ja̧'a̧, pä̧i̧ku̧nä̧nü̧ wopinä̧tü̧, isopäi'ünä̧ juȩnȩtä̧ ü̧ja̧já̧ pä'ü, Simón-ja̧'a̧nä̧ Peduru pä'ü ottä'ijäkumä̧.

¹⁹ Ja̧'wa̧nü̧ ja̧'a̧, Peduru-mä̧ ji̧nä̧ toäji jä̧jí̧ amükuäda'anä̧, Epíritu Sa̧tu̧mä̧ päinä̧ku̧: «Topittü̧, wä̧mȩtukuä ttusäkujä̧.

²⁰ Ä̧rä̧mi̧'ü̧, mȩyȩwä̧chü̧ topitü, kudüdüwoka'a, juätümä̧ ttütä wedäjä̧u̧.»

²¹ Ja̧'wa̧nü̧ ja̧'a̧, Peduru-mä̧ mȩyȩwi̧'o̧po̧'ü̧ Cornelio wȩä̧jä̧u̧ru̧ pä'inü̧: —Ttütäsä, ukutu kusätukuäkumä̧; ¿Tta̧'a̧nü̧ jo̧mȩnä̧, kusäjätukuäkusättü̧?

²² Pä̧u̧ pättinä̧ku̧: —Su̧ro̧do̧u̧ ttu̧ru̧wa̧ Cornelio wȩä̧jä̧u̧ ichäjätüjä̧, jua̧u̧mä̧ Dio-rü esetü ukuotü ja̧'wa̧ta̧nü̧ Judío'i̧nä̧ ttu̧wo̧juä̧ku̧ ja̧'a̧. Jua̧u̧ru̧ Dio i̧sa̧ á̧gȩ ukuru woa pä'ü weäja'a ja̧'a̧, ojusodera̧'a̧ kuichiyarü pä'äji jikuäu ä̧ju̧kua̧ pä'ü.

²³ Ja̧'wa̧nü̧ ja̧'a̧ttü̧, Peduru-mä̧ jua̧u̧ yodomä̧, juȩnȩtä̧ ttä'ünä̧ do'ädü we'inü̧. Ja̧'wa̧nü̧ jä̧ja̧'a̧ kkoro mo̧ro̧, Peduru-mä̧ juätütäku i̧'cha̧'a̧ kkorotü Jope-ttü Jesucrito-rü esetätü'i̧nä̧ jua̧u̧tä̧ku̧ 'chi̧nä̧tü̧.

²⁴ Ja̧'wa̧nü̧ ja̧'a̧ kkoro mo̧ro̧ Cesarea ütawiyära̧'a̧ 'chä̧wi̧'i̧nä̧tü̧, Cornelio-mä̧ ukuojattü awaruwäku ja̧'wa̧ta̧nü̧ aditäwättü awaruwä'i̧nä̧ ttü̧ka̧ka̧kui̧'ü̧nä̧ ä̧tȩpä̧ji̧'ka̧ tta̧wä̧ra̧'a̧ rȩbȩwi̧pi̧nü̧.

²⁵ Ja̧'wa̧nü̧ ja̧'a̧ Peduru-mä̧, Cornelio ojusodenä̧ i̧'chi̧'o̧mȩnä̧, Cornelio-mä̧ rä'o'ü, Peduru-rü eseu, ä'ka jo̧mȩ iwe'kiyunä̧ ü̧'ä̧mä̧da̧'a̧.

²⁶ Peduru-mä̧, äräbe'ükkä̧nü̧ päinä̧ku̧: —Ä̧rä̧mi̧'i̧, ttü'i̧nä̧ uku ta̧'a̧nü̧ ttü̧ja̧sa̧sä̧.

²⁷ Ja̧'wa̧nü̧ ja̧'a̧ chutäku ukuokuäya̧ do'ächi'ü toomȩnä̧, ttü̧ja̧ rekuätü ka̧ka̧kuä̧jä̧'kotü ttü̧'ȩja̧'a̧ topinü̧.

²⁸ Juätürü Peduru-mä̧ pä'inü̧: —Ukutumä̧ wo̧juä̧tü̧jä̧ judío wa̧, judío pokotüku esekua pä'ümä̧, weäwi'o̧ko̧u̧ pä'ü. Ja̧'wa̧nü̧ ja̧'a̧nä̧ Dio-mä̧ i̧jȩpä̧jä̧ku̧sä̧, ttü̧ja̧sa̧rü̧mä̧ ya̧tȩrü̧'i̧nä̧, su̧ro̧pa̧ pä'ümä̧ okuä pä'ü.

²⁹ Ja̧'wa̧nü̧ ja̧'a̧ttü̧, jarodäkuäwä juiyünä̧, jittäüta'a̧nü̧ yotäku ichäjisä. Ja̧'wa̧nü̧ ja̧'a̧ttü̧, ukuturu jä'epüsä: ¿Toku jo̧mȩnä̧, kuä̧tȩpä̧jä̧tu̧kuä̧ku̧sä̧ttü̧ pä'ü?

³⁰ Cornelio-mä̧ ädätinü̧: Täkü pa̧ja̧kuä̧nü̧ mo̧ro̧ ja̧'a̧, pi̧yȩtä̧ hora-nä̧, porü chojusodettü, las tres-bü Dio-rü chu̧kuȩ a̧do̧chü̧ chukuokuomȩnä̧ ya̧tȩ ü̧'ka̧tä̧wä̧ta̧ kkȩdȩpä̧ta̧ 'ka̧tä̧u̧ i̧jȩkuä̧ja̧'a̧mä̧.

³¹ Jua̧u̧mä̧ päjäkusä: Cornelio, Dio-rü kukuokuä'ijümä̧ ä̧ju̧kuä̧jä̧ku̧jä̧ ja̧'wa̧ta̧nü̧ usurä isotürü ppäkuädä'ijü'i̧nä̧ amükuädäjäkujä̧, jü̧nä̧.

³² Ja̧'wa̧nü̧ ja̧'a̧ttü̧, yotüterü we'i Jope ütawiyära̧'a̧ Simón-ja̧'a̧nä̧ Peduru pättäkuru ottäja. Jua̧u̧mä̧ ja̧'wa̧ta̧nü̧ Simón pä'ü mi̧kua̧, isotü tti̧jȩti̧yu̧ adikuä i̧sa̧ pättäku ojusodenä̧ ü̧ja̧'a̧, rü̧ä̧ dubora jäyoto.

³³ Ja̧'wa̧nü̧ päjiyäku, yotäku ottäjaku pä'ü wedäja'a ichi'äjijä̧. Ja̧'wa̧nü̧ ja̧'a̧ttü̧, jitämä̧ o'katoi'ünä̧ pȩnȩtä̧ Dio ä'ka jo̧mȩ pȩjä̧tü̧jä̧, ukuru Dio weäji tä̧ju̧kua̧ pä'ümä̧.

Cornelio ojusodettü, Peduru jiäwinü̧ wȩnȩ

³⁴ Ja̧'wa̧nü̧ ukuokuiyäku, Peduru-mä̧ pä'inü̧: —Jitämä̧ isopäi'ünä̧ wo̧jui̧'ü̧sä̧, Dio-mä̧ yotüterütämä̧ esewokü pä'ü,

³⁵ Isopäi'ünä̧ kko̧ro̧jä̧ ttü̧ja̧rü̧'i̧nä̧ Churutä ukuotü esetätürümä̧, Dio-mä̧ repe'ü eseuti̧ pä'ü.

³⁶ Dio-mä̧ Irae i̧tti̧mü̧ o'kotürümä̧ ukuokuinü̧, wȩnȩ juiyünä̧ kkä̧kuä̧wä̧mä̧, o'katoi'ünä̧ Tu̧ru̧wa̧ Jesucrito ya̧tȩnä̧tä̧.

³⁷ Ukutumä̧, wo̧juä̧tü̧jä̧ judea rȩjȩnä̧ttü̧ ukuounä̧ o'kajuiyünä̧ 'kuäopinü̧mä̧, Galirea rȩjȩttü̧ kkä̧mä̧dü̧, Ju̧a̧ bautizo jȩpü̧ jiäwinü̧ o'ka'a.

³⁸ Dio-mä̧, Epíritu Sa̧tu̧ jäwänä̧ jȩpü̧, ujuru'i̧nä̧ iyinä̧ku̧ Jesú Nazare i̧sa̧rü̧mä̧. Ja̧'wa̧nü̧ ja̧'a̧ttü̧, Jesú-mä̧ adiutä ppä'ädü kue'ächinü̧, äwettä usurä ttȩmä̧u̧nä̧ jȩü̧'i̧nä̧ aditü ikuinü̧. Jua'amä̧ Dio chutäku ü̧ja̧'a̧ttü̧.

³⁹ Ujutumä̧ totina̧'a̧ttü̧ wo̧juä̧tü̧jä̧, o'kajuiyünä̧tä̧ Jesú, Judea rȩjȩttü̧ jȩi̧nü̧'i̧nä̧, Jerusarȩ́-ttü̧ jȩi̧nü̧'i̧nä̧, jü̧nä̧. Jua̧u̧nü̧ o'ka'a, daunä̧ ü̧jo̧kä̧nü̧ ü̧jü̧nä̧ kuä'ü ttikuinä̧ku̧mä̧.

⁴⁰ Ja̧'wa̧nü̧ ja̧'a̧nä̧, Dio-mä̧ wäbodäkuä mo̧ro̧ päi'omȩnä̧ ttoädinä̧ku̧, pä'äjita'anü̧ ujuturu i̧jȩkua̧ pä'ümä̧.

⁴¹ O'katoi'ünä̧rü̧mä̧ i̧jȩkuo̧ka̧'a̧nä̧, ujuturu ä'kojitä päi'ünä̧ tota pä'ü Dio pojopü ȩmi̧nä̧u̧ru̧tä̧ i̧jȩkui̧nü̧. Ujututä ji̧na̧'a̧ ttoächäji o'ka'a, chutäku kuä̧nü̧'i̧nä̧, au'i̧nä̧ jȩa̧'a̧ topinä̧tü̧mä̧.

⁴² Ja̧'wa̧nü̧ ja̧'a̧mä̧, jua̧u̧tä̧ weinä̧u̧jä̧ ttü̧ja̧rü̧ jitäwiyarü pä'ü; Jua̧u̧ru̧tä̧ Dio-mä̧ a̧'kua̧rä̧tü̧rü̧'i̧nä̧, wa'ü ikuinä̧tü̧rü̧'i̧nä̧ juez päi'ünä̧ ütinä̧ku̧ pä'ü.

⁴³ Profeta-mä̧ o'katoi'ünä̧, pide Jesú ütü'kümä̧ jittäwinü̧ o'ka'a ji̧na̧'a̧, Jua̧u̧ru̧ esetätümä̧ o'katoi'ünä̧ suronä̧ jȩttü̧ttü̧mä̧ jȩpü̧ i̧kuä̧kuä̧u̧ pä'ü.

Judío pokotü Epíritu Sa̧tu̧rü̧ ȩmi̧nä̧tü̧

⁴⁴ Peduru-mä̧ ji̧nä̧ ukuokua'a 'kä̧tȩnä̧, Epíritu Sa̧tu̧mä̧ juȩnȩ ä̧ju̧kuä̧rä̧tü̧rü̧ o'katoi'ünä̧rü̧ kkä̧mä̧di̧nü̧.

⁴⁵ Circuncisión pättü ukuotä'ijätü Peduru-ku ichäjätümä̧, to̧o̧ to̧pä̧ri̧nä̧tü̧ Epíritu Sa̧tu̧mä̧ judío pokotürü'i̧nä̧ ü̧jä̧mä̧dü̧nä̧ iyäwi'a'ati̧ pä'ü.

⁴⁶ Ja̧'wa̧nü̧ ja̧'a̧, ttä̧ju̧kui̧nä̧u̧ kkoro wȩnȩnä̧ ttukuokua'a, Dio-rü eseu.

⁴⁷ Ja̧'wa̧nü̧ ji̧yä̧ku̧, Peduru-mä̧ pä'inü̧: —¿Pitürümä̧, ujutu jü̧ta̧'a̧nü̧ Epíritu Sa̧tu̧ ü̧jä̧mä̧dä̧jä̧u̧ru̧mä̧, bautizo jȩttü̧ juiyü'anü̧ tä̧jí̧?

⁴⁸ Ja̧'wa̧nü̧ ja̧'a̧ttü̧, Jesucrito i̧mi̧nä̧ bautizo jȩtta̧tü̧ pä'ü weinä̧u̧. Ja̧'wa̧nü̧ jä̧ji̧ o'ka'a, Peduru-rü jä'epinä̧tü̧ rekuonä̧nü̧ mo̧ro̧, jitütäku ü̧ji̧'i̧ya̧tü̧ pä'ü.