Hebreos 9 - Nuevo Testamento Uwotjüja

Täbokü sacrificio jȩtti̧nü̧ wȩnȩ

¹ Ja̧'wa̧ta̧nü̧, Dio ä̧kuo̧mȩnä̧ esekuinü̧nä̧mä̧; Churutä ukuoku jȩä̧kuä̧wä̧mä̧ we'ü kku̧nä̧wi̧na̧'a̧. Ja̧'wa̧ta̧nü̧ jua̧u̧mä̧ pi̧jä̧nä̧ttü̧ Dio-rü ukuokuäkuäwomȩ ro̧mȩ pättomȩttü̧ jȩtta̧ pä'ü ji̧na̧'a̧.

² Juode Dio-rü ukuokuäkuäwode «Tabenákuro» pättode pa̧'a̧nü̧ adikuino̧de: Ä̧kuo̧mȩnä̧ I̧so̧ka̧ Ro̧ka̧nä̧, kki̧na̧'a̧: Tȩya̧u̧nä̧ kkȩdȩpü̧ kku̧nä̧wäkä; Mesa isodä wä̧mȩmä̧ kki̧na̧'a̧, trigo o̧si̧ Dio-rü iyü kku̧nä̧wä̧.

³ Juodettü, i̧sä̧ta̧ aboja̧'a̧ku̧nä̧ kko̧ro̧ka̧, kki̧na̧'a̧ Rü̧ȩnä̧ Ro̧ü̧ jo̧ka̧,

⁴ juo̧ka̧nä̧ kki̧na̧'a̧: Incienso pättü kku̧wä̧wä̧ka̧, oro-ttü adikuä̧ka̧; ja̧'wa̧ta̧nü̧ kki̧na̧'a̧, Esekuinü̧ Ȩko̧ka̧, oro-ttütä poünä̧ tu'epü adikuo̧ka̧. Juo̧ka̧ jakuämä̧ jua'a yabo oro-ttü a̧di̧kuä̧yü̧nä̧ ȩki̧na̧'a̧, maná pättinü̧'i̧nä̧. Juo̧ka̧ Esekuinü̧ Ȩko̧ka̧nä̧mä̧ ȩki̧na̧'a̧ Aaro̧ itta'ka bawipinä̧'ka'i̧nä̧ ja̧'wa̧ta̧nü̧ weäwä wȩnȩ i̧nä̧ obinä̧ wȩyu̧kuä̧'i̧nä̧, jü̧nä̧.

⁵ Ji̧nä̧so ji̧ka̧tä̧ wä̧mȩmä̧ kki̧na̧'a̧: Ttujuabiyä kkä̧u̧, juo̧ka̧ tta̧'a̧rä̧tü̧ «Querubines» pä̧ttä̧u̧, Dio ü̧ja̧'a̧ wȩnȩkuä̧chü̧nä̧ kka̧kuä̧tü̧. Ja̧'wa̧nü̧ ja̧'a̧nä̧, jua̧u̧ o'kajuiyünä̧ jua̧u̧ tukuokua pä'ümä̧ juiya'a jitämä̧.

⁶ Ja̧'wa̧nü̧ jo̧mȩnü̧ jȩpü̧ kku̧nä̧wi̧na̧'a̧, ä̧kuo̧mȩnä̧ I̧so̧ka̧ Ro̧ka̧nä̧ sacerdote wotü, 'kuäopünä̧ do'ächü Dio ä'ka jo̧mȩ ttaditäwä ttadita pä'ümä̧.

⁷ Ja̧'wa̧nü̧ ja̧'a̧nä̧, juȩnȩ yabonä̧ I̧so̧ka̧ Rü̧ȩnä̧ Ro̧ka̧nä̧, suro sacerdote-tü̧ ttu̧ru̧wa̧tä̧, ji̧yȩtȩ año-nä̧mä̧, ya'utenä̧tä̧ do'ächinü̧; churutä kkü̧ surojü jȩä̧chü̧nä̧'i̧nä̧ ja̧'wa̧ta̧nü̧ ttü̧ja̧ ttieruwa'anä̧ suronä̧ jȩttä̧'i̧jü̧ mikuäwächünä̧, isotü ttukuojanä̧ riripü 'chi̧nü̧.

⁸ Pi̧yȩ pä'amä̧ Epíritu Sa̧tu̧mä̧ tu̧wo̧jui̧pa̧ pä'ü pä'inü̧, ji̧nä̧ ä̧kuo̧mȩnä̧ I̧so̧ka̧ Ro̧ka̧ kka̧'a̧nä̧mä̧, juȩnȩ yabonä̧ I̧so̧ka̧ Rü̧ȩnä̧ Ro̧ka̧nä̧ dottächa pä'ümä̧ weyekua'a pä'ü.

⁹ Ja̧'wa̧nü̧ ja̧'a̧ jua̧u̧mä̧ jitä mo̧ro̧ wȩnȩkuä̧cha̧ pä'ütä ji̧na̧'a̧; ja̧'wa̧nü̧ jȩpü̧ ofrenda pättü'i̧nä̧, sacrificio pättü'i̧nä̧ iyinä̧tü̧ ja̧'wa̧nü̧ ja̧'a̧nä̧ tta̧mü̧kuädü jakuänämä̧ aditü ikuokü ji̧na̧'a̧ ja̧'wa̧nü̧ jȩpü̧tä̧ Dio-rü esewätürümä̧.

¹⁰ Suro kuäkuäwätä, awäwätä, ttütükäwinü̧tä̧, jȩta̧jä̧ pä'ü rütäwä ji̧na̧'a̧ wä̧mȩnä̧ jäwätä, Dio kkoronä̧ ü'ärotomebütä päi'ünä̧ rü̧ȩnä̧ adiu mikuäu jäwänä̧.

Jareünä̧ sacrificio pättü wȩnȩ

¹¹ Ja̧'wa̧nü̧ ja̧'a̧nä̧ jitämä̧ Crito ja̧'a̧ i̧jȩkui̧nü̧mä̧ sacerdote-tü̧ ttu̧ru̧wa̧, adiwä juei tta̧wä̧rä̧kuä̧wä̧ i̧sa̧ jü̧nä̧. Dio-rü ukuokuäkuäwomȩ «Tabenákuro» pättomȩ, juȩnȩmä̧ rü̧o̧mȩ, surojü'i̧nä̧ juiyomȩ ja̧'a̧nä̧ ttu̧mü̧nä̧'i̧nä̧ adikuokomȩ, ja̧'wa̧nü̧ ja̧'a̧ttü̧ pi̧jä̧ ttü̧ja̧'i̧nä̧ adikuokomȩ ja̧'a̧.

¹² Ja̧'wa̧ta̧nü̧ cabrío pä̧ttä̧u̧, pä̧kä̧yü̧ ppo̧'ä̧tü̧ ttukuoja'i̧nä̧ ttȩpa̧jü̧ jueimä̧ Chutä a̧mü̧nä̧ pa̧ja̧tü̧ ukuoja ȩpi̧nü̧, I̧so̧ka̧ Rü̧ȩnä̧ Ro̧ka̧nä̧, ya'utenä̧tä̧ do'ächinü̧ 'kuäopünä̧tä̧ mikuäwa pä'ü, surojü mikuäwächünä̧ mitäu kä'ädäji̧'ka̧mä̧.

¹³ Isopäi'ünä̧ chiwotü̧'i̧nä̧, pä̧kä̧yü̧'i̧nä̧ ttukuojamä̧ ja̧'wa̧ta̧nü̧ ppo̧'ä̧tü̧ pä̧kä̧yü̧ nä̧tü̧rü̧ kkuwü ttiku o'ka̧ppȩnä̧ ririttomȩnä̧mä̧, adiutä päi'ünä̧ ujuru kki̧na̧'a̧ idepänä̧.

¹⁴ Ja̧'wa̧nü̧ ji̧na̧'a̧nä̧, juȩnȩ abonä̧nü̧ ujuru kka̧'a̧ Jesucrito ukuojamä̧. Jua'amä̧ Epíritu 'kuäopünä̧ kkü̧ jäwänä̧, chutä a̧mü̧nä̧ pa̧ja̧tü̧, surojü jui̧'a̧tä̧ iyäwina̧'a̧ttü̧ Dio ä'ka jo̧mȩ; ja̧'wa̧nü̧ jȩpü̧ wa'are jäwä tamükuädinü̧mä̧ tükü ikuinü̧, Dio a̧'kua̧rü̧rü̧ ukuotü tü̧ji̧ya̧rü̧ pä'ümä̧.

Jareünä̧ esekuinü̧ wȩnȩ

¹⁵ Ja̧'wa̧nü̧ ja̧'a̧ttü̧, Jesucrito-nä̧mä̧ jitä jareünä̧ esekuinü̧nä̧ dodepätüjä̧. Jua'amä̧ wa'arenä̧ 'korujuoächomȩnä̧ ä̧kuo̧mȩnä̧ esekuinü̧ jäwänä̧ kkä̧nü̧ suronä̧ jȩtti̧nü̧ttü̧mä̧ rä'epü ikuäu̧jä̧. Ja̧'wa̧nü̧tä̧ Dio woinä̧u̧mä̧ isopäi'ünä̧tä̧ ttȩmä̧kuo̧tü̧jä̧, i'ko iyatü päinü̧mä̧.

¹⁶ Isopäi'ünä̧ pi̧yȩ jareünä̧ eseku jȩä̧kuä̧wä̧mä̧ «testamento» pättü 'kua̧rü̧nä̧ jü̧ ja̧'a̧; «testamento» pättü wȩyu̧ti̧nü̧ wa'iku juiyäimä̧ ji̧nä̧ mi̧kuäwächi'oka'a, 'korupäi'ü'ka'atä mikuäwächi'a'a.

¹⁷ Isopäi'ünä̧ ji̧yȩtȩ «testamento» pättü mikuäwächi'a pä'ümä̧, wȩyu̧ti̧nü̧ wa'ü ikuomȩnä̧tä̧ mikuäwächi'a'a, ji̧nä̧ a̧'kua̧rä̧i̧mä̧ mikuäwoka'a.

¹⁸ Ja̧'wa̧nü̧ ja̧'a̧ttü̧, Dio ä̧kuo̧mȩnä̧ esekuinü̧nä̧mä̧, rekuätü äjikuäkuäwotü ttukuojanä̧tä̧ esekuinü̧, jua̧u̧ juiyünä̧mä̧ esekuokü pinü̧.

¹⁹ Moisé-mä̧ ttü̧ja̧ o'katoi'ünä̧rü̧ weäwä wȩnȩ o'kajuiyünä̧ ji'äwäji̧'ka̧; pä̧kä̧yü̧ ppo̧'ä̧tü̧ ttukuoja'i̧nä̧, cabrío isotü u̧mä̧tü̧ ttukuoja'i̧nä̧, ajiyanä̧ wiwakua'a, lana escarlata pättünä̧'i̧nä̧, isade i̧sä̧ppä̧nä̧'i̧nä̧ akuäbe'äji̧'ka̧ riripinü̧ weäwä wȩnȩ kuyäru'tänä̧'i̧nä̧ ja̧'wa̧ta̧nü̧ ttü̧ja̧rü̧'i̧nä̧, jü̧nä̧.

²⁰ Ja̧'wa̧nü̧ jȩpü̧ pä'inü̧: «Poya ttukuojanä̧ we'inü̧, Dio ukuturu esekumä̧», pä'ü.

²¹ Ja̧'wa̧ta̧nü̧ Moisé-mä̧, Dio-rü ukuokuäkuäwode «Tabenákuro» pättodenä̧'i̧nä̧ ttukuoja riripü kkä̧nü̧ ja̧'wa̧ta̧nü̧ juodenä̧ kka̧ku̧ vaso o̧'ta̧nä̧mä̧ o'kajuiyünä̧ riripinü̧.

²² Ja̧'wa̧nü̧ ja̧'a̧ttü̧ weäwä wȩnȩ päü'anü̧, o'kajuiyünä̧ päi'a pä'ümä̧ a̧'u̧ku̧nä̧tä̧ juiyünä̧ ttukuojanä̧tä̧ suronä̧ jȩttä̧'i̧jü̧mä̧ tükächi'ina̧'a̧; ja̧'wa̧nü̧ ja̧'a̧nä̧ ukuoja juiyünä̧mä̧ Dio-mä̧ suronä̧ jȩttä̧'i̧jü̧mä̧ jȩpü̧ ikuokü ji̧na̧'a̧.

²³ Ja̧'wa̧nü̧ ja̧'a̧ttü̧ mo̧ro̧jä̧nä̧ kka̧ku̧ a̧'kua̧juä̧mä̧ ja̧'wa̧nü̧tä̧ tükokuächa pä'ü rekuä rü̧ji̧na̧'a̧; ja̧'wa̧nü̧ ja̧'a̧nä̧ mo̧ro̧jä̧nä̧ kka̧ku̧mä̧ pi̧jä̧nä̧ kka̧ku̧ a̧'kua̧juä̧ttü̧'i̧nä̧ abonä̧nü̧ mikuäu sacrificio jȩtta̧ pä'ü rekuä rü̧ji̧na̧'a̧.

Sacrificio-ttü abonä̧nü̧ adiwäjuei wȩnȩ

²⁴ Isopäi'ünä̧ Crito-mä̧, Dio-rü ukuokuäkuäwode pi̧jä̧ ttü̧ja̧ adikuode, mo̧ro̧jä̧ttü̧ a̧'kua̧juä̧ kkodenä̧mä̧ do'ächokü pinü̧, ji̧nä̧so yodenä̧tä̧ mo̧ro̧jä̧ isodenä̧, Dio ä'ka jo̧mȩ ujutu jäwänä̧mä̧ do'ächinü̧.

²⁵ Pi̧jä̧ttü̧ sacerdote tturuwotü jȩtti̧nü̧'a̧nü̧mä̧, ya'ute año-nä̧ kko̧ro̧nü̧ jü̧ta̧'a̧nü̧ sacrificio jȩa̧ pä'ümä̧ do'ächokü pinü̧, kkorotü i̧sa̧ ukuojakumä̧.

²⁶ Ja̧'wa̧nü̧ jü̧ juiyüttümä̧, Crito-mä̧ kko̧ro̧nü̧ jü̧ta̧'a̧nü̧, pi̧jä̧ uwäbe'inomȩttü̧ kkä̧mä̧dü̧ 'koru juoächä'cha pä'ü ji̧na̧'a̧. Ja̧'wa̧nü̧ ja̧'a̧nä̧, jitä rüjí mo̧ro̧ päi'omȩnä̧, ya'utenä̧tä̧ usurä ȩmä̧u̧ iyäu ikuinü̧, suronä̧ jȩttä̧'i̧jü̧ jȩpü̧ ikua pä'ümä̧.

²⁷ Ja̧'wa̧nü̧ ja̧'a̧ttü̧ o'katoi'ünä̧ ya'utenä̧tä̧ 'korujuottächünä̧ pä'ü kku̧nä̧wa̧'a̧, juȩnȩ o'komȩnä̧mä̧ Dio ü'ojo'ü mo̧ro̧tä̧ ichäkua'a.

²⁸ Ja̧'wa̧ta̧nü̧ Crito'i̧nä̧ ya'utenä̧tä̧ usurä ȩmä̧u̧ iyäwinü̧, rekuätü suronä̧ jȩttü̧ jȩpü̧ ikua pä'ümä̧. Juȩnȩ o'komȩnä̧mä̧ i̧chä̧kua̧, täkü surojü jȩpü̧ ikumä̧kü̧, Churutä tta̧'a̧rä̧tü̧rü̧ rä'epü iku ichütä.