Hebreos 8 - Nuevo Testamento Uwotjüja

Jesú-mä̧ sacerdote-tü̧ ttu̧wä̧mȩnä̧ wa̧

¹ Ja̧'wa̧nü̧ ji̧na̧'a̧ ji̧nä̧so ji̧yȩtä̧ ukuo jäwä pätümä̧ pi̧yȩ ja̧'a̧, sacerdote-tü̧ ttu̧ru̧wa̧mä̧ mo̧ro̧jä̧nä̧ kkü̧ Dio i̧dȩä̧kä̧ u̧wo̧jua̧'a̧ku̧nä̧ pä̧mä̧di̧nü̧ pä'ätüjä̧.

² Jua̧u̧ sacerdote Jesucrito-mä̧; Jua̧u̧ ja̧'a̧ santuario pättomȩ sacerdote jü̧nä̧ aditümä̧ isopäi'ünä̧ Tabenákuro; Tu̧ru̧wa̧ aditino̧mȩ Santuario pättomȩ, pi̧jä̧ ttü̧ja̧ ttäräbe'okomȩ, Tu̧ru̧wa̧ Dio-tä äräbe'ino̧mȩ.

³ O'katoi'ünä̧ pi̧jä̧ttü̧ sacerdote-tü̧ tturuwotü päi'ünä̧ kku̧nä̧wo̧tü̧mä̧ eseu ttiya pä'ü ja̧'wa̧ta̧nü̧ ttü̧ja̧ suronä̧ jȩtta̧'a̧ mikuäwächü sacrificio'i̧nä̧ jȩpi̧nä̧tü̧ ja̧'wa̧nü̧ ji̧na̧'a̧ttü̧ Jesucrito'i̧nä̧ ji̧yȩtȩ Dio-rü iya pä'ü ja̧'a̧.

⁴ Ja̧'wa̧nü̧ ja̧'a̧ttü̧, pi̧jä̧nä̧tä̧ ü̧ji̧nü̧ttü̧mä̧ sacerdote jü̧ juiyü'anü̧ ja̧'a̧, täkü sacerdote-tü̧ Moisé weäwä wȩnȩnä̧ wea'aku ofrenda iyü jȩpä̧tü̧ ttü̧ja̧kua̧'a̧ttü̧.

⁵ Juätü sacerdote-tü̧ ttaditäwämä̧ mo̧ro̧jä̧nä̧ kkü̧ a̧'kua̧juä̧tä̧ aditätü, jua'amä̧ Moisé-rü Tabenákuro pättomȩ aditäkua'a jiäwino̧mȩttü̧ topü pä'ätüjä̧: «Ttu̧'ȩpä̧rü̧nü̧ topü aditijó, mü̧ä̧'kattü tabenákuro a̧'kua̧juä̧ to'kunä̧ chi̧jȩpi̧nä̧'a̧ku̧tä̧,» päinä̧ku̧.

⁶ Ja̧'wa̧nü̧ ja̧'a̧nä̧ Tu̧ru̧wa̧ Jesucrito sacerdote-tü̧ ttu̧ru̧wa̧ aditäwä Dio iyinü̧mä̧ rü̧ȩnä̧ adiwäjuei ja̧'a̧, jua̧u̧nä̧tä̧ adiwäjuei esekuinü̧mä̧ kku̧nä̧rä̧tü̧jä̧, jua'amä̧ Dio adiwäjuei chi̧yä̧kua̧sä̧ päinü̧mä̧ jua̧u̧nä̧tä̧ iya'attü.

Täbokü esekuinü̧ wȩnȩ

⁷ Ä̧kuo̧mȩnä̧ Dio i̧tti̧mü̧ Irae ttü̧ja̧ku̧ esekuinü̧tä̧ jo̧mȩnü̧ ji̧nü̧ttü̧mä̧, pä'äjita'anü̧mä̧ esekuäkuäwämä̧ juiyü'anü̧ ji̧na̧'a̧.

⁸ Ja̧'wa̧nü̧ ja̧'a̧nä̧, wopäkuäunü̧ pä'inü̧: «Tu̧ru̧wa̧mä̧ pä'ü: Irae ttü̧ja̧rü̧'i̧nä̧ ja̧'wa̧ta̧nü̧ Judá ttü̧ja̧ku̧'i̧nä̧ jareünä̧ cheseku mo̧ro̧ ichäkua'a.

⁹ Ja̧'wa̧nü̧ ja̧'a̧nä̧ ttü̧tä̧mü̧mi̧nä̧rü̧ Egito-ttü, rä'epü iku, chesekuinü̧'anü̧mä̧kü̧; Juätümä̧ ttüarodiyäku, ja̧'a̧tä̧tä̧ ja̧ro̧chi̧nä̧u̧, pä'inü̧ Tu̧ru̧wa̧mä̧.

¹⁰ Ji̧yȩnü̧ mo̧ro̧ o'ka'a, Irae ttü̧ja̧ku̧ chesekuä̧kuȩmä̧, pi̧yȩ ja̧'a̧, pä'inü̧ Tu̧ru̧wa̧mä̧: Ttü wedü wȩnȩmä̧, ttünä̧ ȩnü̧ kku̧nu̧ ja̧'wa̧ta̧nü̧ tta̧mi̧ iso'kinä̧ wȩyu̧tu̧ chu̧ju̧nä̧kua̧sä̧. Ttürümä̧ ttü̧ä̧nä̧wa̧ Dio jü̧nä̧tä̧, ja̧'wa̧ta̧nü̧ jitütämä̧ chi̧tti̧mü̧ jü̧nä̧tä̧ ttäkuotü, pä'inü̧.

¹¹ Ya̧tȩ'i̧nä̧ a̧wa̧ru̧wa̧ ji̧jä̧tä̧ i̧sa̧rü̧mä̧, ja̧'wa̧ta̧nü̧ ü̧jä̧wa̧rü̧mä̧, wo̧juȩkuo̧ka̧'a̧ jä̧kua̧'a̧, pa̧'a̧nü̧ wo̧jui̧pi̧ ku̧ru̧wa̧rü̧ pä'ümä̧; jua'amä̧ o'katoi'ünä̧tä̧ ttürümä̧ ttu̧wo̧jua̧'a̧ttü̧, ppo̧'ä̧tü̧ttü̧ kkä̧mä̧da̧'a̧mä̧, tä̧mü̧rü̧'i̧nä̧.

¹² Suronä̧ jȩttä̧'i̧jü̧mä̧ jȩpü̧ iku, pä'äjita'anü̧mä̧, yorisotä amükuädokü chä̧kua̧sä̧ surottü'i̧nä̧ ja̧'wa̧ta̧nü̧ suronä̧ jȩttä̧'i̧jü̧'i̧nä̧, jü̧nä̧.»

¹³ «Jareünä̧ esekusä» päümä̧, ä'koji jäwämä̧, täkü tabo jäwä ja̧'a̧ pä'ü pä'inü̧; ja̧'wa̧ta̧nü̧ täbo jäwä jo̧mȩnä̧mä̧ büäkuächütä ja̧'a̧, jua̧u̧nü̧ o'ka'amä̧ sü'ekuächü toe'ächü.