Hebreos 7 - Nuevo Testamento Uwotjüja

Jesú-mä̧, Mequisede ji̧nü̧ta'anü̧ sacerdote wa̧

¹ Jua̧u̧ Mequisede-mä̧ Salem ütawiyä ru̧wa̧ pinü̧; mo̧ro̧jä̧ Dio rü̧tä̧wa̧ sacerdote pinü̧. Abraha̧-mä̧, ruwotürü kurä rowäu iso juo'epä̧ji̧'ka̧ ppa̧wä̧chi̧'a̧'a̧, Mequisede-mä̧ rä'o'ü te'äu kkä̧nü̧, adiutä ja̧rü̧ pä'ü ukuokuinä̧ku̧;

² ja̧'wa̧nü̧ ja̧'a̧ Abraha̧-mä̧, Mequisede-rü iyinü̧ iäre diezmo o'kajuiyünä̧, kurä rowäu ȩmä̧ji̧ttü̧. Jua̧u̧ i̧mi̧ Mequisede pä'ümä̧ «ru̧wa̧ adiwä i̧sa̧» pä'ü päwä ja̧'a̧ ja̧'wa̧nü̧ ja̧'a̧nä̧ Salem ütawiyä ru̧wa̧ pä'ümä̧, «ru̧wa̧ wȩnȩ juiyünä̧ wa̧» pä'ü päwä ja̧'a̧.

³ Jua̧u̧ awaruwä ttütü'kümä̧ yoriso jeruwäkuäwa'a, jä'orü'i̧nä̧, ja̧ju̧ru̧'i̧nä̧, ü̧tä̧mü̧mi̧nä̧rü'i̧nä̧ jü̧nä̧; ja̧'wa̧ta̧nü̧ uwäpächinomȩ'i̧nä̧, 'korujuoächinü̧'i̧nä̧ jeruwäkuäwa'a ja̧'wa̧nü̧ ja̧'a̧ttü̧mä̧ Dio I̧tti̧ 'kua̧rü̧nä̧tä̧ wa̧, 'kuäopünä̧ sacerdote jü̧nä̧tä̧ wa̧ ja̧'a̧.

⁴ Ja̧'wa̧nü̧ ji̧na̧'a̧mä̧ amükuädü topätukuittü, Mequisede-mä̧ ukuo i̧sa̧ pinü̧, ujutu tä̧do̧mi̧nä̧ Abraha̧'i̧nä̧ iäre diezmo iyünä̧ päi'ünä̧, kurä rowäu ȩmä̧ji̧ttü̧.

⁵ Moisé weäwä wȩnȩnä̧ weäwina̧'a̧, Rewí isotüttü todepätü sacerdote-tü̧mä̧, ttü̧ja̧ ttiäre diezmo pättü ttȩma̧ pä'ü, jitütä tü'kü ttukuojattü ttawaruwä ja̧'a̧nä̧, jua'amä̧ o'katoi'ünä̧ Abraha̧ isotü ja̧'a̧ttü̧.

⁶ Ja̧'wa̧nü̧ ja̧'a̧nä̧, Mequisede-mä̧, Rewí isotü pokü ja̧'a̧nä̧, Abraha̧-mä̧ iäre diezmo pättü iyomȩnä̧, adiunä̧ ja̧rü̧ pä'ü ukuokuinä̧ku̧, Dio-mä̧ Abraha̧-rü̧mä̧ ppädä̧dä̧kua̧jä̧ päinä̧ku̧ ja̧'a̧ttü̧. Mequisede-mä̧ Abraha̧-rü̧mä̧ adiunä̧ ja̧rü̧ pä'ü ukuokuinü̧,

⁷ ja̧'wa̧ta̧nü̧ ya̧tȩ'i̧nä̧ yapare pä'ü tä̧ppü̧ti̧'a̧ pä'ümä̧ juiya'a, isopäi'ünä̧ ppä'ädümä̧ ppädäkuttü'i̧nä̧ abonä̧nü̧ ukuo i̧sa̧ ja̧'a̧.

⁸ Isopäi'ünä̧ pi̧jä̧ttü̧mä̧ ȩmä̧tü̧, be'ipächätü ttü̧ja̧ ttiäre diezmo-ttü̧; ja̧'wa̧nü̧ ja̧'a̧nä̧, pi̧yȩ tü'kümä̧, a̧'kua̧rü̧ ütü'kü ja̧'a̧, jua'amä̧ wȩyu̧kuä̧ wȩnȩmä̧ Mequisede-mä̧ wa'ü ikuinü̧ päoka'attü̧.

⁹ Ja̧'wa̧ta̧nü̧ jua̧u̧, pä'ü kkä̧nü̧'i̧nä̧ pätü'anü̧ ja̧'a̧, Rewí iäre diezmo'i̧nä̧ iyinü̧, jua'amä̧ Abraha̧ Mequisede-rü iyinomȩttü̧;

¹⁰ Ja̧'wa̧nü̧ ja̧'a̧, jua̧u̧ Abraha̧ isotü ttäkuotümä̧, jua̧u̧nä̧tä̧ kki̧nä̧tü̧ ji̧nä̧ ttuwäpächoka'a ja̧'a̧ttü̧, jua̧u̧ru̧ Mequisede topü i̧'chi̧nü̧mä̧.

Todäre jo̧mȩnä̧ sacerdote-tü̧ wotü

¹¹ Irae ttü̧ja̧mä̧ weäwä wȩnȩ iyäwi'inä̧u̧ Rewí jäwä sacerdote-tü̧ jäwänä̧ adiu juettekuächa pä'ü. Ja̧'wa̧nü̧ ja̧'a̧nä̧ jua̧u̧nä̧mä̧ juettekuächü juiyünä̧ jo̧mȩttü̧ kka̧ra̧ sacerdote i̧mi̧ku̧nä̧ wa̧ räopa pä'ü rekuä rü̧ji̧na̧'a̧: Aaro̧ isotü i̧sa̧ pokü, Mequisede ji̧nü̧'a̧nü̧ wa̧.

¹² Ja̧'wa̧nü̧ ja̧'a̧ttü̧ sacerdote-tü̧ jäwä pärowächomȩnä̧, weäwä wȩnȩ'i̧nä̧ ä̧tȩkuä̧nä̧tä̧ pärowächa'a;

¹³ ja̧'wa̧nü̧ ja̧'a̧ttü̧ pä'a Tu̧ru̧wa̧ Jesucrito ütü'kümä̧, kkorotü isotü i̧sa̧ttü̧ rä'opinü̧ Dio-rü ukuokuäkuäwodenä̧ sacerdote jü̧nä̧ yoriso aditokotü pä'ijätüttü.

¹⁴ Ja̧'wa̧nü̧ ja̧'a̧, jo̧mȩnü̧ wo̧juä̧tü̧jä̧, Tu̧ru̧wa̧ Jesucrito-mä̧ Judá isotü i̧sa̧ pinü̧ pä'ümä̧ ja̧'wa̧nü̧ ja̧'a̧nä̧ Moisé-mä̧, sacerdote-tü̧ tütü'kü ukuokuomȩnä̧mä̧, pi̧yȩ jäwä jiäwinü̧mä̧ yoriso juiya'a.

¹⁵ Ja̧'wa̧nü̧ ja̧'a̧ttü̧ pi̧yȩmä̧ jua'a yabonä̧ wäjuönä̧tä̧ päia'a; jareünä̧ sacerdote wa̧ räopümä̧ Mequisede ji̧nü̧'a̧nü̧ wa̧.

¹⁶ Jua̧u̧ sacerdote-mä̧ Rewí isotü i̧sa̧mä̧kü̧ weäwä wȩnȩ weü'anü̧mä̧, jua'amä̧ 'kuäopünä̧ a̧'kua̧rü̧ ja̧'a̧ttü̧.

¹⁷ Ja̧'wa̧nü̧ ja̧'a̧ttü̧ Dio ukuokuinü̧ wȩnȩ, pä'a: «Ukumä̧ sacerdote-jä̧, mo̧ro̧ kki̧ä̧mü̧nä̧ Mequisede ji̧nü̧ ta̧'a̧nü̧.»

¹⁸ Ja̧'wa̧nü̧ ja̧'a̧ttü̧, ä'koji weäwä wȩnȩ ji̧nü̧mä̧ siekuächa'a, ppädü juiyünä̧'i̧nä̧, ujuru'i̧nä̧ juiyinü̧ ja̧'a̧ttü̧.

¹⁹ Isopäi'ünä̧ Moisé weäwä wȩnȩnä̧mä̧ ya̧tȩrü̧'i̧nä̧ jo̧mȩnü̧ juoächünä̧ ppädokü ji̧na̧'a̧, jitämä̧, jareünä̧ adiwä juei tta̧'kua̧ wȩnä̧rä̧kuä̧wä̧ tta̧'a̧rä̧tü̧jä̧, jitämä̧ jua̧u̧nä̧tä̧ Dio-rü tü'küpächätüjä̧.

Sacerdote-tü̧ ttinomȩttü̧'i̧nä̧ u̧wä̧mȩnä̧ wa̧ Jesú-mä̧

²⁰ Pide jitäwäkururümä̧, Dio-mä̧ juramento pättünä̧ pä'ü u̧ju̧ni̧nä̧ku̧. Ja̧'wa̧nü̧ ja̧'a̧nä̧ kkorotü sacerdote-mä̧ suro 'kȩ'ȩpü̧ o'ütä ttȩmi̧nä̧u̧.

²¹ Ja̧'wa̧nü̧ ji̧na̧'a̧nä̧, Dio-mä̧ Tu̧ru̧wa̧ Jesú-rumä̧ juramento pättümä̧ jȩi̧nä̧ku̧, pa̧'a̧nü̧ pä'a wȩyu̧kuä̧ wȩnȩnä̧: «Tu̧ru̧wa̧ Dio-mä̧ juramento pättünä̧ jȩpü̧ ukuokuina̧'a̧mä̧ pärotokü: Ukumä̧ 'kuäopünä̧tä̧ sacerdote wa̧jä̧, Mequisede ji̧nü̧ta'anü̧,» päinü̧mä̧.

²² Ja̧'wa̧nü̧ ji̧na̧'a̧ttü̧, Jesú-nä̧mä̧ iso juoepinä̧u̧jä̧, juȩnȩ obonä̧nü̧ jü̧, Dio-ku jareünä̧ esekuäkuäwä.

²³ Kkorotü sacerdote winä̧tü̧mä̧ rekuinä̧tü̧, rekuo ttü̧jü̧ juiyünä̧ wa'are rȩbȩwa̧'a̧ttü̧, juätürü.

²⁴ Ja̧'wa̧nü̧ ji̧na̧'a̧nä̧, Jesú-mä̧ wa'ü ikuokü ja̧'a̧ttü̧, sacerdote jü̧nä̧ aditäwämä̧ 'kuäopünä̧tä̧ pärowächoka'a.

²⁵ Ja̧'wa̧nü̧ ja̧'a̧ttü̧, jua̧u̧nä̧tä̧ Dio-rü tü'küpächätürümä̧ surojüttü ttü̧ji̧pü̧nä̧ ppä'ädü, 'kuäopünä̧tä̧ kkä̧nü̧, juätürü ppädünä̧, Dio-rü jäepa'attü.

²⁶ Ja̧'wa̧nü̧ ja̧'a̧ttü̧, ja̧'wa̧nü̧ wa̧ sacerdote-rü rekuä rü̧ji̧nä̧u̧jä̧: surojü'i̧nä̧ jui̧'a̧rü̧, idiku'i̧nä̧ jui̧'a̧rü̧, suronä̧ jȩpä̧tü̧ttü̧'i̧nä̧ otó wa̧rü̧ ja̧'wa̧ta̧nü̧, mo̧ro̧jä̧'i̧nä̧ u̧wä̧mȩnä̧ jü̧nä̧ jȩi̧nä̧ku̧ru̧.

²⁷ Pide sacerdote-mä̧ rekuä rü̧jo̧ko̧ku̧, sacerdote-tü̧ tturuwotü ji̧nü̧'a̧nü̧ mo̧ro̧ ji̧nü̧ a̧kuä̧, tta̧mü̧nä̧ suronä̧ jȩttä̧'i̧ja̧'a̧ mikuäwächünä̧ sacrificio pättü jȩpä̧kuä̧wi̧'ü̧'ka̧, juȩnȩ o'komȩnä̧ ttü̧ja̧ suronä̧ jȩttä̧'i̧jü̧ mikuäwächünä̧ sacrificio jȩa̧ pä'ümä̧; Jesú-mä̧ ya'utenä̧tä̧ jȩpi̧nü̧, sacrificio-mä̧ 'kuäopünä̧tä̧ mikuäunä̧, a̧mü̧nä̧ pa̧ja̧tü̧ iyäkuäwomȩnä̧mä̧.

²⁸ Moisé weäwä wȩnȩnä̧mä̧ sacerdote-tü̧ tturuwotü päi'ünä̧ jȩpi̧nä̧tü̧, adiwä juei jo̧mȩnü̧mä̧ jȩttü̧ juiyünä̧ wotürü; ja̧'wa̧nü̧ ja̧'a̧nä̧, jua̧u̧ o'ka'a juramento pättünä̧, Dio jȩpi̧nü̧ I̧tti̧rü̧, sacerdote-tü̧ ttu̧ru̧wa̧ päi'ünä̧, 'kuäopünä̧tä̧ adiwä juei kku̧nä̧rü̧rü̧.