Hebreos 6 - Nuevo Testamento Uwotjüja

¹ Ja̧'wa̧nü̧ ja̧'a̧ttü̧, ä̧kuo̧mȩnä̧ Crito ütü'kü ku̧wo̧jui̧'i̧nä̧tu̧ku̧mä̧ pporädo'ü kku̧nu̧, yabokutä adiwä jueinä̧ jo̧mȩnü̧ juokuätukunä̧ päi'ünä̧ ti̧'chä̧tu̧kua̧; pä'äji ji̧nü̧ta'anü̧mä̧, ppa̧'a̧dü̧mä̧ surojüttü räopächäkuäwämä̧, Dio-rü tta̧'kua̧ wȩnä̧rä̧kuä̧wä̧mä̧ kukuokuätukuä, wa'ü tiku juiyäkua'anü̧, täkü jua̧u̧mä̧ kukuokuätukuä, jua'amä̧ yabonü̧ Dio-rümä̧ ta̧'kua̧ tu̧wȩnä̧ra̧'a̧ttü̧,

² bautizo jȩttä̧kuä̧u̧'a̧nü̧ ja̧'a̧; ttu̧mü̧ mȩ'ü̧ ttukuokuomȩnä̧ Epíritu Sa̧tu̧rü̧ ttȩmu̧'i̧nä̧; wa'inä̧tü̧ ttottächäkuȩ'i̧nä̧; ja̧'wa̧ta̧nü̧ rüjí mo̧ro̧ ü'ojo'äkuȩ'i̧nä̧ täkü kukuokuätukuä.

³ Jua'akumä̧ pi̧yȩ pädümä̧ wo̧juȩkua̧'a̧; ja̧'wa̧nü̧ ja̧'a̧nä̧ Dio-rü pä̧wä̧rü̧jo̧mȩnä̧tä̧.

⁴ Isopäi'ünä̧ weyekua'a, ya'utenä̧ tȩya̧u̧ kkȩdȩ'ä̧u̧, Dio mippoünä̧ iyü kkü'kü, Epíritu Sa̧tu̧rü̧ ȩmi̧nä̧tü̧ ppa̧ttä̧cha̧ pä'ümä̧,

⁵ ja̧'wa̧ta̧nü̧ Dio i̧wȩnȩ kkü'kekunä̧ ȩmi̧nä̧tü̧'i̧nä̧, yodoji kkä̧kuä̧wä̧kuȩ ujuru ȩmi̧nä̧tü̧rü̧mä̧ weyekua'a,

⁶ pä'äjita'anü̧ ma̧'ä̧cha̧ pä'ümä̧, ¿Toku ppa̧wä̧cha̧, Dio jäwä u̧wo̧jui̧pi̧na̧'a̧mä̧? Pä'äjita'anü̧ Crito Dio i̧tti̧rü̧ ü̧jo̧kä̧nü̧ ü̧jü̧nä̧ ttu̧ju̧na̧'a̧ jä̧'i̧nü̧'a̧nü̧ ja̧'a̧, o'katoi'ünä̧ topü ya̧ttä̧wä̧'chü̧nä̧.

⁷ Isopäi'ünä̧ ajiya rȩjȩra̧'a̧ ma̧ä̧mo̧mȩnä̧mä̧, rȩjȩmä̧ juoya 'ku̧o̧'o̧mȩnä̧mä̧, juorütä isä'kua adiwä'kua bawa'a, jua̧u̧ttü̧tä̧ kuäwä kku̧nä̧wä̧ isotü aditätü ja̧'wa̧nü̧ jȩpü̧ Dio ppädü ȩmä̧tü̧.

⁸ Ja̧'wa̧nü̧ ja̧'a̧nä̧, so̧ä̧'kuatä bawuönä̧ iyomȩnä̧mä̧, Dio suronä̧ pä'ü u̧ju̧no̧mȩnä̧, rüjinä̧mä̧ okuränä̧tä̧ kkuwü ikuäwä ja̧'a̧.

⁹ Ja̧'wa̧nü̧ ukuturumä̧ tukuokua'anä̧ chawaruwä chü̧jä̧wa̧tü̧; ukutumä̧ Dio-rü esetätü pä'ü wo̧juä̧tü̧jä̧, surojüttü kki̧'ä̧kuä̧wä̧ ttȩmä̧kuo̧tü̧ pä'ü wo̧juä̧tü̧jä̧.

¹⁰ Isopäi'ünä̧ Dio-mä̧ suronä̧ jȩä̧kuä̧wä̧ i̧sa̧mä̧kü̧ ja̧'a̧ttü̧, Chutä i̧mi̧ eseu, jȩ'kuä̧'i̧jä̧tu̧ku̧mä̧ ja̧'wa̧ta̧nü̧ umüwäyotü ȩmi̧nä̧u̧rü̧ ppäkuädä'ijätuku'i̧nä̧, yabonü̧ jitä jȩ'kuä̧tu̧ku̧'i̧nä̧ yorisotä u̧ni̧chi'okü.

¹¹ Ja̧'wa̧nü̧ ja̧'a̧nä̧ ukutu yotukunä̧ jua̧u̧ kuesewätukumä̧ rüjibü päi'ünä̧ tottünä̧ jȩpü̧ ku̧jä̧tu̧kua̧ pä̧wä̧rü̧jä̧u̧jä̧ ujutumä̧, tta̧'a̧rü̧ ku̧jä̧'i̧jä̧tu̧ku̧ jo̧mȩnü̧ jä̧kua̧'a̧nü̧.

¹² Kutäwächätukuamä pä'okotüjä̧, pärokuänä̧ jitü Dio-rü tta̧'kua̧ wȩnä̧rä̧tü̧ tti̧'chü̧'a̧nü̧, ku̧jä̧tu̧kua̧ pä'ätüjä̧ ja̧'wa̧nü̧ jȩpü̧ ku̧jä̧tu̧ku̧ttü̧mä̧ kuȩmä̧tu̧kuao̧tü̧jä̧ Dio iya päinü̧mä̧.

Dio iya päinü̧ wȩnȩ

¹³ Isopäi'ünä̧ Dio Abraha̧-rü̧ chi̧yä̧kua̧jä̧ päinü̧mä̧, kka̧ra̧ i̧mi̧nä̧ pättajü jueimä̧, Chutä i̧mi̧nä̧tä̧ pä'äwinü̧; Chutä u̧wä̧mȩnä̧ wa̧ kka̧ra̧mä̧ toa'attü̧;

¹⁴ pä'inü̧: «Isopäi'ünä̧, ukuru adiu ppädä̧dä̧kua̧jä̧, rekuätü kui̧tti̧mü̧rü̧ yokuäwächünä̧.»

¹⁵ Ja̧'wa̧nü̧ ji̧nü̧ o'ka'a, a̧mi̧ 'ki'ächi'ü tta̧wä̧ri̧na̧'a̧mä̧, Abraha̧-mä̧ Dio iya päinü̧mä̧ iyinä̧ku̧.

¹⁶ Isopäi'ünä̧ ttü̧ja̧ jȩttä̧kuȩmä̧, jitüttütä'i̧nä̧ abonä̧nü̧ ttu̧wä̧mȩnä̧ wotü tti̧mi̧nä̧ wȩnȩtü̧ pä'ätü, pättü mikuäwächi'ünä̧; ja̧'wa̧nü̧ jȩttü̧ o'ka'a pättäjimä̧, täkü juȩnȩbütä beipa'a, jua̧u̧mä̧.

¹⁷ Ja̧'wa̧nü̧ ja̧'a̧ttü̧, iyäkuä̧u̧ru̧ Dio-mä̧ chi̧yä̧kua̧sä̧ päinü̧mä̧ pärowächü juiyünä̧ jueünä̧tä̧ iya pä'ü ukuokuinü̧, juramento pättünä̧ wȩnȩtü̧.

¹⁸ Ja̧'wa̧nü̧ Dio yaparewokü ja̧'a̧mä̧; juramento pättünä̧ iya päinü̧'i̧nä̧, wȩnȩtü̧ i̧mi̧nä̧ päinü̧'i̧nä̧ yoriso pärowächoka'a. Ja̧'wa̧nü̧ jo̧mȩttü̧ eseu ta̧'kua̧ wȩnä̧rä̧tü̧jä̧ Chutä ujuturu tta̧wä̧rü̧'i̧nä̧ ja̧'wa̧ta̧nü̧ ujuturu i̧yä̧kuȩ'i̧nä̧, jü̧nä̧.

¹⁹ Jua̧u̧ tta̧tä̧ra̧'a̧mä̧, jua̧u̧tä̧ ja̧'a̧ 'kiyü tü̧ja̧ku̧nä̧'i̧nä̧, ta̧'kua̧rü̧'i̧nä̧ 'kiyü 'chu̧ä̧rü̧nä̧ jȩü̧mä̧, woi'ka 'chu̧ä̧räkä Ancla pättäkä 'chu̧ä̧rü̧'a̧nü̧. Jua̧u̧ tta̧tä̧rü̧mä̧ Dio-rü ukuokuäkuäwodenä̧ rä̧ta̧, i̧sä̧ta̧ abora̧'a̧ päi'ünä̧ 'kuäo'ina̧'a̧.

²⁰ Jua'a Jesú ä̧kuo̧mȩnä̧ doächi'omȩnä̧mä̧, tu̧mä̧nä̧ ba'epinü̧, 'kuäopünä̧tä̧ sacerdote-tü̧ ttu̧ru̧wa̧ päinü̧nä̧tä̧ jü̧nä̧, Mequisede aditäwänä̧ winä̧tü̧ ji̧nü̧ta'anü̧.