Hebreos 5 - Nuevo Testamento Uwotjüja

¹ O'katoi'ünä̧ sacerdote-tü̧ tturuwotümä̧ ttü̧ja̧ ttü̧'kä̧tȩttü̧ pojopü ȩmä̧wo̧tü̧ ja̧'a̧, Dio ä'ka jo̧mȩ ttü̧ja̧ tti̧mi̧nä̧ ttukuokua pä'ü ja̧'wa̧ta̧nü̧ ofrenda jȩtta̧ pä'ü'i̧nä̧, suronä̧ jȩttä̧'i̧ja̧'a̧ sacrificio pättü jȩtta̧ pä'ü'i̧nä̧, jü̧nä̧.

² Jua'amä̧ sacerdote'i̧nä̧ ttü̧ja̧ i̧sa̧ ja̧'a̧ttü̧ a̧mi̧ 'kuä'ü, re ü̧ja̧ pä'ü ja̧'a̧ jerupü surojuo'ächinä̧tü̧rü̧;

³ ja̧'wa̧nü̧ ja̧'a̧ttü̧ chutä'i̧nä̧ a̧mi̧ 'kuä'attü, sacrificio pättü jȩa̧ pä'ü ja̧'a̧, chutä jäwä jȩpü̧ kkä̧nü̧, ttü̧ja̧ jäwä'i̧nä̧, jü̧nä̧.

⁴ Ya̧tȩ'i̧nä̧ pi̧yȩ ukuo jäwä a̧mü̧nä̧ pa̧ja̧tü̧, ttütä jäwä pä'ü amükuäda pä'ümä̧ juiya'a. Jua'amä̧, suro Dio woäkutä ji̧na̧'a̧, Aaro̧-rü̧ ji̧nü̧ta'anü̧.

⁵ Ja̧'wa̧nü̧ ji̧nü̧ta'anü̧, Crito'i̧nä̧, a̧mü̧nä̧ pa̧ja̧tü̧mä̧ sacerdote-tü̧ ttu̧ru̧wa̧ päi'ünä̧mä̧ rütäwokü pinü̧, suro Chutä, Dio-tä iyinä̧ku̧, jua̧u̧ uruwomä̧, pa̧'a̧nü̧ pä'ü: «Ukumä̧ chi̧tti̧jä̧; pi̧yȩ mo̧ro̧ chuwäbe'äkujä̧.»

⁶ Ja̧'wa̧ta̧nü̧ kkoromȩ'i̧nä̧ wȩyu̧kuä̧ wȩnȩnä̧ pä'inü̧: «Ukumä̧ sacerdote kuä̧kua̧jä̧ mo̧ro̧ kki̧ä̧mü̧nä̧, Mequisede ji̧nü̧ta'anü̧.»

⁷ Crito pi̧jä̧nä̧ ü̧ji̧nü̧mä̧, Dio-rü rü̧ȩnä̧ ujuruku ukuoku ajuäkuäwinü̧ i̧'chȩrȩjaku, wa'arettü rä'epü ikuäwä ujuru kku̧nä̧rü̧rü̧, jua̧u̧ttü̧ rä'epü ikuarü pä'ü; ja̧'wa̧nü̧ ja̧'a̧mä̧ ä̧ju̧kui̧nä̧ku̧ ye'ekunü̧ ukuotomȩttü̧.

⁸ Ja̧'wa̧ta̧nü̧ Crito-mä̧, Chutä Dio I̧tti̧ ja̧'a̧nä̧, usurä ȩmä̧u̧ ukuotäkuäwä wo̧jui̧pi̧nü̧;

⁹ ja̧'wa̧nü̧ adiunä̧ jue'ekuächü, ra̧wä̧pi̧jü̧ttü̧ kki̧'ä̧kuä̧wä̧ ba'epü kku̧ni̧nü̧, o'katoi'ünä̧ jua̧u̧ru̧ esetü ukuotätürümä̧.

¹⁰ Ja̧'wa̧nü̧ jo̧mȩnä̧ Dio-mä̧ sacerdote-tü̧ ttu̧ru̧wa̧ päi'ünä̧ jȩi̧nä̧ku̧, Mequisede-rü ji̧nü̧ta'anü̧.

Tta̧'kua̧ wȩnä̧rä̧kuä̧wä̧nä̧ tä̧mü̧ juoäwä

¹¹ Pi̧yȩ tü'kümä̧ rü̧ȩnä̧ jitäwa pä'ü ja̧'a̧nä̧, jiäkuäwänä̧ jeruwuö tü'kü ja̧'a̧, adiu kuä̧ju̧kuä̧tu̧kua̧ päkuätukuoka'attü̧.

¹² Jua'amä̧, täkü wo̧juȩkuä̧ isotü kuajatukua'anä̧, rekuo mo̧ro̧ 'kuäopina̧'a̧nä̧, rekuä rü̧jä̧u̧jä̧ ä̧kuo̧mȩnä̧ jäwä, Dio i̧wȩnȩ ttu̧wo̧juȩtä̧tu̧kua̧ku̧ pä'ütä; 'kiyümä̧ kukuätuku juiyünä̧tä̧, rechi kuawätukua pä'ütä juiyupächinä̧tü̧jä̧.

¹³ Ja̧'wa̧nü̧ ja̧'a̧ttü̧, rechi aumä̧ adiwä kkä̧kuä̧wä̧ wȩnȩ jȩru̧pa̧, jua'amä̧ ji̧'ki̧cha̧wa̧ ja̧'a̧ttü̧.

¹⁴ Ja̧'wa̧nü̧ ja̧'a̧nä̧ ttu̧kuȩ 'kiyümä̧, tä̧mü̧ juo'inä̧tü̧ ttu̧kuȩ ja̧'a̧, adiu'i̧nä̧, surojü'i̧nä̧ pojokunä̧ amükuädätü.