Hebreos 4 - Nuevo Testamento Uwotjüja

¹ Ja̧'wa̧nü̧ ja̧'a̧ttü̧, yetekua pä'ü ja̧'a̧, 'kuä'ächi'ü kkä̧kuä̧wä̧ Dio-mä̧ iya päina̧'a̧nä̧, ttu̧'ȩpä̧rä̧kuä̧wä̧tu̧kui̧, yotukunä̧mä̧ dokuächätuku juiyü 'kua̧ra̧'a̧.

² Isopäi'ünä̧ ujutu'i̧nä̧ juätü Irae ttü̧ja̧ Egito-ttü rä'opinä̧tü̧ ji̧nü̧ta'anü̧ jareü adiwä wȩnȩ jittäwi̧nä̧u̧jä̧; ja̧'wa̧nü̧ ja̧'a̧nä̧ juätürümä̧ ppädoka'a ji̧na̧'a̧ ä̧ju̧ku̧tä̧ ttä̧ju̧kuo̧mȩnä̧mä̧, esetü tta̧'kua̧ ttu̧wȩnä̧ro̧ko̧mȩnä̧mä̧.

³ Ja̧'wa̧nü̧ ja̧'a̧nä̧ ujutu esetinä̧tü̧mä̧, jua̧u̧ 'kuä'ächi'ü kkä̧kuä̧wä̧nä̧ dodepinä̧tü̧jä̧, Chutä päinü̧ta'anü̧: «Cha̧mi̧ surächi'äku pädinü̧ta̧'a̧nü̧ Ttü 'kuä'ächi'ü chü̧jo̧mȩmä̧ dodepokotü ttäkuotü, 'kuä'ächi'ü ttü̧ja̧kua̧ pä'ümä̧.» Ja̧'wa̧nü̧ ja̧'a̧nä̧, Dio aditäwämä̧ pi̧jä̧ aditino̧mȩttü̧ päi'ünä̧, kädäkuäwina̧'a̧ ji̧na̧'a̧;

⁴ Isopäi'ünä̧ yo̧mȩtȩ pä'a, wȩyu̧kuä̧ wȩnȩnä̧, kko̧ro̧mü̧ttü̧nü̧ todäre mo̧ro̧ tü'kümä̧: «Ja̧'wa̧ta̧nü̧ kko̧ro̧mü̧ttü̧nü̧ todäre mo̧ro̧ päi'omȩnä̧, Dio-mä̧ aditäwättümä̧ o'kajuiyünä̧ 'kuä'ächi'ü pä̧mä̧di̧nü̧.»

⁵ Ja̧'wa̧ta̧nü̧ pä'äjita'anü̧ pä'a: «Ttü 'kuä'ächi'ü chü̧jo̧mȩmä̧ dodepokotü ttäkuotü.»

⁶ Ja̧'wa̧nü̧ ja̧'a̧ttü̧, yotukunä̧ juȩnȩ 'kuä'ächi'ü kkä̧kuä̧wo̧mȩ dodetta pä'ü kka̧'a̧, ä̧kuo̧mȩnä̧ jiäwinä̧u̧mä̧ esetü jui'ü dodettoka'a ji̧na̧'a̧ttü̧.

⁷ Ja̧'wa̧nü̧ ji̧nü̧ta'anü̧, Dio-mä̧ pä'äjita'anü̧ pä'ü kku̧ni̧nü̧ «ji̧yȩtȩ mo̧ro̧,» rekuinü̧ o'ka'a Dawi-nä̧ pä'inü̧: «Jitä pi̧yȩ mo̧ro̧ Dio ukuoku, kuä̧ju̧kuä̧tu̧ku̧ttü̧mä̧, kua̧mi̧ pokuekuätukuä.»

⁸ Isopäi'ünä̧ Josué Irae ttü̧ja̧rü̧ 'kuä'ächi'ü ttü̧jü̧nä̧ iyinü̧ttü̧mä̧, Dio-mä̧ kkoro mo̧ro̧, 'kuä'ächi'ü kkä̧kuä̧wä̧ mo̧ro̧mä̧ ukuokuokü pi̧na̧jü̧.

⁹ Ja̧'wa̧nü̧ ja̧'a̧ttü̧, ji̧yȩtȩ 'kuä'ächi'ü kkä̧kuä̧wä̧ mo̧ro̧ kka̧'a̧, Dio i̧tti̧mü̧rü̧ i̧yä̧kuȩ mo̧ro̧;

¹⁰ Isopäi'ünä̧ Dio 'kuä'ächi'ü ü̧jo̧mȩ do'ächi'ümä̧, aditäwättü 'kuä'ächi'ü kkü̧, Dio aditäwättü 'kuä'ächi'ü ü̧'ä̧mä̧di̧nü̧ ta̧'a̧nü̧.

¹¹ Ja̧'wa̧nü̧ ja̧'a̧ttü̧, kujuruku amükuädätukui juȩnȩ 'kuä'ächi'ü kkä̧kuä̧wo̧mȩ dode'kuätukua, ya̧tȩ'i̧nä̧ ukuotokotü pinä̧tü̧ jȩtti̧nü̧nä̧ jȩpü̧ i̧'chü̧ juiyäkua'anü̧.

¹² Isopäi'ünä̧ Dio i̧wȩnȩmä̧, a̧'kua̧rä̧kuä̧wä̧'i̧nä̧, ujuru'i̧nä̧ kkü̧ ja̧'a̧. Kurodä pätekunä̧ so̧ȩkuodättü'i̧nä̧ abonä̧nü̧ 'kuiokuächa'a ja̧'wa̧ta̧nü̧ ttü̧ja̧sa̧ a̧'kua̧rü̧nä̧'i̧nä̧, a̧'kua̧rü̧ i̧sa̧nä̧'i̧nä̧ jakuära̧'a̧ doächi'ünä̧; ja̧'wa̧ta̧nü̧ tta̧mü̧kuädünä̧'i̧nä̧, tta̧mi̧'iso'kinä̧'i̧nä̧ adiu'i̧nä̧, surojü'i̧nä̧ ttu̧wo̧jui̧pü̧nä̧ ja̧'a̧.

¹³ Yoriso ji̧yȩtȩ'i̧nä̧ Dio ä'ka jo̧mȩttü̧ dajäwämä̧ juiya'a; o'kajuiyünä̧tä̧ wäjunä̧ i̧jȩku̧tä̧ ja̧'a̧, Churutä jȩti̧nü̧ ti̧jȩpä̧kua̧'a̧ttü̧.

Jesú-mä̧, sacerdote-tü̧ ttu̧ru̧wa̧ ja̧'a̧

¹⁴ Ja̧'wa̧nü̧ ja̧'a̧ttü̧ Jesú-mä̧, ukuo i̧sa̧ sacerdote-tü̧ ttu̧ru̧wa̧ ja̧'a̧, mo̧ro̧jä̧ra̧'a̧ do'ächinü̧. Ja̧'wa̧ta̧nü̧ yabokutä tesetinü̧mä̧ tta̧'kua̧ tu̧wȩnä̧ra̧rü̧ pä'ü ja̧'a̧.

¹⁵ Isopäi'ünä̧ ujutu tijuiyüwa'a rettü ppädü'anü̧ wa̧mä̧ to'ätüjä̧ ukuo i̧sa̧ sacerdote-tü̧ ttu̧ru̧wa̧mä̧. Ja̧'wa̧nü̧ ja̧'a̧nä̧, Jua̧u̧tä̧tä̧ ja̧'a̧, ujutu ta̧'a̧nü̧ wa̧rü̧ kka̧kuä̧mȩ'ü̧ toinä̧ku̧mä̧; ja̧'wa̧nü̧ ja̧'a̧nä̧ yoriso surojümä̧ jȩpo̧kü̧ pinü̧.

¹⁶ Ja̧'wa̧nü̧ ja̧'a̧ttü̧, ta̧'kua̧ wȩnä̧rü̧ kkä̧nü̧, Dio rettü weomȩku̧ tütü'küwächa pä'ätukui. Rȩrü̧jü̧ toatü pä'ümä̧, ujuturu rekuä rü̧jü̧ mo̧ro̧ ja̧'a̧ttü̧.