Hebreos 3 - Nuevo Testamento Uwotjüja

Jesú, Moisé u̧wä̧mȩnä̧ jü̧ wȩnȩ

¹ Ja̧'wa̧nü̧ ji̧na̧'a̧ttü̧ chü̧jä̧wa̧tü̧, ukutu surojüttü 'kȩ'ȩpü̧ ȩmü̧ iku kkä̧nü̧, Dio i̧tti̧mü̧ päi'ünä̧ woinä̧u̧mä̧, ttu̧'ȩpä̧rü̧ adiu amükuädätukui, apóto jü̧nä̧'i̧nä̧, sacerdote-tü̧ ttu̧ru̧wa̧ jü̧nä̧'i̧nä̧ wa̧mä̧, Crito Jesú-tä ja̧'a̧ tta̧'kua̧ tu̧wȩnä̧rä̧ku̧mä̧.

² Isopäi'ünä̧ Jesú-mä̧, Dio Moisé-rü weinüta'anü̧; Dio ȩmi̧nä̧u̧ru̧ tta̧wä̧ra̧ pä'ü weinä̧ku̧.

³ Ja̧'wa̧nü̧ ji̧na̧'a̧nä̧ Jesú-rumä̧, Moisé ji̧no̧mȩttü̧'i̧nä̧ abonä̧nü̧ ukuo iyäwi'inä̧ku̧. Ya̧tȩ isode adikuä i̧sa̧ ukuo u̧ju̧nä̧rü̧'a̧nü̧ ja̧'a̧, yodetämä̧ adinä̧mä̧ ukuo juiyode ja̧'a̧ jä̧'i̧nü̧'a̧nü̧.

⁴ O'kajuiyünä̧tä̧ kka̧ku̧mä̧ ya̧tȩ aditü u̧ju̧ni̧nü̧ ja̧'a̧; ja̧'wa̧nü̧ ja̧'a̧nä̧ o'kajuiyünä̧ aditinü̧mä̧ Dio-tä ja̧'a̧.

⁵ Ja̧'wa̧ta̧nü̧, Moisé-mä̧, Dio u̧mü̧wä̧ya̧ jü̧nä̧mä̧ adiu ukuotinü̧; ja̧'wa̧ta̧nü̧ Dio ȩmi̧nä̧u̧ru̧ tta̧'ä̧ri̧nü̧ weäwi'inü̧'a̧kuä̧mä̧; ja̧'wa̧ta̧nü̧ ji'äwinü̧ juätürü 'kuäopä̧kuȩ wȩnȩ'i̧nä̧.

⁶ Ja̧'wa̧nü̧ ja̧'a̧nä̧ Crito-mä̧, Dio I̧tti̧ ja̧'a̧, Chutä ojusode tta̧wä̧rä̧kuä̧wä̧ i̧sa̧, juodemä̧ ujututä ja̧'a̧. Ja̧'wa̧ta̧nü̧ ujutumä̧ juätütä isotüjä̧ isopäi'ünä̧ eseunu̧ ta̧mi̧ 'ki'ächi'ü ti̧'chü̧ttü̧mä̧, surojüttü kki̧'ä̧kuä̧wä̧ tȩmä̧kuo̧tü̧jä̧.

Ukuotäkuäwä wȩnȩ

⁷ Ja̧'wa̧nü̧ ja̧'a̧ttü̧ wȩyu̧kuä̧ wȩnȩnä̧ Epíritu Sa̧tu̧ pä'inü̧: «Jitä pi̧yȩ mo̧ro̧ Dio ukuokua'a kuä̧ju̧kuä̧tu̧ku̧ttü̧mä̧,

⁸ Kua̧mi̧ pokuekuätukuä, jitü Irae ttü̧ja̧ rȩbi̧yu̧ dȩ'a̧ra̧'a̧ttü̧, Dio-rü kka̧kuä̧mȩ'ü̧ jȩtti̧nü̧'a̧nü̧mä̧.

⁹ Jua'attümä̧, ku̧tä̧mü̧tu̧ku̧mi̧nä̧mä̧ kka̧kuä̧mȩ'ü̧ tottinä̧ku̧sä̧, Ja̧'wa̧nü̧ jȩpü̧, Ttü adiu jȩchü̧ topinä̧tü̧ cuarenta-nü̧ año jo̧mȩnä̧.

¹⁰ Ja̧'wa̧nü̧ ji̧yä̧ku̧ juätü isotürümä̧ chüjü'kü juiyünä̧ päi'äku, pä'inü̧sä̧: 'Kuäopünä̧tä̧ tta̧mi̧so'ki wea'akutä jȩpü̧ kka̧ku̧ to'e'ächinä̧tü̧, Ttü chu̧mä̧nä̧ ttu̧wo̧jua̧ pättoka'atä.

¹¹ Ja̧'wa̧nü̧ ja̧'a̧ttü̧, cha̧mi̧ surächi'inä̧ku̧ ra̧wä̧ri̧pü̧ pä'inü̧sä̧: Ttü 'kuä'ächi'ü chü̧jo̧mȩmä̧ dodepokotü ttäkuotü.»

¹² Chawaruwä chü̧jä̧wa̧tü̧, to̧pä̧rä̧kuä̧wä̧tu̧kui̧ kua̧mi̧so'kitukunä̧, surojünä̧ amükuädü, a̧'kua̧rä̧kuä̧wä̧ i̧sa̧ Dio-ttü 'kȩkui̧pä̧chä̧tu̧ku̧ juiyäkua'anü̧.

¹³ Jua̧u̧ jü̧ juiyünä̧tä̧, mo̧ro̧ ji̧nü̧ a̧'u̧kuä̧ ji'äkuäu tätukui, wȩyu̧kuä̧ wȩnȩ päü'a̧kuä̧: «jitä mo̧ro̧» surojü yapareunä̧ juokuächätuku juiyäkua'anü̧.

¹⁴ Isopäi'ünä̧ ujutumä̧ Crito-ku ji̧nä̧ ji̧yȩtȩnä̧ juo'ächinä̧tü̧jä̧, ä̧kuo̧mȩnä̧ ji̧nü̧ta'anü̧ ta̧mi̧ 'ki'ächi'ü ti̧'chü̧ttü̧mä̧ adiwäkua'a.

¹⁵ Ja̧'wa̧nü̧ ja̧'a̧ttü̧ pä'a: «Jitä pi̧yȩ mo̧ro̧ Dio ukuokua'a kuä̧ju̧kuä̧tu̧ku̧ttü̧mä̧, kua̧mi̧ pokuekuätukuä, jitü ra̧wä̧rü̧ jȩtti̧nü̧'a̧nü̧mä̧.»

¹⁶ ¿Titü ji̧na̧'a̧jä̧ttü̧, Dio i̧wȩnȩ ä̧ju̧kui̧nü̧'kotü ra̧wä̧ri̧nä̧tü̧mä̧? juätümä̧, jitütä Moisé Egito-ra̧'a̧ttü̧ räepinä̧u̧ o'katoi'ünä̧ ji̧na̧'a̧.

¹⁷ ¿Titü ji̧na̧'a̧jä̧ttü̧ cuarenta-nü̧ año jo̧mȩnä̧ Dio üjü'kü juiyünä̧ jȩpi̧nä̧tü̧mä̧? Juätümä̧ jitütä ji̧na̧'a̧ surojü jȩpi̧nä̧tü̧, rȩbi̧yu̧ dȩ'a̧ra̧'a̧ttü̧ to'e'ächinä̧tü̧mä̧.

¹⁸ ¿Ja̧'wa̧nü̧ ja̧'a̧mä̧, Dio-mä̧ titürü 'kuä'ächi'ü chü̧jo̧mȩmä̧ dodepokotü täkuotü päina̧'a̧jä̧ttü̧? Jua'amä̧ ukuotokotü pinä̧tü̧rü̧, jitürütä ji̧na̧'a̧.

¹⁹ Ja̧'wa̧nü̧ ji̧na̧'a̧mä̧ topätüjä̧; ttesetokomȩnä̧mä̧, dodepokotü pinä̧tü̧ pä'ü.