Hebreos 13 - Nuevo Testamento Uwotjüja

Jesú-ru esetü ukuotäkuäwä wȩnȩ

¹ Eseäkuäu, repe'äkuäu kka̧kuä̧tu̧kui̧, Crito-nä̧ kui̧jä̧wa̧tu̧ku̧ jü̧nä̧.

² Do'ächü ichätürü eseunu̧ ttä'a we'ätukui. Ja̧'wa̧nü̧ jȩpü̧, yotukunä̧ mo̧'i̧nä̧ á̧gȩrȩ-rü, ttieruwa'a jakuänä̧ do'ädü ä'epinä̧tü̧.

³ Ja̧'wa̧ta̧nü̧ kärenä̧ pȩjä̧tü̧rü̧ amükuädätukui, ukutu'i̧nä̧ juätütäku ttü̧'ȩja̧'a̧ 'kua̧rü̧nä̧. Ja̧'wa̧ta̧nü̧ suronä̧ jȩttä̧'i̧jä̧u̧rü'i̧nä̧ amükuädätukui, ukutu'i̧nä̧ juätütäku ku̧jä̧tu̧kua̧'a̧ 'kua̧rü̧nä̧.

⁴ O'katoi'ünä̧ tti̧rȩkua̧mü̧rü̧ kku̧nä̧rä̧tü̧rü̧mä̧ ukuotätukui ja̧'wa̧ta̧nü̧ kuirekuamü̧tu̧ku̧ku̧ ku̧ja̧kuä̧kuä̧wä̧tu̧ku̧mä̧ surojü juiyünä̧tä̧ kka̧kuä̧wä̧tu̧kui̧; jua'amä̧ ttȩmä̧kuä̧wo̧ka̧'a̧nä̧ kka̧kuä̧wä̧tü̧rü̧'i̧nä̧ ja̧'wa̧ta̧nü̧ kkorotü tti̧rȩkua̧mü̧rü̧ jȩpä̧'chä̧tü̧rü̧'i̧nä̧, Dio-mä̧ ü̧tä̧bo̧tä̧kua̧ ja̧'a̧.

⁵ Pärätänä̧mä̧, juiyomä̧ kua̧'kua̧ rokuekuätukuä; ku̧ju̧nä̧rä̧tu̧ku̧tä̧ esewätukui, Dio-mä̧ pä'inü̧: «usurä kuȩmä̧u̧nä̧mä̧ chikuipokoku jä̧kua̧jä̧»;

⁶ Ja̧'wa̧nü̧ ja̧'a̧ttü̧, ta̧'kua̧ wȩnä̧rü̧nü̧ pä'ätüjä̧: «Chu̧ru̧wa̧mä̧ ttürü ppä'ädü; ja̧'wa̧nü̧ ja̧'a̧ttü̧ ye'ekuoküsä. Ttü̧ja̧sa̧ jȩa̧ päümä̧», jü̧nä̧.

⁷ Amükuädätukui kuruwotü pató-tü̧, Dio i̧wȩnȩ jittäwinü̧mä̧; jȩpü̧ ttü̧jo̧mȩnä̧ tti̧rȩbȩwi̧na̧'a̧ttü̧ topü, tta̧'kua̧ ttu̧wȩnä̧ri̧nü̧'a̧kuä̧ ukutu'i̧nä̧ kua̧'kua̧ wȩnä̧rü̧ jȩpä̧tu̧kui̧.

⁸ Jesucrito-mä̧ pärowächokü: ni̧po̧'i̧nä̧, jitä mo̧ro̧'i̧nä̧, yodoji'i̧nä̧ 'kuäopünä̧tä̧ wa̧.

⁹ Kuieruwätuku, kkoro kkä̧kuä̧wä̧ wȩnȩku̧mä̧ pekuächächätukuä; Isopäi'ünä̧, ttu̧kuȩ kuäkuäwänä̧ repettajü jueimä̧, tamiso'kinä̧, Dio iyinü̧nä̧ repetächa pä'ü ja̧'a̧, büó juo'ünü̧; ja̧'wa̧nü̧ kkä̧'chä̧kuä̧wä̧mä̧ yorisotä ppädokü ji̧nü̧.

¹⁰ Ujutumä̧ altar pättomȩ kku̧nä̧rä̧tü̧jä̧, juȩnȩmä̧ tä̧mi̧nä̧ sacerdote winä̧tü̧'i̧nä̧ ttukua pä'ümä̧ juiya'a.

¹¹ Isopäi'ünä̧ sacerdote-tü̧ ttu̧ru̧wa̧mä̧, santuario pättomȩku̧, äjikuäkuäwotü ttukuoja ȩpi̧nü̧, ttü̧ja̧ suronä̧ jȩttä̧'i̧jü̧ adiwächa pä'ümä̧; ja̧'wa̧nü̧ jȩpü̧ ttü̧ja̧kuo̧mȩ u̧mi̧ku̧ttü̧ kkuwü ikuinä̧tü̧.

¹² Ja̧'wa̧nü̧ ji̧nü̧ta'anü̧, Jesú-mä̧ Jerusarȩ́ ütawiyä u̧mi̧ttü̧ 'korujuo'ächinü̧, chutä ukuojanä̧, ȩmi̧nä̧u̧ suronä̧ jȩttä̧'i̧jü̧ Dio jȩpü̧ ikua pä'ümä̧.

¹³ Ja̧'wa̧nü̧ ji̧nü̧ta'anü̧, ujutu'i̧nä̧ jua̧u̧ ü̧jo̧mȩku̧ ti̧'cha̧ pä'ätukui, ttü̧ja̧kuo̧mȩ u̧mi̧ku̧; jua̧u̧ru̧ ji̧nü̧ta'anü̧ usurä tȩmä̧u̧nä̧ ya̧ttä̧wä̧'cha̧tü̧ pä'ü.

¹⁴ Isopäi'ünä̧ pi̧jä̧ttü̧mä̧, ütawiyä beipächünätä kka̧kú̧; ujutumä̧ usätüjä̧ yodoji kkä̧kuä̧wä̧kuȩ ütawiyä.

¹⁵ Ja̧'wa̧nü̧ ja̧'a̧ttü̧, jua̧u̧ Jesucrito-nä̧ Dio-rümä̧ 'kuäopünä̧tä̧ usurä ȩmä̧u̧nu̧ teseäkuäwa pä'ätukuirü; ¡Jua̧u̧mä̧, tänä̧ räopa'a u̧wä̧ju̧, i̧mi̧ teseäkuäumä̧!

¹⁶ käkuädätukuä adiu ppädäkuäwämä̧; ja̧'wa̧nü̧ jȩpü̧ ttü̧jo̧mȩnä̧mä̧, Dio-mä̧ juiyo eseu.

¹⁷ Ukuturu tta̧'a̧rä̧tü̧ pató-tü̧rü̧ ukuotü esetätukui, jua'amä̧ Dio-rü tti̧jȩpä̧kua̧'a̧ ukuturu 'kuäopünä̧ tta̧ttä̧ra̧'a̧ttü̧ kuesewätukuäkua'anü̧; surojü juiyünä̧, adiunä̧ jü̧tä̧ jȩpä̧tu̧kui̧, surojümä̧ ppädokü ja̧'a̧ttü̧.

¹⁸ Ujuturu Dio-rü ukuokuätukui; tamükuädünämä̧ surojü jui'ätüjä̧, o'kajuiyünä̧ jȩtü̧mä̧ adiwomȩnä̧tä̧ jȩta̧ päta'attü̧.

¹⁹ Ja̧'wa̧nü̧tä̧, yabonü̧ jȩ'kuä̧tu̧kua̧ pä'üsä; pä'äjita'anü̧, jitätä ja̧'a̧ku̧ Dio-rü pä̧wä̧rü̧jo̧mȩnä̧ tochätukuaku pä'ü.

Teäwi'inü̧ wȩnȩ

²⁰ Jua̧u̧ Dio eseäkuäwä ru̧wa̧, Tu̧ru̧wa̧ Jesucrito-rü tto'ädinü̧, oweja-tü̧ ttu̧ru̧wa̧ ukuo i̧sa̧, ukuojanä̧tä̧ 'kuäopünä̧ jü̧nä̧tä̧ esekuinü̧tä̧,

²¹ surojü juikuätukunä̧, adiwotü kuätukunä̧tä̧ pärotü ikuätukuäku, Churutä pä̧wä̧rü̧jü̧tä̧ adiu o'kajuiyünä̧ jȩ'kuä̧tu̧kuä̧kua̧'a̧nü̧ Jesucrito-nä̧; ¡Jua̧u̧ Crito-rütä gloria pättümä̧, 'kuäopünä̧tä̧ iyäwäkua'a! Amȩ́.

²² Chawaruwä chü̧jä̧wa̧tü̧, pi̧yȩ a̧'u̧ku̧nä̧ ro̧'ȩpü̧nü̧ ukuoku chi̧wȩyu̧tä̧ji̧, kua̧mi̧ 'ki'ächi'ünü̧ kuä̧ju̧kuä̧tu̧kua̧ pä'üsä.

²³ Ta̧wa̧ru̧wa̧ tti̧jä̧wa̧ Timoteo-mä̧ täkü rä'epü ttikuäjäku pä'ü jidäwä̧u̧jä̧, jurunä̧nü̧ ichi'üttümä̧, jua̧u̧tä̧ku̧ jua'amä̧, ukuturu topü chi̧chä̧kua̧sä̧.

²⁴ O'katoi'ünä̧rü̧, kuruwotuku pató-tü̧rü̧'i̧nä̧ ja̧'wa̧ta̧nü̧ o'katoi'ünä̧ esetinä̧tü̧rü̧mä̧ te'äwiyätukuittü. Ja̧'wa̧ta̧nü̧ Itaria rȩjȩ ttü̧ja̧'i̧nä̧, pottümä̧ tettäwä̧u̧jä̧.

²⁵ Dio rȩrü̧jü̧ toinü̧nä̧ kka̧kuä̧tu̧kui̧ o'katoi'ünä̧. Amȩ́