Hebreos 12 - Nuevo Testamento Uwotjüja

Surojü 'kuäopa'anä̧ Dio-rü tta̧'kua̧ wȩnä̧rä̧kuä̧wä̧

¹ Ja̧'wa̧nü̧ ji̧nü̧ta'anü̧, ujutu'i̧nä̧, tta̧'kua̧ wȩnä̧ri̧nä̧tü̧rü̧ rekuätürü tippeyänä tu̧ju̧nä̧ra̧'a̧ttü̧, o'kajuiyünä̧ tto̧ȩpä̧rü̧mä̧, suronä̧ jȩä̧kuä̧wä̧'i̧nä̧ kä'ädi'ü, joäkuäwämä̧, tujuruku ta̧mi̧ 'ki'ächi'ü jotätukua.

² Jesú-ru to̧pä̧rü̧tä̧ jotätukua, jua̧u̧tä̧ ja̧'a̧ tta̧'kua̧ wȩnä̧rä̧kuä̧wä̧ kkada'kamä̧, jo̧mȩnü̧ kä'ädinü̧mä̧. Jua̧u̧tä̧ ja̧'a̧ eseäkuäwätä ä'ka ja̧'a̧nä̧ kku̧nä̧wi̧'ü̧, ü̧jo̧kä̧nü̧ jäinä̧ usurä ȩmä̧wi̧'i̧pü̧, suronä̧ jȩttü̧ yekuoka'attü̧ Dio uruwo deäkä u̧wo̧jua̧'a̧ku̧nä̧ pä̧mä̧di̧nü̧mä̧.

³ Ja̧'wa̧nü̧ ja̧'a̧ttü̧, Jesú jȩi̧nü̧tä̧ amükuädätukui, rekuätü ttü̧ja̧ surojünä̧ kka̧kuä̧tü̧ suronä̧ jȩtta̧'a̧nä̧'i̧nä̧ yaboku 'chi̧nü̧rü̧ amükuädätukui; ja̧'wa̧nü̧ ja̧'a̧ttü̧ juiyupächi'ümä̧ 'kuäkuächi'ätukuä.

⁴ Isopäi'ünä̧ surojüku rowäu usurä kuȩmä̧wä̧tu̧kua̧'a̧nä̧; Jua̧u̧ ji̧nü̧'a̧nü̧mä̧ wa'arera̧'a̧bü päi'ünä̧mä̧ rȩbȩwo̧ko̧tü̧jä̧,

⁵ Ja̧'wa̧ta̧nü̧ unichi'inä̧tü̧jä̧, Dio i̧tti̧mü̧rü̧, pa̧'a̧nü̧ ro̧ȩpi̧nü̧mä̧: «Chi̧tti̧, Tu̧ru̧wa̧ ro̧ȩpo̧mȩnä̧mä̧ ya̧kuo̧kuä̧rä̧, ja̧'wa̧ta̧nü̧ suronä̧ jȩ'kui̧yä̧ku̧ jiäwomȩnä̧ kuijuiyuwächi'ä, pä'ijümä̧.

⁶ Isopäi'ünä̧ Tu̧ru̧wa̧mä̧ repeäkurumä̧ juekuächünä̧ ro̧'ȩpü̧, ja̧'wa̧ta̧nü̧ i̧tti̧ päi'ünä̧ ȩmä̧ku̧rü̧mä̧ kuä'opo'ächü tä̧bo̧tü̧ ja̧'a̧.»

⁷ Isopäi'ünä̧ jitä usurä kuȩmä̧wä̧tu̧ku̧ttü̧mä̧, jua'amä̧ Dio jue'epü ro̧ȩpa̧'a̧ ja̧'a̧; Jua̧u̧ i̧tti̧mü̧ kuätukua'attü. Isopäi'ünä̧ ¿Ditä jä̧ttü̧, i̧tti̧rü̧ ro̧'ȩpo̧kü̧mä̧?

⁸ Ja̧'wa̧nü̧ ja̧'a̧nä̧, ukuturu Dio ro̧ȩpü̧ juiyüttümä̧; jua̧u̧nu̧mä̧ i̧tti̧mü̧mä̧ pokotüjä̧, ttü̧jo̧ko̧kua̧ku̧ u̧mi̧nä̧ tti̧tti̧mü̧ jä̧'i̧nü̧'a̧nü̧tä̧ wotüjä̧.

⁹ Ja̧'wa̧nü̧ jo̧ka̧'a̧, ppo̧'ä̧tü̧ täimä̧, pi̧jä̧ttü̧ tä̧'o̧tü̧rü̧mä̧ ro̧ȩkuä̧nä̧ ro̧ttȩpä̧u̧ ukuotinä̧tü̧jä̧. Jua'a yabonä̧, ¿Tta̧'a̧nü̧ pä'ü, epíritu-tu̧ ttä'orü tukuotoka'ajä̧ttü̧, kkä̧kuä̧wä̧ tȩma̧ pä'ümä̧?

¹⁰ Ja̧'wa̧nü̧ jo̧ka̧'a̧, juätü pi̧jä̧ttü̧ tä̧'o̧tü̧mä̧, pi̧jä̧nä̧ kkä̧kuä̧wä̧ beipü'i̧nä̧, jitürütä adiwomȩnä̧ ro̧ttȩpi̧nä̧u̧jä̧; Ja̧'wa̧nü̧ ja̧'a̧nä̧ tü̧ä̧nä̧wa̧ Dio-mä̧ ujuturu ro̧'ȩpü̧, Chutä jü̧ta̧'a̧nü̧ surojü juiyünä̧ tü̧ji̧ya̧rü̧ pä'ü.

¹¹ Isopäi'ünä̧, ji̧yȩtȩ'i̧nä̧ juiya'a ro̧ȩkuä̧nä̧ ro̧ttȩpo̧mȩnä̧, yotäku barau juiyünä̧ eseäkuäwämä̧; ja̧'wa̧nü̧ ja̧'a̧nä̧ ro̧ttȩpä̧ji̧ ttu̧wo̧jui̧pa̧'a̧, päjuriyänämä̧ po̧kui̧kua̧'a̧, adiu eseu kkä̧kuä̧wä̧tä̧.

¹² Ja̧'wa̧nü̧ ja̧'a̧ttü̧, kä'epätukui ku̧mü̧tu̧ku̧ ma̧ä̧mä̧chi̧nü̧'i̧nä̧ ja̧'wa̧ta̧nü̧ kuiwe'kiyutuku jiyuwächinü'i̧nä̧,

¹³ ja̧'wa̧ta̧nü̧ mä̧ni̧yä̧ jueü o̧mä̧nä̧ jopätukui, kui̧jä̧pü̧ ppi̧sä̧ ppi̧sä̧ jo̧mȩ jue'ekuächünä̧.

To̧pä̧rä̧kuä̧u̧ kkä̧kuä̧wä̧ wȩnȩ

¹⁴ O'katoi'ünä̧ku̧ wȩnȩ juiyünä̧ ku̧jä̧tu̧kua̧ usätukui, surojü juiyünä̧ kka̧kuä̧tu̧kui̧; jua̧u̧ juiyünä̧mä̧, Tu̧ru̧wa̧rü̧mä̧ toäkuäwoka'a jä̧kua̧'a̧.

¹⁵ Adiu topäkuäu kka̧kuä̧tu̧kui̧, Dio rettü iyümä̧ ya̧tȩ'i̧nä̧ ku̧ja̧kui̧'ä̧tu̧kuo̧ka̧'a̧ kuȩmä̧tu̧kuä̧kua̧'a̧nü̧; pä̧i̧ jakuänä̧ ȩki̧pa̧'a̧ püttächi'ü ttoepomȩnä̧, rekuätürü surojuoepü juiyäkua'anü̧.

¹⁶ Ya̧tȩ'i̧nä̧ kui̧rȩkua̧mü̧ pokotüku jȩpä̧'chä̧kuä̧u̧ jȩpü̧, Dio jäwä'i̧nä̧ surojuokuepätukuä; ja̧'wa̧nü̧ jȩpi̧nü̧ Esaú-mä̧, ä̧kuo̧mȩnä̧ i̧sa̧ jü̧nä̧ uruwo jä̧ji̧mä̧, kuäkuäwänä̧ mikuä pä'ü iyü ikuinü̧.

¹⁷ Ukutumä̧ wo̧juä̧tü̧jä̧ ja̧'wa̧nü̧ ji̧nü̧ o'ka'a, jä'o mȩ'ü̧ ukuokuarü pä'ümä̧ usa'anä̧, iyäwi'okoku pinü̧; rü̧ȩnä̧ ajuäkuäu jäepa'anä̧, ppa̧wä̧dä̧kuä̧wa̧ pä'ümä̧ juiyina̧'a̧.

¹⁸ Ukutumä̧ Sinaí mü̧ä̧'kaku tü'kü pä'i'okotü pinä̧tü̧jä̧: okurä kuoina̧'a̧ tottünä̧, mȩttü̧'a̧nü̧, yo̧i̧na̧'a̧, kkä̧rü̧'ko̧wi̧na̧'a̧;

¹⁹ ä̧ju̧kui̧nä̧tü̧ trompeta rä̧mi̧pa̧'a̧ ja̧'wa̧ta̧nü̧ Dio ukuoku'i̧nä̧ rä̧mi̧pä̧u̧, yaboku ukuoku juiyünä̧ jä'epü ajuäkuäwinä̧tü̧.

²⁰ Jua'amä̧ i̧wȩnȩ we'ü ukuokuomȩnä̧, tta̧mi̧ 'kittächi'ü juiyünä̧ ji̧nä̧u̧: «Pi'ka mü̧ä̧'kanä̧ i̧sa̧ kkȩdü̧rü̧mä̧, i̧nä̧dunä̧'i̧nä̧, dakuodänä'i̧nä̧ ikuäu ttiku'anü̧tä̧.»

²¹ Jua̧u̧ tottümä̧ rü̧ȩnä̧ ra̧wä̧pi̧jü̧ ji̧na̧'a̧ ja̧'wa̧nü̧ ji̧yä̧ku̧, chutä Moisé'i̧nä̧ pä'inü̧: «Rü̧ȩnä̧ ye'ü, ttü̧'ä̧u̧sä̧.»

²² Ja̧'wa̧nü̧ ji̧nü̧ juei ukutumä̧, tü'küpächi'inä̧tü̧jä̧, Sión mü̧ä̧'kanä̧, Dio wa'okü ü̧jo̧mȩ ütawiyänä̧, mo̧ro̧jä̧ra̧'a̧ttü̧ Jerusarȩ́-nä̧ ja̧'wa̧ta̧nü̧ rekuätü á̧gȩrȩ, Dio-rü eseäkuäu ttü̧ka̧ka̧kuo̧mȩku̧,

²³ ja̧'wa̧ta̧nü̧ Dio ä̧kuo̧mȩnä̧ i̧tti̧mü̧, mo̧ro̧jä̧nä̧ wȩyu̧kuo̧tü̧ ttü̧ja̧kuo̧mȩku̧. Tü'küpächi'inä̧tü̧jä̧ Dio-rü, Juez jü̧nä̧ o'katoi'ünä̧rü̧ wa̧ ü̧jo̧mȩku̧ ja̧'wa̧ta̧nü̧ Dio adiunä̧ juoepinä̧u̧ epíritu-tu̧ ttü̧ja̧kuo̧mȩku̧.

²⁴ Ja̧'wa̧ta̧nü̧ ichinä̧tü̧jä̧ Jesú-ku jareünä̧ esekuäkuäwänä̧ todetü iyinü̧ku̧. Ja̧'wa̧ta̧nü̧ ukuojanä̧ ujuturu toinoyanä̧, Abel ukuojattü'i̧nä̧ abonä̧nü̧ ppädinoyanä̧.

²⁵ Ja̧'wa̧nü̧ ja̧'a̧ttü̧, ttu̧'ȩpä̧rü̧nü̧ esetätukui Dio ukuokuomȩnä̧mä̧. Isopäi'ünä̧ pi̧jä̧nä̧ttü̧ ro̧ȩpi̧nü̧ jarodinä̧tü̧mä̧ to'e'ächinä̧tü̧. Juȩnȩ abonä̧nü̧ tü̧ja̧kui̧'ü̧ juiyü'anü̧ ja̧'a̧ mo̧ro̧jä̧ra̧'a̧ttü̧ ro̧ȩpo̧mȩnä̧mä̧.

²⁶ Ji̧yȩnü̧ mo̧ro̧mä̧, Dio i̧wȩnȩ ukuokuomȩnä̧mä̧, pi̧jä̧ ttü̧ȩpi̧na̧'a̧ ja̧'wa̧nü̧ ja̧'a̧nä̧ jitämä̧ pä'ü: «Ji̧nä̧ pä'äjita'anü̧, ya'utenä̧ ttü̧ȩpü̧nä̧ jȩchä̧kua̧sä̧, suro pi̧jä̧tä̧mä̧kü̧, jitämä̧ mo̧ro̧jä̧'i̧nä̧.»

²⁷ Pa̧'a̧nü̧ päümä̧: «Ji̧nä̧ pä'äjita'anü̧ ya'utenä̧,» jua̧u̧ wo̧jui̧'ä̧tü̧jä̧, aditinü̧mä̧ ȩmü̧ ikuäwäkua'a pä'ü, pporächi'okü jäwä pärokuätä kki̧'i̧pü̧nä̧.

²⁸ Ja̧'wa̧nü̧ ja̧'a̧ttü̧ ujutumä̧ ȩmä̧tü̧jä̧ Ru̧wa̧ Dio weü wȩnȩ pporächi'okü jäwä. Ja̧'wa̧nü̧ ja̧'a̧ttü̧ Jua̧u̧ Dio-rü tesewätukuarü; Chutä üjü'komȩnä̧.

²⁹ Isopäi'ünä̧ Tü̧ä̧nä̧wa̧ Dio-mä̧, okurä kuo'ü ttikuarä jü̧nä̧tä̧ wa̧.