Hebreos 11 - Nuevo Testamento Uwotjüja

Dio-rü tta̧'kua̧ wȩnä̧rä̧kuä̧wä̧ wȩnȩ

¹ Isopäi'ünä̧ tta̧'kua̧ wȩnä̧rä̧kuä̧wä̧mä̧, tta̧dä̧rü̧mä̧ chȩmä̧kua̧sä̧ pä'ü jo̧mȩnü̧ wo̧juä̧wä̧ ja̧'a̧; kkoro juei totokü'i̧nä̧ isopäi'ünä̧ jä̧kua̧'a̧ pä'ü wo̧juä̧wä̧ ja̧'a̧.

² Dio-mä̧, tü̧tä̧mü̧ mi̧nä̧rü̧mä̧ tta̧'kua̧ ttu̧wȩnä̧ro̧mȩttü̧ adiu esewinä̧u̧.

³ Ta̧'kua̧ wȩnä̧rä̧tü̧jä̧, Dio-mä̧ pi̧jä̧mä̧ i̧wȩnȩnä̧tä̧ aditinü̧ pä'ü ja̧'wa̧nü̧ ja̧'a̧ttü̧ jitä totümä̧, toäkuäwokü ji̧nü̧ttü̧ adikui'inü̧do pä'ü.

⁴ A̧'kua̧ u̧wȩnä̧ro̧mȩttü̧, Abel-mä̧ Caín iyinü̧ttü̧'i̧nä̧ abonä̧nü̧ adiu sacrificio pättü Dio-rü iyinü ja̧'wa̧nü̧ jȩo̧mȩttü̧ Dio-mä̧ üäre ofrenda eseu ȩmi̧ni̧yä̧ku̧, churutämä̧ surojü jui̧'a̧ jü̧nä̧tä̧ jȩpü̧ iku; ja̧'wa̧nü̧ ja̧'a̧ttü̧ Abelmä̧ 'korujuoächina̧'a̧nä̧'i̧nä̧, jitä'i̧nä̧ jua̧u̧ jȩi̧nü̧nä̧tä̧ tu̧wo̧jui̧pü̧nä̧ ukuokuä̧u̧jä̧.

⁵ A̧'kua̧ u̧wȩnä̧ro̧mȩttü̧, Henoc-mä̧ wa'ü iku juiyünä̧tä̧ kkä̧kuä̧wä̧nä̧ pärowächinü̧ ja̧'wa̧nü̧ ja̧'a̧ttü̧ ttü̧'o̧kui̧'o̧ko̧ku̧ pinü̧, Dio-tä ȩmo̧po̧'ä̧chä̧ja̧'a̧ttü̧. Ja̧'wa̧ta̧nü̧ wȩyu̧kuä̧ wȩnȩnä̧mä̧ pä'a, Henoc-mä̧ Dio-rü pä̧wä̧rü̧jo̧mȩnä̧ kki̧nü̧, jü̧nä̧.

⁶ Ja̧'wa̧nü̧ ja̧'a̧ttü̧ tta̧'kua̧ wȩnä̧rä̧kuä̧wä̧ juiyünä̧ Dio-rü eseunä̧ jȩä̧kuä̧ juiya'a; ja̧'wa̧nü̧ ja̧'a̧ttü̧ Dio-rü kutü'küwächi'omȩnä̧mä̧, Kkü̧ pä'ü esetünü̧, usätürümä̧ adiwä juei ppä'ädü pä'ü ttesetarü pä'ü ja̧'a̧.

⁷ A̧'kua̧ u̧wȩnä̧ra̧'a̧ttü̧, Nuémä̧, Dio jiäwomȩnä̧mä̧, ji̧nä̧ 'kuäopäkuȩmä̧ tooka'anä̧ esetü woi'ka aditinü̧ i̧tti̧mü̧tä̧ku̧ ü̧ji̧pa̧ pä'ümä̧. Ja̧'wa̧nü̧ a̧'kua̧ u̧wȩnä̧ro̧mȩnä̧mä̧ pi̧jä̧ ttü̧ja̧mä̧ to'e'inä̧tü̧ ja̧'wa̧nü̧ ja̧'a̧nä̧ Nuémä̧ Dio-ttü ȩmi̧nü̧ adiwäjuei, Churutä tta̧'kua̧ wȩnä̧rä̧tü̧rü̧ iyü.

⁸ A̧'kua̧ u̧wȩnä̧ro̧mȩttü̧, Abraha̧-mä̧ Dio woäkumä̧ ukuotü, rä'opinü̧ kui̧rȩjä̧ chi̧yä̧kua̧jä̧ päjäkumä̧. Ja̧'wa̧nü̧ ja̧'a̧ttü̧ i̧rȩjä̧ttü̧mä̧ rä'opinü̧, ieruwa'a päte'ü.

⁹ Ja̧'wa̧nü̧ a̧'kua̧ u̧wȩnä̧ro̧mȩttü̧ kki̧nü̧, Dio ü'ätetinä̧jä̧nä̧mä̧ kko̧ro̧jä̧ttü̧ i̧chä̧kuä̧wa̧ jü̧nä̧. Isotü tti̧jȩti̧yu̧ttü̧ adikuä o̧ta̧ttü̧ adikuä odenä̧tä̧ kki̧nü̧ ja̧'wa̧nü̧tä̧ ji̧na̧'a̧ Isaa'i̧nä̧, Jaco'inä̧ jü̧nä̧, jua̧u̧ iya pä'ü ukuokuinä̧u̧mä̧.

¹⁰ Jua'amä̧, Abraha̧-mä̧ tta̧wä̧ra̧'a̧ttü̧ ji̧na̧'a̧, kkada'kiyu 'kiyünä̧ kka̧ku̧, Chutä Dio amükuädü aditü u̧ju̧ni̧nü̧ ütawiyä tta̧wä̧ra̧'a̧ttü̧.

¹¹ Ja̧'wa̧ta̧nü̧ kka̧'kua̧ ku̧wȩnä̧ro̧mȩttü̧, Sara-mä̧, kki̧tti̧mü̧ to'aju kka'anä̧, kkujuru ȩmi̧nä̧ju̧, kki̧tti̧rü̧ o'kaju juoja pä'ümä̧, täkü kkubüäkuächina̧'a̧nä̧. Jua'amä̧, ttürü ukuokuinü̧mä̧, päinü̧ta'anü̧ jȩä̧kua̧ pä'ü kkeseta'attü.

¹² Ja̧'wa̧nü̧ ja̧'a̧ttü̧ Abraha̧-ttü̧mä̧, täkü 'korujuoächü'anü̧tä̧ bü̧o̧sa̧ ja̧'a̧nä̧, rekuätü yo'äwi'inä̧tü̧ si̧ri̧'kü̧ jä̧'i̧nü̧'a̧nü̧, rȩba̧ jä̧'i̧nü̧'a̧nü̧ jü̧nä̧tä̧, pa̧ja̧kuä̧ juiyünä̧.

¹³ Juätümä̧ o'katoi'ünä̧tä̧ wa'ü ikuinä̧tü̧ Dio iya päinü̧mä̧ ttȩmo̧ka̧'a̧tä̧; ja̧'wa̧nü̧ ja̧'a̧nä̧ ta̧'kua̧ ttu̧wȩnä̧ro̧mȩttü̧, otonä̧tä̧ topinä̧tü̧, esetü ukuokuinä̧tü̧ pi̧jä̧mä̧ ttü̧ja̧mä̧kü̧jä̧, ujutumä̧ 'kuäokuä ttü̧ja̧jä̧, pä'ü.

¹⁴ Ja̧'wa̧nü̧ pättomȩnä̧mä̧, wäjuönä̧ tu̧wo̧jui̧pü̧nä̧ ja̧'a̧ ja̧'wa̧nü̧ pä'ümä̧ tti̧rȩjä̧ usätütä päwä pä'ü.

¹⁵ Isopäi'ünä̧ ttichinä̧jä̧ra̧'a̧tä̧ a̧mü̧kuä̧rü̧, ppa̧ttä̧cha̧ pättinü̧ttü̧mä̧ ppa̧'ä̧chi̧na̧ja̧tü̧, ppa̧ttä̧cha̧ pä'ümä̧ ji̧na̧'a̧;

¹⁶ ja̧'wa̧nü̧ ja̧'a̧nä̧ juätümä̧ tti̧rȩjä̧ adiwä̧jä̧ pä̧wä̧rü̧ji̧nä̧u̧, juä̧jä̧mä̧ mo̧ro̧jä̧ rȩjȩ ja̧'a̧. Ja̧'wa̧nü̧ ja̧'a̧ttü̧, Dio-mä̧ juätü ttü̧ä̧nä̧wa̧ ja̧'a̧mä̧ dä̧'ä̧rü̧jo̧ko̧ku̧, jua'amä̧ juätü ttü̧jä̧kuȩ ütawiyä jo̧mȩnü̧ aditü u̧ju̧ni̧na̧'a̧ttü̧.

¹⁷ A̧'kua̧ u̧wȩnä̧ra̧'a̧ttü̧, Abraha̧-mä̧, Dio kka̧kuä̧mü̧ topü weäjäkumä̧, Isaa-rü sacrificio jü̧nä̧ iyinü̧. I̧tti̧ chu̧'ä̧kua̧rü̧ iya pä'ümä̧ jo̧mȩnü̧tä̧ winü̧, Dio-mä̧ chi̧yä̧kua̧jä̧ päinä̧ku̧ ja̧'a̧ttü̧:

¹⁸ «Isaa-nä̧ ku̧ju̧nä̧rä̧kua̧jä̧ kui̧tti̧mü̧rü̧mä̧,» päinä̧ku̧,

¹⁹ Jua'amä̧ Abraha̧-mä̧ wo̧juö̧ jȩpi̧nü̧, Dio-mä̧ wa'ü ikuinä̧tü̧rü̧'i̧nä̧ ttoäda pä'ü ujuru kku̧nä̧rü̧ pä'ü; ja̧'wa̧nü̧ ja̧'a̧ttü̧ Abraha̧-mä̧ pä'äjita'anü̧ i̧tti̧rü̧ ȩmi̧nü̧, jitä ji̧yȩtȩnä̧ wȩnȩkuä̧chä̧kua̧'a̧mä̧.

²⁰ A̧'kua̧ u̧wȩnä̧ra̧'a̧ttü̧, Isaa-mä̧ Jaco-rü'i̧nä̧, Esaú-rü'i̧nä̧ mȩ'ü̧ ukuokuinü̧, juätü adiwä juei ttȩmä̧kuȩmä̧.

²¹ A̧'kua̧ u̧wȩnä̧ra̧'a̧ttü̧, Jaco-mä̧, täkü 'korujuoächäkua'a ä'kanä̧, José i̧tti̧mü̧ ya̧ku̧nä̧rü̧ adiwä juei ja̧tü̧ pä'ü mȩ'ü̧ ukuokuäji̧'ka̧, itta'ka päjure yü'eku kkä̧mä̧dü̧ Dio-rü eseu ukuokuinü̧.

²² A̧'kua̧ u̧wȩnä̧ra̧'a̧ttü̧, José-mä̧ 'korujuo'ächü kkä̧nü̧mä̧ ji'äwi'inü Irae ttü̧ja̧ rekuipü o'ka'a Egito-ttü rättopä̧kuȩ wȩnȩmä̧ ja̧'wa̧nü̧ ukuoku we'ipinü̧ iwe'kiyu o'ko, pa̧'a̧nü̧ jȩ'kuä̧tu̧kua̧jä̧ pä'ü'i̧nä̧.

²³ Tta̧'kua̧ ttu̧wȩnä̧ra̧'a̧ttü̧, Moisé uwäpächomenämä̧, jä'o'i̧nä̧, ja̧ju̧'i̧nä̧, dajü ikuinä̧tü̧ kkä̧wa̧tü̧ wä̧mȩtukuä jo̧mȩnä̧; ji̧'ki̧cha̧wa̧rü̧ tottomȩnä̧ adiu a̧'kua̧kui̧yä̧u̧ ru̧wa̧ Faraó̧ weäji'i̧nä̧ yettekuoka'atä.

²⁴ A̧'kua̧ u̧wȩnä̧ra̧'a̧ttü̧, Moisé-mä̧, büó juomȩnä̧mä̧, Faraó̧ ittiju kki̧tti̧ ja̧ pä'ümä̧ ya'okuinü̧;

²⁵ Dio i̧tti̧mü̧ku̧tä̧, juätürü jü̧ta̧'a̧nü̧ suronä̧ jȩtta̧'a̧ usurä ȩmä̧wa̧ pä'inü̧, pi̧jä̧ üadiwänä̧ suronä̧ jȩpü̧ ü̧ja̧ pä'ü jui'ü.

²⁶ Jesucrito usurä ȩmä̧wä̧kuȩ ji̧nü̧ta'anü̧, usurä ȩmä̧kuä̧wä̧mä̧, Egito ruwottü'i̧nä̧ abonä̧nü̧ rü̧ȩnä̧ mikuäu jü̧nä̧ topinü̧; jua'amä̧ Dio i̧yä̧kuȩ u̧wo̧jua̧'a̧ttü̧.

²⁷ A̧'kua̧ u̧wȩnä̧ra̧'a̧ttü̧, Moisé-mä̧ Egito-ttümä̧ rä'opächinü̧, ru̧wa̧ ü̧ra̧wä̧rü̧'i̧nä̧ yekuoka'a; jua'amä̧ Uwäpokürü totta'a 'kua̧rü̧nä̧ to̧pä̧rü̧ ü̧ji̧na̧'a̧ttü̧.

²⁸ A̧'kua̧ u̧wȩnä̧ra̧'a̧ttü̧, Moisé-mä̧ Pacua pä'käri jȩpü̧, äpatiyänä̧ ttukuoja tuttepe'a pä'ü we'inü̧, jua'amä̧ Irae ttü̧ja̧ tti̧tti̧mü̧ ä̧kuo̧mȩnä̧ isotürü, wa'are i̧sa̧ á̧gȩ mȩü̧ juiya pä'ü.

²⁹ Tta̧'kua̧ ttu̧wȩnä̧ro̧mȩttü̧, Irae ttü̧ja̧mä̧ rü̧ä̧ dubora Mar Rojo pä'ü mikuora 'kuä'opinä̧tü̧, rȩjȩ joünä̧tä̧ päi'a'attü; ja̧'wa̧nü̧ 'kuätto'i̧yä̧u̧, Egito ttü̧ja̧'i̧nä̧ 'kuäto'äkuotüjä̧kü̧ pä'ü 'kuätto'omȩnä̧ a̧'ä̧kuä̧u̧ ikuinä̧tü̧.

³⁰ Tta̧'kua̧ ttu̧wȩnä̧ra̧'a̧ttü̧, Jericó ütawiyä jäyänä̧ ttoekuä̧rü̧ o'kamä̧ ma̧ä̧chi̧na̧'a̧, kko̧ro̧mü̧ttü̧nü̧ todäre mo̧ro̧ päi'ünä̧ ttüjäräwomȩnä̧.

³¹ Kka̧'kua̧ kku̧wȩnä̧ra̧'a̧ttü̧, u̧mä̧tu̧ku̧ ä'ä'chäkuäwä isaju, Rahab-mä̧, ukuotokotükumä̧ to'e'ächokoju pinä̧ju̧, yä̧wȩi̧nä̧ weinä̧u̧ru̧ do'ädü ppäjädina̧'a̧ttü̧.

³² ¿Jua'a yabonü̧mä̧ ti̧yȩtä̧ jidäu'anü̧ttü̧? juiyo rekuächi'ü'anü̧ ja̧'a̧, Gedeón-rü̧'i̧nä̧, Barac-rü'i̧nä̧, Sansón-rü̧'i̧nä̧, Jefté-rü'i̧nä̧, Dawi-rü'i̧nä̧, Samue-rü̧'i̧nä̧ ja̧'wa̧ta̧nü̧ profeta-tü̧rü̧'i̧nä̧ ttütü'kü chukuokuttümä̧.

³³ Tta̧'kua̧ wȩnä̧rä̧tü̧mä̧, kkorotü tti̧rȩji̧yä'i̧nä̧ 'cho'ipinä̧tü̧, adiwäjuei'i̧nä̧ jȩpü̧ ppä'ädinä̧tü̧, Dio chi̧yä̧kua̧sä̧ päinü̧'i̧nä̧ ȩmi̧nä̧tü̧, jojochäyu̧tu̧ ttä'i̧nä̧ mü̧'ȩpi̧nä̧tü̧,

³⁴ okurä rü̧a̧rä'i̧nä̧ na̧'ȩpi̧nä̧tü̧, kurodänä̧ kuä'ü ttikua pättä'a'i̧nä̧ kki̧'i̧pinä̧tü̧, ttijuiyuwomettü̧'i̧nä̧ ttujuru ichinä̧u̧, kurättü'i̧nä̧ iso juo'epinä̧tü̧, taboiyotü dü'eku tti̧wuö̧nä̧.

³⁵ Kkorotü nä̧tü̧mä̧ ttawaruwä 'korujuo'ächinä̧tü̧rü̧mä̧, pä'äjita'anü̧ tta̧'kua̧ri̧'i̧ni̧yä̧u̧. Kkorotümä̧ ubara ttu'utä 'korujuo'ächinä̧tü̧, ppättädatü pättoka'atä, jua'amä̧ rü̧ȩnä̧ adiwäjuei kkä̧kuä̧wä̧nä̧ ttottächa pä'ü.

³⁶ Kkorotümä̧ ya̧'a̧wä̧'chü̧ kuäkuättinä̧u̧, kä̧rȩnä̧sa̧nä̧ nü'kä̧rü̧, kärenä̧ ttütä'chinä̧u̧.

³⁷ Kkorotümä̧ inä̧dunä̧ ikuäu kuä'ü ttikuä̧u̧'i̧nä̧, kkä'kotünä ro'ü ttikuä̧u̧'i̧nä̧, kurodänä̧ kuä'ü ttikuä̧u̧'i̧nä̧ 'korujuo'ächinä̧tü̧; oweja-tü'i̧nä̧, cabra-tü̧'i̧nä̧ tti̧jȩti̧yu̧ttü̧ adikuä 'ka̧tä̧u̧ kue'ächinä̧tü̧; usurä ȩmä̧u̧, ajuäkuäu, kuäkuäpü jȩttä̧u̧.

³⁸ Pitü ttü̧ja̧mä̧, pi̧jä̧ttü̧mä̧ ttü̧ja̧kua̧ pä'ü'i̧nä̧ weyekuinä̧u̧, rȩbi̧yu̧ dȩ'a̧ra̧'a̧tä̧, idoriyänä̧tä̧, müä'kiyunä̧tä̧, idoriyä sasaäkuäwänä̧tä̧ kue'ächü kka̧kui̧nä̧tü̧, ttü̧jä̧mä̧do̧mȩ juiyünä̧.

³⁹ Juätü o'katoi'ünä̧ tta̧'kua̧ ttu̧wȩnä̧ra̧'a̧ttü̧, adiu ttukuotünä̧ rȩbȩä̧kuä̧wi̧nä̧tü̧ ja̧'wa̧nü̧ ja̧'a̧nä̧ Dio iya päinü̧mä̧ po̧kui̧po̧ko̧tü̧ pinä̧tü̧;

⁴⁰ jua'amä̧ Dio-mä̧, abonä̧nü̧ adiwä juei ujuturu iya pä'ü jȩpü̧ u̧ju̧ni̧na̧'a̧ttü̧, ujututäkutä yo̧mȩtȩnä̧ surojü jui'ätü päi'ünä̧ jo̧mȩnü̧tä̧ jȩa̧tü̧ pä'ü.