Hebreos 10 - Nuevo Testamento Uwotjüja

Täbokü weäwä wȩnȩ ji̧nü̧mä̧ ppädokü ji̧nü̧

¹ Isopäi'ünä̧ Moisé weinü̧ wȩnȩ ji̧nü̧mä̧, suro kkoro adiwä juei a̧'kua̧juä̧ yodoji i̧chä̧kuȩtä̧ ji̧na̧'a̧, ji̧nä̧so ji̧yȩtä̧ i̧chä̧kuȩmä̧kü̧. Ja̧'wa̧nü̧ ja̧'a̧ttü̧ weäwä wȩnȩnä̧mä̧, 'kuäopünä̧ año jü̧ta̧'a̧nü̧ Dio-rü sacrificio pättü jȩtta̧'a̧nä̧ jo̧mȩnü̧mä̧ adiwächokotü pinä̧tü̧.

² Weäwä wȩnȩ tukuotomȩnä̧ ujutu suronä̧ jȩtä̧'i̧jü̧ tükü ikuttümä̧, suronä̧ jȩtä̧'i̧jü̧ ppa̧'a̧dä̧rü̧ amükuädümä̧, Dio-rümä̧ sacrificio pättümä̧ jȩpä̧'cho̧ko̧tü̧ pa̧ja̧tü̧jä̧.

³ Ja̧'wa̧nü̧ ja̧'a̧ttü̧, jua̧u̧ sacrificio jȩtto̧mȩnä̧mä̧ kkoro año jü̧ta̧'a̧nü̧ suronä̧ jȩttä̧'i̧jü̧tä̧ tamükuädünä̧ ji̧na̧'a̧.

⁴ Isopäi'ünä̧ pä̧kä̧yü̧'i̧nä̧, chiwotü̧'i̧nä̧ ttukuojamä̧ suronä̧ jȩttä̧'i̧jü̧mä̧ jȩpü̧ ikuoka'a ji̧na̧'a̧.

Crito, sacrificio pättünä̧ 'kuäopinü̧ wȩnȩ

⁵ Ja̧'wa̧nü̧ ja̧'a̧ttü̧ Crito-mä̧, pi̧jä̧ra̧'a̧ ichinü̧, Dio-rü päinü̧mä̧ pä'a: Sacrificio jü̧nä̧, ofrenda jü̧nä̧, jȩttü̧mä̧ kkü'kü jui'ü, ttü chidepä kkü̧nä̧ iyinü̧jä̧.

⁶ I̧sa̧rü̧ kkuwü iku jȩtti̧nü̧'i̧nä̧, ofrenda pättü jȩtti̧nü̧'i̧nä̧ kuesewuö juiyünä̧ ji̧nä̧ku̧jä̧.

⁷ Ja̧'wa̧nü̧ ji̧yä̧ku̧ pä'inü̧sä̧: Ttü chütü'kü wȩyu̧kui̧nü̧ta'anü̧, «Ichüsä Dio, ukuru pä̧wä̧rü̧jü̧ jȩcha̧ pä'ü.»

⁸ Ä̧kuo̧mȩnä̧mä̧ päina̧'a̧, Dio-mä̧ sacrificio pättü'i̧nä̧, äjikuäkuäwotürü ofrenda jü̧nä̧ iyäwä'i̧nä̧, suronä̧ jȩttä̧'i̧jü̧ mikuäwächünä̧mä̧ eseunu̧mä̧ kkü'kokü pinü̧jä̧, weäwä wȩnȩ pä'akumä̧ jȩtta̧'a̧nä̧.

⁹ Jua̧u̧ o'ka'a yabonü̧ pä'a: «Ichüsä Dio, ukuru pä̧wä̧rü̧jü̧tä̧ jȩcha̧ pä'ü,» ja̧'wa̧nü̧ ja̧'a̧ttü̧ ä̧kuo̧mȩnä̧ esekuinü̧ jä̧ji̧mä̧, si'epü iku pärokuä, juȩnȩ o'komȩnä̧ esekuinü̧ jä̧ji̧tä̧ jo̧mȩnü̧ jȩpü̧ kku̧ni̧nü̧.

¹⁰ Jua̧u̧nä̧tä̧ Dio-rü pä̧wä̧rü̧ji̧nü̧nä̧ surojümä̧ jo̧mȩnü̧ jȩpü̧ ikuinä̧u̧jä̧, Jesucrito idepä jä̧ttä̧pä̧ya̧, ofrenda jü̧nä̧ ya'utenä̧tä̧ ji̧nü̧mä̧, 'kuäopünä̧tä̧ mikuäunä̧ jȩpü̧ kku̧ni̧nü̧.

¹¹ Isopäi'ünä̧ sacerdote-tü̧ judío-mä̧ mo̧ro̧ ji̧nü̧ a̧'u̧kuä̧ sacrificio pättü jȩpi̧nä̧tü̧, suronä̧ jȩttü̧mä̧ jȩpü̧ ikuokü ja̧'a̧nä̧.

¹² Ja̧'wa̧nü̧ ji̧na̧'a̧nä̧, Jesucrito-mä̧, suronä̧ jȩttä̧'i̧jü̧ jȩpü̧ ikunä̧mä̧, suro ya'utenä̧tä̧ jȩpi̧nü̧, sacrificio pättümä̧ 'kuäopünä̧tä̧ mikuäunä̧; ja̧'wa̧nü̧ jȩpü̧ Dio u̧wo̧jua̧'a̧ku̧nä̧ pä̧mä̧di̧nü̧.

¹³ Juȩnȩtä̧ tta̧'a̧rü̧ kkü̧, aboiyotürü ü̧jä̧pü̧ dȩa̧'a̧ rütäwächomȩbü päi'ünä̧,

¹⁴ ja̧'wa̧nü̧ ja̧'a̧ttü̧ ofrenda pättümä̧, ji̧yȩtȩtä̧ jȩa̧'a̧nä̧, 'kuäopünä̧tä̧ jo̧mȩnü̧ mikuäwächünä̧ jȩpi̧nü̧.

¹⁵ Ja̧'wa̧ta̧nü̧ Epíritu Sa̧tu̧mä̧ pä'inü̧:

¹⁶ «Ji̧yȩnü̧ mo̧ro̧ jü̧ o'ka'a juätuku chesekuä̧kuȩmä̧, pi̧yȩ ja̧'a̧, pä'ü Tu̧ru̧wa̧mä̧: Ttü wedümä̧ tta̧mi̧ iso'kinä̧ chu̧ju̧nä̧kua̧sä̧ ja̧'wa̧ta̧nü̧ tta̧mü̧kuädü jakuänä̧'i̧nä̧ chu̧ju̧nä̧kua̧sä̧.

¹⁷ Yabonä̧ pä'a: Ja̧'wa̧ta̧nü̧ suronä̧ jȩttä̧'i̧jü̧'i̧nä̧, ttukuotokü jä̧'i̧jü̧'i̧nä̧ yabonü̧mä̧ amükuädokü chä̧kua̧sä̧.»

¹⁸ Ja̧'wa̧nü̧ ja̧'a̧ttü̧, suronä̧ jȩttä̧'i̧jü̧ jȩä̧cho̧mȩnä̧mä̧, suronä̧ jȩttä̧'i̧jü̧ mikuä yabonü̧ ofrenda jȩtta̧ pä'ümä̧ juiya'a.

Dio-ku 'kiyünä̧ kkä̧kuä̧wä̧ wȩnȩ

¹⁹ Ja̧'wa̧nü̧ ji̧na̧'a̧ttü̧, chawaruwä chü̧jä̧wa̧tü̧, Surojü Juiyomȩ pättomȩ dotächa pä'ü jo̧mȩnü̧ wotüjä̧, Jesucrito ukuoja jinoyanä̧mä̧.

²⁰ Jesú 'korujuoächomȩnä̧, Dio-rü ukuokuäwodenä̧ 'kuätto'ü juiyünä̧ tto̧ȩpä̧rä̧ta̧ ba'epinü̧, idepänä̧tä̧.

²¹ Ja̧'wa̧nü̧ ji̧na̧'a̧ttü̧ sacerdote-tü̧ ttu̧ru̧wa̧ ukuo i̧sa̧rü̧ kku̧nä̧rä̧tü̧jä̧, Dio ojusodenä̧mä̧.

²² Ja̧'wa̧nü̧ ji̧na̧'a̧ttü̧, tütü'küwächätukua Dio-rümä̧ tamiso'kinä̧ jueünä̧tä̧ amükuädü, jo̧mȩnü̧tä̧ tta̧'kua̧ wȩnä̧rü̧, surojü juiyünä̧ adiunä̧tä̧ amükuädünü̧ tamiso'kinä̧mä̧ ja̧'wa̧ta̧nü̧ jättäpäyotü ajiya päkuoyanä tükäu ikuipü.

²³ Käkuädi'ätukuoka'a kka̧kuä̧tu̧kui̧ kua̧'kua̧ wȩnä̧rü̧nü̧ Tesetinü̧ pätünä̧mä̧, isopäi'ünä̧ Dio ujuturu iya päinü̧mä̧, i̧yä̧kua̧.

²⁴ Yotukunä̧ repe'äkuäwätukui, eseäkuäwä yabonü̧ rü̧ä̧chü̧nä̧ adiu ppä'ädäkuäu jȩ'kuä̧tu̧ku̧nä̧.

²⁵ Ka̧ka̧kuä̧rü̧ jȩpä̧tu̧kui̧, kkorotü jȩpü̧ weyejuottinü̧'a̧nü̧mä̧ ku̧ka̧ka̧kuä̧rä̧tu̧kuo̧ka̧'a̧mä̧ jȩ'kuä̧'chä̧tu̧kuä̧, ji'äkuäu wo̧juȩtü̧ jȩpä̧tu̧kui̧; Tu̧ru̧wa̧ u̧mo̧ro̧mä̧, täkü tü'kü ja̧'a̧.

²⁶ Isopäi'ünä̧, jo̧mȩnü̧ jueü wȩnȩ wo̧jui̧'i̧nü̧'kotü, ujuturu pä̧wä̧rü̧jo̧mȩnä̧ surojü jȩto̧mȩnä̧mä̧, sacrificio pättü jȩto̧mȩnä̧dä̧jä̧, Dio-mä̧ surojümä̧ jȩpü̧ ikuoko̧u̧jä̧;

²⁷ suro, ji̧yȩtȩtä̧ kki̧'a̧'a̧, rü̧ȩnä̧ yeteku ro̧ȩkuä̧kuȩtä̧ ja̧'wa̧ta̧nü̧, Dio aboiyotürü okurä rü̧a̧ränä̧ si'epü i̧kuä̧kuȩtä̧.

²⁸ Moisé weinü̧ wȩnȩnä̧mä̧: ya̧tȩ ukuotoka'a jä̧ja̧'a̧, ta̧ju̧ jo̧mȩnä̧, wä̧mȩtukuä jo̧mȩnä̧ totti'äjittümä̧; jua̧u̧ suronä̧ jȩpä̧ji̧rü̧mä̧ jȩä̧kuä̧wä̧ juiyünä̧tä̧ kuä'ü ttikuarü pä'ü ja̧'a̧, rȩrü̧jü̧ toäkuäwä juiyünä̧tä̧.

²⁹ Juȩnȩ abonä̧nü̧ ¿tta̧'a̧nü̧ rü̧ȩnä̧ ro̧ȩkuä̧kua̧'a̧ päkuätukua'ajä̧ttü̧ Dio I̧tti̧ ukuoja kkü'kü jui'ü 'kuȩ'ku̧ru̧mä̧ ja̧'wa̧ta̧nü̧ Dio i̧sa̧ Epíritu repeäkuru suronä̧ pä'ürümä̧?

³⁰ Ja̧'wa̧ta̧nü̧ pa̧'a̧nü̧ pä'inü̧rü̧mä̧ wo̧juä̧tü̧jä̧: «Ttü ja̧'a̧, suronä̧ jȩpü̧rü̧ mikuä jȩchä̧kua̧mä̧, ttü ja̧'a̧ chi̧mi̧tä̧kua̧mä̧» ja̧'wa̧ta̧nü̧ pä'inü̧: Tu̧ru̧wa̧mä̧ u̧mü̧wä̧yotürü adiwomȩnä̧ pä̧kua̧.

³¹ ¡Rü̧ȩnä̧ ra̧wä̧pi̧ja̧'a̧, a̧'kua̧rü̧ Dio u̧mü̧nä̧ ma̧ttä̧mo̧mȩnä̧!

³² Ja̧'wa̧nü̧ ja̧'a̧nä̧, ukutumä̧ amükuädätukui ji̧yȩnü̧ mo̧ro̧, tȩya̧u̧ ȩmä̧jä̧'kotümä̧ rü̧ȩnä̧ usurä kuȩmä̧wä̧tu̧kua̧'a̧nä̧ kujuruku 'kuä'opinä̧tü̧jä̧.

³³ Ukututtü yotukunä̧mä̧, ttü̧ja̧ ttä'ka jo̧mȩttü̧ suronä̧ wopü'i̧nä̧, kuäkuäpü'i̧nä̧ jȩtti̧nä̧u̧; ja̧'wa̧ta̧nü̧ kkorotümä̧ ja̧'wa̧nü̧ jȩttä̧u̧ usurä ȩmä̧wä̧tu̧ku̧ ppä'ächi'inä̧tü̧jä̧.

³⁴ Ja̧'wa̧ta̧nü̧ re kki̧nä̧tü̧jä̧ kärenä̧ pȩjä̧tü̧rü̧; ja̧'wa̧ta̧nü̧ kuiäretuku 'chottipe'a'anä̧'i̧nä̧ eseunu̧ 'kuä'opinä̧tü̧jä̧, mo̧ro̧jä̧ra̧'a̧mä̧ juȩnȩ obonä̧nü̧ adiu'i̧nä̧, toe'ächokü'i̧nä̧ tiäremä̧ kku̧nä̧rä̧tü̧jä̧ päkuätukua'attü̧.

³⁵ Ja̧'wa̧nü̧ ja̧'a̧ttü̧, Dio-rü kua̧'kua̧ ku̧wȩnä̧rä̧tu̧ku̧mä̧ käkuädi'ätukuä, jua̧u̧ mikuämä̧ kuȩmä̧kuo̧tü̧jä̧.

³⁶ Isopäi'ünä̧ rekuo ja̧'a̧nä̧ kua̧mi̧ 'ki'ächi'ü tta̧'a̧rä̧tu̧kui̧, Dio-rü pä̧wä̧rü̧jü̧ jȩpü̧ kä'ädi'ü'kotü, iya päinü̧ kuȩmä̧tu̧kuä̧kua̧'a̧nü̧.

³⁷ Wȩyu̧kuä̧ wȩnȩmä̧ pä'a: Isopäi'ünä̧ a̧'u̧kua̧'a̧tä̧ ja̧'a̧nä̧, icha pä'inü̧mä̧, i̧chä̧kua̧. Rekuomä̧ to'epokü jä̧kua̧.

³⁸ Ja̧'wa̧nü̧ ja̧'a̧ttü̧, adiwä jueinä̧ jȩpü̧ kkü̧mä̧, tta̧'kua̧ wȩnä̧rä̧kuä̧wä̧nä̧tä̧ ü̧jä̧kua̧; ja̧'wa̧nü̧ ja̧'a̧nä̧ o'ka'aku ppa̧'a̧chä̧chü̧rü̧mä̧, cha̧'kua̧rü̧ esewoka'a jä̧kua̧'a̧.

³⁹ Ja̧'wa̧nü̧ ja̧'a̧ttü̧ ujutumä̧ tto'ka'aku ppa̧'ä̧chü̧ toe'ächäkuäwä isotümä̧kü̧jä̧ ja̧'wa̧nü̧ ja̧jü̧ jueimä̧ ta̧'kua̧ wȩnä̧rü̧, ta̧'kua̧rü̧ kki̧'i̧kuä̧ isotüjä̧.