Hebreos 1 - Nuevo Testamento Uwotjüja

Dio-mä̧ i̧tti̧nä̧ ukuokuinü̧

¹ Mo̧ täbokütä päi'ünä̧ Dio-mä̧ tü̧tä̧mü̧ mi̧nä̧rü̧mä̧, profeta-nä̧'i̧nä̧, kkoro jueinä̧'i̧nä̧, rü̧ȩnä̧ ukuokuinü̧'ka̧.

² Jitä rüjí mo̧ro̧mä̧, Dio-mä̧ I̧tti̧nä̧tä̧ ukuokuinä̧u̧jä̧. Jua'amä̧ o'kajuiyünä̧tä̧ jua̧u̧ I̧tti̧nä̧tä̧ aditina̧'a̧ttü̧; o'kajuiyünä̧ u̧ru̧wa̧ päi'ünä̧ jȩpü̧ kku̧nu̧, Jua̧u̧ru̧mä̧.

³ Jua̧u̧tä̧ ja̧'a̧, i̧wȩnȩ ujurunä̧nä̧tä̧ 'chü̧ä̧rä̧kuä̧wä̧ i̧sa̧, uruwo kkȩdȩpa̧mä̧, ja̧'wa̧ta̧nü̧ Dio a̧'kua̧juä̧mä̧. Jua̧u̧mä̧ suronä̧ jȩtü̧ tükü ikuinü̧ o'ka'amä̧, mo̧ro̧jä̧nä̧ pä̧mä̧di̧nü̧, Dio uruwo dȩä̧kä̧ u̧wo̧jua̧'a̧ku̧nä̧.

⁴ Á̧gȩrȩ-rü ttu̧wä̧mȩnä̧ päi'ünä̧ jȩpü̧ kku̧nu̧, i̧mi̧'i̧nä̧ juätü abonä̧nü̧ ukuo i̧sa̧ päi'ünä̧ Dio-mä̧ iyinä̧ku̧.

⁵ Isopäi'ünä̧, Dio jua̧u̧ru̧ päinü̧'a̧nü̧ á̧gȩrȩ-ttü̧ päinä̧ku̧mä̧ ¿Ditä jä̧ttü̧?, Jua̧u̧ru̧mä̧ pä'inü̧: «Ukumä̧ ttü chi̧tti̧jä̧; jitä mo̧ro̧ chuwäbe'äkujä̧.» Ja̧'wa̧nü̧ pä'ü kkä̧nü̧ päinä̧ku̧: «Ttümä̧, jua̧u̧mä̧ Jä'o chä̧kua̧sä̧, ja̧'wa̧ta̧nü̧ jua̧u̧mä̧ ttü chi̧tti̧ jä̧kua̧», jü̧nä̧.

⁶ Ja̧'wa̧ta̧nü̧, Dio i̧tti̧ ä̧kuo̧mȩnä̧ i̧sa̧rü̧ pi̧jä̧ra̧'a̧ we'ümä̧ pä'inü̧: «O'katoi'ünä̧ chumüwäyotü A̧gȩrȩ-mä̧ kuiwe'kiyunä̧ kkä̧mä̧dü̧ esewätukuirü.»

⁷ Ja̧'wa̧ta̧nü̧ á̧gȩrȩ ttütü'kümä̧, pä'inü̧: «Ttü chumüwäyotü A̧gȩrȩ-mä̧ isoppa ja̧'a̧, ja̧'wa̧ta̧nü̧ wedü aditätümä̧ ku'upä ürou ja̧'a̧.»

⁸ Ja̧'wa̧nü̧ ja̧'a̧nä̧ I̧tti̧ ütü'kümä̧ pä'inü̧: «Uku kuruwomä̧ beipokü jä̧kuȩ, ja̧'wa̧ta̧nü̧ kujurumä̧ adiwomȩnä̧tä̧ wȩkuä̧kua̧jä̧.»

⁹ «Adiwomȩnä̧ jȩä̧kuä̧wä̧tä̧ esewinü̧jä̧, surojümä̧ kkü'kokü pinü̧jä̧; ja̧'wa̧nü̧ jo̧mȩnä̧ Dio-mä̧, pojopü ȩmi̧nä̧ku̧jä̧, kuä'o Dio jü̧nä̧, eseäkuäwä iyinä̧ku̧jä̧, kuawaruwättü'i̧nä̧ abonä̧nü̧.»

¹⁰ Ja̧'wa̧ta̧nü̧ ji̧na̧'a̧ttü̧: «Ukutäjä̧, Chu̧ru̧wa̧, ä̧kuo̧mȩnä̧ttü̧tä̧ päi'ünä̧ pi̧jä̧ aditinü̧mä̧; ja̧'wa̧ta̧nü̧ mo̧ro̧jä̧'i̧nä̧ aditinü̧mä̧ ukutäjä̧.

¹¹ Ja̧'wa̧nü̧ ja̧'a̧nä̧, jua̧u̧ kuaditinü̧mä̧ beipächä̧kuȩ, ukumä̧ 'kuäopünä̧tä̧ ku̧jä̧kua̧jä̧. Jua̧u̧mä̧ o'kajuiyünä̧tä̧ büäkuächä̧kuȩ, pü̧jä̧ta̧ 'kua̧rü̧nä̧.

¹² Ja̧'wa̧ta̧nü̧ pü̧jä̧ta̧ ttü̧to̧rä̧da̧'a̧ 'kua̧rü̧nä̧ to̧rä̧cha̧'a̧nä̧, ja̧'wa̧ta̧nü̧ pü̧jä̧ta̧ 'kua̧rü̧nä̧ pärowächa'anä̧, Ukumä̧ 'kuäopünä̧tä̧ kkü̧jä̧; kua̧'kua̧rü̧mä̧ beipokü jä̧kuȩ.»

¹³ Ja̧'wa̧ta̧nü̧ Jua̧u̧ru̧ päinü̧'a̧nü̧ á̧gȩrȩ-ttü̧ päinä̧ku̧mä̧ ¿Ditä jä̧ttü̧?: «Chu̧wo̧jua̧'a̧ku̧nä̧ pä̧mä̧di̧, kuaboiyotürü ku̧jä̧pü̧ dȩa̧'a̧ku̧ päi'ünä̧, Ttü kkȩdü̧ chikuomȩbü päi'ünä̧.»

¹⁴ Isopäi'ünä̧ A̧gȩrȩ-mä̧ o'katoi'ünä̧tä̧ Dio umüwäyotü uwäpokotü ja̧'a̧, surojü ra̧wä̧pi̧jü̧ttü̧ kki̧'ä̧tü̧ o'katoi'ünä̧rü̧ ppättäda pä'ü Dio wȩä̧u̧.