Gálatas 6 - Nuevo Testamento Uwotjüja

Kkorotüku ppä'ädäkuäu kka̧kuä̧tu̧kui̧

¹ Chawaruwä chi̧jä̧wa̧tü̧, ya̧tȩ surojü jȩä̧ja̧'a̧ ttü̧'o̧kui̧'ü̧ttü̧mä̧, ukutu Epíritu jäwänä̧ kka̧kuä̧tü̧tä̧ ro̧'ȩpä̧tu̧kui̧ diyawäyänä̧. Ukututä'i̧nä̧ tta̧'ä̧rä̧kuä̧u̧ kka̧kuä̧tu̧kui̧, kua̧mi̧ 'kuä'ü ma̧kuä̧chä̧tu̧ku̧ a̧'kua̧ra̧'a̧.

² Ya̧tȩ ȩpü̧mä̧, kkorotü'i̧nä̧ ppä'ädäkuäu ȩpä̧tu̧kui̧, ja̧'wa̧nü̧ jȩpü̧tä̧ Crito aditinü̧mä̧ kuaditäkuotüjä̧.

³ Ya̧tȩ, uruwo jui̧'a̧ kkä̧nü̧ ukuo teäwomȩnä̧mä̧, a̧mü̧nä̧ pa̧ja̧tü̧tä̧ yaparewäkuäu.

⁴ Ya̧ku̧nä̧ jȩpü̧ ku̧ja̧kuä̧tu̧ku̧mä̧, kua̧mü̧nä̧ pa̧ja̧tü̧tä̧ kka̧mü̧nä̧ topäkuäwätukui.

⁵ Ja̧'wa̧nü̧ ja̧'a̧ttü̧ yotukunä̧ jitürütä ä̧mä̧kü̧mä̧ ttȩpa̧ pä'ü ja̧'a̧.

⁶ Ya̧tȩ wo̧jui̧kuä̧ i̧sa̧ Dio i̧wȩnȩ wo̧jui̧pü̧mä̧, wo̧juȩtü̧rü̧ o'kajuiyünä̧ adiumä̧ iya pä'ü ja̧'a̧.

⁷ Kua̧mü̧nä̧mä̧ kuyapareäkuäwätukuä, Dio-rü ya̧'a̧wä̧'chü̧mä̧ ya̧tȩ'i̧nä̧ toa'a. Isopäi'ünä̧ yotukunä̧ tu̧ju̧nä̧ji̧tä̧, ȩmä̧tü̧jä̧ u̧wä̧ju̧mä̧.

⁸ Idepänä̧ jäwänä̧ kku̧nu̧mä̧, idepättümä̧ surojütä ȩmä̧kua̧, Epíritu jäwänä̧ kku̧nu̧mä̧, Epíritu-ttü kkä̧kuä̧wä̧ i'ko ȩmä̧kua̧.

⁹ Ja̧'wa̧nü̧ ja̧'a̧ttü̧ adiwä juei jȩpü̧mä̧ 'kuäkuächi'ätukuä; isopäi'ünä̧ tijuiyuwächi'oka'a jü̧ttü̧mä̧, ji̧yȩtä̧ mo̧ro̧ päi'omȩnä̧ u̧wä̧ju̧ tȩmä̧kuo̧tü̧jä̧.

¹⁰ Ja̧'wa̧nü̧ ja̧'a̧ttü̧, o'katoi'ünä̧rü̧ adiu jȩtü̧'a̧nü̧ jü̧ttü̧mä̧, adiu jȩta̧ pä'ü ja̧'a̧, ja̧'wa̧nü̧ ja̧'a̧nä̧ ji̧nä̧somä̧ tawaruwä ti̧jä̧wa̧tü̧ Crito esetärütä.

Teäwi'inü̧ wȩnȩ

¹¹ ¡Amükuädätukui! cha̧mü̧nä̧ pa̧ja̧tü̧, chu̧mü̧nä̧, wȩyu̧kuä̧mä̧ bäreunä̧ chi̧wȩyu̧tä̧u̧jä̧.

¹² Circuncisión pättü, jȩttä̧kuä̧wa̧ pä'ü wȩ'ä̧rä̧tü̧mä̧, ttü̧ja̧ku̧ adiunä̧ ttü̧ja̧kui̧'a̧ pä'ütä jȩpä̧tü̧, Crito ü̧jo̧kä̧ jäinä̧ 'korujuoächinü̧ jäwänä̧ kuä'äu ttikua pä̧ttä̧u̧ usurä ttȩmä̧u̧ juiya pä'ü.

¹³ Juätü circuncisión pättü jȩpä̧kuä̧wo̧tü̧'i̧nä̧ o'kajuiyünä̧ weäwä wȩnȩ päü'a̧nü̧mä̧ jȩpo̧ko̧tü̧. Ja̧'wa̧nü̧ ja̧'a̧nä̧ ukuturutä circuncisión jȩ'kui̧yä̧tu̧kua̧tü̧ pä'ätü, wȩti̧nä̧u̧ pä'ü topü tteseäkuäwa pä'ü.

¹⁴ Ja̧'wa̧nü̧ ja̧'a̧nä̧ ttümä̧, chesewä̧kua̧sä̧ Jesucrito 'korujuo'ächü i̧mi̧täwinü̧tä̧ esetü kkä̧nü̧. Ja̧'wa̧nü̧ ja̧'a̧ttü̧ Crito 'korujuoächinü̧nä̧tä̧ eseusä, pi̧jä̧ ttü̧ja̧ tta̧mü̧kuädümä̧ wä̧i̧nä̧ ja̧'a̧, pi̧jä̧nä̧mä̧ wa'ü chikuina̧'a̧ 'kua̧rü̧nä̧tä̧ jä̧ku̧sä̧.

¹⁵ Isopäi'ünä̧ circuncisión jȩtta̧ja̧ pä'ü'i̧nä̧, jȩttü̧ juiyaja pä'ü'i̧nä̧ mikuäwoka'a; ji̧nä̧somä̧ pärokuänä̧ ttuwäpächütä ja̧'a̧ mikuäumä̧.

¹⁶ Ja̧'wa̧nü̧ ja̧'a̧ttü̧, o'katoi'ünä̧ pi̧yȩ päü'anü̧ kka̧kuä̧tü̧mä̧, rȩrü̧jü̧ toinü̧nä̧, wȩnȩ juiyü eseäkuäwä̧nä̧ kka̧kuä̧tü̧, ja̧'wa̧ta̧nü̧ o'katoi'ünä̧ Dio i̧tti̧mü̧ irae ttü̧ja̧'i̧nä̧.

¹⁷ Jitä yabokumä̧, ya̧tȩ'i̧nä̧ suronä̧ jȩtta̧ttü̧mä̧ pä'oküsä; chidepänä̧mä̧ Jesú usurä ȩmä̧wi̧nü̧ rü̧tä̧rü̧sä̧.

¹⁸ Chawaruwä chi̧jä̧wa̧tü̧, Tu̧ru̧wa̧ Jesucrito ppädümä̧ o'katoi'ünä̧rü̧ kua̧'kua̧rä̧tu̧ku̧nä̧ kkä̧tu̧kua̧ku̧ pä'üsä. Amȩ́.