Gálatas 5 - Nuevo Testamento Uwotjüja

'Chu̧ä̧rinü̧ttü̧mä̧ Crito-nä̧tä̧ rä'epü ikuinä̧u̧jä̧

¹ Crito rä'epü ikuinü̧nä̧tä̧, 'kiyünä̧ kka̧kuä̧tu̧kui̧, pä'äjita'anü̧mä̧ weäwä wȩnȩ kkȩdä̧ra̧'a̧ku̧mä̧ ku̧ja̧kuä̧tu̧kuä̧.

² Ttü Pauru pädü ä̧ju̧kuä̧tu̧kui̧: isopäi'ünä̧ circuncisión pättü jȩpä̧kuä̧wä̧tü̧rü̧mä̧, Crito i̧mi̧täwinü̧mä̧ mikuäwokü ja̧'a̧.

³ Pä'äjita'anü̧ pädäu̧jä̧: o'katoi'ünä̧ circuncisión pättü jȩpä̧kuä̧wä̧tü̧mä̧ weäwä wȩnȩ päümä̧ o'kajuiyünä̧tä̧ ttukuota pä'ü ja̧'a̧.

⁴ Jitü, Dio ȩma̧tü̧ pä'ü weäwä wȩnȩ jȩpä̧tü̧mä̧, Crito rȩrü̧jü̧ topü ppädinü̧ kkü'kü jui'ü, jua̧u̧ttü̧mä̧ rä'ekuächätü.

⁵ Ja̧'wa̧nü̧ ja̧'a̧nä̧, ujutumä̧ Epíritu jueünä̧ jiäwä̧u̧jä̧, Crito-nä̧ Dio ujuturu ȩma̧'a̧mä̧.

⁶ Isopäi'ünä̧ Crito-nä̧ kkä̧kuä̧wä̧mä̧, circuncisión pättü jȩ'kuä̧kuä̧wa̧ja̧ pä'ü'i̧nä̧, jȩ'kuä̧kuä̧wuö̧ juiyaja pä'ü'i̧nä̧ mikuäwoka'a, ji̧nä̧somä̧ Crito-rü ta̧'kua̧ wȩnä̧rü̧ eseu jȩpü̧ tü̧jü̧tä̧ ja̧'a̧.

⁷ Ukutumä̧ adiunä̧tä̧ kui̧'chi̧nä̧tu̧kua̧'a̧mä̧, ¿Dí ji̧nä̧ttü̧ jueü wȩnȩnä̧ kui̧'chä̧tu̧ku̧ juiyünä̧ tto'epinü̧mä̧?

⁸ Ja̧'wa̧nü̧ kuesetätukunä̧ ttesekuinü̧mä̧, ukuturu wopinü̧ Dio jäwämä̧ jo̧ka̧'a̧.

⁹ «Levadura pättü jueimä̧ ji̧'ki̧cha̧nü̧tä̧ ja̧'a̧nä̧, pan isäwa jättäwatä ppü̧ä̧mi̧'ü̧nä̧ päia'a.»

¹⁰ Ttümä̧ Chu̧ru̧wa̧rü̧tä̧ cha̧'kua̧ wȩnä̧rü̧sä̧, ukuturumä̧ kkara'akumä̧ amükuädokotüjä̧ pä'ü; ja̧'wa̧nü̧ ja̧'a̧nä̧ ukuturu tto̧'ȩpä̧rü̧rü̧mä̧ Dio ro̧ȩpä̧kua̧, jȩpü̧rü̧mä̧.

¹¹ Chawaruwä chi̧jä̧wa̧tü̧, circuncisión pättü jȩttä̧kuä̧wa̧ pä'ü jidäwuttümä̧, chabo iyotümä̧ suronä̧ pä'ümä̧ ttusokoku pajüsä. Ja̧'wa̧ta̧nü̧ ü̧jo̧kä̧ jäinä̧ kkä̧nü̧ 'korupäi'inü̧ wȩnȩ tta̧mi̧ surunä̧ topokotü pa̧ja̧tü̧.

¹² Ja̧'wa̧nü̧ ja̧'a̧nä̧, ukuturu surojünä̧ ma̧kuä̧chä̧tu̧ku̧'a̧nü̧ jȩpä̧tü̧rü̧mä̧, circuncisión pättü jȩpä̧kuä̧u̧ kkä̧nü̧'i̧nä̧ ¡tta̧mü̧nä̧ pa̧ja̧tü̧ ya'utekutä 'kui'oku ttiku'anü̧ ja̧'a̧!

Weäwä wȩnȩmä̧ eseu repeäkuäwänä̧ ka̧ka̧kuä̧cha̧'a̧

¹³ Chawaruwä chi̧jä̧wa̧tü̧, 'chu̧ä̧rü̧ juiyünä̧ ku̧jä̧tu̧kua̧ pä'ü woinä̧u̧jä̧. Ja̧'wa̧nü̧ ja̧'a̧nä̧, jua̧u̧ 'chu̧ä̧ro̧kü̧nä̧ kkä̧nü̧mä̧ kuidepätuku wea'aku jȩpü̧ ku̧ja̧kuä̧tu̧kuä̧. Pärokuänä̧tä̧, yotukunä̧ eseu repe'äkuäutä kka̧kuä̧tu̧kui̧.

¹⁴ Isopäi'ünä̧ weäwä wȩnȩmä̧ o'kajuiyünä̧, pi̧yȩ ji̧yȩtȩnä̧tä̧ ka̧ka̧kuä̧cha̧'a̧: «Kuawaruwärümä̧, ya̧ku̧nä̧rü̧ eseu repe'ätukui, kua̧mü̧nä̧ pa̧ja̧tü̧ repekuäkuäuta'anü̧» jü̧nä̧.

¹⁵ Ja̧'wa̧nü̧ ja̧'a̧nä̧ yü̧yü̧pä̧kuä̧u̧, kurowäwätukuttümä̧, kua̧mü̧nä̧tä̧ kuä'äkuäu kuikuäkuotüjä̧.

Dio i̧sa̧, Epíritu üjü'komȩnä̧ kkä̧kuä̧wä̧ wȩnȩ

¹⁶ Ja̧'wa̧nü̧ ja̧'a̧ttü̧ pä'üsä: Dio i̧sa̧, Epíritu üjü'komȩnä̧tä̧ kka̧kuä̧tu̧kui̧, kuidepätuku kkü'kekunä̧mä̧ ku̧jä̧tu̧kuä̧.

¹⁷ Isopäi'ünä̧ kuidepätuku kkü'kekumä̧, Epíritu abo jäwä ja̧'a̧, ja̧'wa̧ta̧nü̧ Epíritumä̧, ttidepä kkü'keku a̧bo̧i̧ya̧ ja̧'a̧. Jua̧u̧ todärenä̧ jü̧mä̧ mi̧kuä̧ri̧yä̧kuä̧u̧ rowäwa'a, ukutu kuju'kätuku jȩ'kuä̧tu̧ku̧ juiyünä̧.

¹⁸ Ja̧'wa̧nü̧ ja̧'a̧nä̧, ukuturu Epíritu oipüttümä̧, täkü weäwä wȩnȩmä̧ wȩo̧ko̧u̧jä̧.

¹⁹ Ttidepä kkü'kekunä̧ kkä̧kuä̧wä̧mä̧, tottünä̧ i̧jȩkua̧'a̧: nä̧tü̧rü̧ jȩä̧'chä̧kuä̧wä̧, surojütä jȩä̧kuä̧wä̧, pä̧wä̧rü̧jü̧nä̧ eseu kkä̧kuä̧wä̧;

²⁰ tätäwä o'ka esetäkuäwä'i̧nä̧, märipänä̧ kkä̧kuä̧wä̧; kkü'käwokü'i̧nä̧, rowäkuäwä'i̧nä̧, ä'kuoyäkuäwä'i̧nä̧, pä̧i̧'i̧nä̧, tturuwonä̧ rowäkuäu, 'kȩ'ȩkuä̧chä̧'chü̧ jȩpü̧'i̧nä̧,

²¹ jui'ü ra̧wä̧rä̧kuä̧wä̧'i̧nä̧; tä̧mä̧'chä̧kuä̧wä̧'i̧nä̧, abo 'kuäo'ünä̧ kuäkuäwä'i̧nä̧, ja̧'wa̧ta̧nü̧ jü̧ kkoro jȩä̧'chä̧kuä̧wä̧'i̧nä̧. Mo̧ jidäwinü̧ta'anü̧, jitä'i̧nä̧ ji'äusä, jua̧u̧ jȩpä̧tü̧mä̧ ru̧wa̧ Dio weomȩmä̧ dodettokäkuotü.

²² Ja̧'wa̧nü̧ ja̧'a̧nä̧ Epíritumä̧ iyü, eseu repeäkuäwä, eseäkuäwä, wȩnȩ juiyü kkä̧kuä̧wä̧, jurunä̧ woäkuäwokü, adiwä i̧sa̧, ppädäkuäwä i̧sa̧, jueünä̧tä̧ ukuoku,

²³ ukuo te'äwokü, a̧mü̧nä̧ pa̧ja̧tü̧ 'chu'ädäkuäu; pi̧yȩ kko̧mȩnä̧mä̧ weäwä wȩnȩmä̧ juiya'a.

²⁴ Isopäi'ünä̧ Jesucrito-ku juo'ächinä̧tü̧mä̧, täkü ü̧jo̧kä̧ jäinä̧ kuä'ü ikuinä̧tü̧ ttidepä kkü'kekumä̧.

²⁵ Isopäi'ünä̧ ta̧'kua̧rü̧ Epíritu iyüttümä̧, Epíritu oipa'anä̧tä̧ ti̧'cha̧ pä'ü ja̧'a̧.

²⁶ Ukuo te'äkuäumä̧ türowäu juiyätukua, mi̧kuä̧ri̧yä̧kuä̧u̧ pä'ä'chäkuäumä̧, kkorotü ttu̧ju̧nä̧ra̧'a̧ topümä̧, ttu̧wä̧mȩnä̧ wotüjä̧ pä'ümä̧.