Gálatas 4 - Nuevo Testamento Uwotjüja

Jitämä̧ Dio i̧tti̧mü̧jä̧

¹ Ja̧'wa̧ta̧nü̧ pi̧yȩ pä'üsä: Jä'o iäre ȩmä̧kua̧ ja̧'a̧nä̧, ji̧nä̧ ji̧'ki̧cha̧wa̧ jo̧mȩnä̧mä̧, esclavo pättäku jü̧ta̧'a̧nü̧ wa̧, o'kajuiyünä̧tä̧ u̧ru̧wa̧ ja̧'a̧nä̧.

² Ja̧'wa̧ta̧nü̧ tta̧'ä̧rü̧ to̧ttä̧rä̧ku̧, tta̧ttä̧ra̧ pä'ü we'äwotü, jä'o päinomȩbü päi'ünä̧.

³ Ja̧'wa̧nü̧ jü̧ta̧'a̧nü̧ 'kuäopa'a ujuturu'i̧nä̧: ji̧nä̧ ta̧'u̧kuä̧i̧mä̧, pi̧jä̧nä̧ weünä̧tä̧ kka̧kui̧nä̧tü̧jä̧.

⁴ Ja̧'wa̧nü̧ ja̧'a̧nä̧, ji̧yȩnü̧ mo̧ro̧ rȩbȩwo̧mȩnä̧mä̧, Dio i̧tti̧rü̧ we'inü̧, isaju yajutenä̧ uwäpächünä̧, Moisé weäwä wȩnȩ päü'a̧kuä̧,

⁵ jua̧u̧ weäwä wȩnȩnä̧ kka̧kuä̧tü̧rü̧ rä'epü iku, Dio-mä̧ i̧tti̧mü̧ päi'ünä̧ jȩi̧nä̧u̧jä̧.

⁶ Ja̧'wa̧nü̧, täkü i̧tti̧mü̧ ta'attü̧ Dio-mä̧ i̧tti̧ a̧'kua̧rü̧ i̧sa̧ Epíritu-ru we'inü̧ ta̧mi̧'iso'kinä̧: jua̧u̧ Epíritu ja̧'a̧, ¡Abbá! ¡Chä'o! pä'ü wopümä̧.

⁷ Ja̧'wa̧nü̧ ja̧'a̧ttü̧, täkü esclavo jü̧nä̧mä̧ u̧mü̧wä̧ya̧mä̧kü̧jä̧, jitämä̧ i̧tti̧jä̧; Dio-rü pä̧wä̧rü̧jo̧mȩnä̧ chutä iäre iya päinü̧mä̧ i̧yä̧kua̧jä̧.

⁸ Pä'äjimä̧, Dio-rü ku̧wo̧juä̧tu̧ku̧ juiyäimä̧, yapareäkuäwä isotü ttü̧ä̧nä̧wo̧tü̧rü̧ ukuotü kka̧kui̧nä̧tü̧jä̧.

⁹ Ja̧'wa̧nü̧ ja̧'a̧nä̧ jitä Dio-rü ku̧wo̧juä̧chi̧nä̧tu̧kua̧'a̧mä̧, ja̧'wa̧nü̧ pä'ü jui'ü'i̧nä̧ Dio u̧wo̧juä̧u̧ kuätukua'amä̧ ¿tta̧'a̧nü̧ pä'ü ppa̧kuä̧chä̧tu̧kua̧'a̧jä̧ttü̧ ttü̧ä̧nä̧wo̧tü̧ juiyupätürü, mikuäwokotürü, kukuotätukua pä'ümä̧?

¹⁰ Ukutumä̧ ji̧nä̧, ukuotü jȩpä̧tü̧jä̧, mo̧ro̧'i̧nä̧, kkä̧wa̧tü̧rü̧'i̧nä̧, a̧'ȩ'i̧nä̧, du'o'i̧nä̧ ja̧'wa̧ta̧nü̧ años'i̧nä̧, jü̧nä̧.

¹¹ ¡Ukuturu yȩ'ȩkua̧sä̧, yapare aditü chusuräwi̧nä̧u̧ ja̧'a̧ tä̧jí̧ pä'ü!

Yotukunä̧ jȩtti̧nü̧ amükuädinü̧ wȩnȩ

¹² Chawaruwä chü̧jä̧wa̧tü̧, ukuturu jä'epüsä: ttü chüta'anü̧ ku'ärowächätukua pä'ü, ttü'i̧nä̧ ukutu jü̧ta̧'a̧nü̧ chü'ärowächina̧'a̧ttü̧. Ukutumä̧, ttürü suronä̧ jȩpo̧ko̧tü̧ pinä̧tü̧jä̧.

¹³ Ukutumä̧ wo̧juä̧tü̧jä̧, na̧dä̧chi̧pä̧jo̧mȩttü̧ ä̧kuo̧mȩnä̧ jareü wȩnȩ jidäwina̧'a̧mä̧.

¹⁴ Jua̧u̧ na̧dä̧cha̧'a̧mä̧ ukuturumä̧ wȩnȩ ja̧'a̧nä̧, ttürü suronä̧ jȩpü̧ ya'okuokotü pinä̧tü̧jä̧. Yattokuajü jueimä̧, Dio i̧sa̧ á̧gȩ 'kua̧rü̧nä̧tä̧, ¡chutä Crito Jesú-ru jȩtta̧'a̧ jä̧'i̧ja̧'a̧nü̧tä̧ jȩ'kui̧nä̧tu̧kuä̧ku̧sä̧!

¹⁵ ¿Tta̧'a̧nü̧ päi'inä̧tu̧kuä̧ku̧ttü̧, ji̧yȩnü̧ kueseäkuäwinä̧tu̧ku̧mä̧? ukuturumä̧ wo̧jua̧sä̧, jȩ'kuä̧tu̧ku̧'a̧nü̧ jü̧ttü̧mä̧, kui'äretuku'i̧nä̧ baroku iyina̧ja̧tü̧jä̧ ttürümä̧.

¹⁶ Ja̧'wa̧nü̧ ji̧na̧'a̧ jitämä̧, ¡ukuturu jueü wȩnȩ pädomenä̧tä̧'i̧nä̧ ukutu kua̧bo̧i̧ya̧tu̧ku̧ päi'ünä̧ wa̧sä̧!

¹⁷ Juätümä̧ ujuturu ä'kuoyäutä jȩpä̧tü̧ ukuturumä̧, jua'a'i̧nä̧ adiu jȩtta̧ pä'ü amükuädümä̧kü̧tä̧. Jua'amä̧ ujututtü 'kȩ'ȩpü̧ ttikua pä'ütä.

¹⁸ Ä'kuoyäunü̧ jȩä̧kuä̧wä̧mä̧ iweye adiwa'a, ppä'ädü jȩä̧kuä̧wä̧nä̧mä̧. Jua̧u̧'i̧nä̧ 'kuäopünä̧tä̧, suro ttü ukutuku chü̧jo̧mȩnä̧tä̧mä̧kü̧.

¹⁹ Chi̧tti̧mü̧ 'kua̧rü̧nä̧ ukuturu repeda'attü̧, ukutu Crito jü̧ta̧'a̧nü̧ juokuächätukuomȩbü päi'ünä̧ pä'äjita'anü̧ usurä ȩmä̧u̧sä̧, muchaju ku̧kuä̧ba̧ barawäkua usurä kkȩmä̧wa̧'a̧ 'kua̧rü̧nä̧.

²⁰ ¡Jitätä ukutuku chü̧jü̧ttü̧mä̧ i̧mi̧ku̧nä̧ chukuokua̧ja̧u̧jä̧, wäitä chieruwuönä̧ jȩpä̧tü̧jä̧tó!

Agar'i̧nä̧, Sara'i̧nä̧ jȩtti̧nü̧ wȩnȩkuä̧cha̧'a̧

²¹ Weäwä wȩnȩ päü'anü̧ ttü̧ja̧kua̧ pä'ätümä̧, ji̧yȩtȩ ji'äwätukuittü: ¿Ukutumä̧, weäwä wȩnȩ päümä̧ ä̧ju̧kuo̧ko̧tü̧ pä'ijätüjä̧ tä̧jí̧?

²² Jua̧u̧ wȩyu̧kuä̧ wȩnȩ jiäwa'a, Abraha̧ i̧tti̧mü̧ ta̧ju̧ru̧ u̧ju̧nä̧ri̧nü̧ wȩnȩ: Ya̧tȩmä̧ umüwäyaju esclava waju pättäkuattü ji̧na̧'a̧, kka̧ra̧mä̧ irekuattü, libre waju pättäkuattü ji̧na̧'a̧.

²³ Umüwäyaju esclava wajuttümä̧ idepä pä̧wä̧rü̧jo̧mȩnä̧ uwäpächinü̧; ja̧'wa̧nü̧ ja̧'a̧nä̧ irekua libre waju pättäkuattümä̧, Abraha̧-rü̧ Dio iya päina̧'a̧ku̧ uwäpächini̧yä̧ku̧.

²⁴ Pitü nä̧tü̧ ta̧ju̧ru̧mä̧ wȩnȩkuä̧cha̧'a̧, todärenä̧ jo̧mȩnä̧ esekuäkuäwä wȩnȩ: Yajuterümä̧, Sinaí mü̧ä̧'kattü esekuinü̧ wȩnȩkuä̧cha̧'a̧, juäjuttümä̧ esclavo jü̧nä̧ ttu̧wo̧juȩtä̧u̧ wotütä rü̧'ä̧chi̧nä̧tü̧, Juajumä̧ Aga ji̧na̧'a̧.

²⁵ Aga-rümä̧ wȩnȩkuä̧cha̧'a̧ Sinaí mü̧ä̧'ka Arabia rȩjȩnä̧ kkä'kanä̧, jitämä̧ Jerusarȩ́ ütawiyänä̧, jua'amä̧ kki̧tti̧mü̧ku̧tä̧ ttu̧wo̧juȩtä̧u̧ esclavo jü̧nä̧ kkü̧ja̧'a̧ttü̧.

²⁶ Ja̧'wa̧nü̧ ja̧'a̧nä̧, Sara-rümä̧ wȩnȩkuä̧cha̧'a̧ jareünä̧ esekuäkuäwä wȩnȩ, ja̧'wa̧nü̧ jo̧mȩttü̧ mo̧ro̧jä̧ra̧'a̧ Jerusarȩ́ ütawiyä isotüjä̧, ttu̧wo̧juȩtä̧u̧ wokotü ttidepiyu jo̧mȩ,

²⁷ Wȩyu̧kuä̧ wȩnȩmä̧, Sara kkütü'kümä̧ pä'a: ¡Kki̧tti̧mü̧ku̧ juiyünä̧ wajumä̧; Modü ubara jerupajumä̧, pä̧i̧ku̧nä̧ wopü esewi! Isopäi'ünä̧ kkirekuorü kku̧nä̧rü̧ i̧tti̧mü̧kua̧ju̧ttü̧'i̧nä̧, abonä̧nü̧ kki̧tti̧mü̧kuä̧kua̧ju̧, kki̧tti̧mü̧ to'ä'ijäjumä̧.

²⁸ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, ukutumä̧ Isaac ji̧nü̧ta'anü̧ päinü̧'a̧kuä̧, Dio i̧tti̧mü̧jä̧.

²⁹ Ja̧'wa̧nü̧ ji̧yȩnü̧ mo̧ro̧ ttidepä pä̧wä̧rü̧jo̧mȩnä̧ kkuwäbekuinä̧ku̧, Epíritu jäwänä̧ kkuwäbekuinä̧ku̧ru̧ üjü'kü juiyinü̧ta'anü̧, jitä'i̧nä̧ ja̧'wa̧nü̧tä̧ 'kuäopa'a.

³⁰ Ja̧'wa̧nü̧ ja̧'a̧mä̧ ¿toku pä'ajä̧ttü̧ wȩyu̧kuä̧ wȩnȩmä̧?, jua̧u̧mä̧ pä'a: «ku̧mü̧wäyajurumä̧ kki̧tti̧tä̧ku̧ rä'epü ikuiju, jua'amä̧ ku̧mü̧wäyaju kki̧tti̧mä̧ kuiäremä̧ ȩmo̧kä̧kua̧, ji̧nä̧so kui̧tti̧, libre waju kki̧tti̧ku̧mä̧.»

³¹ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧, esclava jü̧nä̧ ttu̧mü̧wäyajumä̧, kki̧tti̧mü̧mä̧kü̧jä̧, ttu̧mü̧wäyaju wokojutä kki̧tti̧mü̧jä̧.