Gálatas 3 - Nuevo Testamento Uwotjüja

Epíritu-mä̧ tta̧'kua̧ wȩnä̧rü̧tä̧ ȩmä̧wa̧

¹ ¡Isoo, Galacia ttü̧ja̧, Kuamükuädü jui'ätüjä̧ttü̧! ¿Dí ji̧nä̧ttü̧ ukuturu märipänä̧ surojuo'epinü̧mä̧ jueü wȩnȩ kukuotätuku juiya pä'ümä̧? Ttütä wäjuönä̧ jidäwinä̧u̧jä̧ Jesucrito ü̧jo̧kä̧nü̧ daunä̧ kkä̧nü̧ 'korujuoächinü̧ wȩnȩmä̧.

² Ukuturu ji̧yȩtȩtä̧ jä'epü chä̧ju̧kua̧ pä'üsä: ¿Dio i̧sa̧ Epíritu-rumä̧, toku kuȩmi̧nä̧tu̧kuä̧ttü̧: weäwä wȩnȩ kukuotätukuomȩnä̧; ja̧'wa̧nü̧ jo̧ka̧'a̧ jü̧ttü̧'i̧nä̧ kua̧'kua̧ wȩnä̧rü̧ kuä̧ju̧kuä̧tu̧kuo̧mȩnä̧ jo̧ka̧'a̧ ji̧na̧'a̧ tä̧jí̧?

³ ¿Yoriso amükuädokotüjä̧ tä̧jí̧? Epíritu jäwänä̧ kkä̧mä̧di̧nü̧'kotü'i̧nä̧, ttidepä jäwänä̧ käkuädäkuäwätukua'amä̧.

⁴ ¿Jua̧u̧nu̧mä̧ rü̧ȩnä̧ usurä kuȩmä̧winä̧tu̧ku̧mä̧, yaparetä ji̧na̧'a̧ tä̧jí̧? ¡juiyomä̧ yaparemä̧ jo̧ka̧'a̧ ji̧na̧'a̧ 'kua̧ra̧'a̧!

⁵ Chú, Epíritu-ru Dio iya'amä̧ ja̧'wa̧ta̧nü̧ jȩtto̧kü̧ juei jȩa̧'a̧mä̧, ¿ti̧yȩ jȩ'kuä̧tu̧kuo̧mȩnä̧ ja̧'a̧ jä̧ttü̧?, ¿weäwä wȩnȩ kukuotätukuomȩnä̧ ja̧'a̧ tä̧jí̧?, ¿jareü wȩnȩ kua̧'kua̧ wȩnä̧rü̧ kuesetätukuomȩnä̧tä̧ ja̧'a̧ tä̧jí̧?

Abraha̧, Dio-rü a̧'kua̧ u̧wȩnä̧ri̧nü̧ wȩnȩ

⁶ Ja̧'wa̧nü̧tä̧ Abraha̧'i̧nä̧, Dio-rü a̧'kua̧ wȩnä̧rü̧ esetomȩttü̧, ȩmi̧nä̧ku̧.

⁷ Ja̧'wa̧nü̧ ji̧na̧'a̧ttü̧, tta̧'kua̧ wȩnä̧rä̧tü̧mä̧ Abraha̧ i̧tti̧mü̧ wotü ja̧'a̧.

⁸ Mo̧ täbokütä päi'ünä̧, ä'kanä̧ ukuokuina̧'a̧ Wȩyu̧kuä̧ wȩnȩmä̧, judío pokotü tta̧'kua̧ ttu̧wȩnä̧ro̧mȩnä̧ Dio ȩmä̧kuȩ wȩnȩmä̧. Ja̧'wa̧nü̧ jo̧mȩttü̧ Dio-mä̧, pa̧'a̧nü̧ jareü wȩnȩ ji'äwinü̧ Abraha̧-rü̧: «Ukunä̧tä̧ pi̧jä̧ ttü̧ja̧rü̧mä̧ o'katoi'ünä̧rü̧ ppä̧dä̧dä̧kua̧sä̧» jü̧nä̧.

⁹ Ja̧'wa̧nü̧ ja̧'a̧ttü̧, Abraha̧ ji̧nü̧ta'anü̧ tta̧'kua̧ wȩnä̧rä̧tü̧rü̧mä̧, jua̧u̧tä̧ku̧ ȩmä̧u̧.

¹⁰ Weäwä wȩnȩnä̧ tta̧'kua̧ wȩnä̧rä̧tü̧rü̧ surojü ma̧ä̧ma̧ pä'ü, pa̧'a̧nü̧ päwina̧'a̧ wȩyu̧kuä̧ wȩnȩmä̧: «surojütä ma̧ä̧mä̧kua̧'a̧ o'katoi'ünä̧ wȩyu̧kuä̧ wȩnȩnä̧ pȩjü̧ ukuotokürümä̧.»

¹¹ Isopäi'ünä̧ Dio ä'kattümä̧, ya̧tȩ'i̧nä̧ toa'a weäwä wȩnȩnä̧tä̧ ukuotü adiwächümä̧; wȩyu̧kuä̧ wȩnȩmä̧ pa̧'a̧nü̧ pä'attü̧: «Adiwä juei jȩpü̧mä̧, a̧'kua̧ wȩnä̧rü̧tä̧ ü̧jä̧kua̧.»

¹² Ja̧'wa̧ta̧nü̧ weäwä wȩnȩmä̧, tta̧'kua̧ wȩnä̧rä̧kuä̧wä̧mä̧ jo̧ka̧'a̧ pa̧'a̧nü̧ päomȩttü̧: «Pi̧yȩ ukuotü jȩpü̧ kkü̧tä̧ jä̧kua̧'a̧ ü̧jä̧kua̧mä̧,» jü̧nä̧.

¹³ Crito-mä̧ weäwä wȩnȩ ukuotokü, usurä ȩmä̧wa̧jü̧ juei usurä ȩmä̧wi̧nü̧ ujutu jäwänä̧, ja̧'wa̧nü̧ jȩpü̧tä̧ ȩmi̧nä̧u̧jä̧. Wȩyu̧kuä̧ wȩnȩmä̧ pä'a: «Dio-mä̧ suronä̧ pä̧kua̧, ü̧jo̧kä̧ jäi daunä̧ 'korujuo'ächürümä̧.»

¹⁴ Ja̧'wa̧nü̧ ja̧'a̧ttü̧, Jesucrito-nä̧tä̧ Abraha̧-rü̧, Dio iya päinü̧ adiwä jueimä̧ judío pokotürü'i̧nä̧ rȩbȩä̧kuä̧wi̧na̧'a̧. Ja̧'wa̧nü̧ jo̧mȩttü̧, ta̧'kua̧ tu̧wȩnä̧ro̧mȩnä̧mä̧, Dio iya päinä̧ku̧ Epíritu Sa̧tu̧rü̧ ȩmä̧tü̧jä̧.

Weäwä wȩnȩmä̧, Dio iya päinü̧mä̧ si'epü ikuokü

¹⁵ Chawaruwä chi̧jä̧wa̧tü̧, ttü̧ja̧ ttukuokuä'ija'aku chukuokuä̧u̧jä̧: ji̧yȩtȩ pacto pättü esekuäkuäwä'i̧nä̧, ta̧ju̧ eseku ttiku o'ka'amä̧, ya̧tȩ'i̧nä̧ rü̧ä̧da̧ pä'ümä̧, ȩmü̧ ikua pä'ü'i̧nä̧ yoriso juiya'a, ttü̧ja̧ jäwä ja̧'a̧nä̧.

¹⁶ Ja̧'wa̧nü̧ ja̧'a̧ttü̧ Dio, Abraha̧-rü̧ chi̧yä̧kua̧jä̧ pä'ü ukuokuinü̧mä̧, churutä'i̧nä̧, i̧tti̧rü̧'i̧nä̧ pätetü ji̧na̧'a̧. Rekuätünä̧, «kui̧tti̧mü̧rü̧» päwächoka'a, ya̧tȩrü̧tä̧ «kuakuä i̧sa̧rü̧» päwächina̧'a̧, Jua̧u̧mä̧ Crito-tä ja̧'a̧.

¹⁷ Ja̧'wa̧ta̧nü̧ pi̧yȩ pä'üsä: Dio-mä̧ pacto pättünä̧ Abraha̧-rü̧ eseku chi̧yä̧kua̧jä̧ päinü̧mä̧ jȩpi̧nü̧. Ja̧'wa̧nü̧ ji̧nü̧ o'ka'a, Moisé-rü weinü̧mä̧, weäwä wȩnȩ jü̧nä̧tä̧ pärowächina̧'a̧, cuatrocientos treinta años jo̧mȩnä̧ 'kuäopinü̧ o'ka'atä, ja̧'wa̧nü̧ ji̧na̧'a̧nä̧ jua̧u̧mä̧ Dio iya päinü̧mä̧ si'epümä̧ ikuoka'a.

¹⁸ Isopäi'ünä̧ Dio ujuturu iya päinü̧mä̧, Moisé weäwä wȩnȩ ukuotätürütä iya päinü̧ttü̧mä̧, jua̧u̧nu̧mä̧, täkü mipponä̧mä̧ jo̧ka̧'a̧; ja̧'wa̧nü̧ ja̧'a̧nä̧ Abraha̧-rü̧mä̧ Dio-mä̧ chi̧yä̧kua̧jä̧ päinü̧mä̧, mikuämä̧ jäepoka'atä chi̧yä̧kua̧jä̧ päinä̧ku̧.

¹⁹ Ja̧'wa̧nü̧ jü̧ttü̧mä̧, ¿Weäwä wȩnȩmä̧ däjetä ppäda'a jä̧ttü̧? Jua̧u̧ weäwä wȩnȩ iyinü ttü̧ja̧ ttukuotokomȩttü̧, Abraha̧-rü̧ kui̧tti̧rü̧ chi̧yä̧kua̧jä̧ Dio päinä̧ku̧ icha'anä̧. Á̧gȩrȩ-tä̧ ji'äwinä̧tü̧, Moisé-mä̧ jua'a yabo jiäkuäwä i̧sa̧ jü̧nä̧tä̧ winü̧.

²⁰ Ja̧'wa̧nü̧ ja̧'a̧nä̧, Abraha̧-rü̧ chi̧yä̧kua̧jä̧ pä'ü Dio ukuokuinü̧mä̧, kka̧ra̧ jiäkuäwä i̧sa̧rü̧ rekuärü̧jo̧ka̧'a̧ chutätä ukuokuinü̧.

¿Weäwä wȩnȩmä̧ däjetä ppädinü̧jä̧ttü̧?

²¹ ¿Ja̧'wa̧nü̧ jü̧ttü̧mä̧ weäwä wȩnȩmä̧, Dio iya päinü̧ku̧mä̧ to'i ja̧'a̧ku̧ jäwä ja̧'a̧ tä̧jí̧? ¡Ja̧'wa̧nü̧mä̧ jo̧ka̧'a̧! isopäi'ünä̧ weäwä wȩnȩtä̧ kkä̧kuä̧wä̧ i'ko iyü jü̧ttü̧mä̧, Dio-mä̧ ȩma̧ja̧u̧jä̧ weäwä wȩnȩ tukuota'anä̧tä̧'i̧nä̧.

²² Wȩyu̧kuä̧ wȩnȩmä̧ pä'a, o'katoi'ünä̧rü̧tä̧ surojü pecado pättümä̧ kkȩdä̧rä̧u̧jä̧, ja̧'wa̧nü̧ ja̧'a̧ttü̧ Dio mippoünä̧ iya päinü̧mä̧ Jesucrito-rü tta̧'kua̧ wȩnä̧rä̧tü̧rü̧tä̧ ttȩma̧ pä'ü ja̧'a̧.

²³ Tta̧'kua̧ wȩnä̧rä̧kuä̧wä̧ ichäkua'a ä'kanä̧mä̧, weäwä wȩnȩtä̧ tta̧wä̧ri̧nä̧u̧jä̧ kärenä̧ ttü̧'a̧'a̧ jä̧'i̧nü̧'a̧nü̧, tta̧'kua̧ wȩnä̧rä̧kuä̧wä̧ i̧jȩkuä̧chü̧nä̧ ichomȩbü päi'ünä̧.

²⁴ Weäwä wȩnȩmä̧ wo̧juȩkuä̧ i̧sa̧ jä̧'i̧nü̧'a̧nü̧tä̧ ȩpi̧nä̧u̧jä̧ Jesucrito-bümä̧, Jua̧u̧ru̧ ta̧'kua̧ tu̧wȩnä̧ro̧mȩnä̧ Dio ȩma̧tü̧ pä'ümä̧.

²⁵ Ja̧'wa̧nü̧ ja̧'a̧nä̧, ta̧'kua̧ tu̧wȩnä̧rä̧ku̧ Crito ichinü̧ o'ka'amä̧, täkü rekuä rü̧jo̧ko̧u̧jä̧ weäwä wȩnȩ wo̧juȩtä̧rü̧ oipatü pä'ümä̧.

²⁶ Ja̧'wa̧nü̧ ja̧'a̧ttü̧ ukutumä̧ o'katoi'ünä̧ Dio i̧tti̧mü̧jä̧, Crito Jesú-ru kua̧'kua̧ ku̧wȩnä̧rä̧tu̧kua̧'a̧mä̧.

²⁷ Ja̧'wa̧nü̧ jo̧mȩttü̧, o'katoi'ünä̧ Crito-nä̧ bautizo jȩpä̧kuä̧wi̧nä̧tü̧mä̧, Crito-tä pä'äjita'anü̧ ü̧'ka̧ti̧nä̧u̧jä̧.

²⁸ Ja̧'wa̧nü̧ ja̧'a̧ttü̧, täkü toa'a judío'i̧nä̧, Grecia ttü̧ja̧'i̧nä̧, ttu̧wo̧juȩtä̧u̧ esclavo wotü'i̧nä̧, ttu̧ru̧wa̧ to'ätü'i̧nä̧, ubo'i̧nä̧, isaju'i̧nä̧, jü̧nä̧; isopäi'ünä̧ Crito Jesú-nä̧mä̧, ukutu o'katoi'ünä̧ ji̧nä̧ ya̧tȩ wotüjä̧.

²⁹ Ja̧'wa̧ta̧nü̧, Crito-rü kuesetätukuttümä̧, Abraha̧-mi̧nä̧ i̧tti̧mü̧ isotüjä̧ ja̧'wa̧nü̧ ja̧'a̧ttü̧ Dio i̧yä̧kuȩ päinü̧mä̧ kuȩmä̧tu̧kua̧ pä'ütä ja̧'a̧.