Gálatas 2 - Nuevo Testamento Uwotjüja

¹ Jua̧u̧nü̧ ji̧na̧'a̧ttü̧mä̧, ttü̧jä̧pü̧ttü̧ pa̧ja̧kuä̧nü̧ a̧'ȩ 'kuäopinü̧ o'ka'a, pä'äjita'anü̧ Jerusarȩ́-ra̧'a̧ Bernawé-ku 'chä̧nü̧, Tito-rü'i̧nä̧ o'ipinü̧sä̧.

² Jua'amä̧ 'chi̧nü̧sä̧, chi̧'cha̧ pä'ü Dio i̧jȩpä̧jä̧ku̧. Ja̧'wa̧ta̧nü̧ jua'attümä̧ chaditä'ijü'i̧nä̧, chaditä̧kuȩ'i̧nä̧ ji̧ya̧'a̧kuä̧ra̧'a̧ aditü jui'ü, chu̧wo̧jua̧ pä'ü, ukuo isotüku i̧mi̧ku̧nä̧ ka̧ka̧kui̧pü̧ ukuokuinü̧sä̧, judío pokotürü chaditä'ijü jareü wȩnȩ tü'kü.

³ Ja̧'wa̧nü̧ ja̧'a̧nä̧, ttüku kue'ächü Tito Grecia ttü̧ja̧sa̧ ja̧'a̧nä̧'i̧nä̧, circuncisión jȩä̧kuä̧wa̧ pä'ümä̧ wettokoku pinü̧.

⁴ Jua'akumä̧, yä̧wȩi̧nä̧ tü̧'kä̧tȩnä̧ to̧ttä̧ri̧nä̧u̧jä̧ Crito-rü esetätüjä̧ pä'ätümä̧, Crito ujuturu rä'epü ikuinü̧nä̧ tü̧ja̧ku̧ttü̧ rä'epü iku, pä'äjita'anü̧ weäwä wȩnȩku̧ esclavo pättünä̧ tü̧ja̧ku̧nä̧ jȩtta̧ pä'ümä̧.

⁵ Ja̧'wa̧nü̧ ja̧'a̧nä̧, juätü pätta'akumä̧ jȩpo̧ko̧tü̧ pi̧nä̧tu̧jä̧, ukutunä̧ jareünä̧ jueü wȩnȩ kka̧ päta'attü̧.

⁶ Ja̧'wa̧nü̧ ja̧'a̧nä̧, ukuo isotü päi'ünä̧ kka̧kuä̧tü̧mä̧ (ä'kanä̧ kkoro tturuwo ttu̧ju̧nä̧ri̧na̧ja̧ pä'ü'i̧nä̧, jua̧u̧mä̧ ttürümä̧ jo̧ka̧'a̧; Dio-mä̧ ttü̧ja̧rü̧mä̧ 'kȩ'chä̧wo̧kü̧ ja̧'a̧ttü̧), ja̧'wa̧nü̧ ja̧'a̧nä̧, ttürümä̧, ukuo isotü wotümä̧, kkoro jareü wȩnȩmä̧ jittäwokoku pinü̧sä̧.

⁷ Pärokua'aku, judío pokotürü jidäwiyarü pä'ü Dio weina̧'a̧tä̧ wo̧jui̧'i̧nä̧tü̧, Peduru-rü'i̧nä̧ judío-rü jiäwa pä'ü weinüta'anü̧.

⁸ Isopäi'ünä̧, judío-rü apóto päi'ünä̧ jiäwa pä'ü Peduru-rü we'inü̧ Dio-tä ttürü'i̧nä̧ weinä̧ku̧ cha'attü judío pokotürü apóto jü̧nä̧, jidäwiyarü pä'ü.

⁹ Ja̧'wa̧nü̧ ja̧'a̧ttü̧, adiwä juei ttürü iyäwi'ina̧'a̧ wo̧jui̧'ü̧ Sa̧ti̧a̧ku̧'i̧nä̧, Cefa'i̧nä̧, Ju̧a̧'i̧nä̧ igresia 'chu̧'ä̧rä̧tü̧ ja̧'a̧ttü̧ tettäwinä̧u̧jä̧, ttürü'i̧nä̧, Bernawérü'i̧nä̧, ji̧nä̧ ji̧yȩtȩ adikuä isotü jü̧nä̧: Ujutumä̧ judío pokotürü ji'äu ti̧'cha̧'a̧nä̧, jitütämä̧ judío-rü jittäwa pä'ü.

¹⁰ Ji̧yȩtȩtä̧ jättepinä̧u̧jä̧, usurä isotürü tamükuäda pä'ütä; Jua̧u̧mä̧, iweye jȩchä̧'i̧jü̧tä̧.

¹¹ Ja̧'wa̧nü̧ ja̧'a̧nä̧, Antioquía ütawiyänä̧ ichi'äja'a Peduru-rü pä'inü̧sä̧, ukú jȩ'ku̧mä̧ suroja'a, jü̧nä̧. Iweye pädarü pä'ü ji̧na̧'a̧.

¹² Jua'amä̧, Sa̧ti̧a̧ku̧ wȩä̧jä̧u̧ judío ttichi'äkua'a ä'kanä̧mä̧, judío pokotüku u̧kuȩ kuä̧nü̧ jȩä̧ja̧'a̧nä̧, ttichi'omȩnä̧mä̧, ye'eku, ukuoka'a jȩo̧mȩttü̧.

¹³ Ja̧'wa̧nü̧ ä'koyättü Peduru jȩü̧ta̧'a̧nü̧ jȩpi̧nä̧tü̧, kkorotü judío'i̧nä̧, ji̧nä̧ Bernawé'i̧nä̧ ja̧'wa̧ta̧nü̧tä̧ jȩpi̧nü̧.

¹⁴ Ja̧'wa̧nü̧ jȩtto̧mȩnä̧, jareü wȩnȩ pä'aku jȩpo̧ko̧tü̧ pinä̧tü̧, ja̧'wa̧nü̧ ji̧yä̧ku̧ Peduru-rü, o'katoi'ünä̧ ttä'ka jo̧mȩttü̧ pä'inü̧sä̧: Ukú, judío i̧sa̧'i̧nä̧, judío pokotü 'kua̧rü̧nä̧ ku̧ja̧'a̧nä̧; ¿Tta̧'a̧nü̧ pä'ü judío pokotürümä̧, judío jȩttü̧ jäwänä̧ ttü̧ja̧kua̧ päkua'ajä̧ttü̧?

Surojüttü kki̧'ä̧kuä̧wa̧'a̧ Crito-rü ta̧'kua̧ tu̧wȩnä̧ro̧mȩnä̧mä̧

¹⁵ Ujutumä̧ judío-jä̧ tuwäpächinü̧tä̧ päi'ünä̧, ja̧'wa̧nü̧ ja̧'a̧ttü̧ surojümä̧ jȩpo̧ko̧tü̧jä̧ judío pokotü jȩttü̧'a̧nü̧mä̧.

¹⁶ Ujutumä̧ wo̧juä̧tü̧jä̧, weäwä wȩnȩ päü jȩä̧kuä̧wä̧nä̧tä̧mä̧ Dio-mä̧ ȩmo̧kü̧ jä̧kua̧ pä'ümä̧, ja̧'wa̧nü̧ ja̧'a̧nä̧ Jesucrito-rü tta̧'kua̧ wȩnä̧rä̧kuä̧wä̧nä̧tä̧ ȩmä̧u̧jä̧. Ja̧'wa̧nü̧ jo̧mȩnä̧, ujutu'i̧nä̧ Jesucrito-rü esetinä̧tü̧jä̧, Jesucrito-nä̧ ȩma̧tü̧ pä'ümä̧, weäwä wȩnȩnä̧ jo̧ka̧'a̧ttü̧. Ja̧'wa̧nü̧ ja̧'a̧ttü̧, suro weäwä wȩnȩ päütä ttukuotüttümä̧, Dio-mä̧ ȩmo̧ko̧u̧ ttäkuotü.

¹⁷ Ja̧'wa̧nü̧ ja̧'a̧nä̧, Crito-nä̧ ȩma̧tü̧ pä'ü esetü tikuomȩnä̧mä̧, ujutu'i̧nä̧ surojünä̧ tü̧ja̧kua̧'a̧ wo̧jui̧'ä̧tü̧jä̧. ¿Ja̧'wa̧nü̧ ja̧'a̧mä̧, Crito'i̧nä̧ surojü jȩtü̧nä̧ wea'a tä̧jí̧? ¡Ja̧'wa̧nü̧mä̧ jo̧ka̧'a̧!

¹⁸ Weäwä wȩnȩ iso juoepokü pädinü̧, pä'äjita'anü̧ chukuotüttümä̧, o'kajuiyünä̧ jäyä jȩcha̧'a̧tä̧ i̧jȩpü̧sä̧. Jua'amä̧ Dio pä'aku cha̧'kua̧ra̧ pä'ü.

¹⁹ Isopäi'ünä̧ weäwä wȩnȩnä̧mä̧, weäwä wȩnȩ pä'aku 'korujuo'ächinü̧sä̧, jua'amä̧ Dio pä'aku cha̧'kua̧ra̧ pä'ü.

²⁰ Ja̧'wa̧nü̧ ja̧'a̧ttü̧ jitämä̧ a̧'kua̧ro̧kü̧sä̧, Crito-tä ja̧'a̧ ttünä̧ a̧'kua̧rü̧ kkü̧mä̧; jitä pi̧jä̧ttü̧ chidepänä̧ a̧'kua̧rü̧ chü̧jü̧mä̧, Dio i̧tti̧, ttürü re kkä̧nü̧ iyäkuäwinü̧nä̧ cha̧'kua̧ wȩnä̧rü̧ chü̧jü̧tä̧ ja̧'a̧.

²¹ Dio rettü ppädinü̧mä̧ ya'okuoküsä. Isopäi'ünä̧ weäwä wȩnȩnä̧tä̧ Dio ȩmü̧ttü̧mä̧, Crito 'korujuoächinü̧mä̧ mikuäwokütä ja̧ja̧'a̧.