Gálatas 1 - Nuevo Testamento Uwotjüja

Teäwinü̧ wȩnȩ

¹ Ttü Pauru, Apóto päi'ünä̧ wa̧, ttü̧ja̧ weäwänä̧'i̧nä̧, ttü̧ja̧nä̧'i̧nä̧ u̧ju̧no̧ko̧ku̧ pinü̧, Tu̧ru̧wa̧ Jesucrito-nä̧tä̧, jua̧u̧ru̧ wa'arettü tto'ädinü̧ Dio-tä weinä̧ku̧,

² Te'äwuösä ji̧nä̧ yo̧mȩtȩnä̧, chawaruwä chi̧jä̧wa̧tu̧ku̧ ukuturu Galacia rȩjȩttü̧, igresia wotürü:

³ Ukuturu eseusä ja̧'wa̧ta̧nü̧ wȩnȩ juiyünä̧ kkä̧kuä̧wä̧ tä'o Dio-tä, Tu̧ru̧wa̧ Jesucrito Jä'o Dio-tä iyätukuaku.

⁴ Jä'o Dio-rü pä̧wä̧rü̧jo̧mȩnä̧, suronä̧ jȩtü̧ mikuäwächünä̧, pi̧jä̧ surojüttü rä'epü ikua pä'ü a̧mü̧nä̧ pa̧ja̧tü̧ iyäwinü̧rü̧tä̧,

⁵ ¡Jua̧u̧ru̧tä̧, mo̧ro̧ kki̧ä̧mü̧nä̧ teseäkuäwätukua! Amȩ́.

Ji̧yȩtȩtä̧ ja̧'a̧ jareü wȩnȩmä̧

⁶ Rü̧ȩnä̧ chamükuädünä̧ jä̧ku̧sä̧, Jesucrito re ü̧jü̧nä̧ woinä̧u̧mä̧, jua̧u̧ttü̧ yotäku rä'opächü kkoro jareü wȩnȩnä̧ bokuipächäjiyätukuäku.

⁷ Isopäi'ünä̧ kkoro jareü wȩnȩmä̧ juiya'anä̧, yotukunä̧ kka̧kuä̧tü̧ ukuturu jerutu ikuätü, Crito i̧wȩnȩ jareü wȩnȩ surojuo'epü.

⁸ Ja̧'wa̧nü̧ ja̧'a̧nä̧, ujututä ja̧ pä'ü'i̧nä̧, mo̧ro̧jä̧ttü̧ ichäkuäwa̧ á̧gȩ ja̧ pä'ü'i̧nä̧, jitäwä'ijü i̧mi̧ku̧nä̧ jareü wȩnȩ jittäuttümä̧, Dio-tä ro̧ȩpä̧kua̧.

⁹ Pädinü̧mä̧, pä'äjita'anü̧ pä'üsä: ya̧tȩ jareü wȩnȩ kkoromȩnä̧ jü̧ jiäuttümä̧, Dio-tä ro̧ȩpä̧kua̧.

Pauru, Jesucrito-rü esetinü̧ wȩnȩ

¹⁰ Ja̧'wa̧nü̧ ja̧'a̧ttü̧ ttü̧ja̧rü̧ pä̧wä̧rü̧jü̧ jȩcha̧ pä'ümä̧ usoküsä, Dio-rü pä̧wä̧rü̧jü̧tä̧ jȩcha̧ pä'ü wa̧sä̧. Ja̧'wa̧nü̧ ttü̧ja̧rü̧ pä̧wä̧rü̧jü̧ jȩchü̧ttü̧mä̧, Crito-mä̧ u̧mü̧wä̧ya̧mä̧ poküsä.

¹¹ Isopäi'ünä̧, chawaruwä chü̧jä̧wa̧tü̧ pi̧yȩ ku̧wo̧jui̧pä̧tu̧kua̧ pä'ü ja̧'a̧: Jareü wȩnȩ ttü jidäwumä̧ pi̧jä̧ ttü̧ja̧ jäwämä̧kü̧ ja̧'a̧.

¹² Isopäi'ünä̧ ȩmü̧'i̧nä̧, wo̧jui̧pü̧'i̧nä̧, ttü̧ja̧ttü̧mä̧ chȩmo̧kü̧ ji̧nü̧, Jesucrito-tä ji̧na̧'a̧ ttürü i̧jȩpi̧nü̧mä̧.

¹³ Isopäi'ünä̧ ukutumä̧ ä̧ju̧kui̧nä̧tü̧jä̧ judío jäwänä̧ kkä̧nü̧, ä'koji jȩchi̧nü̧mä̧ ja̧'wa̧ta̧nü̧ wo̧juä̧tü̧jä̧ Dio-rü esetätürü si'epü chikua pä'ü suronä̧ jȩchi̧nü̧'i̧nä̧.

¹⁴ Ja̧'wa̧ta̧nü̧ wo̧juä̧tü̧jä̧, chi̧rȩjä̧ttü̧ judío jäwänä̧ kkä̧nü̧, chawaruwä ttü ta̧'a̧nü̧ wotü ttu̧wä̧mȩnä̧ chinü̧mä̧, chä̧do̧tü̧ mi̧nä̧ jäwä ä'kuoyäunü̧ jȩcho̧mȩnä̧.

¹⁵ Ja̧'wa̧nü̧ ja̧'a̧nä̧, Chu, ttü cha̧ju̧ kküakuä jakuättü 'kȩ'ȩpü̧ ȩmi̧nü̧tä̧ woinä̧ku̧sä̧, eseunu̧ repea'attü̧.

¹⁶ I̧tti̧'rü̧'i̧nä̧ chu̧wo̧juä̧chi̧'ü̧nä̧ i̧jȩpi̧nä̧ku̧sä̧, judío pokotürü jidäwiyarü pä'ü, ja̧'wa̧nü̧ ja̧'a̧nä̧ yotäkumä̧ ttü̧ja̧rü̧ jä̧'ȩpä̧rü̧ 'cho̧kü̧ pinü̧sä̧;

¹⁷ ja̧'wa̧ta̧nü̧ Jerusarȩ́-ra̧'a̧'i̧nä̧, chä'kanä̧ Apótore-rümä̧ topü 'cho̧kü̧ pinü̧sä̧; ja̧'wa̧nü̧ jo̧ka̧'a̧ Arabia rȩjȩra̧'a̧tä̧ i̧u̧ i̧wi̧nü̧'ka̧, Damasco-ra̧'a̧tä̧ pä'äjita'anü̧ ppa̧'ä̧chi̧nü̧sä̧.

Pauru, kkorotü apótore-rü topinü̧

¹⁸ Ja̧'wa̧nü̧ ji̧na̧'a̧ttü̧mä̧, wäbodäkuä a̧'ȩ o'ka'a, Peduru-rü topü 'chä̧nü̧ Jerusarȩ́-ra̧'a̧ku̧ 'cha'ächinü̧sä̧, ja̧'wa̧nü̧ ja̧'a̧ jua̧u̧ku̧mä̧ ttü̧jä̧pü̧ttü̧nü̧ ji̧mü̧tȩ mo̧ro̧ jo̧mȩnä̧ kki̧nü̧sä̧;

¹⁹ Ja̧'wa̧nü̧ ja̧'a̧nä̧ kkorotü apótore-rümä̧ topokü pinü̧sä̧, suro Tu̧ru̧wa̧ i̧jä̧wa̧ Sa̧ti̧a̧ku̧rü̧tä̧ topinü̧sä̧.

²⁰ Pi̧yȩ chi̧wȩyu̧tu̧mä̧, Dio-mä̧ wo̧jua̧ chuyaparewoka'amä̧.

²¹ Ja̧'wa̧nü̧ ji̧nü̧ o'ka'amä̧ Siria rȩjȩra̧'a̧tä̧, Ciricia rȩjȩra̧'a̧tä̧ 'chi̧nü̧sä̧.

²² Jua̧u̧nü̧ pä̧nä̧mä̧, Crito-rü esetätü Judea rȩjȩnä̧ kka̧kuä̧tü̧mä̧ ttieruwinä̧ku̧sä̧.

²³ Suro, ukuowa'a ttä̧ju̧kuä̧ja̧'a̧tä̧ ji̧na̧'a̧: «Chu, ujuturu usurä tȩmä̧u̧nä̧ jȩpi̧nü̧mä̧, jitämä̧ jareü wȩnȩ si'epü ikua päinü̧ ji̧nü̧tä̧, ji'äudo» jü̧nä̧.

²⁴ Ja̧'wa̧nü̧ ttürü pärotü ikuina̧'a̧ topü, Dio-rümä̧ juiyo eseäkuäwinä̧tü̧.