Filipenses 4 - Nuevo Testamento Uwotjüja

¹ Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧ ukutumä̧ rü̧ȩnä̧ rȩpȩdä̧u̧ kuätukua'attü, ya̧tȩtä̧ Tu̧ru̧wa̧nä̧ yaboku tätukui. Ukuturumä̧ jäwänä̧mä̧ mikuäwächäku eseusä.

Igresia-rü u̧wo̧juȩti̧nü̧ wȩnȩ

² Evodia-rü'i̧nä̧, Síntique-rü'i̧nä̧ jä'epüsä, Tu̧ru̧wa̧rü̧ kuesetinä̧tu̧kua̧'a̧ttü̧, eseku ku̧ja̧kuä̧tu̧kua̧ pä'ü.

³ Ja̧'wa̧ta̧nü̧ uku, ttürü ppä'ädä̧rä̧'i̧jü̧rü̧'i̧nä̧ jä'epüsä, juätü nä̧tü̧rü̧ ppäkuäda pä'ü. Juätümä̧ adiwä wȩnȩ jidäwomȩnä̧ ppä'ädäri̧nä̧tü̧, ja̧'wa̧ta̧nü̧ Clemente'i̧nä̧, kkorotü'i̧nä̧ aditinä̧tü̧. Juätü o'katoi'ünä̧ tti̧mi̧pi̧yä̧mä̧ wȩyu̧tu̧ rütäwa'a pa̧'a̧, kkä̧kuä̧wä̧ i'ko kuyäru'tänä̧.

Jȩttä̧kuȩ wȩnȩ ji'äwinü̧

⁴ Tu̧ru̧wa̧nä̧ 'kuäopünä̧ eseäkuäwätukui. Yaboku pädäu̧jä̧: ¡Eseäkuäwuötä kka̧kuä̧tu̧kui̧! jü̧nä̧.

⁵ Ukutu eseu jȩ'kuä̧tu̧ku̧mä̧ kkorotü o'katoi'ünä̧ tu̧wo̧juö̧nä̧ kka̧kuä̧tu̧kui̧. Tu̧ru̧wa̧ ichäkuomȩmä̧ täkü tü'küwächa'a.

⁶ Kkorojueinä̧mä̧ kua̧'kua̧ rokuekuätukuä, ja̧'wa̧nü̧ ja̧jü̧ jueimä̧, ukuturu rekuä rü̧jü̧mä̧ Dio u̧wo̧juö̧nä̧tä̧ ji'äwätukuirü; churutä esewuönü̧.

⁷ Ja̧'wa̧nü̧ jȩ'kuä̧tu̧kuo̧mȩnä̧, Dio-mä̧ wȩnȩ juiyünä̧ kkä̧kuä̧wä̧ i̧yä̧kuä̧, jua̧u̧mä̧ pi̧jä̧ ttü̧ja̧ jäwättü'i̧nä̧ abonä̧nü̧ jü̧ jäwä; tta̧wä̧rä̧kuȩ kua̧mi̧ iso'kituku'i̧nä̧, kuamükuädätuku'i̧nä̧, Crito Jesú-nä̧tä̧.

⁸ Chawaruwä chi̧jä̧wa̧tü̧ amükuädätukui jueü wȩnȩnä̧tä̧, yapareäkuäwokünä̧tä̧, adiwomȩnä̧ jȩä̧kuä̧wä̧nä̧tä̧, surojü juiyünä̧ jȩä̧kuä̧wä̧nä̧tä̧, eseu ppädäkuäwänä̧tä̧, adiu ukuowunä̧tä̧. O'kajuiyünä̧ adiwäjuei oäwänänä̧tä̧ amükuädü jȩpä̧tu̧kui̧, üadiwä eseäkuäu ttü̧ja̧'a̧nü̧ jü̧nä̧tä̧.

⁹ Ttüttü ku̧wo̧jui̧'i̧nä̧tu̧ku̧mä̧, kuȩmi̧nä̧tu̧ku̧mä̧, kuä̧ju̧kui̧nä̧tu̧ku̧mä̧ jȩpä̧tu̧kui̧; ja̧'wa̧nü̧ jȩ'kuä̧tu̧kuo̧mȩnä̧, Dio wȩnȩ juiyünä̧ kkä̧kuä̧wä̧ iyümä̧ 'kuäopünä̧ ukututäku ü̧jä̧kua̧.

¹⁰ Chu̧ru̧wa̧ i̧mi̧nä̧ esewäjisä ukuturu, pä'äjita'anü̧ ttürü kuamükuädäjätukuäku. Jua'akumä̧ ku̧ni̧chi'ätukuoka'anä̧, ppäkuädätuku mo̧ro̧ rȩbȩwo̧ka̧'a̧ jä̧'i̧ji̧yä̧ku̧.

¹¹ Jua'amä̧ rekuä rü̧jä̧ku̧mä̧ pädokü, eseu weyejuodina̧'a̧ttü̧ pä'üsä juidomȩnä̧'i̧nä̧, chu̧ju̧nä̧ro̧mȩnä̧'i̧nä̧, jü̧nä̧.

¹² Usurä i̧sa̧ jü̧nä̧ kkä̧kuä̧wä̧'i̧nä̧, rü̧ȩnä̧ kku̧nä̧rü̧ kkä̧kuä̧wä̧'i̧nä̧ wo̧jua̧sä̧. O'kajuiyünä̧tä̧ kkä̧kuä̧wä̧ wo̧juȩkua̧sä̧, chu̧kuȩ ppäittuda pä'ü'i̧nä̧, chu̧kuȩ chu̧ju̧nä̧ra̧ pä'ü'i̧nä̧, jü̧nä̧.

¹³ Crito-nä̧mä̧ o'kajuiyünä̧tä̧ iso juo'epüsä, chujuru iya'attü.

¹⁴ Ja̧'wa̧nü̧ ja̧'a̧nä̧, adiu jȩ'kui̧nä̧tu̧kuä̧ku̧sä̧, ttü usurä chȩmä̧u̧ mo̧ro̧ ppäkuädätukuomȩnä̧.

¹⁵ Ja̧'wa̧ta̧nü̧ ukutu Filipo ttü̧ja̧mä̧ wo̧juä̧tü̧jä̧, Macedonia-ra̧'a̧ttü̧ rä'opäji̧'ka̧ Dio i̧wȩnȩ ä̧kuo̧mȩnä̧ kkä̧mä̧dü̧ jidäwomȩnä̧, kkorotümä̧ ppättädoka'anä̧, juȩnȩ igresia wotütä ji̧na̧'a̧, ttürü rekuä rü̧jü̧ ppä'ädinä̧tü̧mä̧, pärokua'aku'i̧nä̧ ppädäda'anä̧.

¹⁶ Suro, juȩnȩbütämä̧kü̧ ji̧na̧'a̧, Tesalónica ütawiyära̧'a̧ chü̧ja̧'a̧'i̧nä̧, todärenä̧ jo̧mȩnä̧ wekuinä̧tu̧kuä̧ku̧sä̧, ttürü rekuä rü̧ja̧'a̧ ppä'ädümä̧.

¹⁷ Pi̧yȩ pädümä̧, pä'äjita'anü̧ kuiyätukuattü pä'ü jä'epümä̧ pädokü, ji̧nä̧somä̧ Dio yabonü̧ ppädätukuaku pä'ü pädü.

¹⁸ Epafrodito-ku wekuäjätukumä̧ o'kajuiyünä̧ ȩmä̧ji̧sä̧, täkü rekuä rü̧jo̧ko̧ku̧sä̧. Jua̧u̧ ttürü wekuinä̧tu̧ku̧mä̧ adiwina̧'a̧, a̧mȩu̧ nü̧a̧'a̧ jä̧'i̧nü̧'a̧nü̧, ja̧'wa̧nü̧ usurä ȩmä̧u̧ ppädäkuäwä ja̧'a̧ Dio eseunu̧ ȩmü̧mä̧.

¹⁹ Ja̧'wa̧nü̧ ja̧'a̧ttü̧, Chu̧ru̧wa̧ Dio-tä, ukuturu rekuä rü̧jü̧mä̧ o'kajuiyünä̧ ppä̧dä̧kuä̧u̧jä̧, Crito Jesú ukuo jäwänä̧.

²⁰ 'Kuäopünä̧ mo̧ro̧ kki̧ä̧mü̧nä̧, Tä'o Dio-rü teseutä ja̧'a̧. Amȩ́.

Teäwi'inü̧ wȩnȩ

²¹ O'katoi'ünä̧ Jesucrito-rü esetinä̧tü̧rü̧ tekuäwätukua pä'ü we'üsä. Ttüku kka̧kuä̧tü̧'i̧nä̧ esetinä̧tü̧mä̧ ukuturu te'äwätü.

²² O'katoi'ünä̧ Jesucrito-rü esetinä̧tü̧mä̧ tettäwä̧u̧jä̧. Ji̧nä̧so te'äwätümä̧ Roma Ru̧wa̧ umüwäyotü ja̧'a̧.

²³ Tu̧ru̧wa̧ Jesucrito-tä ja̧'a̧, ukuturu o'kajuiyünä̧ ppä̧dä̧kua̧mä̧.