Filipenses 3 - Nuevo Testamento Uwotjüja

Circuncisión pättüku, weäwä wȩnȩku̧ jiäwomȩ

¹ Chawaruwä chi̧jä̧wa̧tü̧, kkoro päi'ünä̧mä̧, Tu̧ru̧wa̧nä̧ eseäkuäu ku̧jä̧tu̧kua̧ pä'üsä. Ukuturu chi̧wȩyu̧ti̧nü̧ pä'äjita'anü̧ chi̧wȩyu̧ta̧ pä'ü'i̧nä̧ ü̧tä̧ri̧jo̧ko̧ku̧sä̧, jua̧u̧mä̧ ukuturu ppädü ja̧'a̧ttü̧.

² Rü̧ȩnä̧ tta̧'ä̧rä̧kuä̧u̧ kka̧kuä̧tu̧kui̧ ä̧wi̧ri̧tü̧ 'kua̧rü̧nä̧ jȩpä̧tü̧rü̧, surojünä̧ aditätürü, circuncisión pättü jȩpä̧tü̧rü̧;

³ Isopäi'ünä̧ circuncisión pättü jȩpä̧kuä̧wo̧tü̧mä̧ ujututä ja̧'a̧, Epíritu-nä̧ Tä'o Dio-rü esewätütä ja̧'wa̧nü̧ jȩpü̧ Crito Jesú-nä̧ eseäkuäwätüjä̧, tidepä jäwänä̧ ukuo tetäwoka'a.

⁴ Ja̧'wa̧ta̧nü̧, jua̧u̧ ttidepä jäwänä̧ ukuo tedäuttü, ukuo te'äwajümä̧ ttütä ja̧'a̧:

⁵ Chuwäpächäja'attümä̧ kko̧ro̧mü̧ttü̧nü̧ wäbodäkuä mo̧ro̧ päi'omȩnä̧ circuncisió̧-mä̧ jȩtti̧nä̧ku̧sä̧, Irae ttü̧ja̧ i̧sa̧sä̧, Benjamín i̧tti̧mü̧ i̧sa̧sä̧, hebreos ttü̧ja̧ i̧sa̧. Weäwä wȩnȩ weünä̧mä̧ Fariseo wotü i̧sa̧ winü̧sä̧.

⁶ Päte'üra̧'a̧ esetü, igresia wotürü suronä̧ jȩpü̧ ru̧'ä̧ri̧nü̧sä̧, weäwä wȩnȩ ukuotü. Ja̧'wa̧nü̧ ja̧'a̧ttü̧ weäwä wȩnȩ chukuotokü ji̧nü̧ pä'ätümä̧ ya̧tȩ'i̧nä̧ toa'a.

⁷ Ja̧'wa̧nü̧ ji̧na̧'a̧nä̧, jua̧u̧nü̧ pä̧nä̧ rü̧ȩnä̧ mikuäunä̧ tochinü̧mä̧, jitä Crito jäwänä̧mä̧ ttürümä̧ mikuäwokü jü̧nä̧ tochünä̧tä̧ ja̧'a̧.

⁸ Juȩnȩ yabo päi'ünä̧, o'kajuiyünä̧tä̧ toe'ächü jäwä ja̧'a̧, Chu̧ru̧wa̧ Crito-rü wo̧juä̧wä̧ mikuäu wȩnȩku̧ yorätetü tochomȩnä̧mä̧. Jua̧u̧ku̧ pä'i'ümä̧ o'kajuiyünä̧tä̧ to'e'ächinü̧sä̧, jua̧u̧ ji̧nü̧mä̧ ikuikuä o'ko jü̧nä̧tä̧ tochü, Crito-rü chi̧rȩbȩwa̧ pä'ümä̧.

⁹ Jua̧u̧ku̧ todeunä̧ chü̧ja̧ pä'ü; weäwä wȩnȩ päü'a̧kuä̧ adiu jȩcha̧ pä'oküsä, ji̧nä̧somä̧ Crito-rü cha̧'kua̧ wȩnä̧rü̧, tta̧'kua̧ wȩnä̧rä̧kuä̧wä̧nä̧ Dio iyü adiwä juei chȩma̧ pä'üsä.

¹⁰ Ja̧'wa̧ta̧nü̧ Jua̧u̧ru̧ chu̧wo̧jua̧ pä'ü'i̧nä̧, wa'arettü ttoächäkuäwä ujuru chu̧wo̧jua̧ pä'ü'i̧nä̧, Ja̧'wa̧ta̧nü̧ Ubara ttuinü̧ta̧'a̧nü̧ ubara ttuda pä'ü'i̧nä̧ pä'üsä; Ja̧'wa̧ta̧nü̧ Chutä 'korupäi'inü̧ta̧'a̧nü̧'i̧nä̧ 'korujuodächa pä'üsä,

¹¹ Ja̧'wa̧nü̧ jȩpü̧ wa'ü ikuipü'i̧nä̧ ttodächa pä'ü tta̧'ä̧rü̧sä̧.

Ti̧rȩbȩwa̧ pä'ü jo̧mȩmä̧, ji̧nä̧ rȩbȩwi̧'o̧ko̧tü̧jä̧

¹² Täkü o'kajuiyünä̧ po̧kui̧pi̧nü̧sä̧, surojü'i̧nä̧ jui̧'a̧sä̧ pä'ümä̧ pä'oküsä; jua'a yaboku usú usurä ȩmä̧u̧sä̧ jua̧u̧ chi̧rȩbȩwa̧ pä'ü, jua̧u̧ ja̧'a̧tȩ'ü̧ Jesucrito-mä̧ surojüttü rä'epü iku ȩmi̧nä̧ku̧ cha'attü.

¹³ Chawaruwä chi̧jä̧wa̧tü̧ ttütä'i̧nä̧ täkü jo̧mȩnü̧ rȩbȩwi̧nü̧sä̧ pä'ümä̧ pä'oküsä; ja̧'wa̧nü̧ ja̧'a̧nä̧ ji̧yȩtȩtä̧ jȩpü̧sä̧, cho'ka'aku jäwämä̧ u̧ni̧chi'ü chä'ka ja̧'a̧ku̧ jäwätä chi̧rȩbȩwa̧ pä'ü amükuädü ususä.

¹⁴ Chi̧rȩbȩwa̧ pä'ü jȩpü̧ kku̧nä̧wo̧mȩ chi̧rȩbȩwa̧ pä'ü ususä, mo̧ro̧jä̧ jäwä Dio woinü̧nä̧ Chu̧ru̧wa̧ Jesucrito-nä̧ chȩma̧ pä'ü.

¹⁵ Ja̧'wa̧nü̧ ja̧'a̧ttü̧, o'katoi'ünä̧ adiwä juei jo̧mȩnü̧ wotümä̧, pi̧yȩtä̧ tamükuädätukua; ja̧'wa̧nü̧ ja̧'a̧nä̧ kkoro tta̧mü̧kuädüttümä̧, jua̧u̧'i̧nä̧ Dio-mä̧ tottünä̧ jȩä̧kua̧.

¹⁶ Ja̧'wa̧nü̧ ja̧'a̧nä̧, jitü rȩbȩä̧kuä̧wä̧tü̧mä̧, ji̧yȩtȩtä̧ pä'aku jȩpü̧, amükuädü jȩpü̧ tü̧ja̧kuä̧tu̧kua̧.

Ujutumä̧ mo̧ro̧jä̧ ttü̧ja̧jä̧

¹⁷ Chawaruwä chi̧jä̧wa̧tü̧, ttü jȩcha̧'a̧ topü jȩpä̧tu̧kui̧ ja̧'wa̧ta̧nü̧ kkorotü ja̧'wa̧nü̧ jȩpü̧ kka̧kuä̧tü̧rü̧ topü tätukui.

¹⁸ Isopäi'ünä̧ rekuätü kka̧kuä̧tü̧, jȩttü̧ juiya pä'ü ro̧dȩpä̧rä̧'i̧jü̧nä̧, ü̧jo̧kä̧nü̧ jäi dau Crito 'korujuoächinä̧i aboiyotü wotü, jitä pä'äjita'anü̧ ji̧dä̧wä̧u̧jä̧ ajuäunü̧.

¹⁹ Juätümä̧ totte'ächäkuotü, ttü'käbiyutä ttü̧ä̧nä̧wa̧ jü̧nä̧ kka̧kuä̧tü̧, dä'ä rü̧jü̧ jäwätä ukuo te'äkuäwätü. Suro, pi̧jä̧ jäwätä amükuädü jȩpä̧tü̧.

²⁰ Ja̧'wa̧nü̧ ja̧'a̧nä̧ ujutumä̧ mo̧ro̧jä̧ ttü̧ja̧jä̧, jua'attü Tu̧ru̧wa̧ ra̧wä̧pi̧jü̧ttü̧ rä'epü ikuinü̧ Jesucrito-rü icha'a tetäwäkuotüjä̧.

²¹ Jua̧u̧tä̧tä̧ jä̧kua̧'a̧ tidepä wa'are jäwä jä̧'i̧jü̧mä̧, Chutä ü̧jü̧ beipokü jäwänä̧ pärotü i̧kuä̧kua̧mä̧. Chutä ujurunä̧ pi̧jä̧ o'kajuiyünä̧ wea pä'ü iyäwi'inä̧ku̧ ja̧'a̧ttü̧.