Filipenses 2 - Nuevo Testamento Uwotjüja

Jesucrito jü̧ta̧'a̧nü̧ kkä̧kuä̧wä̧ wȩnȩ

¹ Ja̧'wa̧nü̧ ja̧'a̧ttü̧, Crito-rü esetü ku̧jä̧tu̧kuo̧mȩnä̧ kuesewätukunä̧, ro̧kuȩkuä̧tu̧ku̧nä̧, Epíritu-nä̧ ji̧nä̧ ji̧yȩtȩnä̧ ku̧ja̧kuä̧tu̧ku̧nä̧, rȩrü̧jü̧nü̧ to'kuäkuäwätukunä̧ kujurutuku iyinü̧ jü̧ttü̧mä̧,

² Cheseunä̧ kka̧kuä̧tu̧kui̧, o'katoi'ünä̧ ji̧yȩtȩnä̧tä̧ repe'äkuäu'i̧nä̧, eseäkuäu'i̧nä̧, ji̧nä̧ ji̧yȩtȩnä̧tä̧ amükuädü jȩpä̧tu̧kui̧. Ja̧'wa̧nü̧ jȩ'kuä̧tu̧kua̧'a̧ topü chesewä̧kua̧sä̧. Rekuä rü̧jü̧mä̧ ji̧nä̧ ji̧yȩtȩnä̧tä̧ ppä'ädäkuäu kka̧kuä̧tu̧kui̧.

³ Ukuo te'äkuäumä̧ jȩ'kuä̧tu̧kuä̧, chukuo chu̧ju̧nä̧ra̧ pä'ümä̧, pärokua'aku ukuo tekuäwoka'a, kkorotürümä̧ ukutu ku̧wä̧mȩnä̧ wotü 'kua̧rü̧nä̧tä̧ topätukui.

⁴ Ya̧tȩ'i̧nä̧ suro, churutä a̧mü̧nä̧ pa̧ja̧tü̧ rekuä rü̧jü̧tä̧mä̧ kusätukuä, pärokua'aku kkorotürü rekuä rü̧jü̧'i̧nä̧ usätukui.

Crito-rü ukuo iyinü̧ wȩnȩ

⁵ Crito amükuädinü̧ta̧'a̧nü̧, ukutu'i̧nä̧ ji̧nä̧ ji̧yȩtȩ amükuädü kka̧kuä̧tu̧kui̧,

⁶ Jua̧u̧mä̧: Crito-mä̧, Dio jü̧ta̧'a̧nü̧ wa̧ ja̧'a̧nä̧ yo̧rä̧tȩwa̧sä̧ pä'ü ukuo te'äwokü pinü̧,

⁷ Pärokua'aku, üyorewäjimä̧ kko̧'ä̧dä̧kuä̧u̧ iku, ttu̧mü̧wä̧ya̧ pä'i'ü, Pi̧jä̧ ttü̧ja̧sa̧ jü̧nä̧tä̧ pä'i'inü̧, pi̧jä̧ ttü̧ja̧ jü̧'a̧nü̧tä̧.

⁸ Ja̧'wa̧nü̧ jȩpä̧kuä̧u̧, ukuo teäkuäwoka'a, Ukuotinü̧ 'korujuoächomebü päi'ünä̧, Jua'a'i̧nä̧ ü̧jo̧kä̧nü̧ kkä̧nü̧ usurä ȩmä̧u̧tä̧.

⁹ Ja̧'wa̧nü̧ iyäwina̧'a̧ttü̧ Dio-mä̧ o'kajuiyünä̧ u̧wä̧mȩnä̧ kku̧nu̧, o'kajuiyünä̧tä̧ i̧mi̧pi̧yä̧ kkü̧mä̧ u̧wä̧mȩnä̧ jȩi̧nä̧ku̧.

¹⁰ Jua'amä̧ Jua̧u̧ Jesú ä'ka jo̧mȩmä̧ o'katoi'ünä̧ ttiwe'kiyunä̧ ttü̧ja̧kuä̧ma̧ pä'ü, mo̧ro̧jä̧ra̧'a̧ttü̧'i̧nä̧, pi̧jä̧nä̧ttü̧'i̧nä̧ ja̧'wa̧ta̧nü̧ pi̧jä̧ dȩa̧'a̧nä̧ttü̧'i̧nä̧, jü̧nä̧.

¹¹ Ja̧'wa̧nü̧ jȩpü̧, o'katoi'ünä̧ ukuokuätümä̧ Jesucrito-rümä̧ Tu̧ru̧wa̧ pättünä̧, jua'a yabo Jä'o Dio-rü uruwo tteseäkuäwa pä'ü.

Dio-rü ukuotü kkä̧kuä̧wä̧ wȩnȩ

¹² Ja̧'wa̧nü̧ ja̧'a̧ttü̧, chawaruwä chi̧jä̧wa̧tü̧ 'kuäopünä̧ kukuotä'ijätukuta'anü̧ ukuotätukui, suro ttü ukutuku chü̧jo̧mȩnä̧tä̧mä̧kü̧, ttü otó chü̧jo̧mȩnä̧'i̧nä̧. Ye'ekunü̧, ukuotü aditätukui ra̧wä̧pi̧jü̧ttü̧ kki̧'ä̧kuä̧wä̧ ku̧ji̧pä̧tu̧kuä̧kuȩnä̧mä̧;

¹³ Isopäi'ünä̧ Dio-tä ja̧'a̧, ukuturu adiu jȩ'kuä̧tu̧kua̧ pä'ü kuju'kätukunä̧'i̧nä̧, adiu jȩ'kuä̧tu̧ku̧nä̧'i̧nä̧ jȩpü̧mä̧.

¹⁴ O'kajuiyünä̧ jȩpü̧ kka̧kuä̧tu̧kui̧, ya̧tȩrü̧'i̧nä̧ surojümä̧ kukuokuätukuä, kurowäwätukuoka'atä,

¹⁵ Ukuturu suronä̧ pättü juiyünä̧ kka̧kuä̧tu̧kui̧, pi̧jä̧ ttü̧ja̧ suropätü ttü̧'kä̧tȩnä̧ ku̧ja̧kuä̧tu̧kua̧'a̧ttü̧, ukutumä̧ Dio i̧tti̧mü̧jä̧, isopäi'ünä̧ ukutumä̧ pi̧jä̧ttü̧mä̧ tejäwore kkȩdȩpa̧'a̧ jä̧'i̧nü̧'a̧nü̧ kka̧kuä̧tu̧kui̧.

¹⁶ Kkä̧kuä̧wä̧ wȩnȩmä̧ käkuädi'ätukuoka'a esetätukui, Crito ichomȩnä̧ ttü ukuo tedäwäkua'anü̧. Yaparemä̧ usurä ȩmä̧u̧mä̧ aditokü pinü̧sä̧ pädäkua'anü̧.

¹⁷ Ja̧'wa̧ta̧nü̧ chukuoja sacrificio jü̧nä̧, altar pättomȩ tta̧'kua̧ wȩnä̧rü̧ ofrenda jü̧nä̧ ririäkuäwächünä̧ jȩtta̧ja̧ pä'ü'i̧nä̧, esewajüsä ukutu kua̧'kua̧ ku̧wȩnä̧rä̧tu̧ku̧ ukutuku chesewa pä'üsä.

¹⁸ Ja̧'wa̧nü̧ jü̧ta̧'a̧nü̧, eseäkuäwätukui ttütäku yo̧mȩtȩnä̧.

Timoteo

¹⁹ Chu̧ru̧wa̧ Jesucrito-nä̧ tta̧'ä̧rü̧sä̧, jitätä ja̧'a̧ Timoteo-rü weda pä'ü, ukutu kutü'kütuku ä̧ju̧ku̧ rü̧ȩnä̧ chesewa pä'ü.

²⁰ Timoteo jü̧'a̧nü̧ wa̧ kka̧ra̧rü̧mä̧ to̧'a̧sä̧ ukuturu ppäda pä'ümä̧. Ttü jü̧'a̧nü̧ ukuturu repe'ürümä̧.

²¹ Isopäi'ünä̧ o'katoi'ünä̧ jitürütä pä̧wä̧rü̧jü̧tä̧ usú jȩpä̧tü̧, ja̧'wa̧nü̧ ja̧'a̧nä̧ Jesucrito-rü pä̧wä̧rü̧jü̧mä̧ jȩpo̧ko̧tü̧.

²² Ja̧'wa̧nü̧ ja̧'a̧nä̧, täkü wo̧juä̧tü̧jä̧ Timoteo adiu jȩü̧ tü'kümä̧ ja̧'wa̧ta̧nü̧ wo̧juä̧tü̧jä̧ chi̧tti̧ 'kua̧rü̧nä̧ Dio i̧wȩnȩ jidäwa'anä̧ ttürü ppädärä̧'i̧jü̧mä̧.

²³ Ja̧'wa̧nü̧ ja̧'a̧ttü̧, ttü jäwä adiu wäjuönä̧ pädi'omȩnä̧ weü chikua pä'ü tta̧dä̧rä̧ku̧;

²⁴ Ja̧'wa̧ta̧nü̧ ttü'i̧nä̧ Chu̧ru̧wa̧rü̧ cha̧'kua̧ wȩnä̧rü̧sä̧, jitätä ja̧'a̧ topü chi̧'chä̧kua̧sä̧ pä'ü.

Epafrodito

²⁵ Ja̧'wa̧nü̧ ja̧'a̧nä̧ cha̧wa̧ru̧wa̧ chi̧jä̧wa̧ Epafrodito-rü, pä'äjita'anü̧ ppa̧'a̧dü̧ weda pä'ü rekuä rü̧jä̧ku̧sä̧, ttürü ppä'ädä̧rä̧'i̧jü̧rü̧ chaditäwä'i̧nä̧, usurä chȩmä̧u̧'i̧nä̧, ukututä ttürü rekuä rü̧ji̧yä̧u̧ ppä̧dä̧ra̧ttü̧ pä'ü wekuinä̧tu̧kuä̧ku̧ru̧.

²⁶ Ukutu o'katoi'ünä̧rü̧ a̧mü̧kuä̧rü̧ a̧'kua̧ tta̧'ȩkuä̧ji̧, rü̧ȩnä̧ na̧wä̧cha̧'a̧ ukuowa'a kuä̧ju̧kuini̧yä̧tu̧kuä̧ku̧.

²⁷ Isopäi'ünä̧ rü̧ȩnä̧ na̧'ä̧chä̧ji̧, 'korupäi'ü'anü̧tä̧ päi'ünä̧; ja̧'wa̧nü̧ ja̧'a̧nä̧ Dio rȩrü̧jü̧ toinä̧ku̧. Suro, jua̧u̧ru̧tä̧mä̧kü̧, ttürü'i̧nä̧ ppä'ädinü̧, ppa̧'ä̧dä̧rü̧ cha̧'kua̧ tta̧dȩku̧ juiya pä'ü.

²⁸ Ja̧'wa̧nü̧ ja̧'a̧ttü̧, jitätä ja̧'a̧ we'ü chikuäku pä'äjita'anü̧ topü kuesewätukua pä'ü, ttü'i̧nä̧ cha̧'kua̧ tta̧dȩku̧ juiyäkua'anü̧.

²⁹ Ja̧'wa̧nü̧ ja̧'a̧ttü̧ Tu̧ru̧wa̧ aditäwä adikuä i̧sa̧ jü̧nä̧ icha'a rü̧ȩnä̧ esewätukuirü, kkorotürü'i̧nä̧ ja̧'wa̧nü̧ aditätürümä̧ ja̧'wa̧nü̧tä̧ jȩpä̧tu̧kui̧.

³⁰ Isopäi'ünä̧ Jesucrito aditäwä aditomȩnä̧ 'korupäi'ü'anü̧ jä̧ja̧'a̧nä̧ kki̧'i̧pi̧nü̧ ttürü ppä'ädü aditomȩnä̧, ukutu ppäkuädätuku juiyünä̧ ja̧'a̧ttü̧.