Filemón 1 - Nuevo Testamento Uwotjüja

Pauru, Filemó̧-rü̧ teäwinü̧ wȩnȩ

¹ Ttü Pauru, Jesucrito jäwänä̧ kärenä̧ pä̧nü̧ kkä̧nü̧ ja̧'wa̧ta̧nü̧ cha̧wa̧ru̧wa̧ chi̧jä̧wa̧ Timoteo-ku te'äusä, ujuturu ppä'ädä̧rä̧'i̧jü̧ Filemó̧-rü̧,

² ja̧'wa̧ta̧nü̧ te'äusä o'katoi'ünä̧ igresia wotürü'i̧nä̧, chawaruwaju chijäwaju Apia-rü'i̧nä̧, Arquipo-rü'i̧nä̧ ja̧'wa̧ta̧nü̧ kuojusodettü igresia wotürü'i̧nä̧, jü̧nä̧.

³ Ta̧mi̧ iso'ki o'kajuiyünä̧ pä̧wä̧rü̧jä̧u̧jä̧, Tä'o Dio'i̧nä̧, Tu̧ru̧wa̧ Jesucrito'i̧nä̧ wȩnȩ juiyomȩnä̧ eseu kkä̧kuä̧wä̧ iyätukuaku pä'ü.

Pauru, Filemó̧-rü̧ Dio-rü ukuokuinü̧

⁴ Dio-rü chukuokuomȩnä̧, 'kuäopünä̧tä̧ ukuru'i̧nä̧ amükuädü ukuokusä,

⁵ ukú Tu̧ru̧wa̧ Jesucrito-rü kua̧'kua̧ ku̧wȩnä̧rü̧'i̧nä̧ ja̧'wa̧ta̧nü̧ o'katoi'ünä̧ tawaruwä tü̧jä̧wa̧tü̧rü̧ eseu repekua'a'i̧nä̧ chä̧ju̧kua̧'a̧ttü̧.

⁶ Dio-rümä̧ jä'epüsä ukú kua̧'kua̧ wȩnä̧rü̧ kueseumä̧ jo̧mȩnü̧ adiu jȩ'kua̧ pä'ü. Jesucrito-rü jo̧mȩnü̧ tu̧wo̧juä̧cha̧'a̧ttü̧, Chutä jäwänä̧.

⁷ Isopäi'ünä̧ cha̧wa̧ru̧wa̧ chi̧jä̧wa̧, ukú Filemó̧-rü̧ rü̧ȩnä̧ eseusä kkorotü tawaruwä tü̧jä̧wa̧tü̧rü̧ eseu ppäkuäda'a ä̧ju̧ku̧.

Pauru Onésimo-rü̧ ppädinü̧ wȩnȩ

⁸ Ja̧'wa̧nü̧ ja̧'a̧ttü̧, jua'akumä̧ jȩ'kuä̧kuȩmä̧ Jesucrito-nä̧ wedü ja̧'a̧nä̧,

⁹ täkü bü̧o̧sa̧ cha'attü, Crito jäwänä̧ kärenä̧ pä̧nü̧ kkä̧nü̧, jä'epütä jädepäkujä̧ ppäkuäda pä'ü,

¹⁰ Chi̧tti̧ jä̧'i̧nü̧'a̧nü̧ wa̧ Onésimo-rü̧, kärenära̧'a̧ttü̧ esetü ikuinü̧rü̧.

¹¹ Ji̧yȩnü̧ pä̧nä̧mä̧ adiu jȩo̧ka̧'a̧ ji̧na̧'a̧nä̧, jitämä̧ Onésimo-mä̧ ukuru'i̧nä̧, ttürü'i̧nä̧ ppädü'anü̧ wa̧.

¹² Pä'äjita'anü̧ jua̧u̧ru̧ we'üsä, ttürü dokuädajüta'anü̧ do'ädirü.

¹³ Jua'akumä̧ jareü wȩnȩ jäwänä̧ kärenä̧ chü̧'a̧'a̧ ppä̧dä̧ra̧ttü̧ pädü'anü̧ ja̧'a̧nä̧;

¹⁴ Ukú päkuoka'anä̧mä̧ jȩcha̧ pä'okü päjisä, ppäkuädattü pä'ü jädepäjimä̧ ttü weda'a 'kua̧rü̧nä̧ jü̧ juiyäkua'anü̧.

¹⁵ Jua'akumä̧ Onésimo-mä̧, ukuttü a̧'u̧kua̧'a̧ räopächina̧'a̧mä̧, jitä ukuku 'kuäopünä̧ ü̧ja̧ pä'ü 'kuäopina̧'a̧ 'kua̧ra̧'a̧.

¹⁶ Jitämä̧ esclavo jü̧nä̧mä̧ ku̧mü̧wä̧ya̧mä̧ pokü jä̧kua̧'a̧, pärokua'attü kua̧wa̧ru̧wa̧ kui̧jä̧wa̧ jü̧nä̧tä̧ jä̧kua̧, ja̧'wa̧nü̧ ja̧'a̧ ji̧nä̧so adiwa'amä̧. Jua̧u̧ru̧mä̧, ttümä̧ juiyo repe'üsä, uku'i̧nä̧ repe'irü. Suro ujutu jäwänä̧tä̧mä̧kü̧, Tu̧ru̧wa̧ Jesucrito jäwänä̧.

¹⁷ Ja̧'wa̧nü̧ ja̧'a̧ttü̧, ttürü'i̧nä̧ kua̧wa̧ru̧wa̧ kui̧jä̧wa̧ jü̧nä̧ repekuttümä̧, jua̧u̧ru̧'i̧nä̧ repe'i.

¹⁸ Ukú kuiäre ji̧yȩtȩ surojuoepinü̧ttü̧mä̧, i̧mi̧ppotüttü'i̧nä̧, ttürütä jäkuepattüjä̧.

¹⁹ Ttü Pauru, wȩyu̧tu̧ we'üsä; jua'akumä̧ ttütä chi̧mi̧tä̧kua̧jä̧ (ji̧nä̧, uku'i̧nä̧ ttürü kuimi̧ppota'a, pä'ü jui'ü).

²⁰ Cha̧wa̧ru̧wa̧ chi̧jä̧wa̧ pi̧yȩ jädepü, ppä'ädittü, Tu̧ru̧wa̧rü̧ repekua'attü̧; jua̧u̧tä̧tä̧ ppä'ädittü cheseunä̧.

²¹ Wȩyu̧tu̧ wedäkujä̧, ppä̧dä̧kua̧ pä'ü chu̧wo̧jua̧'a̧ttü̧. Suro jua̧u̧tä̧mä̧kü̧ kkoro'i̧nä̧ ppäkuädäkua'amä̧ wo̧jua̧sä̧.

²² Ja̧'wa̧ta̧nü̧ rȩbȩu̧ chä'äkuomȩ'i̧nä̧ aditü kku̧ni̧yi̧ttü̧; Dio-rü kukuokuätukua'a, Dio-mä̧ rä'epü i̧kuä̧kua̧sä̧ 'kua̧ra̧'a̧.

Rüjiku teäwi'inü̧ wȩnȩ

²³ Epafra pä'ü mi̧kua̧, Crito jäwänä̧ chuku kärenä̧ chü̧'ä̧ku̧'i̧nä̧ teäwäkujä̧,

²⁴ ja̧'wa̧ta̧nü̧ Maruku'i̧nä̧, Aritarco'i̧nä̧, Dema'i̧nä̧, Ruka'i̧nä̧ chaditäwänä̧ ppä'ädä̧rä̧tü̧mä̧ tettäwäkujä̧.

²⁵ Tu̧ru̧wa̧ Jesucrito rettü ppädümä̧, ukutunä̧ kka̧ pä'üsä. Amȩ́