Efesios 6 - Nuevo Testamento Uwotjüja

Ttä'otü̧'i̧nä̧, tti̧tti̧mü̧'i̧nä̧ jȩttü̧ wȩnȩ

¹ Tti̧tti̧mü̧mä̧, kuä̧'o̧tu̧ku̧tu̧ru̧ ukuotätukui Crito-rü kuesetätukua'attü; isopäi'ünä̧ jua̧u̧ ja̧'a̧ jueünä̧ jäwämä̧.

² Weäwä wȩnȩttü̧, ä̧kuo̧mȩnä̧ jäwänä̧ pä'a: Kuä'orü'i̧nä̧, kua̧ju̧ru̧'i̧nä̧ eseunu̧ ukuoti; jua̧u̧ ukuotü ü̧jo̧mȩnä̧ ü̧'o̧kui̧'ä̧kuȩ'i̧nä̧ päwina̧'a̧:

³ Ja̧'wa̧nü̧ ukuotümä̧, pi̧jä̧nä̧ttü̧ eseu'i̧nä̧ ü̧ja̧'a̧nä̧, rekuo mo̧ro̧'i̧nä̧ ü̧jä̧kua̧, jü̧nä̧.

⁴ Ja̧'wa̧ta̧nü̧ ukutu, ttä̧'o̧tü̧mä̧, kui̧tti̧mü̧tu̧ku̧ru̧ ku̧'ä̧i̧tä̧tu̧kuä̧. Pärokua'aku, ukuotü jȩttü̧nä̧tä̧ ro̧'ȩpä̧rä̧tu̧kui̧ Tu̧ru̧wa̧rü̧ pä̧wä̧rü̧jo̧mȩnä̧.

Ttu̧ru̧wa̧rü̧ ttukuotü wȩnȩ

⁵ Tturuwotürü kku̧nä̧rä̧tü̧mä̧, pi̧jä̧nä̧ttü̧ kuruwotürü ukuotätukui. Ye'ekunü̧tä̧, eseunü̧tä̧ ukuotätukui kua̧mi̧ iso'kitukunä̧, Crito-rü kukuotätukuta'anü̧.

⁶ Kuruwotü tottätukuaku pä'ütämä̧ kuaditätukuä, pärokua'aku Crito umüwäyotü jü̧nä̧, kua̧mi̧ iso'kitukuttü Dio-rü pä̧wä̧rü̧jo̧mȩnä̧ aditätukui.

⁷ Eseunu̧ ukuotü aditätukui, Tu̧ru̧wa̧rü̧ kukuotätukuta'anü̧, pi̧jä̧ ttü̧ja̧rü̧ ukuotü jȩ'kuä̧tu̧kuo̧ka̧'a̧tä̧.

⁸ Isopäi'ünä̧ yotukunä̧ adiu jȩ'kuä̧tu̧ku̧mä̧, Tu̧ru̧wa̧ttü̧ mikuä kuȩmä̧kuo̧tü̧jä̧, pi̧jä̧nä̧ttü̧ u̧ru̧wa̧ kku̧nä̧rü̧ ja̧ pä'ü'i̧nä̧, u̧ru̧wa̧ to̧'a̧ ja̧ pä'ü'i̧nä̧, jü̧nä̧.

⁹ Ja̧'wa̧ta̧nü̧ ukutu tturuwotümä̧, ku̧wo̧juȩtä̧u̧rü ja̧'wa̧ta̧nü̧ jȩpä̧tu̧kui̧, yekuepe'ätukuoka'a. Amükuädätukui ukutu Ku̧ru̧wa̧tu̧ku̧'i̧nä̧, ku̧wo̧juȩtä̧u̧ Ttu̧ru̧wa̧'i̧nä̧ ji̧nä̧ ya̧tȩtä̧ ja̧'a̧ mo̧ro̧jä̧nä̧ kkü̧mä̧, isopäi'ünä̧ jua̧u̧mä̧ ttü̧ja̧rü̧mä̧ yoräteutä jȩpü̧.

Dio jäwä ttaboiyotürü ttoekuäkuäwä

¹⁰ Ja̧'wa̧ta̧nü̧ chawaruwä chi̧jä̧wa̧tü̧, kujurutukumä̧ Tu̧ru̧wa̧nä̧ ȩmä̧tu̧kui̧, jua̧u̧tä̧ ujuruttü.

¹¹ 'Ka̧tä̧wi̧'ä̧tu̧kui̧, tta̧bo̧i̧ya̧rü̧ ttoekuäkuäwä Dio jäwämä̧ o'kajuiyünä̧, äwettä suronä̧ jȩo̧mȩnä̧ ma̧kuä̧chä̧tu̧ku̧ juiyäkua'anü̧.

¹² Isopäi'ünä̧ ujutumä̧, pi̧jä̧ ttü̧ja̧ jü̧'a̧nü̧ ttidepä'i̧nä̧, ttiwe'kiyu'i̧nä̧ kku̧nä̧rä̧tu̧ku̧mä̧ rowäwokotüjä̧, pärokua'aku ruwo we'ätuku, ttujuru kku̧nä̧rä̧tu̧ku̧, ja̧'wa̧ta̧nü̧ pi̧jä̧ttü̧ yo̧ä̧jä̧nä̧ we'ätuku, epíritu wotü suropätü mo̧ro̧jä̧nä̧ we'ätuku rowäwätüjä̧.

¹³ Ja̧'wa̧nü̧ ja̧'a̧ttü̧, Dio jäwä a̧bo̧i̧ya̧rü̧ ttoekuäkuäwä 'ka̧tä̧wi̧'ä̧tu̧kui̧, surojü 'kuäopü mo̧ro̧ kua̧mi̧ 'ki'ächi'ü ku̧ja̧kuä̧tu̧kuä̧kua̧'a̧nü̧, ja̧'wa̧nü̧ surojü o'kajuiyünä̧ 'kuä'opi'ü'kotümä̧ ma̧kuä̧chä̧tu̧kuo̧ka̧'a̧tä̧ tätukui.

¹⁴ Ja̧'wa̧ta̧nü̧ 'kiyünä̧, kuäkätukunä̧mä̧ jueü wȩnȩ'i̧nä̧, adiwomȩnä̧ jȩä̧kuä̧wä̧'i̧nä̧ 'chu̧ä̧rü̧nä̧ 'ka̧tä̧wi̧'ü̧ kka̧kuä̧tu̧kui̧.

¹⁵ Ja̧'wa̧ta̧nü̧ kui̧jä̧pi̧yä̧tu̧ku̧nä̧mä̧, kku̧nä̧wi̧'ä̧tu̧kui̧ wȩnȩ juiyünä̧ kkä̧kuä̧wä̧ wȩnȩ jikuäwätukua pä'ü.

¹⁶ Kkorottü'i̧nä̧ abonä̧nü̧ 'chu̧'ä̧rä̧tu̧kui̧, tta̧'kua̧ wȩnä̧rä̧kuä̧wä̧mä̧ escudo pättüjuei jä̧'i̧nü̧'a̧nü̧ tto̧ȩpä̧rä̧tu̧kua̧ku̧, äwettä iäro'ki okurä kuo'ki püdo'ki ppüäwomȩnä̧ na̧'ȩpü̧ kuikuätukuäkua'anü̧.

¹⁷ Ja̧'wa̧ta̧nü̧ ȩmä̧tu̧kui̧, surojüttü kki̧'ä̧kuä̧wä̧mä̧ ttünä̧ 'kiyäba ttu̧ju̧nä̧wa̧'a̧ jä̧'i̧nü̧'a̧nü̧ ja̧'wa̧ta̧nü̧ ȩmä̧tu̧kui̧ Dio i̧wȩnȩtä̧, jua̧u̧mä̧ Epíritu Sa̧tu̧ ukurodä jü̧nä̧.

¹⁸ 'Kuäopünä̧tä̧ Dio-rü ukuokuätukui: Epíritu-nä̧ ajuäkuäunü̧ jä'epätukui; ji̧nä̧yo̧mȩtȩnä̧, 'kuäkuächi'ätukuoka'a'i̧nä̧, kuä'i'ätukuoka'a'i̧nä̧ ukuokuätukui o'katoi'ünä̧ Dio ȩmi̧nä̧u̧ru̧mä̧.

¹⁹ Ja̧'wa̧ta̧nü̧ ttü chütü'kü'i̧nä̧ Dio-rü ukuokuätukui, yä̧wä̧i̧ jäwä jareü wȩnȩ jidäwa pä'ü chä yädepomȩnä̧ wo̧juȩku̧nä̧ jidäunä̧ Dio iyattü.

²⁰ Tu̧ru̧wa̧mä̧ weinä̧ku̧sä̧ kko̧ro̧jä̧ ttü̧ja̧sa̧ jü̧nä̧ pi̧yȩ wȩnȩ jidäwa pä'ü, ja̧'wa̧nü̧ jo̧mȩttü̧ kärenä̧ pü̧sä̧ jitämä̧. Dio-rütä jä'epätukui, jua̧u̧ ütü'kü yekuäkuäwä juiyünä̧ chujuruku jidäwäkua'anü̧.

²¹ Ttürü 'kuäopü'i̧nä̧, jȩchü̧'i̧nä̧ o'kajuiyünä̧ jiäwa pä'ü we'üsä ta̧wa̧ru̧wa̧ ti̧jä̧wa̧ repetäku Tíquico-rü, Tu̧ru̧wa̧ i̧wȩnȩ jueünä̧ adikuä i̧sa̧rü̧.

²² Jua̧u̧ru̧ we'üsä ujutu tütü'kü ku̧wo̧juä̧tu̧kua̧ pä'ü ja̧'wa̧ta̧nü̧ kua̧'kua̧ tta̧kuȩkuä̧tu̧ku̧ juiyünä̧ jiäwa pä'ü.

²³ Tu̧ru̧wa̧ Jesucrito'i̧nä̧, jä'o Dio'i̧nä̧ wȩnȩ juiyünä̧, eseäkuäu kkä̧kuä̧wä̧nä̧, ja̧'wa̧ta̧nü̧ tta̧'kua̧ wȩnä̧rä̧kuä̧wä̧ iyünä̧ ku̧jä̧tu̧kua̧ pä'üsä;

²⁴ Tu̧ru̧wa̧ ujuturu rȩrü̧jü̧ toinü̧, repeü beipokümä̧ ukutu o'katoi'ünä̧rü̧ kkü̧nä̧ ku̧jä̧tu̧kua̧ pä'üsä.