Efesios 5 - Nuevo Testamento Uwotjüja

¹ Dio i̧tti̧mü̧ kuätukua'attü, Dio jȩü̧mä̧ jȩpü̧ kka̧kuä̧tu̧kui̧.

² Eseäkuäutä kka̧kuä̧tu̧kui̧, Crito ujuturu esewinü̧ta'anü̧; ja̧'wa̧nü̧ repe'ümä̧, ujutu jäwänä̧ ofrenda jü̧nä̧, sacrificio jü̧nä̧, Dio-rü adiu a̧mȩu̧nä̧ iyäkuäwinü.

³ Ja̧'wa̧nü̧ ja̧'a̧nä̧, nä̧tü̧rü̧ jȩä̧'chä̧kuä̧wä̧mä̧, surojümä̧, o'kajuiyütä kkü'käwämä̧, ukutu jȩ'kuä̧tu̧kua̧'a̧ ukuowa pä'ümä̧ juiya'a, surojü jui'ätü kuätukua'attü.

⁴ Ja̧'wa̧ta̧nü̧ 'tärä wȩnȩ'i̧nä̧, suräjuä wȩnȩ'i̧nä̧; doriünä̧ 'tärä pä'chäkuäwä'i̧nä̧ kukuokuätukuoka'a, Dio-rütä esewätukui, kuätukunä̧mä̧.

⁵ Ja̧'wa̧ta̧nü̧ wo̧juä̧tü̧jä̧, ya̧tȩ ü'käwoka'a jȩpä̧'chü̧'i̧nä̧, surojünä̧ kkü̧'i̧nä̧, kkorojuei yaboku u̧ju̧nä̧ra̧ pä'ü'i̧nä̧, ttü̧ä̧nä̧wo̧tü̧rü̧ tätäwa'a esetü'i̧nä̧, Dio weomȩmä̧, Crito weomȩmä̧ do'ächokü jä̧kua̧.

Dio-rü ukuotü kkä̧kuä̧wä̧ wȩnȩ

⁶ Suräjuä wȩnȩnä̧ ttüyaparewa'anä̧ kuiyäwätukuä, isopäi'ünä̧ jua̧u̧ttü̧tä̧ ichäkua'a churutä ütäwe'ätürü Dio ü̧tä̧bo̧tü̧ wȩnȩmä̧.

⁷ Ja̧'wa̧nü̧ ja̧'a̧ttü̧, juätü jȩttü̧nä̧mä̧ ppä̧kuä̧chä̧rä̧tu̧kuä̧,

⁸ isopäi'ünä̧ ji̧yȩnü̧ mo̧ro̧mä̧ yo̧ü̧nä̧ kka̧kui̧nä̧tü̧jä̧, ja̧'wa̧nü̧ ja̧'a̧nä̧ jitämä̧, Tu̧ru̧wa̧nä̧mä̧ tȩya̧u̧ wotüjä̧; ja̧'wa̧nü̧ ja̧'a̧ttü̧ tȩya̧u̧ i̧tti̧mü̧ jü̧nä̧ kka̧kuä̧tu̧kui̧.

⁹ Isopäi'ünä̧ Epíritu u̧wä̧ju̧mä̧ o'kajuiyünä̧tä̧ rȩrü̧jü̧ topü kkä̧kuä̧wä̧tä̧, adiwomȩnä̧ jȩä̧kuä̧wä̧tä̧ ja̧'wa̧ta̧nü̧ jueü wȩnȩnä̧ kkä̧kuä̧wä̧tä̧ ja̧'a̧.

¹⁰ Pojopü topü, Tu̧ru̧wa̧rü̧ pä̧wä̧rü̧jü̧tä̧ jȩpü̧ kka̧kuä̧tu̧kui̧.

¹¹ Ja̧'wa̧ta̧nü̧ u̧wä̧juö̧ juiyü yo̧ü̧nä̧mä̧ ppä̧kuä̧chä̧rä̧, pärokua'aku, pä̧i̧ku̧nä̧ ya'okui'ütä ya'okui'i.

¹² Isopäi'ünä̧ juätü yä̧wä̧i̧nä̧ jȩttü̧mä̧, pättaja pä'ü'i̧nä̧ dä'ärü̧jü̧ tükü ja̧'a̧;

¹³ Ja̧'wa̧nü̧ ja̧'a̧nä̧, tȩya̧u̧ i̧jȩpü̧ ikuomȩnä̧mä̧ o'kajuiyünä̧tä̧ i̧jȩkuä̧cha̧'a̧, isopäi'ünä̧ tȩya̧u̧tä̧ ja̧'a̧ o'kajuiyünä̧ i̧jȩpü̧mä̧.

¹⁴ Ja̧'wa̧nü̧ ja̧'a̧ttü̧ pä'a: Ukú ä'ümä̧, porächi'i; ja̧'wa̧ta̧nü̧ wa'ü ikuinä̧tü̧ttü̧ ä̧rä̧mi̧'i̧, ja̧'wa̧nü̧ jȩ'kuo̧mȩnä̧ Crito i̧tȩjä̧dä̧kua̧jä̧.

¹⁵ Ja̧'wa̧nü̧ ja̧'a̧ttü̧, tta̧'ä̧rä̧kuä̧u̧ kkä̧wi̧; tta̧mü̧kuädü jui'ätü ttü̧jü̧'a̧nü̧mä̧ kkü̧jä̧, pärokua'aku amükuädätü ttü̧jü̧'a̧nü̧tä̧ kkä̧wi̧.

¹⁶ Jitä mo̧ro̧mä̧ adiutätä jȩpä̧tu̧kui̧, isopäi'ünä̧ mo̧ro̧mä̧ adiwokü ja̧'a̧.

¹⁷ Amükuädäkuäwä jui'ätü jȩttü̧'a̧nü̧mä̧ jȩ'kuä̧tu̧kuä̧; Dio-rü pä̧wä̧rü̧jü̧tä̧ amükuädü jȩpä̧tu̧kui̧.

¹⁸ Vino isoyattümä̧ tä̧kuä̧mä̧kuä̧wä̧tu̧kuä̧, juoyamä̧ ja̧'a̧tä̧ surojuoepoya; pärokua'attü Epíritu Sa̧tu̧ jäwätä jo̧mȩnü̧ kka̧kuä̧tu̧kui̧.

¹⁹ Salmos'i̧nä̧ ukuokutä, ra̧wä̧wä̧'i̧nä̧ ra̧'ü̧tä̧ eseunu̧ jȩpä̧tu̧kui̧; ra̧'ü̧ eseäkuäwätukui Tu̧ru̧wa̧rü̧mä̧ kua̧mi̧ iso'kitukunä̧.

²⁰ O'kajuiyünä̧tä̧ 'kuäopümä̧ Tä'o Dio-rü esewätukui, Tu̧ru̧wa̧ Jesucrito i̧mi̧nä̧.

Tti̧rȩkua̧mü̧ku̧ kkä̧kuä̧wä̧ wȩnȩ Ttirekuomü̧ ttütü'kü

²¹ Dio-rü ukuotätümä̧, jikuäkuäwätukumä̧ ukuotäkuäu kka̧kuä̧tu̧kui̧.

²² Tu̧ru̧wa̧rü̧ kukuotätukuta'anü̧, kuirekuotukurumä̧ ukuotätukui.

²³ Isopäi'ünä̧ kkirekuomä̧, isaju kku ja̧'a̧, Crito-rü igresia u jä̧'i̧jü̧'a̧nü̧. Ja̧'wa̧ta̧nü̧ jättäpäyotürü ra̧wä̧pi̧jü̧ttü̧ ppä'ädümä̧ jua̧u̧ Crito-tä ja̧'a̧.

²⁴ Ja̧'wa̧nü̧ igresia isotü Crito-rü ttukuotüta'anü̧, tti̧rȩkua̧mü̧mä̧ ttirekuorü ttukuota pä'ü ja̧'a̧.

²⁵ Ttirekuomü̧mä̧, kuirekuamü̧tu̧ku̧ru̧ eseunu̧ repe'ätukui, Crito igresia-rü eseu repe'ü a̧'kua̧rü̧ iyäwinü̧ta̧'a̧nü̧.

²⁶ Surojü juiyünä̧tä̧ 'kȩ'ȩpü̧ kku̧ni̧nü̧ igresia-rü, ajiyanä̧ aje i'ü tükü iku, chutä i̧wȩnȩ päomȩnä̧.

²⁷ Ja̧'wa̧ta̧nü̧ igresia-rümä̧ tȩya̧u̧nä̧tä̧ kkȩdȩpü̧nä̧ jȩpü̧ iku; Idikuomȩ'i̧nä̧, yü'kiwä jü̧'i̧nä̧, kkoro surojümä̧ juiyünä̧tä̧ jȩpü̧ iku ȩmi̧nü̧.

²⁸ Ja̧'wa̧nü̧ ji̧nü̧ta'anü̧ ubomä̧ irekuarü repeü'anü̧ ja̧'a̧, chutä a̧mü̧nä̧ repeäkuäuta'anü̧. Irekuarü eseu repe'ümä̧ chutä a̧mü̧nä̧ pa̧ja̧tü̧ repe'äkuäu.

²⁹ Isopäi'ünä̧ ya̧tȩ'i̧nä̧ chutä a̧mü̧nä̧ pa̧ja̧tü̧ idepä a̧mi̧suru topäkuäumä̧ toa'a, pärokua'aku u̧kuȩ kuä̧nü̧tä̧ tta̧'ä̧rä̧kuä̧u̧, Crito'i̧nä̧ igresia isotürü tta̧wä̧rü̧ta'anü̧,

³⁰ Isopäi'ünä̧ ujutu yotukunä̧mä̧, Crito jä̧ttä̧pä̧ya̧rü̧ todepätüjä̧.

³¹ Ja̧'wa̧nü̧ ja̧'a̧ttü̧ ubomä̧, jä'ottü'i̧nä̧, ja̧ju̧ttu̧'i̧nä̧, 'kȩ'i̧pä̧chü̧ irekuaku ppächi̧'ä̧kua̧, ja̧'wa̧nü̧ jo̧mȩnä̧ ta̧ju̧kuäyotü ttidepänä̧ ji̧nä̧ ji̧yȩtȩ pätti'akuotü.

³² Pi̧yȩmä̧ rü̧ȩnä̧ jeruwuö wȩnȩ ja̧'a̧nä̧, Crito ütü'kütä, igresia ütü'kütä ukuokusä.

³³ Kkoromä̧ ja̧'a̧nä̧, yotukunä̧ repe'ätukui kuirekuamü̧tu̧ku̧ru̧, kua̧mü̧nä̧ pa̧ja̧tü̧ repekuäwätukuta'anü̧, ja̧'wa̧ta̧nü̧ nä̧tü̧mä̧ kuirekuorü ukuotätukui.