Efesios 4 - Nuevo Testamento Uwotjüja

Ji̧nä̧ ji̧yȩtȩnä̧tä̧ kkä̧kuä̧wä̧ wȩnȩ

¹ Ttü Tu̧ru̧wa̧ jäwänä̧ kärenä̧ pä̧nü̧ kkä̧nü̧, ukuturu jä'epüsä, Dio ukuturu woina̧'a̧ku̧, ukuotü ku̧ja̧kuä̧tu̧kua̧ pä'üsä.

² Ukuo tekuäwätukuoka'a, kurowäwätukuoka'a, kua̧mi̧ 'ki'ächi'ü, eseunu̧ repe'äkuäu ppä'ädäkuäwätukui;

³ Epíritu jäwä ji̧yȩtȩnä̧tä̧ 'chu̧'ä̧rä̧kuä̧wä̧tu̧kui̧, wȩnȩ juiyünä̧ kkä̧nü̧.

⁴ Ji̧nä̧ ya̧tȩ jäwänä̧tä̧ ja̧'wa̧ta̧nü̧ Epíritu'i̧nä̧ ji̧nä̧ ya̧tȩnä̧tä̧, yo̧mȩtȩnä̧ a̧mü̧kuä̧rü̧ kkä̧kuä̧wä̧nä̧ woina̧'a̧ku̧tä̧ kka̧kuä̧tu̧kui̧;

⁵ ja̧'wa̧ta̧nü̧ Tu̧ru̧wa̧mä̧ ji̧nä̧ya̧tȩtä̧ ja̧'a̧, tta̧'kua̧ wȩnä̧rä̧kuä̧wä̧'i̧nä̧ ji̧nä̧ ji̧yȩtȩtä̧ ja̧'a̧, bautizo jȩä̧kuä̧wä̧'i̧nä̧ ji̧yȩtȩtä̧ ja̧'a̧;

⁶ Dio'i̧nä̧ ji̧nä̧ ya̧tȩtä̧ ja̧'a̧, jua̧u̧mä̧ o'katoi'ünä̧ ttä'o ja̧'a̧, o'katoi'ünä̧tä̧ ttu̧wä̧mȩnä̧ wa̧, o'katoi'ünä̧rü̧ ppä'ädü ja̧'wa̧ta̧nü̧ o'katoi'ünä̧tä̧ kkü̧ ja̧'a̧.

⁷ Ujutu yotukunä̧rü̧mä̧ iyäwi'inä̧u̧jä̧ Dio jäwä, Crito mippoünä̧ iya päinü̧'a̧kuä̧.

⁸ Ja̧'wa̧nü̧ ja̧'a̧ttü̧, wȩyu̧kuä̧ wȩnȩmä̧ pä'a: Mo̧ro̧jä̧ra̧'a̧ kä'ekuächümä̧, kärenä̧ pȩjä̧tü̧rü̧ ȩmi̧pi̧nü̧ ja̧'wa̧nü̧ jȩpü̧ ttü̧ja̧rü̧mä̧ jȩttü̧'a̧nü̧ jü̧ iyinü̧.

⁹ ¿Toku pä'ü, kä'ekuächinü̧ pä'ajä̧ttü̧? jua'amä̧ pi̧jä̧nä̧ttü̧, ji̧nä̧so täkuomȩra̧'a̧bü päi'ünä̧ mȩyȩwi̧nü̧ pä'ü pä'a.

¹⁰ Jua̧u̧ mȩyȩwi̧nü̧mä̧, jua̧u̧tä̧ ja̧'a̧ mo̧ro̧jä̧ttü̧ o'kajuiyünä̧ wä̧mȩnä̧ 'cha'ächi'inü̧mä̧, o'kajuiyünä̧ su̧'pȩnü̧ päi'ünä̧ jȩa̧ pä'ü.

¹¹ Jua̧u̧tä̧ ji̧na̧'a̧, jȩttü̧'a̧nü̧ jü̧ iyinü̧mä̧, yotüterümä̧ apótore tta pä'ü'i̧nä̧, kkorotürümä̧ profetas tta pä'ü'i̧nä̧; kkorotürümä̧ jareü wȩnȩ jiäkuäwä isotü tta pä'ü'i̧nä̧; kkorotürümä̧ patóre tta pä'ü'i̧nä̧ ja̧'wa̧ta̧nü̧ kkorotürümä̧ wo̧juȩkuä̧ isotü tta pä'ü'i̧nä̧, jü̧nä̧.

¹² Jua'amä̧ I̧tti̧mü̧ juo'ächinä̧tü̧rü̧ jo̧mȩnü̧ juottepa pä'ü, ttaditäwä jo̧mȩnü̧ ttadita pä'ü, ja̧'wa̧nü̧ jȩpü̧ igresia wotürü ttäräbe'a pä'ü.

¹³ O'katoi'ünä̧ ji̧nä̧ ji̧yȩtȩnä̧tä̧ ta̧'kua̧ tu̧wȩnä̧ro̧mȩbü päi'ünä̧ ti̧rȩbȩwi̧'ü̧nä̧ ja̧'wa̧ta̧nü̧ Dio i̧tti̧rü̧ tu̧wo̧juä̧chi̧'ü̧nä̧tä̧ päi'ünä̧, ttü̧ja̧sa̧ surojü jui̧'a̧rü̧, Crito jü̧ta̧'a̧nü̧ jo̧mȩnü̧ tä̧mü̧ juota pä'ü.

¹⁴ Ja̧'wa̧nü̧ jo̧mȩnä̧mä̧ ppo̧'ä̧tü̧ tta̧mi̧ 'kuä'ätü jä̧'i̧nü̧'a̧nü̧, kkoro ttu̧wo̧juȩtü̧ jü̧'a̧kuä̧mä̧ kue'ächü kko̧ko̧tü̧ täkuotüjä̧. Pi̧jä̧ ttü̧ja̧ tta̧mü̧kuäda'aku ma̧ttä̧chü̧nä̧ jȩpä̧'chä̧tü̧ku̧mä̧.

¹⁵ Pärokua'aku, jueü wȩnȩnä̧ eseäkuäu kkä̧nü̧, tä̧mü̧ juotätukua o'kajuiyünä̧tä̧, Crito-mä̧ u wa̧ ja̧'a̧ttü̧.

¹⁶ Crito-tä ja̧'a̧, igresia isotü yotukunä̧rü̧ ka̧ka̧tü̧mä̧, ttaditäwä jü̧'a̧kuä̧, ja̧'wa̧nü̧ jȩa̧'a̧ttü̧ yo̧mȩtȩnä̧ ttaditünä̧ jȩpü̧ jua̧u̧mä̧, igresia isotü yaboku eseäkuäu kkä̧nü̧ ttä̧rä̧mü̧nä̧.

Crito-nä̧ jareünä̧ kkä̧kuä̧wä̧ wȩnȩ

¹⁷ Ja̧'wa̧nü̧ ja̧'a̧ttü̧ ukuturu pä'üsä, Tu̧ru̧wa̧ i̧mi̧nä̧ jä'epünü̧: täkü, ukutumä̧ Dio-rü esetokotü ttü̧jü̧'a̧nü̧mä̧ ku̧ja̧kuä̧tu̧kuä̧, juätümä̧ ttamu̧kuäda'akutä surojü jȩpü̧ kka̧kuä̧tü̧,

¹⁸ Juätümä̧ tta̧mü̧kuädü'i̧nä̧ yo̧ä̧chä̧chi̧nä̧u̧, Dio jäwä a̧'kua̧rä̧kuä̧wä̧ttü̧mä̧ otó wotü, yoriso jerupü tta̧mi̧ 'kittädäkuäwina̧'a̧ttü̧.

¹⁹ Juätümä̧, dä'ärü̧jü̧'i̧nä̧ toepächinä̧u̧, ttidepä kkü'kekunä̧tä̧ iyäkuäu ikuinä̧tü̧ ja̧'wa̧ta̧nü̧ surojümä̧ yabokutä jȩpü̧ kka̧kuä̧tü̧.

²⁰ Ja̧'wa̧nü̧ ja̧'a̧nä̧, jua̧u̧mä̧kü̧ ja̧'a̧ ukutu Crito-ttü ku̧wo̧jui̧'i̧nä̧tu̧ku̧mä̧,

²¹ isopäi'ünä̧ ukutumä̧ ä̧ju̧kui̧nä̧tü̧jä̧ Jua̧u̧ ütü'kümä̧ ja̧'wa̧ta̧nü̧ wo̧juä̧tü̧jä̧ jua̧u̧ weünä̧ kkä̧kuä̧wä̧, Jesú u̧wo̧juȩti̧nü̧mä̧.

²² Ja̧'wa̧nü̧ ja̧'a̧ttü̧, ä̧kuo̧mȩnä̧ jȩpü̧ ku̧ja̧kui̧nä̧tu̧ku̧ttü̧mä̧ kko̧'ä̧dä̧kuä̧u̧ ikuätukui, surojü yapare wea'akumä jȩpü̧ ku̧ja̧kuä̧tu̧ku̧mä̧.

²³ Kuamükuädätukuttü, epíritu-nä̧ pärowächätukui,

²⁴ ja̧'wa̧ta̧nü̧ ttü̧ja̧sa̧ ja̧rȩpa̧nä̧ pärowächätukui, Dio uwäbe'inä̧ku̧nä̧, surojü jui̧'a̧nä̧, jueü wȩnȩnä̧ kkä̧kuä̧wä̧ i̧sa̧nä̧.

Jitä kkä̧kuä̧wä̧ wȩnȩ

²⁵ Ja̧'wa̧nü̧ ja̧'a̧ttü̧, yapare wȩnȩmä̧ ikuipü, jueü wȩnȩtä̧ ukuokuätukui kuawaruwätukurumä̧; isopäi'ünä̧ ji̧nä̧ ji̧yȩtȩ isotü jü̧nä̧ tütodewa'attü.

²⁶ Jua'akumä̧ ku̧ra̧wä̧ri̧'ä̧tu̧kua̧'a̧nä̧, jua̧u̧ surojuoepünä̧mä̧ jȩ'kuä̧tu̧kuä̧; ku̧'ä̧i̧tu̧ku̧mä̧ mo̧ro̧ 'kuäo'ünä̧mä̧ 'chu̧ä̧rü̧ juiyünä̧ kka̧kuä̧tu̧kui̧.

²⁷ Ja̧'wa̧ta̧nü̧ äwettä kka̧kuä̧mȩ'ü̧ toünä̧mä̧ kuiyä'wätukuärü.

²⁸ Nä̧u̧kuä̧rü̧ kki̧'ȩnü̧mä̧, yabonü̧mä̧ ku̧nä̧u̧kuä̧rä̧, aditütä kkä̧wi̧; ku̧mü̧nä̧ adiwä juei jȩpü̧ ku̧ju̧ttü̧mä̧, rekuä rü̧jä̧u̧ru̧ ppäkuädäkua̧jä̧.

²⁹ Surojümä̧ kukuokuä, pärokua'aku adiwäjuei ppädütä ukuokuätukui, ä̧ju̧kuä̧rä̧tü̧rü̧ ppädomȩnä̧.

³⁰ Epíritu Sa̧tu̧rü̧ a̧'kua̧ tta̧wȩpü̧nä̧mä̧ jȩ'kuä̧tu̧kuä̧, jua̧u̧nä̧tä̧ sello tatta'a jä̧'i̧nü̧'a̧nü̧ jȩpü̧ u̧ju̧ni̧nä̧u̧jä̧, ji̧yȩnü̧ mo̧ro̧ surojüttü rä'epü ikuomȩnä̧ u̧wo̧jua̧ pä'ü.

³¹ Ikuäwi'ätukui kurowetuku'i̧nä̧, ku̧'ä̧i̧tu̧ku̧'i̧nä̧, suronä̧ wo'kuäkuäwätuku'i̧nä̧, ja̧'wa̧ta̧nü̧ surojüttümä̧ o'kajuiyütä.

³² Pärokua'aku, rettü ppä'ädütä, mikuä suronä̧ päkuätukuoka'a unichi'ütä, suronä̧ jȩ'kuä̧'i̧jä̧tu̧ku̧ u̧ni̧chi'ü, Dio Crito-nä̧ unichi'inüta'anü̧ jȩpü̧ kka̧kuä̧tu̧kui̧ ukutu'i̧nä̧.